ಪೌಲನು ಕೊಲೊಸ್ಸೆಯರಿಗೆ ಬರೆದ ಪತ್ರಿಕೆ
ಪೌಲನೆ ಕೊಲೊಸ್ಸೆವಾಳಾನ ಲೀಖ್ಯೋತೆ ಚಿಟ್ಟಿ
ಮಾಲುಮ್ ಕರಾನು
ಕೊಲೊಸ್ಸೆವಾಳಾನ ಲೀಖ್ಯೋತೆ ಆ ಚಿಟ್ಟಿನ ಅಪೊಸ್ತಲ ಪೌಲನೆಲಿಖ್ಯೊ. 1:1 ಇನು ಆ ಚಿಟ್ಟಿ ಕ್ರಿಸ್ತನಿ ಪೈದಾಖ್ಹ್‌ನ ವಾರ್ ಘಣೇಥಿ ತೀನಿಖ್ಹ್‌ನು ವರಖ್ಹ್‌ಮ ಲೀಖಿರಾಖ್ಯೊಸ್ ಆ ವೇಳ್ಮ ಯೊ ಘಣೇಥಿ ರೋಮ್ನಿ ಖ್ಹಾರ್ಕೊಟ್‌ಮ ಥೊ. ಕೊಲೊಸ್ಸೆವಾಳಾನ ಲೀಖ್ಯುತೆ ಚಿಟ್ಟಿಬಿ, ಜೋ಼ಡ್ಮ ಎಫೆಸವಾಳನ ಲೀಖ್ಯುತೆ ಚಿಟ್ಟಿಬಿ, ಅಜು಼ ಫೀಲೆಮೋನ್‍ನ ಲೀಖ್ಯುತೆ ಚಿಟ್ಟಿಬಿ ಆ ಅಖ್ಖಾನ ಖ್ಹಾರ್ಕೊಟ್‌ನಿ ಚಿಟ್ಟಿ ಕರಿ ಬೋಲಸ್. ಶನಕತೊ ಆ ಚಿಟ್ಟಿ ಲೀಖಾನಿ ವಖ್ಹ್‌ತೆ ಯೋ ಖ್ಹಾರ್ಕೊಟ್‌ಮ ಥೊ. ಆ ಚಿಟ್ಟಿನ ಯೋ ಕೊಲೊಸ್ಸೆ ಖ್ಹಯೇರ‍್ನ ಸಬೇನ ಲೀಖಿರಾಖ್ಯೊಸ್. 2:1 ವಚನ್‌ಮ ಬೋಲೈರೂಸ್ತೆ ತಿಮ್ ಕೊಲೊಸ್ಸೆ ಸಬೇನ ಪೌಲನೆ ಶುರು ಕರ‍್ಯೊಥೊಕೊಯ್ನಿ. ಕತೋಬಿ ಇನಿ ಬಾರೇಮ ಥೋಡಿ ಜಿಮ್ಮೆದಾರಿನ ಪಾಡಿರಾಖ್ಯೊಥೊ. ಎಫಪ್ರಾಸನೆ ಕೊಲೊಸ್ಸೆವಾಳೊ ಹುಯಿರೊಥೋತೆ ಇನಖ್ಹಾಜೆ ಇನೇಸ್‌ ಆ ಸಬೆನ ಭಾಂದ್ಯೊ ಕರಿ ಬೋಲೆಜಾ಼ಯ್.
