2
ಥೆಸಲೋನಿಕಮ ಪೌಲನು ಕಾಮ್
1 ಹಮಾರ ಭೈ ಭೇನೊ, ಹಮೆ ತುಮಾರಕನ ಆಯತೆ ತುಮೂನ ಫಾಯಿದೊಕೊಂತೆ ಕೊಹುಯುನಿ ಕರಿ ಮಾಲುಮ್ ಛಾ಼.
2 ಹಮೆ ತುಮಾರಕನ ಥೆಸಲೋನಿಕಮ ಆವಾನ ಅಗಾಡಿಸ್, ಫಿಲಿಪ್ಪಿ ಖ್ಹಯೇರ್‌ಮ ಹಮೂನ ಕೆತ್ರೆ ಖ್ಹತಾಯು ಅಜು಼ ಖ್ಹರಮ್‌ ಕಾಡ್ಯು ಕರಿ ತುಮೂನ ಮಾಲುಮ್ ಛಾ಼. ಹಿಜ್ಜಾ಼ ಎತ್ರೆ ವಿರೋದ್ ಕರ‍್ಯುತೋಬಿ ತುಮೂನ ಸುವಾರ್ತೆನ ಬೋಲಾನಟೇಕೆ ಅಪ್ಣೊ ದೇವ್ನೆ ಹಮೂನ ಭಾಲಿದಿದೊ.
3 ಹಮಾರಿ ಸಮಾಚಾರ್ ಹುಮ್ಮಖ್ಹ್‌ನು ಹುಯಿರ‍್ಹುಸ್. ಮೈಲುಬಿ ಕಾಹೆ, ಅಜು಼ ತುಮೂನ ಠಗಾವ಼್ಣು ಕರಿ ಕಾಹೆ.
4 ಅನಬದಲ್ ದೇವ್ ಕದೇಬಿ ಶನ ಲ್ಹಾಯಕ್ ಕರಸ್ಕಿ ಇನಾಸ್ ಅಪ್ಣೆ ಬೋಲಿಯೇಸ್. ಶನಕತೊ ಯೋ ಅಪ್ಣುನ ತರೀಪ್‌ಶ ಕರೀನ್ ಹಮೆ ಯೋಗ್ಯಹುಯಿರಾತೆ ಅದ್ಮಿಕರಿ ಇನಿ ಅಛ್ಛಿ ಸಂದೇಶ್ನ ಇನೆ ಅಪ್ಣುನ ದೀರಾಖ್ಯೊಸ್. ಹಮೆ,ದಿಲ್ನ ತರೀಪ್ಷ ಕರಾವಾಳ ದೇವ್ನ ಖ್ಹಾಜ಼ನುಸ್ ಕರಿಯೇಸ್.
5 ತುಮೂನ ಮಾಲುಮ್‌ಛಾ಼ತೆ ತಿಮ್ ಹಮೆ ಕದೇಬಿ ಕಿನ ಖ್ಹರಾಯಬಿ ಕೊಯ್ನಿ ಅಜು಼ ಲಾಲಚ್‌ನ ಲಪಾಡನಖ್ಹಾಜೆ ವೇಷ ಫೇರ‍್ಯಕೊಯ್ನಿ. ಇನ ದೇವಸ್ ಸಾಕ್ಷಿ.
6 ಎತ್ರೆಸ್ ಕಾಹೆತೆ ಹಮೆ ಕ್ರಿಸ್ತನು ಅಪೊಸ್ತಲರ್ ಹುಯಿರ‍್ಹಾತೆ ಇನಖ್ಹಾಜೆ, ಹಮೂನ ಮಾನ್-ಮರ್ಯಾದಿನ ವತಾಳ್ಣು ಕರಿ ಬೋಲೆಜಾ಼ಯಿಥು. ತೋಬಿ ಹಮೆ ಅದ್ಮಿಥಿ ಮಳಾಸ್ತೆ ಮಾನ್-ಮರ್ಯಾದಿನ ತುಮಾರೇಥಿ ರ‍್ಹವೊ, ಬಿಜಾ಼ಥಿ ರ‍್ಹವೊ ಮಳಾದೆಕರಿ ಆಖ್ಹ್ ಕರ‍್ಯಾಕೊಯ್ನಿ.
7 ಕತೋಬಿ ಕ್ರಿಸ್ತಮ ಅಪೊಸ್ತಲಹುಯಿನ್ ಆಯ ಇನ ಲಡ್ಕಾನ ಖ್ಹದರ್ ಕರಾತೆ ಇಮ್‌ ತುಮಾರಿ ಜೋ಼ಡ್ಮ ರ‍್ಹೇತ ಲಾಡ್‌ಥಿ ಚಾ಼ಲಿಲಿದಾ.
