ಯೋಹಾನನು ಬರೆದ ಎರಡನೆಯ ಪತ್ರಿಕೆ
ಯೋಹಾನನೆ ಲೀಖ್ಯೋತೆ ಬೇನಿ ಚಿಟ್ಟಿ
ಮಾಲುಮ್ ಕರಾನು
ಯೋಹಾನನೆ ಲೀಖ್ಯೋತೆ ಬೇನೆ ಚಿಟ್ಟಿನ ಅಪೊಸ್ತಲ ಯೋಹಾನನೆ ಕ್ರಿಸ್ತನ ಪೈದಾಖ್ಹ್‌ನ ವಾರ್ 50 ಅಜು಼ 100 ವರಖ್ಹ್‌ನಿ ಬೀಚ್ಮ ಲೀಖಿರಾಖ್ಯೊಸ್. ಯೋಹಾನನೆ ಆ ಚಿಟ್ಟಿನೊ ಲೀಖಾಪಟ್‍ವಾಳೊ ಹುಯಿರೊಸ್ಕರಿ ಮಾಲುಮ್ ಕೊಹುವಾನಿ. ಅನಬದಲ್ ಇನುಯೋಸ್ ಏಕ್‌ ಗಲ್‌ಢೊಕರಿ ಬೋಲಿಲೇಸ್. 1:2 ಯೋಹಾನನೆ ಇನುಯೋಸ್, ಯೋಹಾನನೆ ಲೀಖ್ಯೋತೆ ಸುವಾರ್ತೆನಿ ಚಿಟ್ಟೀಮ ದೆಖಾವತೆ ಸಮಾಚಾರಸ್ ಖನ್ನೆ ದೇಖಾವಸ್. ಏಕ್‌ನ ಏಕ್‌ ಪ್ಯಾರ್ ಕರೊಕರಿ ಬೋಲಾನಿತರಸ್ ಯೇಸುನೆ ಚಾಲಿಲೀದೊ ಕರಿ ಬೋಲಾನಿ ಬಾರೇನಿ ತರೀಖಾಮ ದೇಖವಸ್ 1:5-6ಯೋಹಾನ 15:9-10 ಯೋಹಾನನೆ ಲೀಖ್ಯೋತೆ ಸುವಾರ್ತೆ ಅಜು಼ ಇನಿ ತೀನ್ನಿ ಚಿಟ್ಟಿ ಹುಯಿರೀತೆ ಏಕ್‌ನಿ, ಬೇನಿ, ಅಜು಼ ತೀನ್ನಿ ಯೋಹಾನ್ನಿ ಚಿಟ್ಟಿನ ಯೋ ಎಫೆಸಮ ಜಿವ್ಣುಕರುಕರ ತದೆ ಇನೇಸ್‌ ಆ ಚಿಟ್ಟಿನ ಲೀಖಿರಾಖ್ಯೊಸ್‌ಕರಿ ವಿಶ್ವಾಸ್ ಕರೆಜಾ಼ಯ್.
ಯೋಹಾನನೆ ಆ ಚಿಟ್ಟಿನ ಚು಼ಣೈಲಿದೇತೆ ತಯೇಡ ಅಜು಼ ಇನ ಲಡ್ಕಾವ್‌ನಿ ಬಾರೇಮ ಲೀಖಿರಾಖ್ಯೊಸ್. ಆ ವಾತೆನ ಸಬೇನಿ ಬಾರೇಮ ಲೀಖಿರಾಖ್ಯೊಸ್. ಸಬೆನ ಝೂ಼ಟಿ ಬೋಧಕರ್‌ನಿ ಬಾರೇಮ ಝೇತಾವನು ಅಜು಼ ಹುಮ್ಮಖ್ಹ್ ದ್ಯವಾನಿ ಖ್ಹೂಜ಼್‍ಥಿ ಆ ಚಿಟ್ಟಿನ ಲೀಖಿರಾಖ್ಯೊಸ್.