ಪೌಲನೆ ಕೊಲೊಸ್ಸೆ ಸಬೇಮ ಥೂತೆ ಥೋಡಿ ಝೂ಼ಟಿ ಬೋಧನೆ ಚಾ಼ಲಸ್ ಕರಿ ಬೋಲಾನಿ ಬಾರೇಮ ಬರೋಬರ್‌ಥಿ ಖ್ಹಯಾಲ್ ಕರೀನ್ ಲೀಖಿರಾಖ್ಯೊಸ್. ಆ ಚಿಟ್ಟೀಮ ಘಣೇಥಿ ಆ ವಿಚಾರ‍್ನಿ ಬಾರೇಮಸ್ ಲೀಖಿರಾಖ್ಯೊಸ್. ಯೆಹೂದ್ಯ ವಿಶ್ವಾಸಿಮ ಏಕ್‌ ಟೋಳ್‌ ಥು. ಇವ್ಣೆ ಯೆಹೂದ್ಯರ್‌ಕಾಹೆತೆ ವಿಶ್ವಾಸಿನ ಜೂ಼ನಿ ಒಪ್ಪಂದಾನು ಯೆಹೂದ್ಯರ್‌ನ ಖಾನುಲ್‌ ಪಾಡಿಚಾ಼ಲನ ಜು಼ಲಮ್‌ ಕರುಕರ್ತುಥು. ಘಣೇಥಿ ಖ್ಹತ್ನ ಕರೈಲ್ಯಾವನಿ ಬಾರೇಮ. ಪೌಲನೆ ಬರೋಬರ್‌ಥಿ ವಿಶ್ವಾಸಿಖ್ಹಾರು ದೇವ್‍ಥಿ ಸ್ವೀಕಾರ್ ಕರಿಲ್ಯಾವಾನ ಕ್ರಿಸ್ತನ ಮ್ಹೇಲಿನ್ ಬಿಜು಼ ಖೆವಾನಿ ಅಜು಼ ಖಿವಿ ಜ಼ರೂರತ್ ಕೊಯ್ನಿ. 1:15-20 ಅಜು಼ ಅದ್ಮಿವ್‌ನಾಸ್ ಹೋಣುತೆ ಬೋಧನೆ ಶಾತ್ಬಿ ಫಾಯಿದೊಕೊಯ್ನಿಕರಿ ಲೀಖಸ್ 2:8
ಕಾಡಿದೇಖೊ
1. ಕೊಲೊಸ್ಸೆ ಸಬೆವಾಳನ ಖ್ಹಲಾಮ್ ಕರ್ತೊಹುಯಿನ್ ಚಿಟ್ಟಿನ ಶುರುಕರಸ್ 1:1-2
2. ಇನಕೇಡೆಥು ಯೋ ಕ್ರಿಸ್ತನು ಭಡಪ್ಪಣ್ಣಿ ಬಾರೇಮ ಕತೊ ವಿಶೇಷ್‌ಥಿ ಕೊಲೊಸ್ಸೆಮ ಥೂತೆ ಝೂ಼ಟಿ ಬೋಧನೆನ ಫೇಡ್‍ದ್ಯವಾನಿ ಬಾರೇಮ ಲೀಖಸ್ 1:3—3:4
3. ಪೌಲ ಕೈಏಕ್ ಚಿಟ್ಟೀಮ ಛಾತೆತಿಮ್, ಇನೆ ಚಿಟ್ಟಿನು ಆಧಾಯೆತ್ರು ಭಾಗ್‌ ವಿಶ್ವಾಸಿನು ಜಿವ್ಣು ಜಿವಾನ ಖ್ಹಾಜೆ ಥೋಡು ಘಟ್‍ಥಿ ಬೋಲಿನ್ ವಾಟ್‌ ವತಾಳಸ್. 3:5—4:6
4. ಪೌಲನೆ ಖ್ಹಲಾಮ್ ಕರ್ತೊಹುಯಿನ್ ಅಜು಼ ಚಿಟ್ಟಿನ ಅಲಕ್ ಸಬೇನ ಜೋ಼ರೇಖ್ಹು ಫಡಾನಖ್ಹಾಜೆ ಖ್ಹಂಜ಼್‌ಕಾರ್‌ ದೇತೊಹುಯಿನ್ ಆಚಿಟ್ಟಿನ ಖ್ಹತಮ್ ಕರಸ್ 4:7-18
1
1 ದೇವ್ನಿ ಖ್ಹೂಜ಼್‌ನಿ ಘೋಣಿ ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೌಲಬಿ ಭೈಹುಯಿರ‍್ಹೊತೆ ತಿಮೊಥೆ
2 ಕೊಲೊಸ್ಸೆಮ ಕ್ರಿಸ್ತಮಛಾ಼ತೆ ಪರಿಶುದ್ಧರ್‌ನ ಅಜು಼ ವಿಶ್ವಾಸ್‌ವಾಳ ಹುಯಿರ‍್ಹಾತೆ ಭೈಯೇವ್ನ ಅಪ್ಣೊ ಬಾ ದೇವ್‍ಥಿಬಿ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
ಧನ್ಯವಾದ್ನಿ ಪ್ರಾರ್ಥನೆ
3 ಹಮೆ ತುಮಾರಖ್ಹಾಜೆ ಪ್ರಾರ್ಥನೆಕರಾನಿ ಖ್ಹಾರಿ ವಖ್ಹತ್‌ಮ ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ಬಾ ದೇವ್ನ ಧನ್ಯವಾದ್ ಕರಿಯೇಸ್.
