4
ದೇವ್ನ ಖ್ಹಾಜಾ಼ತೆ ಜಿವ್ಣು
1 ಖ್ಹರ್ತಿನಿ ವಾತ್ ಶಾತ್‌ಕತೊ, ಹಮಾರ ಭೈಯೇ ಭೇನೆವೊ ಯೇಸು ಪ್ರಭುನ ಅದಿಕಾರ್‌ಥಿ ತುಮೂನ ಶಾತ್ ಹುಕುಮ್ ದಿದಾಥ ಕರಿ ತುಮೂನ ಮಾಲುಮ್ ಛಾ಼. ತುಮೂನ ಬಿಜು಼ ಥೋಡಿ ವಾತೆ ಬೋಲಾನು ಛಾ಼.
2 ಇನಖ್ಹಾಜೆ ದೇವ್ನ ಖ್ಹಾಜಾ಼ನಟೇಕೆ ಕಿಮ್ ಜಿವ್ಣು ಕರಿ ಹಮಾರೆಥಿ ಶಿಕಿನ್ ಯೋಸ್ ತರಿಕಾಥಿ ಜಿವ್‌ಕರಾಸ್. ತುಮೆ ಬಿಜೂ಼ಬಿ ಜಾ಼ಖ್ಹತ್ ಚಾ಼ಲ್ನುಕರಿ ಪ್ರಭು ಯೇಸುಮ ಬಿಂತಿ ಕರಿಯೇಸ್.
3 ದೇವ್ನಿ ಮರ್ಜಿ ಶಾತ್‌ಕತೊ ತುಮೆ ಪವಿತ್ರ ರ‍್ಹೇಣುಸ್ ಕರಿ. ಇನಖ್ಹಾಜೆ ವ್ಯಬಿಚಾರ್‌ಥಿ ದೂರ್ ರ‍್ಹವೊ.
4-5 ದೇವ್ನ ಮಾಲುಮ್‌ಕರ‍್ಯುಕೊಂತೆ ಅಲಕ್‌ ಅದ್ಮಿವೋನಿಘೊಣಿ ಶರೀರ್‌ನಿ ಭೋಗ್‌ಮ ನಾಪಡ್ನುತೆ ತುಮಾರಮ ಹರೇಕ್ ಜ಼ಣು ಪವಿತ್ರ ದಿಲ್‌ಥೀಬಿ ಮರ‍್ಯಾದಿಥೀಬಿ ಬಾವಣ್ಣಿಜೋ಼ಡ್ಮ ಕಿಮ್ ಜಿವ್ಣು ಕರ್ನುಕರಿ ಶಿಕಿಲೇವ್ಣು.
6 ಅಜು಼ ಆ ಬಾರೇಮ ಜಿನುಕು ಕೋಣ್‌ಬಿ ಕ್ರಿಸ್ತನ ಮಹಿ ಇವ್ಣ ಭೈಯೇ ಹುಯಿರ‍್ಹಾತೆ ಅದ್ಮಿನ ಠಗಾವ್ಣುಕರಿ ಝೇತೈನ್‌, ಖರಾಬ್ ನಾ ಕರ‍್ನು. ಆ ಖ್ಹಾರಿ ಬಾರೇಮ ಪ್ರಭು ನಿಶತ್ ದಿಶೆಕರಿ ಹಮೆ ತುಮುನ ಬೋಲಿರಾಖ್ಯಾಸ್.
7 ದೇವ್ನೆ ಅಪ್ಣುನ ಮೈಲುಹುವಾನಖ್ಹಾಜೆ ಬುಲಾಯೊಕೊಯ್ನಿ, ಪರಿಶುದ್ ಜಿವ್ಣುಕರಾನಖ್ಹಾಜೆ ಬುಲಾಯೋತೆ.
8 ಅನಖ್ಹಾಜೆಸ್ ಆ ವಾತೇನ ಝಿಟ್ಕಾರವಾಳು ಅದ್ಮಿನಾಸ್ ಕಾಹೆತೆ ಪವಿತ್ರಾತ್ಮನ ದಿದೋತೆ ದೇವ್‍ನಾಬಿ ಝಿಟ್ಕಾರವಾಳು ಹುಯಿರ‍್ಹೂಸ್.
9 ಕ್ರಿಸ್ತನ ಮಹಿ ಭಯ್ಯೆ ಅಜು಼ ಭೇನೇನ ಕಿಮ್ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮೂನ ಲೀಖಾನಿ ಜ಼ರೂರತ್ ಕೊಯ್ನಿ. ಏಕ್‌ಥಿಏಕ್‌ ಪ್ಯಾರ್ ಕರ‍್ನು ಕರಿ ಬೋಲಾನಿ ಬಾರೇಮ ತುಮಾರು ತುಮೇಸ್ ದೇವ್‌ಥಿಶಿಕಿರಾಖ್ಯಸ್.
10 ಅಜು಼ ಇಮ್ಮಸ್ ಮೆಕೆದೋನ್ಯಮ ಛಾ಼ತೆ ತಮಾಮ್‌ ಭೈಯೆ ಭೇನೇನ ಜೋ಼ಡೆ ಪ್ಯಾರ್‌ಥಿ ಚಾ಼ಲಿರಾಖ್ಯಾಸ್‌. ಕತೋಬಿ ಹಮಾರ ಭೈಯೆ ಭೇನೇವೊ ತುಮೆ ಪ್ಯಾರ್ ಕರಾಮ ಬಿಜೂ಼ಬಿ ಭಡ್ನುಕರಿ ಬೋಲಿಲಿಯೆಸ್.
