1 ಯೋಹಾನನು ಬರೆದ ಮೊದಲನೆಯ ಪತ್ರಿಕೆ
ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟಿ
ಮಾಲುಮ್ ಕರಾನು
ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟಿ ಅಪೊಸ್ತಲ ಯೋಹಾನನೆ ಕ್ರಿಸ್ತನು ಪೈದಾಖ್ಹ್‌ನ ವಾರ್ 50 ಅಜು಼ 100 ವರಖ್ಹ್‌ನ ಬೀಚ್ಮ ಲೀಖಿರಾಖ್ಯೊಸ್. ಯೋಹಾನನೆ ಯೋಸ್ ಲೀಖವಾಳೊಕರಿ ವತಾಳಿರಾಖ್ಯೊ ಕೊಯ್ನಿ ಕತೋಬಿ ಪಹಿಲ ಅದ್ಯಾಯಮ ಯೋ ಯೇಸುನು ಜಿವ್ಣು ಅಜು಼ ಮರಿನ್‌ ಉಠ್ಯೊತೆ ಡೋಳೆಖ್ಹು ದೆಖ್ಯೊತೆ ಸಾಕ್ಷಿಹುಯಿರ‍್ಹೊಸ್ ಕರಿ ವತಾಳಿದೇಸ್. ಯೋಹಾನನೆ ಲೀಖ್ಯೋತೆ ಪಹಿಲಿ ಚಿಟ್ಟೀಮ ಲೀಖಿರಾಖನು ತರೀಕ ಯೋಹಾನನೆ ಲೀಖ್ಯೋತೆ ಸುವಾರ್ತೆನು ಲೀಖ್ಯಾನ ಘಣು ಖನ್ನೆಛಾ಼ ಯೋಹಾನನೆ ಲೀಖ್ಯೋತೆ ಸುವಾರ್ತೆ ಯೋಹಾನನೆಸ್ ಲೀಖಿರಾಖ್ಯೊಸ್ ಕರಿ ವಿಶ್ವಾಸ್ ಕರಸ್. ಅಜು಼ ಯೋಹಾನನೆ ಲೀಖ್ಯೋತೆ ಏಕ್‌ನಿ ಚಿಟ್ಟಿ, ಬೇನಿ ಚಿಟ್ಟಿ ಅಜು಼ ತೀನ್ನಿ ಚಿಟ್ಟಿಬಿ ಜಿನು ಇನೆ ಎಫೆಸಮ ಜಿವ್ಣುಕರುಕರಾನಿ ವಖ್ಹ್‌ತೆ ಲೀಖಿರಾಖ್ಯೊಸ್ ಕರಿ ವಿಶ್ವಾಸ್ ಕರಸ್.
ಯೋಹಾನನೆ ದೇವ್‌ಮ ವಿಶ್ವಾಸ್‌ಕೊಂತೆ ಬೋಲಾವಸ್ತೆ ಕರಿ ಅದ್ಮಿನು ಝೂ಼ಂಡ್‌ಥಿ ತಕ್ಲಿಬ್‌ಮ ರ‍್ಹವಾನಿವಖ್ಹ್‌ತೆ ಅಖ್ಖಾಸ್ ಕ್ರಿಸ್ತ ವಿಶ್ವಾಸಿನಖ್ಹಾಜೆ ಆ ಚಿಟ್ಟಿ ಲೀಖ್ಯೊ. ಆ ಅದ್ಮಿ ಯೇಸು ಭರ್‌ಪೂರ್‌ಥಿ ದೇವ್ ಹುಯಿರ‍್ಹೊಸ್‌ಕರಿ ಕತೋಬಿ ಜ಼ಮೀನ್‌ಪರ್ ಯೋರ‍್ಹವಾನಿ ವಖ್ಹ್‌ತೆ ಲ್ಹೋಯಿಥಿ ಬೋಟೀಥಿ ಅದ್ಮಿನ ಶರೀರ್‌ನ ಲೀರಾಖ್ಯೊಸ್ತೆ ಖ್ಹಾಚ ಕಾಹೆಕರಿ ವಿಶ್ವಾಸ್ ಕರಿರಾಖ್ಯುಥು ಅನಖ್ಹಾಜೆ ಯೋಹಾನನೆ ಯೇಸುನು ಜಿವ್ಣು ಅಜು಼ ಇನ ಶೊಂತ್‌ ಹಾತೇಖ್ಹು ಇನ ಮೂಚಿರಾಖನು ಏಕ್‌ ಡೋಳೆಖ್ಹು ದೇಖಾನಿತರನು ಸಾಕ್ಷಿ ಹುಯಿರ‍್ಹಾವನಿ ಬಾರೇಮ ಲೀಖಸ್. 