4 ಶನಕತೊ ಕ್ರಿಸ್ತ ಯೇಸುಮ ತುಮೆ ರಾಖಿರಾಖ್ಯತೆ ವಿಶ್ವಾಸ್ ಅಜು಼ ದೇವ್ನ ಅದ್ಮಿವ್‌ಪರ್ ಛಾ಼ತೆ ತುಮಾರಿ ಲಾಡ್ನ ಬಾರೇಮ ಹಮೆ ಖ್ಹಮ್‌ಜಿರಾಖ್ಯಾಸ್‌.
5 ಪರ್ಲೋಕ್ಮ ತುಮಾರಖ್ಹಾಜೆ ಭರೋಖ್ಹಾನಿ ಬಾರೇಮ ಸುವಾರ್ತೆ ಖ್ಹಾಚಿ ವಚನ್‍ಥಿ ತುಮೆ ಪಹಿಲೇಸ್ ಖ್ಹಮ್‌ಜಿರಾಖ್ಯಾಸ್‌.
6 ತುಮೆ ಖ್ಹಾಚಾಮ ದೇವ್ನಿ ವಾರ್‌ಖ್ಹಾನ ಖ್ಹಮ್‌ಜಿನ್‌ ಮಾಲುಮ್ ಕರಿರಾಖ್ಯಾತೆ ದನ್‌ಥು ತುಮಾರಕನ ಆಯುತೆ ಯೋ ಸುವಾರ್ತೆನ ಜಗತ್‌ಮಖ್ಹಾರು ಫಲ್‍ದಿದೂತೆ ತಿಮ್ಮಸ್ ತುಮಾರಮಾಬಿ ಫಲ್‍ದೀನ್‍ ಭಢುಕರಸ್.
7 ಅನ ತುಮೆ ಹಮಾರ ಜೋ಼ಡ್ಮ ಪ್ಯಾರ್‌ನೊ ಸೇವಕ್ ಹುಯಿರ‍್ಹೋತೆ ಎಪಫ್ರಥಿ ಶಿಕಿಲಿದ. ಯೋ ತುಮಾರ ಖ್ಹಾಜೆ ಕ್ರಿಸ್ತನೊ ವಿಶ್ವಾಸ್‌ವಾಳೊ ಸೇವಕ್ ಹುಯಿರ‍್ಹೋಸ್.
8 ಪವಿತ್ರಾತ್ಮಮ ಛಾ಼ತೆ ತುಮಾರಿ ಪ್ಯಾರ್ ಮನ ಖ್ಹಮ್‌ಜಾ಼ಡ್ಯೊತೆ ಇನೇಸ್‌.
9 ಇನಖ್ಹಾಜೆ ಹಮೇಬಿ ತುಮಾರಿ ಬಾರೇಮ ಖ್ಹಮ್‍ಜ್ಯಾತೆ ದನ್‌ಥು ತುಮಾರಖ್ಹಾಜೆ ಪ್ರಾರ್ಥನೆಕರಾನು ಭೀರಾಖ್ಯಕೊಂತೆ ತುಮೆ ಹರೇಕ್ ಆತ್ಮೀಕ ಖ್ಹಯಾಲ್‌ಥೀಬಿ ಅಕ್ಕಲ್‍ಥಿ ಭರೈಜಾ಼ವ್ಣು ಕರಿ ದೇವ್ನ ಗಿಂಗೈಲೆವ್‌ ಕರಿಯೇಸ್.