8 ಶನಕತೊ ಹಮೆ ತುಮೂನ ಜಾ಼ಖ್ಹತ್ ಪ್ಯಾರ್ ಕರ‍್ಯಾತೆ ಇನಖ್ಹಾಜೆ ದೇವ್ನಿ ಅಛ್ಛಿ ಸಂದೇಶ್ ಖಲಿ ಬೋಲಾನಟೇಕೆ ಕಾಹೆತೆ ತುಮಾರಖ್ಹಾಜೆ ಜಾನ್ನ ದ್ಯವಾನಾಬಿ ಹಮೆ ತಯಾರ್ ಹುಯಿರಾಸ್.
9 ಭೈ ಭೇನೊ ಹಮೆ ತುಮಾರಾಮ ಕಿನಾಪರ್‌ಬಿ ಭಾರೊ ನಾ ನಾಕ್ಣು ಕರಿ ರಾತ್-ದನ್ ಕಾಮ್ ಕರೀನ್, ಜಿವ್ಣು ಚ಼ಲಾವ್ತಹುಯಿನ್, ದೇವ್ನಿ ಸುವಾರ್ತೆನ ತುಮೂನ ಬೋಲಿವತಾಳ್ಯ, ಯೋ ಹಮಾರಿ ಲತಾಡಬಿ ಮ್ಹಿನತ್ ಖ್ಹಾರು ತುಮಾರಿ ಯಾದ್ಮ ರ‍್ಹವಾದೆ.
10 ನಂಬವಾಳ ಹುಯಿರ‍್ಹಾತೆ ತುಮಾರ ಜೋ಼ಡೆ ಹಮಾರಿ ಚಾ಼ಲ್‍ಚ಼ಲಣ್‍ಮ ಖ್ಹಾಚಿಥಿಬಿ ಪರಿಶುದ್ಧಬಿ, ನೀತಿವಾಳಬಿ ಅಜು಼ ನಿರ್ದೋಷಿ ಥಾ, ಕರಿ ಬೋಲಾನ ತುಮೇಬಿ ಸಾಕ್ಷಿ ಅಜು಼ ದೇವ್‌ಬಿ ಸಾಕ್ಷಿ ಹುಯಿರ್ಹಾಸ್.
11 ಬಾ ಇನ ಶೊಂತ್ ಲಡ್ಕಾನ ಜೋ಼ಡೆ ಕಿಮ್ ಚಾ಼ಲಿಲೇಸ್ಕಿ ಇಮ್ಮಸ್, ಹಮೆ ತುಮಾರ ಜೋ಼ಡೆ ಚಾ಼ಲಿಲಿದಾ.
12 ಇನಿ ರಾಜ್ಯ ಅಜು಼ ಮಹಿಮೆಮ ವಾಟೊಲ್ಯವಾನಖ್ಹಾಜೆ ಬುಲೈರಾಖ್ಯೊಸ್ತೆ ದೇವ್ನಖ್ಹಾಮ್ಣೆ ಬರೋಬರ್‌ಥಿ ಜಿವ್ಣು ಕರ‍್ನುಕರಿ ಬೋಲಿದಿದಾ. ಆ ಅಖ್ಖು ತುಮುನ ಮಾಲುಮ್.
13 ಅಜು಼ ತುಮೆ ಹಮಾರೇಥಿ ದೇವ್ನಿ ವಚನ್ನ ಖ್ಹಮ್‍ಜ್ಯಾತೆ ತದೆ, ಅದ್ಮಿನಿ ವಚನ್ ಕರಿ ಸೋಚ್ನುನಾತೆ, ದೇವ್‍ನೀಸ್ ಕರಿ ಮಾನೀನ್ ಇನಖ್ಹಾಜೇಬಿ ಹಮೆ ಲಗತ್ತರ್ ದೇವ್ನ ಧನ್ಯವಾದ್ ಕರಿಯೇಸ್. ಯೋ ಖ್ಹಾಚ಼ಮಾಬಿ ದೇವ್‍ನೀಸ್ ವಚನ್. ಯೊ ವಚನ್ ನಂಬವಾಳ ತುಮಾರಾಮ ಶಕಥ್ಥಿ ಕಾಮ್ ಚ಼ಲಾವಸ್.