ಕಾಡಿದೇಖೊ
1. ಯೋಹಾನನೆ ಪಢಾವಾಳಾನ ಖ್ಹಲಾಮ್‌ಕರಾನಿ ಜೋ಼ಡ್ಮ ಅಜು಼ ಆ ಕಿನ ಲೀಖೈರುಸ್ ಕರಿ ಬೋಲ್ತೊಹುಯಿನ್ ಚಿಟ್ಟಿನ ಮಾಲುಮ್ ಕರಾವಸ್1:1-3
2. ಇನಕೇಡೆಥು ಇನೆ ಸಬೆನ ಹುಮ್ಮಖ್ಹ್ ದೇಸ್ ಅಜು಼ ಮಹಾನ್ ಹುಕುಮ್‌ನ ಇವ್ಣುನ ಖ್ಹಯಾಲ್ ಕರೈದೇಸ್ 1:4-6
3. ಬಾದ್ಮ ಯೊ ಝೂ಼ಟಿ ಬೋಧನೆ ಕರವಾಳನಿ ವಿರೋದ್ ಇವ್ಣುನ ಝೇತಾವಸ್1:7-11
4. ಯೋಹಾನನೆ ಯೊ ಜಿವ್ಣುಕರುಕರಾತೆ ಝ಼ಗೋನಿ ಸಬೆನ ವಿಶ್ವಾಸಿನ ಖ್ಹಲಾಮ್ ಕರ್ತೊಹುಯಿನ್ ಚಿಟ್ಟಿನ ಖ್ಹರ್ತಿಕರಸ್1:12-13
1
1 ಸಬೇನೊ ಶಾಣಾವ್‍ಮಾಥೊ ಏಕ್‍ಜ಼ಣೊ ಹುಯಿರ‍್ಹೋತೆ ಮೆ ದೇವ್ನೆ ಚೂ಼ಣಿರಾಖ್ಯುತೆ ಖ್ಹಾಚ ಪ್ಯಾರ್‌ನಿ ಭೇನೆನಾಬಿ ಇನ ಲಡ್ಕಾನಾಬಿ ಲೀಖುಕರುಸ್ತೆ ಶಾತ್‍ಕತೊ;
2 ಅಪ್ಣಾಮ ಜ಼ಡ್‍ಗಾಠಿಛಾ಼ತೆ ಅಜು಼ ಕದೇಬಿ ಅಪ್ಣ ಜೋ಼ಡೆ ಛೇತೆ ಖ್ಹಾಚ಼ನಖ್ಹಾಜೆ, ಮೆ ತುಮುನ ಖ್ಹಾಚಮಾಬಿ ಪ್ಯಾರ್‌ಕರೂಸ್. ಮೇಸ್ ಕಾಹೆತೆ ಖ್ಹಾಚಿನ ಪ್ಯಾರ್‌ಕರವಾಳು ಖ್ಹಾರುಸ್ ತುಮುನ ಪ್ಯಾರ್‌ಕರಾಸ್‌.
3 ಬಾ ಹುಯಿರ‍್ಹೋತೆ ದೇವ್‌ಥಿಬಿ, ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಯೇಸು ಕ್ರಿಸ್ತಥಿ, ವಾರ್‌ಖ್ಹೊಬಿ, ಗೋರ್‌ಬಿ, ಶಾಂತಿಬಿ, ಖ್ಹಾಚಿಬಿ, ಪ್ಯಾರ್‌ಬಿ ಅಪ್ಣ ಜೋ಼ಡೆ ಹರ್‌ಹಮೇಶ ರ‍್ಹವಾದೆ.
ಖ್ಹಾಚಿ ಅಜು಼ ಪ್ಯಾರ್
4 ಬಾಥಿ ಅಪ್ಣೆ ಲೀಲಿದಾತೆ ಹುಕುಮ್‍ನಿತರ ತುಮಾರ ಲಡ್ಕಾಮ ಥೋಡುಜ಼ಣು ಖ್ಹಾಚಿ ವಾಟ್‌ಪರ್ ಚಾ಼ಲುಕರಸ್ತೆ ದೇಖಿನ್ ಮನ ಘಣು ಖ್ಹುಶಿ ಹುಯು.
5 ಆಯಾವೊ, ಮೆ ನವಿ ಹುಕುಮ್‌ನ ಲೀಖುಕರುಕೊಂತೆ ಪಹಿಲೆಥೀಸ್‍ ಛಾ಼ತೆ ಹುಕುಮ್‍ನಾಸ್‍ ಲಿಖಾವಾಳೊ ಹುಯಿರೋಸ್. ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರವಾಳ ಹುಯಿರ‍್ಹಿಯೆಕರಿ ತುಮಾರಮ ಬೋಲಿಲೇವುಸ್.