10 ಪ್ರಭುನ ಪಸಂದ್ ಹುವಾನಿ ಪರಕ್ಮ ಖ್ಹಾರಿಸ್ ತರಾಮ ತುಮೆ ಲ್ಹಾಯೇಕ್ ಹುಯಿನ್ ಜಿವ್ಣುಕರ‍್ನು ಕರೀಬಿ ಹರೇಕ್‍ಥರಾನು ಅಛ಼್ಛುಕಾಮ್ನ ಕರ್ತುಹುಯಿನ್ ದೇವ್ನಿ ಅಕ್ಕಲ್‌ಮ ಭಡ್ತುಜಾ಼ವ್ಣು ಕರಿ,
11 ಇನಿ ಮಹಿಮೆನಿ ಶಕತ್ನಿ ಪರಕ್ಮ ಖ್ಹಾರೀಸ್‍ ತಾಖತ್ನಿ ಶಕತ್ ಲೀನ್, ಖ್ಹಾರೀಸ್‍ ತರಾಮ ಖ್ಹಮಾಳಥೀಬಿ ಅಜು಼ ಘಣಿ ಖ್ಹುಶಿಥಿಬಿ ರ‍್ಹಾವವಾಳ ಕರೀಬಿ,
12 ದೇವ್ನ ವಿಶ್ವಾಸಿಯೇವ್ನ ಉಜಾ಼ಳಮ ಛಾ಼ತೆ ಖ್ಹಾರಸ್‍ಮ ಭಾಗ್‍ಲ್ಯಾವಾನ ಖ್ಹಾಜೆ ಅಪ್ಣುನ ಲ್ಹಾಯೇಕ್ ಕರಿರಾಖ್ಯೋತೆ ಬಾ ದೇವ್ನ ಶಂತೋಖ್ಹ್‌ ಥಿ ಧನ್ಯವಾದ್ ಕರಿಯೇಸ್.
13 ದೇವ್ನೆ ಅಪ್ಣುನ ಅಂಧಕಾರ‍್ನಿ ಅದಿಕಾರ್‌ಮಾಥು ಛೋ಼ಡೈನ್ ಇನ ಪ್ಯಾರ್‌ನ ಛಿಯ್ಯಾನಿ ರಾಜ್ಯಮ ಮಳೈಲಿದೊ.
14 ಆ ಛಿಯ್ಯಾಥಿ ಅಪ್ಣ ಪಾಪ್ನ ಮಾಪಿ ಮಳ್ಯು. ಛುಟ್ಕಾರ್‌ಹುಯು.
ಕ್ರಿಸ್ತನು ಅದ್ಮಿ ಅಜು಼ ಇನು ಕಾಮ್
15 ಕ್ರಿಸ್ತ ದೇಖಾವಕೊಂತೆ ದೇವ್‌ನೊ ರೂಪ್, ಖ್ಹಾರೀಸ್‍ ಉಬ್‍ಜಾ಼ವ್ಣಿಮ ಫೈಲೋಟೋ ಛಿಯ್ಯೋಬಿ ಹುಯಿರ‍್ಹೋಸ್.
16 ಶನಕತೊ ಜ಼ಮೀನ್ಮ ಛಾ಼ತೆ ಪರ್ಲೋಕ್ಮ ಛಾ಼ತೆ, ದೆಖಾವತೆ ಬಿಣ್‍ದೆಖಾವಾತೆ ಖ್ಹಾರೂಸ್, ಸಿಂಹಾಸನ್ ರ‍್ಹವೊ, ದೇಖ್ಹ್‌ಮ ರ‍್ಹವಾನಿ ಕಾನೂಲ್‌ ರ‍್ಹವೊ, ಅದಿಕಾರಿಖ್ಹಾರು ರ‍್ಹವೊ, ಇನೇಥಿ ಉಬ್‍ಜು. ಖ್ಹಾರೂಸ್‍ಬಿ ಇನೇಥಿಸ್, ಇನಖ್ಹಾಜೇಸ್ ಉಬ್‍ಜೈ಼ಗಯು.