1:1-3 ಯೋಹಾನ ಆ ಚಿಟ್ಟಿ ಲೀಖಾನಿ ಉದ್ದೇಶ್ ಶಾತ್‌ಕತೊ ಇನು ಶಂತೋಖ್ಹ್‌ನ ಭರ್‌ಪೂರ್‌ ಕರಸ್. 1 ಯೋಹಾನ 1:4 ವಿಶ್ವಾಸಿನ ಪಾಪ್‌ಕರಾಥಿ ದೂರ್‌ರಾಖಸ್‌. 1 ಯೋಹಾನ 2:1, ಝೂ಼ಟಿ ಬೋಧನೆಥಿ ವಿಶ್ವಾಸಿಖ್ಹಾರನ ಬಚಾ಼ಡಸ್.1 ಯೋಹಾನ 2:26 ಅಜು಼ ಇವ್ಣೆ ಬಚಿಗಯ ಕರಿ ವಿಶ್ವಾಸಿಯೇವ್ನ ಖ್ಹಯಾಲ್ಮ ಲ್ಯಾವಾನು ಹುಯಿರ‍್ಹುಥು 5:13
ಕಾಡಿದೇಖೊ
1. ಯೋಹಾನ ಇನು ಬಾರೇಮ ಬೋಲಿಲೆಸ್. ಅಜು಼ ಆ ಚಿಟ್ಟಿನ ಲೀಖಾನ ಏಕ್‌ ಉದ್ದೇಶ್ ಛಾ಼ಕರಿ ಬೋಲಸ್. 1 ಯೋಹಾನ 1:4
2. ಇನಕೇಡೆಥು ಇನೆ ದೇವ್ ಕಿಮ್ ಉಜಾ಼ಳು ಹುಯಿರ‍್ಹೊಸ್. ಅಜು಼ ಅಪ್ಣೆ ಯೇಸುನೆ ಜಿವ್ಣು ಕರ‍್ಯೊತೆ ಇಮ್ಮಸ್ ಜಿವ್ಣು ಕರ್ನುಕರಿ ಬೋಲಾನು ಬಾರೇಮ ಬೋಲಿವತಾಳಸ್. 1:5—3:10
3. ಇನಕೇಡೆಥು ಇನೆ ಏಕ್‌ಥಿ ಏಕ್‌ ಪ್ಯಾರ್ ಕರ್ನುಕರಿ ಹುಕುಮ್‌ನ ಯಾದ್ ಕರಾವಸ್. 3:11—5:12
4. ಇನೆ ಇನು ಬಾರೇಮ ಖತಮ್ ಕರಸ್.5:13-21
1
ಜಾನ್ನಿ ವಚನ್
1 ತುಮೆ ಖ್ಹಮ್‌ಜು಼ಕರಸ್ತೆ ಜಾನ್ನಿ ವಚನ್ ಶುರುವಾಥೂಸ್ ಛಾ಼ತೆ. ಇನ ಕಾನ್‍ಥಿ ಖ್ಹಮ್‍ಜಿರಾಖ್ಯಸ್; ಡೋಳೆಖ್ಹು ದೇಖಿರಾಖ್ಯಸ್, ದಿಲ್‌ಥಿ ಮಾನಿರಾಖ್ಯಸ್, ಅಜು಼ ಹಾತೇಥಿ ಛಿಮಿರಾಖ್ಯಸ್.
2 ಯೋ ಜಾನ್‌ ಹಮೂನ ದೆಖಾಯು. ಹಮೆ ಇನ ದೇಖ್ಯಾತೆ ಇನಖ್ಹಾಜೇಸ್ ಇನಿ ಬಾರೇಮ ಸಾಕ್ಷಿ ಬೋಲಾನಿತರ ಹುಯು. ಯೋ ಬಾ ಜೋ಼ಡ್ಮ ರ‍್ಹೀನ್ ಹಮುನ ದೆಖಾಯುತೆ ಹರ್‌ಹಮೇಶಾನೊ ಜಾನ್‌ ತುಮುನ ಬೋಲಿವತಾಳೆಸ್‍.
3 ಬಾ ಹುಯಿರೋತೆ ದೇವ್ನ ಅಜು಼ ಇನೊ ಛಿಯ್ಯೊ ಹುಯಿರೋತೆ ಯೇಸುಕ್ರಿಸ್ತನಿ ಜೋಡ್ಮರ‍್ಹವಾನುಬಿ ಹಮುನ ಛಾ಼ತೆ ಗಳ್‌ಜೋ಼ಡ್ಮ ತುಮೆಜಿನು ಭಾಗ್‌ಲೀಲ್ಯವಾಳ ಹುಯಿರ‍್ಹೇವ್ಣುಕರಿ ಹಮೆ ದೇಖಿರಾಖ್ಯತೆ, ಖ್ಹಮ್‍ಜಿರಾಖ್ಯತೆ ತುಮೂನ ಬೋಲಿವತಾಳೆಸ್‍.
