ಇಬ್ರಿಯರಿಗೆ ಬರೆದ ಪತ್ರಿಕೆ
ಪೌಲನೆ ಇಬ್ರಿಯವಾಳಾನ ಲೀಖ್ಯೋತೆ ಚಿಟ್ಟಿ
ಮಾಲುಮ್ ಕರಾನು
ಇಬ್ರಿಯವಾಳಾನ ಲೀಖ್ಯುತೆ ಪುಸ್ತಕ್ ಏಕ್‌ ಹುಮ್ಮಖ್ಹ್‌ ದೇಸ್ತೆ ಚಿಟ್ಟಿಹುಯಿನ್‌ ಯೇಸು ಜೂ಼ನ ಒಪ್ಪಂದಾಮನು ಕೈಏಕ್ ಪ್ರವಾದನೆಖ್ಹಾರು ಕಿಮ್ ಭರ್‌ಪೂರ್‌ ಕರ‍್ಯೊಕರಿ ಬೋಲಾನು ವತಾಳಸ್‍. ಆ ಬೋಧನೇನಿ ರೂಪಾಮ ಲೀಖೈರುಸ್. ಅನಾಮ ಯೇಸು ಜೂ಼ನ ಒಪ್ಪಂದಾಮ ಪ್ರವಾದನೆ ಅಜು಼ ಯೆಹೂದಿ ಯಾಜಕಾನು ಕಾಮ್ ಕಿಮ್ ಪೂರ ಕರ‍್ಯೊಕರಿ ಬೋಲಾನ ತಿನೀಖ್ಹ್‌ಥೀಬಿ ಘಣು ಜೂ಼ನ ಒಪ್ಪಂದಾನು ಸಾಬೂತ್‌ಛಾ಼. ಆ ಹೈರುತೆ ಆ ಬಾರೇಮ ಅಛ್ಛಿನಿತರ ವತಾಳಸ್‍. ಅನಖ್ಹಾಜೆ ಆ ಪುಸ್ತಕ್ ಯಹೂದಿ ವಿಶ್ವಾಸಿಯೇವ್ನ ಹುಮ್ಮಖ್ಹ್‌ ದೆವಾನು ಪುಸ್ತಕ್ ಬೋಲಾವಸ್. ಯೇಸು ಕಿಮ್ ಧರ್ಮಶಾಸ್ತ್ರನ ಪೂರ ಕರ‍್ಯೊ. ಇನಖ್ಹಾಜೇಥಿ ಯಾಜಕರ್‌ ಕೆದೇಬಿ ಜಿನು ಬಲಿ ದ್ಯವಾನು ಜ಼ರೂರತ್ ಕೊಯ್ನಿಕರಿ ಇಬ್ರಿಯ ಪುಸ್ತಕ ವತಾಳಸ್‍ ಅಖ್ಖಾ ಹಗಾಮ್ನಖ್ಹಾಜೆ ಎಕ್ಕಸ್‍ಹಲ್ಲ ಅಖ್ಖಾಸ್ ಪಾಪ್ನಖ್ಹಾಜೆ ಯೇಸು ಬಲಿಹುಯೊ. ದೇವ್‌ಮ ಭರೋಖ್ಹೊ ರಾಖಾನ ಅಜು಼ ಇನಾಮಬಿ ಜಿನು ಭರೋಖ್ಹೊ ರಾಖಾನ ಯೇಸು ಕ್ರಿಸ್ತನ ಪೀಠೆ ಜಾ಼ವ್ಣುಕರಿ ಇಬ್ರಿಯ ಪುಸ್ತಕ ಹಮ್ಕೆನು ಅಪ್ಣ ಹಗಾಮ್ನು ವಿಶ್ವಾಸಿಖ್ಹಾರನ ಜಿನುಕು ಹುಮ್ಮಖ್ಹ್‌ ದೇಸ್ 12:2.