17 ಯೋ ಖ್ಹಾರೇಥಿಸ್ ಪಹಿಲೆ ಥೋತೆ, ಇನಾಮ ತಮಾಮಸ್ ಛಾ಼.
18 ಸಬೆಕರಿ ಶರೀರ್‌ನ ಯೋ ಮುಡ್‌ಕ್ಯು ಹುಯಿರ‍್ಹೋಸ್. ಯೋಸ್ ಪಹಿಲೊ ಹುಯಿರ‍್ಹಿನ್ ಖ್ಹಾರಮಸ್ ಪಹಿಲೆ ರ‍್ಹವಾಳೊ ಹುಯಿನ್ ಯೋ ಮರ‍್ಯಾಹುಯಾಮಾಥು ಆಯೋತೆ ಫೈಲೋಟೊಬಿ ಹುಯಿರ‍್ಹೊಸ್.
19 ಶನಕತೊ ಇನಾಮಸ್ ಅಖ್ಖು ರ‍್ಹೇವ್ಣುಕರಿ,
20 ಅಜು಼ ಯೋ ಶಿಲ್‌ಬೇಪರ್ ರಂಚ್ಯೊತೆ ಲ್ಹೊಯಿಥಿ ಯೋ ಸಮಾಧಾನ್ನಬಣೈನ್‍ ಧರ್ತಿಬಿ ಪರಲೋಕ್‌ಮ ಅಖ್ಖಾಸ್ನ ಛಿಯ್ಯಾಥಿಸ್ ಇನಿ ಜೋ಼ಡ್ಮ ರಾಜಿಕರಾನು ಬಾ ದೇವ್ನಿ ಖ್ಹೂಜ಼್ ಹುಯಿರ‍್ಹೀಥಿ.
21 ಆನಾಹುಯಿನ್ ಏಕ್‌ಹಗಾಮ್ಮ ಯೆಹೂದ್ಯರ್ ಕಾಹೇತೇಬಿ ತುಮೆ ಖರಾಬ್ ಸೋಚ್‌ವಾಳಾಬಿ ವಹೇರ್‌ನೊ ದಿಲ್‌ವಾಳಹುಯಿನ್ ದೇವ್‍ಥಿ ವಿರೋದಿಹುಯಿನ್ ದೂರ್ ಹುಯಿರ‍್ಹಾಸ್.
22 ಕತೋಬಿ ಇನ ಶರೀರ್‌ನು ಮರಣ್‍ಥಿ ಹಮ್ಕೆ ಯೋ ತುಮುನ ರಾಜಿ ಕರಿರಾಖ್ಯೋಸ್. ದೇವ್ ಇನಖ್ಹಾಮ್ಣೆ ತುಮುನ ಪರಿಶುದ್ಧಬಿ, ದೋಷ್‌ಕೊಂತೇಬಿ, ಅಪರಾದ್‌ಕೊಂತೆ, ಭೀರಾಕ್ಣುಕರಿ ಅಮ್ ಕರಿರಾಖ್ಯೊಸ್.
23 ಆಕಾಶ್‍ನ ಹೇಟ್‍ಛಾ಼ತೆ ತಮಾಮ್‌ ಉಬ್‍ಜಾ಼ವ್ಣಿನ ಅಜು಼ ತುಮೆ ಬೋಲಿರಾಖ್ಯಥಾತೆ ಸುವಾರ್ತೆನಿ ಆಖ್ಹ್‌ಥಿ ಧಕೇಲೈ ನಾಜಾ಼ವ್ಣುತೆ ಘಟ್‍ಥಿ ವಿಶ್ವಾಸ್ಮ ಭೀರ‍್ಯಾವಾಳ ಹುಯಿರ‍್ಹಾತೊ, ತುಮೆ ಹದಿಪಾಯ ಅಜು಼ ಘಟ್‍ಥಿ ಭೀರಿಶು. ಆಸ್ ಸುವಾರ್ತೆನ ಪೌಲಕರಿ ಮೆ ಸೇವಕ್ ಹುಯಿರ‍್ಹೋಸ್.