11 ಹಮೆ ಬೋಲ್ಯಾತೆ ತಿಮ್ ತು ಬಿಜೇಕ್‌ಜ಼ಣಾನ ಬಾರೇಮ ಮುಡ್‌ಕ್ಯು ನಕೊಘಾಲ್‌ತೆ ತುಮಾರು ಕಾಮ್ ತುಮೆ ದೇಖಿಲಿನ್ ಖ್ಹೊಪೇಥಿ ಜಿವ್ಣು ಕರೊಕರಿ ಅಗಾಡಿಸ್ ಬೋಲಿರಾಖ್ಯೊಸ್.
12 ಅಮ್ ಕರ‍್ಯಾತೊ ತುಮೂನ ವಿಶ್ವಾಸ್‌ಮಕೊಂತೆ ಅದ್ಮಿಥಿ ಮರ್ಯಾದಿ ಮಳ್‌ಶೆ ಕಾಹೆತೆ ತುಮೆ ಕಿನಾಪರ್‌ಬಿ ವಜ಼ನ್ ಕೊ ರ‍್ಹಿಶುನಿ.
ಕ್ರಿಸ್ತಯೇಸು ಪಾಛು಼ ಆವ್‌ಶೇತೆ
13 ಹಮಾರ ಭೈಯೇ ಭೇನೇವೊ, ಮರಿಗಯೂತೆ ಅದ್ಮಿನಿ ಬಾರೇಮಾನಿ ಖ್ಹಾಚಿನ ತುಮೆ ಮಾಲುಮ್ ಕರಿರಾಕ್ಣುಕರಿ ಹಮಾರಿ ಆಖ್ಹ್. ಅನೇಥಿ ಕೋಣ್‌ಬಿ ಭರೋಖ್ಹಾಮಕೊಂತೆ ಅಲಕ್‌ನಿಘೋಣಿ ತುಮೆ ದುಖ್‌ಮ ನಾರ‍್ಹೇವ್ಣು.
14 ಯೇಸು ಮರೀನ್ ಜಿವ್ತೊ ಹುಯೊ ಕರಿ ಅಪ್ಣೆ ಮಾನೇಸ್, ಇಮ್ಮಸ್ ಯೇಸುಪರ್ ವಿಶ್ವಾಸ್ ಕರೀನ್ ಮರಿಗಯೂತೆ ಇವ್ಣುನ ದೇವ್ ಯೇಸುನ ಜೋ಼ಡೆ ಉಠಾಡ್‍ಶೆ ಕರಿ ವಿಶ್ವಾಸ್ ಕರ‍್ನು.
15 ಹಮ್ಕೆ ಹಮೆ ಶಿಕಾಡುಕರೇತೆ ಆ ವಾತೆ ಪ್ರಭೂನೀಸ್ ಉಪದೇಶ್ ಹುಯಿರ‍್ಹೀಸ್. ಪ್ರಭು ಪಾಛೊ಼ ಆವ್‌ಶೇತೆ ವಖ್ಹತ್‌ಮ, ಜಿವ್ತಾ ಛಿಯ್ಯೇತೆ ಅಪ್ಣೆ ಮರಿಗಯೂತೆ ಇವ್ಣೇಥಿ ಪಹಿಲೆ ಕೋ ಜಾ಼ಶುನಿ.
16 ಶನಕತೊ ಪ್ರಭು ಇನುಯೋಸ್ ಹುಕುಮ್‌ನಿ ಆವಾಜ಼್‌ಥೀಬಿ, ಗಲ್‌ಢೊ ದೂತಾನೊ ಆವಾಜ಼್‌ಥೀಬಿ, ಅಜು಼ ದೇವ್ನಿ ತುತ್ತೂರಿನ ಆವಾಜ಼್‌ಥೀಬಿ ಪರ್‌ಲೋಕ್‌ಥು ಉತ್ರಿನ್ ಆವ್‌ಶೆ. ತದೆ ಯೇಸು ಕ್ರಿಸ್ತನಿ ವಿಶ್ವಾಸ್ಮ, ಮರಿಗಯೂತೆ ಇವ್ಣೆ ಪಹಿಲೆ ಉಠಿ ಆವ್‌ಶೆ.
17 ಅನ ಬಾದ್‌ಮ ಜಿವ್ತಾ ಛಿಯೇತೆ ಅಪ್ಣೆ ಪ್ರಭುನ ವಾದ್‍ಳಾನ ವಹಿರಾಮ ಮಳಾನಖ್ಹಾಜೆ ಇವ್ಣಿ ಜೋ಼ಡೆಸ್ ಏಕ್‌ದಮ್ ವಾದ್‍ಳಾಮ ಪಡೈಜಾ಼ಶು. ಅಮ್ ಹುಯಿನ್ ಅಪ್ಣೆ ಹಮೇಶಾನಖ್ಹಾಜೆ ಪ್ರಭುನ ಜೋ಼ಡೆ ರ‍್ಹಿಶು.
18 ಇನಖ್ಹಾಜೆ ಆ ಖ್ಹಾರಿ ವಾತೆಥಿ ಏಕ್‌ನ ಏಕ್‌ ಭಾಲಿ ದೆವೊ.