6 ದೇವ್ನಿ ಹುಕುಮ್ ಲೀನ್ ವಿಧೇಯ ಹುಯಿನ್ ಚಾ಼ಲಾನುಸ್ ಪ್ಯಾರ್ ಹುಯಿರುಸ್. ಪ್ಯಾರ್‌ಮ ಚಾ಼ಲ್ನುಸ್‍ಕರಿ, ತುಮೆ ಪಹಿಲೆಥುಬಿ ಖ್ಹಮ್‍ಜ್ಯಾತೆ ಹುಕುಮ್ ಹುಯಿರಿಸ್. ತುಮೆ ಖ್ಹಾರು ಪ್ಯಾರ್‌ಮಾಸ್ ಜಿವವಾಳ ಹುಯಿರ‍್ಹೇಣು.
7 ಶನಕತೊ, ಯೇಸುಕ್ರಿಸ್ತ ಅದ್ಮಿಹುಯಿನ್ ಆಯೊ ಕರಿ ಮಾನಿಲೆಯಿಕೊಂತೆ ಕೆತ್ರುಕ್ಕಿ ಠಗಾರುಖ್ಹಾರು ಜಗತ್‌ಮ ಅಯಿಗು ಅಥ್ರಾನವಾಳುಸ್ ಯೇಸುನ ಮಾನಿಲೆಯಿಕೊಂತೆ ಠಗಾರುಖ್ಹಾರು, ಕ್ರಿಸ್ತವಿರೋದಿ ಖ್ಹಾರು ಹುಯಿರುಸ್.
8 ತುಮೆ ಖ್ಹತಾಪ್ಣಿಥಿ ಕಮೈರಾಖ್ಯಸ್ತೆ ನಾ ಗುಮೈಲೆವ್ಣುತೆ ಪೂರ ಫಾಯಿದಾನ ಲೀಲ್ಯಾವನಟೇಕೆ ಹೊಷಾರ್‌ ಹುವೊ.
9 ಕ್ರಿಸ್ತನಿ ಉಪದೇಶ್‍ಮ ನಾರ‍್ಹೀನ್ ಇನ ಮಿತ್‌ಮೀರಿನ್ ಜಾವಾಳಮ ದೇವ್ ಕೊರ‍್ಹೇಯಿನಿ. ಯೊ ಉಪದೇಶ್‍ಮ ಜ಼ಡ್‍ಗಾಠಿನ್ ರ‍್ಹಾವವಾಳಮ ಬಾನಿಬಿ ಛಿಯ್ಯಾನಿಬಿ ಜೋ಼ಡೆ ಗಳ್‍ಜೋ಼ಡ್ ರ‍್ಹಿಶೆ.
10 ಆ ಬೋಧನೆನ ಝಿಟ್ಕಾರವಾಳು ಕೋಣ್‌ಬಿ ತುಮಾರಕನ ಆಯುತೊ ಇವ್ಣುನ ತುಮಾರ ಘರ್‌ಮ ಬುಲಾವೊನಕೊ. ಇವ್ಣುನ ಅಛ್ಛು಼ ಹುವಾದೆ ಕರಿಬಿ ನಕೊ ಬೋಲೊ.
11 ಶನಕತೊ, ಇವ್ಣುನ ಅಛ್ಛು಼ ಹುವಾದೆ ಕರಿ ಬೋಲವಾಳೊ ಇವ್ಣ ಖರಾಬ್ ಕಾಮ್ಮ ಭಾಗ್‌ಲ್ಯಾವಾಳು ಹುಯಿರ‍್ಹಿಶೆ.
ಖ್ಹರ್ತಿನಿ ಖ್ಹಲಾಮ್
12 ಮೇ ತುಮುನ ಬೋಲಾನು ಘಣುಛೆ. ಮೇ ಇಂಕ್‍ಥಿ ಕಾಗತ್‌ಪರ್ ಲೀಖಿನ್ ಖ್ಹಮ್‌ಜಾ಼ಡನ ಇಷ್ಟಕೊಯ್ನಿ. ಕತೋಬಿ ಮೇಸ್ ತುಮಾರಕನ ಐನ್, ತುಮಾರಿಜೋ಼ಡೆ ಆಮಖ್ಹಾಮೆ ವಾತೆ ಬೋಲಾನ ಆಖ್ಹ್‌ ಕರುಸ್. ತದೆ ತುಮಾರಿ ಖ್ಹುಶಿ ಭರ್‌ಪೂರ್‌ ಉಷೆ.
13 ದೇವ್ನೆ ಚೂ಼ಣ್ಯೋತೆ ತುಮಾರಿ ಪ್ಯಾರ್‌ನಿ ಭೇನೆನ ಲಡ್ಕಾ ತುಮುನ ಧನ್ಯವಾದ್ ಬೋಲುಕರಸ್.