ಇಬ್ರಿಯ ಪುಸ್ತಕ್ ಕೋಣ್ ಲೀಖಿರಾಖ್ಯುಸ್ ಕರಿ ಬೋಲಾನು ಕಿನಾಬಿ ಮಾಲುಮ್ ಕೊಯ್ನಿ ಕತೋಬಿ ಫಡಂತಿಖ್ಹಾರು ಅಪೊಸ್ತಲ ಹುಯಿರ‍್ಹೋತೆ ಪೌಲ, ಲೂಕ, ಬಾರ್ನಬಸ್ ರ‍್ಹೇವ್ಣು ಕರಿ ಖ್ಹೂಜ಼್‌ ದೇಸ್. ಆ ಲೀಖೈರ‍್ಹುತೆ ವಖ್ಹತ್ ಜಿನು ಮಾಲುಮ್‌ನಿತರ ಕೊಯ್ನಿ. ಕತೋಬಿ ಘಣೇಥಿ ಕ್ರಿಸ್ತ ಪೈದಾಖ್ಹ್‌ನ ವಾರ್ 70 ವರಖ್ಹ್‌ ಅಗ್ಗಳಸ್ ಲಿಖೈರ‍್ಹುಸ್ ಕರಿ ವಿಶ್ವಾಸ್ ಕರಸ್. 70 ನು ವರಖ್ಹ್‌ಮ ಯೆರೂಸಲೇಮ್‌ ಖ್ಹಯೇರ‍್ನ ನಾಶ್‌ಕರಿ ರಾಖ್ಯುಥು. ಕತೋಬಿ ಲೀಖವಾಳನೆ ಆ ಚಿಟ್ಟೀಮ ಯೆರೂಸಲೇಮ್‌ ನಾಶ್‌ ಉಷೆಕರಿ ಬೋಲಾನು ಪರಕ್ಮ ವಾತ್ ಬೋಲಸ್. ಇಬ್ರಿಯ ಪುಸ್ತಕ್ ರೋಮ್ ಖ್ಹಯೇರ್‌ಮ ಲಿಖೈರ‍್ಹುಸ್. 13:24 ಅಜು಼ ಘಣೇಥಿ ಕೈಯೆಕ್‌ ಸಬೇಮ ಯೋ ಚಾ಼ಲಿರ‍್ಹುಸ್.
ಕಾಡಿದೇಖೊ
1. ಲೀಖವಾಳನೆ ದೇವ್ನು ಪ್ರವಾದಿಖ್ಹಾರು ಅಜು಼ ದೇವ್ನದೂತರ್‌ಥೀಬಿ ಊಚೊ಼ಕರಿ ವತಾಳಸ್‍. 1:1—4:13
2. ಇನಪಾರ್ ಯೊ ಯೆರೂಸಲೇಮ್‌ನ ದೇವಳ್ಮ ಸೇವೆ ಕರುಕರ್ತಥಾತೆ ಯಾಜಕವ್‌ಥೀಬಿ ಯೇಸು ಊಚೊ಼ ಕರಿ ವತಾಳಿದೇಸ್. 4:14—7:28
3. ದೇವ್ನೆ ಮೋಶೇಥಿ ಇನ ಅದ್ಮಿನ ಜೋ಼ಡೆ ಕರ‍್ಯೊತೆ ಜೂ಼ನ ಒಪ್ಪಂದಾಥಿಬಿ ಯೇಸುನು ಸೇವೆನು ಕಾಮ್ ಊಚು಼ ಹುಯಿರ‍್ಹುಸ್ ಕರಿ ವತಾಳಸ್‍ 8:1—10:31
4. ಯೇಸು ಅಖ್ಖೀಸ್ ಪರಕ್ಮ ಊಚೋ಼ ಕರಿ ಬೋಲಿ ವತಾಳನ ವಾರ್ ಲೀಖವಾಳನೆ ಕೈಏಕ್ ಪ್ರಯೋಗ್‌ಥಿ ವಾಟ್‌ವತಾಳಿ ದೇಸ್ 10:32—13:17
5. ಖ್ಹರ್ತಿಮ ಲೀಖವಾಳನೆ ಥೋಡು ಹುಮ್ಮಖ್ಹ್‌ ದ್ಯವಾನಿ ವಾತೆ ಬೋಲಿನ್ ಖ್ಹಲಾಮ್ ಬೋಲ್ತೊಹುಯಿನ್ ಚಿಟ್ಟಿನ ಖತಮ್ ಕರಸ್ 13:18-25
1
ಛಿಯ್ಯೇಥಿ ದೇವ್ನಿ ಸಂದೇಶ್
1 ಅಗ್‍ಲ್ಯ ಹಗಾಮ್ಮ ದೇವ್ನೆ ಪ್ರವಾದಿ ಖ್ಹಾರಾಥಿ ಅಪ್ಣ ಗುರುಗುರಬ್‌ಲ್ಯನಿ ಜೋ಼ಡೆ ಕೆತ್ರೇಕ್ಕಿ ಪರಕ್ಮ, ಕೈಏಕ್ ಹಲ್ಲ ವಾತೆಬೋಲಿರಾಖ್ಯೋಸ್.