14 ಹಮಾರ ಭೈಯೇ ಭೇನೆವೊ, ತುಮೆ ಯೂದಾಯಮ ಕ್ರಿಸ್ತ ಯೇಸುಮ ಛಾ಼ತೆ ದೇವ್ನಿ ಖ್ಹಾಚಿ ಸಬೇನಿಮತ್‌ ಚಾ಼ಲಿರಾಖ್ಯಾಸ್‌. ಇವ್ಣೆ ಯೆಹೂದ್ಯರ್‌ಥಿ ಖ್ಹಮಾಳ್ಯುತೆ ಖ್ಹತಾಪ್ಣಿನ, ತುಮೆ ತುಮಾರ ಶೊಂತ್ ಅದ್ಮಿಥಿ ಖ್ಹಮಾಳಿರಾಖ್ಯಾಸ್‌.
15 ಇವ್ಣೆ ಪ್ರಭು ಹುಯಿರ‍್ಹೋತೆ ಯೇಸುನಾಬಿ, ಖ್ಹಾರ ಪ್ರವಾದಿನಾಬಿ ಮರೈನಾಖ್ಯು ಅಜು಼ ಹಮುನಾಬಿ ನಖ್ಹಾಡಿದಿದು. ಇವ್ಣೆ ದೇವ್ನ ಖ್ಹಾಜಾ಼ತೆ ಇಮ್‌ ಕರಾವಾಳು ಕಾಹೆ! ಅಜು಼ ಇವ್ಣೆ ತಮಾಮ್‌ ಅದ್ಮಿನ ಖೂಮ್ನ ದುಶ್‌ಮನ್‌ ಹುಯಿರ್ಹಾಸ್!
16 ಯೆಹೂದ್ಯರ್‌ಕಾಹೆತೆ ಅದ್ಮಿನ ರಕ್ಷಣೆ ಮಳಾದೆ ಕರಿ ಸುವಾರ್ತೆನ ಬೋಲ್‍ಯೇಸ್ತೆ ಹಮುನಾಬಿ ಭೀರಾಕ್‌ಣು ಕರಿ ಕರ‍್ಯು. ಅಮ್ ಕರಾಥಿ ಇವ್ಣು ಪಾಪ್ನು ಕಾಮ್‌ಖ್ಹಾರು ಭರೈನ್ ಉಛ಼್‌ಳಾಯು. ಕತೋಬಿ ದೇವ್‌ನೊ ಇರಾದೊ ಇವ್ಣಾಪರ್ ಪೂರ ಹೋತುಹುಯಿನ್ ಆಯೊ!
ಪೌಲನೆ ಥೆಸಲೋನಿಕವಾಳಾನ ದೇಖಾನ ಆಖ್ಹ್ ಕರ‍್ಯುತೆ
17 ಮಾರ ಭೈಯೇ ಭೇನೆವೊ, ಹಮೆ ಥೋಡದನ್ ತುಮಾರೇಥಿ ದೂರ್ ರ‍್ಹಿಯತೋಬಿ ಮನ್‌ಮ ದೂರ್ ಕರ‍್ಯಕೊಂತೆ ತುಮೂನ ಆಮಖ್ಹಾಮೆ ದೇಕ್ಣು ಕರಿ ಹರ್‌ಖ್ಹೀನ್ ಘಣು ಕೋಶಿಶ್ ಕರ‍್ಯಾ.
18 ಶನಕತೊ ಆವಾನ ಹಮೂನ ಮನ್ ಥೂ, ಪೌಲ ಹುಯಿರ‍್ಹೋತೆ ಮೇಸ್ ಕೆತ್ರೇಕಿಹಲ್ಲ ಪಾಛು಼ ತುಮಾರಕನ ಆವ್ಣುಕರಿ ಕರ‍್ಯೊ, ಕತೋಬಿ ಶೈತಾನ್ನೆ ಆವಾನ ಮ್ಹೇಲ್ಯೊಕೊಯ್ನಿ.
19 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಆವಾನಿ ವಖ್ಹತ್‌ಮ, ಇನಖ್ಹಾಮ್ಣೆ ಹಮಾರಿ ಭರೋಖ್ಹೊ, ಲ್ಹಾಯಕ್, ಖ್ಹುಶಿ, ಅಜು಼ ಹಮೆ ಖ್ಹರಾವನಿ ಕಿರೀಟ್‌ಬಿ ಕೋಣ್? ತುಮೇಸ್ ಕಾಹೆಕಿ ಶು.
20 ಖ್ಹಾಚಮಾಬಿ ತುಮೇಸ್ ಹಮಾರಿ ಇಜ಼್ಜತ್‌ಬಿ, ಖ್ಹುಶಿಬಿ ಹುಯಿರ್ಹಾಸ್.