4 ಅಪ್ಣಿ ಶಂತೋಖ್ಹ್‌ ಪೂರ ಹುವಾದೆಕರಿ ಹಮೆ ಅನಿ ಬಾರೇಮ ಲೀಖುಕರಿಯೇಸ್.
ದೇವಸ್ ಉಜಾ಼ಳು
5 ಹಮೆ ದೇವ್ನ ಛಿಯ್ಯಾಥಿ ಖ್ಹಮ್‌ಜಿನ್‌ ತುಮುನ ಖ್ಹಮ್‍ಜಾ಼ಡಾನಿ ವಾತೆ ಶಾತ್‌ಕತೊ ದೇವ್ ಉಜಾ಼ಳು ಹುಯಿರ‍್ಹೋಸ್, ಇನಾಮ ಥೋಡುಬಿ ಅಂಧಾರುಕೊಯ್ನಿ.
6 ಇನಖ್ಹಾಜೇಥಿ ಅಪ್ಣೆ ಅಂಧಾರಮ ಜಿವ್ಣು ಕರ್ತಹುಯಿನ್‍ ದೇವ್ನಿ ಜೋ಼ಡ್ಮ ಗಳ್‍ಜೋ಼ಡ್‍ಥಿ ಛೀಯೆಕರಿ ಬೋಲ್ಯಾತೊ ಅಪ್ಣೆ ಝೂ಼ಟ ಹುಯಿರ‍್ಹಾಸ್ ನಿಯತ್ನು ಜಿವ್ಣು ಜಿವವಾಳ ಕಾಹೆ.
7 ಕತೋಬಿ ದೇವ್ ಉಜಾ಼ಳಮ ರ‍್ಹಾವನಿತರಸ್‍ ಅಪ್ಣೇಬಿ ಉಜಾ಼ಳಮ ಚಾ಼ಲ್ಯಾತೊ ಅಪ್ಣೆ ಏಕ್‌ಥಿಏಕ್ ಗಳ್‍ಜೋ಼ಡ್‍ಥಿ ರ‍್ಹಯೇಜಾ಼ಯ್ ತದೆ ಇನೊ ಎಕ್ಕಸ್ ದೇವ್‌ನೊ ಛಿಯ್ಯೊ ಯೇಸುನು ಲ್ಹೋಯಿ ಅಪ್ಣುನ ಅಖ್ಖಾ ಪಾಪ್‌ಥಿ ಛೋ಼ಡೈನ್ ಪಾಕ್‍ಕರಾಸ್.
8 ಅಪ್ಣಾಮ ಪಾಪ್‍ಕೊಯ್ನಿಕರಿ ಅಪ್ಣೆ ಬೋಲ್ಯಾತೊ ಅಪ್ಣುನ ಅಪ್ಣೆಸ್ ಠಗೈಲ್ಯವಾಳ ಹುಯಿರಾಸ್‍ ಅಜು಼ ಖ್ಹಾಚಿ ಕರಿ ಬೋಲಾನು ಅಪ್ಣಾಮ ಕೊಯ್ನಿ.
9 ಕತೋಬಿ ಅಪ್ಣೆ ಅಪ್ಣ ಪಾಪ್ನ ಮಾನೀನ್ ಬೋಲಿಲಿದತೊ ತದೆ ವಿಶ್ವಾಸ್‍ವಾಳೊಬಿ ನೀತಿವಾಳೊಬಿ ಹುಯಿರ‍್ಹೋತೆ ದೇವ್ ಅಪ್ಣಪಾಪ್ನ ಕ್ಷಮಾಪಣ್ ಕರಿನ್ ಅಖ್ಖಿ ನೀಚ್‌ಕಾಮ್‍ಥಿ ಅಪ್ಣುನ ಪಾಕ್‍ಕರಶೆ.
10 ಅಪ್ಣೆ ಪಾಪ್ ಕರ‍್ಯಾಕೊಯ್ನಿಕರಿ ಬೊಲ್ಯಾತೊ ದೇವ್ನ ಝೂ಼ಟೊ ಕರಾನಿತರ ಉಶೆ. ಅಜು಼ ಇನಿವಚನ್ ಅಪ್ಣಾಮ ಜ಼ಡ್‍ಗಾಠಿ ರ‍್ಹಿಶೆಕೊಯ್ನಿ.