2 ಕತೋಬಿ ಆ ಖ್ಹರ್ತಿನೊ ದನ್ಮ ಯೊ ಇನ ಛಿಯ್ಯಾಥಿ ಅಪ್ಣ ಜೋ಼ಡೆ ವಾತೆ ಬೋಲ್ಯೊ. ದೇವ್ನೆ ಇನ ಛಿಯ್ಯಾಥಿ ಖ್ಹಾರ ಜಗತ್‍ನಾಸ್ ಉಬ್‌ಜೈ಼ನ್ ಹರೇಕ್‌ಪರ್ ಇನಾಸ್ ವಾರಿಸ್ ಕರ‍್ಯೊ.
3 ಯೋಸ್ ದೇವ್ನು ಮಹಿಮೆನು ಉಜಾ಼ಖ್ಹ್‌ಬಿ, ದೇವ್ನಿ ಪ್ರತಿರೂಪ್‌ಬಿ, ಇನಿ ವಚನ್ ಶಕಥ್ಥಿ ಅಖ್ಖಾಸ್ನ ಆಧಾರ್ ಹುಯಿನ್ ಯೋಸ್ ಅದಮ್‍ಜ಼ಮಾನನಿ ಪಾಪ್ನ ಶುದ್ದಿಕರಿನ್ ಸೊರ್ಗಾಮ ಮಹಾನ್ ದೇವ್ನು ಖಾವಿಬಾಜು಼ಮ ಬೇಶಿಗಯೊ.
ದೇವ್ನ ಛಿಯ್ಯಾನಿ ಭಡ್‌ಪಣ್‌
4 ಹೈರುತೆ ದೇವ್‌ದೂತರ್‌ಥೀಬಿ ಮಹಾನ್ ಊಚೊ಼ ಹುಯಿನ್; ಇನ ದಿದೋತೆ ನಾಮ್ ದೇವ್‌ದೂತರ್‌ಥೀಬಿ ಮಹಾನ್ ಹುಯಿರ‍್ಹುಸ್.
5 ಶನಕತೊ, ದೇವ್ ಇನ ದೇವ್‌ದೂತರ್‌ಮ ಕಿನಾತೋಬಿ,
“ತೂ ಮಾರೊ ಛಿಯ್ಯೊ;
ಆಜ಼್ ಮೇಸ್ ತಾರೊ ಬಾ ಹುಯಿರ‍್ಹೊಸ್
“ಮೇ ಇನೊ ಬಾ ಹುಯಿರ‍್ಹಿಶ್,
ಯೋ ಮಾರೊ ಛಿಯ್ಯೊ ಹುಯಿರ‍್ಹಿಶೆ.” ಕರಿ ಬೋಲಿರಾಖ್ಯೊಕೊಯ್ನಿ.
6 “ಆ ಕಾಹೆತೆ ದೇವ್ ಇನ ಫೈಲೋಟ ಛಿಯ್ಯಾನ ಧರ್ತಿಪರ್ ಪಾಛು಼ ಮೋಕ್ಲಾನಿ ವಖ್ಹ್‌ತೆ,
ದೇವ್ನ ದೂತರ್‌ಖ್ಹಾರು ಇನ ಆರಾದನೆ ಕರ್ನುಕರಿ ಹುಕುಮ್ ಕರಿರಾಖ್ಯೋಸ್”.
7 ಕತೋಬಿ ದೇವ್ನ ದೂತರ್‌ನಿ ಬಾರೇಮ,
“ದೇವ್ ಇನ ದೂತರ‍್ನ ವಹಿರಾನಿ ಘೋಣಿಬಿ,
ಅಜು಼ ಇನ ಸೇವಕ್‌ಖ್ಹಾರನ ಆಗ್‍ನಿ ಝ಼ಲಪಟ್‌ನಿತರಾಬಿ ಕರೀಶ್‌ಕರಿ ಬೋಲಿರಾಖ್ಯೊಸ್.”