ಸಬೇನೊ ಸೇವಕ್ ಹುಯಿನ್ ಪೌಲನು ಕಾಮ್
24 ಹಮ್ಕೆ ಮೇ ತುಮಾರಖ್ಹಾಜೆ ಪಡುಕರೂತೆ ಖ್ಹತಾಪ್ಣಿಮ ಮನ ಖುಷಿ ಛಾ಼. ಕ್ರಿಸ್ತನು ವದೇಖ್ಹ್‌ಮ ಜ಼ರೂರತ್ ಛಾತೆ ಇನ ಸಬೆಕರಿ ಬೋಲಾನ ಶರೀರ್‌ನಖ್ಹಾಜೆ ಮೆ ಮಾರ ಶರೀರ್‌ಮ ಖ್ಹರ್ತಿಕರೂಸ್.
25 ದೇವ್ನಿ ಖ್ಹೂಜ಼್‌ನಿತರ ತುಮಾರ ಫಾಯಿದಾನಖ್ಹಾಜೆ ಮನ ದೆವಾಯುತೆ ದೇವ್ನ ಕಾಮ್ನು ಜಿಮ್ಮೆದಾರಿ ಕಿಮ್ಕಿತಿಮ್ ದೇವ್ನು ವಚನ್ನ ತುಮುನ ಬೋಲಾನ ಮೇ ಸಬೇನ ಸೇವಕ್ ಹುಯೊ.
26 ಯೋ ಪಾಛ಼್‌ಲ್ಯಾ ಹಗಾಮ್‌ಥೀಬಿ, ಜ಼ಗ್‍ಜ಼ಮಾನೇಥೀಬಿ, ಓಠೆಹುಯಿನ್ ಮ್ಹೇಲೈರ‍್ಹೂತೆ ಗಪ್ಲತ್‌ನಿ ವಾತೆಖ್ಹಾರು ಕತೋಬಿ ಹಮ್ಕೆ ದೇವ್ನ ಅದ್ಮಿವ್‌ನ ಬೋಲೈರ‍್ಹೂಸ್.
27 ಯೆಹೂದ್ಯರ್‌ಕಾಹೆತೆ ಅದ್ಮೆವ್‍ಮ ಆ ಮಾಯ್ನನು ಮಹಿಮೆನಿ ಶಕತ್ ಕೆತ್ರೆಕರಿ ದೇವ್ನೆ ಇನ ಅದ್ಮಿವ್‌ನ ಭಡ್ಕಾವನ ಖ್ಹೂಜ಼್ ಕರ‍್ಯೊ. ಆ ಮಾಯ್ನೊ ಶಾತ್‍ಕತೊ ಮಹಿಮೆನು ಭರೋಖ್ಹಾನ ಆಧಾರ್ ಹುಯಿರೊಸ್ತೆ ಕ್ರಿಸ್ತಸ್ ತುಮಾರಮ ಛಾ಼.
28 ಕ್ರಿಸ್ತ ಯೇಸುಮ ಹರೇಕ್‌ಜ಼ಣಾನಬಿ ಝೇತಾವ್‌ತಹುಯಿನ್ ಖ್ಹಾರೀಸ್‍ ಅಕ್ಕಲ್‌ಮ ಹರೇಕ್‌ಜ಼ಣಾನಬಿ ಬೋಧನೆ ಕರ್ತೊಹುಯಿನ್ ಪೂರ ಗ್ಯಾನ್ ದೀನ್ ದೇವ್ನ ಖ್ಹಾಮ್ಣೆ ಚಾ಼ತುರ್ ಕರೀನ್ ಭೀರಾಖನಖ್ಹಾಜೆ ಕೋಶಿಶ್ ಕರುಕರೆಸ್.
29 ಮಾರಾಮ ಕಾಮ್ ಕರಾನಿ ದೇವ್ನಿ ಶಕಥ್ಥಿ ಅನಖ್ಹಾಜೆಸ್ ಮ್ಹಿನತ್ ಕರೀನ್ ಲಡೂಸ್.