8 ಕತೋಬಿ ಛಿಯ್ಯಾನಿ ಬಾರೇಮ ಅಮ್ ಬೋಲ್ಯೊ:
“ದೇವ್ ತಾರು ಸಿಂಹಾಸನ್ ಜ಼ಗ್‌ಜ಼ಮಾನಮಾಬಿ ರ‍್ಹಿಶೆ.
ನೀತಿನು ಡಂಡೊಸ್‌ ತಾರು ರಾಜ಼ನು ಡಂಡೊ ಹುಯಿರ‍್ಹುಸ್.
9 ತೂ ಬರೋಬರ್‌ನ ಪ್ಯಾರ್‌ಕರ‍್ಯೊ ಅಜು಼ ಗಲತ್‌ನ ಝಿಟ್ಕಾರ‍್ಯೊ.
ಇನಖ್ಹಾಜೇಥಿ ದೇವ್ ತಾರೊ ದೇವಸ್. ತುನ ತಾರ ಜೋ಼ಡೆ ರ‍್ಹವಾಳಥಿಬಿ
ಶಂತೋಖ್ಹ್‌ನ ಜಾ಼ಖ್ಹತ್ ತೇಲ್‌ಥಿ ಅಬಿಷೇಕ್ ಕರಿರಾಖ್ಯೊಸ್
10 ಇನೆ ಅಮ್‍ಬಿ ಬೋಲ್ಯೊ;
“ಪ್ರಭು ತೂ ಶುರುವಾತ್ಮ ಜ಼ಮೀನ್ನ ಹದಿಪಾಯ ನಾಖ್ಯೊ.
ಅಜು಼ ತಾರ ಹಾತೇಖ್ಹು ಆಬ್‌ನ ತುನೆ ಬಣಾಯೊ,
11 ಯೋಖ್ಹಾರು ದೆಖಾವ ಕೊಂತೆ ಹುಯಿಜಾ಼ಶೆ ಕತೋಬಿ ತು ಕೆದೇಬಿ ರ‍್ಹೀಶ್.
ಯೊ ಜಿನಖ್ಹ್‌ಅಖ್ಖು ಲುಂಗ್ಡನಿತರ ಗಳಿಜಾಶೆ.
12 ತು ಯೊ ಅಖ್ಖಾನ ಝ಼ಗ್ಗಾನಿತರ ಬಿಡ್ಕಿಕರಿಷ್,
ಅಜು಼ ಯೊ ಪೇರ್ವಾಖ್ಹ್‌ನಿತರ ಬದ್ಲಿಜಾ಼ಶೆ.
ಕತೋಬಿ ಕದೆಕದೇಬಿ ಬದಲಿಶ್ ಕೊಯ್ನಿ.
ಅಜು಼ ತಾರ ಉಂಬರ‍್ನ ಖ್ಹರ್ತೀಸ್ ಕೊಯ್ನಿ ಕರಿ ಬೋಲಾಸ್.
13 ಕತೋಬಿ ಖೆವ ದೇವ್‌ದೂತರ್‌ನತೋಬಿ ದೇವ್ನೆ,
ಮೇ ತಾರ ದುಶ್‌ಮನ್ನ ತಾರ ಗೋಡಾನ ರಚ್ಚಾ಼ಕನ ನಾಖತೋಡಿ
ತು ಮಾರಿ ಖಾವಿ ಬಾಜೂ಼ಮ ಬೆಠೋರೆ ಕರಿ ಕದೆತೋಬಿ ಬೋಲ್ಯೊಥೋಕಿ ಶು?
14 ಆ ಅಖ್ಖು ದೇವ್ನದೂತರ್ ರಕ್ಷಣೆನು ಹಕ್ನ ಲೀರಾಕ್ಣುತೆ ಇವ್ಣಅಖ್ಖಾನು ಸೇವೆನಖ್ಹಾಜೆ ಮೋಕ್ಲಾಯುತೆ ಸೇವೆನು ಆತ್ಮ ಕಾಹೇಕಿಶು.