7
1 ಪ್ಯಾರ್‌ನ ದೋಸ್ತಿವೊ ಅಪ್ಣೆ ದೇವ್‍ಥಿ ವಾಗ್ದಾನ್ ಲೀರಾಖ್ಯಾತೆ ಇನಾಖ್ಹಾಜೆ ಶರೀರ್ ಆತ್ಮಮಾಥು ಗಲೀಜ಼್‌ನ ಕಾಡಿನಾಖಿನ್ ಅಪ್ಣುನ ಶುದ್ದ ಕರಿಲಿನ್ ಬಿಜು಼ ದೇವ್‍ಮಾ ಡರ್‌ಥಿ ರ‍್ಹೀನ್ ಪರಿಶುದ್ದ ಜಿವ್ಣು ಚ಼ಲಾವಾನ ಕೋಶಿಶ್ ಕರೀಯೆ.
ಪೌಲನಿ ಖ್ಹುಶಿ
2 ತುಮಾರ ದಿಲ್ಮ ಹಮೂನ ಝ಼ಗೊದೆವೋ; ಹಮೆ ತುಮಾರಮ ಕಿನಾಬಿ ಅನ್ಯಾಯ್‌ ಕರ‍್ಯಾಕೊಯ್ನಿ, ಕಿನಾಬಿ ಕೇಡ್ ಕರ‍್ಯಾಕೊಯ್ನಿ, ಕಿನಾಬಿ ಠಗಾಯಕೊಯ್ನಿ.
3 ತುಮಾರಪರ್ ಗಲ್ತಿನಾಕ್‍ನು ಕರಿ ಮೇ ಅನ ಬೋಲುಕರು ಕೊಯ್ನಿ ಶನಕತೊ ತುಮಾರಿ ಜೋ಼ಡ್ಮ ಮರಾನಬಿ ಜಿವಾನಬಿ ತುಮೆ ಮಾರ ದಿಲ್ಮಛಾ಼ ಕರಿ ಮೇ ಪಹಿಲೇಸ್ ಬೋಲ್ಯೊಥೋನಿ.
4 ತುಮಾರಿ ಜೋ಼ಡ್ಮ ವಾತ್‍ಬೋಲನ ಘಣು ಧಿಲ್‍ಪತ್‍ಬಿ ತುಮಾರಿ ಬಾರೇಮ ಮನ ಘಣು ಭರೋಖ್ಹೊ ಛಾ಼; ಮೇ ಧಿಲ್‌ಪತ್‌ಥಿ ಭರೈನ್ ಅಪ್ಣುನ ಉಶೆತೆ ಖ್ಹಾರೀಸ್‍ ಖ್ಹತಾಪ್ಣಿಮ ಘಣೇಥಿ ಘಣು ಖ್ಹುಶಿಮ ಛೂ಼.
5 ಹಮೆ ಮೆಕೆದೋನ್ಯನ ಆಯಾತೆ ತದೇಬಿ ಅಪ್ಣ ಶರೀರ್‌ನ ಅರಾಮಸ್‍ ಕೋಥೂನಿ. ಕತೋಬಿ ಖ್ಹಾರೀಸ್‍ ಬಾಜು಼ಮ ಹಮೂನ ಖ್ಹತಾಪ್ಣಿಥು. ಭಾರ್‌ಲಡೈ, ಮಹಿಡರ್ ಥು;
6 ಕತೋಬಿ ಕಮ್‍ಜೋ಼ರಿ ರ‍್ಹಾವಾಳನ ಸಮಾಧಾನ್‍ ದ್ಯವಾಳೂ ದೇವ್ ತೀತನ ಆವಾಖ್ಹರ್ಕು ಕರೀನ್ ಹಮೂನ ಸಮಾಧಾನ್‍ ಕರ‍್ಯೊ.
7 ಇನ ಬುಲಾವ್‍ಣೆಥಿ ಖಲಿಕಾಹೆತೆ, ತುಮಾರೇಥಿ ಯೋ ಜಾ಼ಖ್ಹತ್ ಸಮಾಧಾನ್‍ ಹುಯೋಕರೀಬಿ, ತುಮಾರಿ ಮಹಾನ್ ಪ್ಯಾರ್, ತುಮಾರಿ ದುಖ್, ಮಾರಪರ್ ಛಾ಼ತೆ ತುಮಾರಿ ಆಖ್ಹ್ ಆ ಅಖ್ಖು ಹಮುನ ಬೋಲಾಖ್ಹತರ್ ಮೇ ಬಿಜೂ಼ಬಿ ಜಾ಼ಖ್ಹತ್ ಖ್ಹುಶಿಕರ‍್ಯೊ.
8 ಮೇ ಲೀಖ್ಯೋತೆ ಚಿಟ್ಟಿ ತುಮುನ ದುಖ್‍ಕಾರಯು ಉಶೇತೋಬಿ ಮನ ವೇಚ಼್‌ಣೆ ಕೊಯ್ನಿ ಯೋ ಚಿಟ್ಟಿ ತುಮುನ ಏಕ್‌ ಘಡಿ ದುಖ್ ಕರಾಯು ಕರಿ ಉಶೇತೋಬಿ ಮೇ ಪಹಿಲೆ ಪಶ್‌ತಾಯೊತೋಬಿ, ಹಮ್ಕೆ ಮೇ ಖುಷಿಕರುಸ್.
9 ತುಮುನ ದುಖ್ ಕರಾಯೋತೆ ಇನಾಖ್ಹಾಜೆ, ಮೇ ಖುಷಿ ಕರ‍್ಯೊಕೊಯ್ನಿ, ತುಮೆ ದುಖ್ ಕರೀನ್ ದಿಲ್ನ ಫರಿಜ಼ವಾನ ಕರಿರಾಖ್ಯತೆ ಇನಾಖ್ಹಾಜೆ ಖ್ಹುಶಿಕರೂಸ್. ದೇವ್ನಿ ‘ಖ್ಹೂಜ಼್‌ನಿ’ ಘೋಣಿ ತುಮೆ ದುಖಿಹುಯ ಇನಾಖ್ಹಾಜೆ ಹಮಾರೇಥಿ ತುಮುನ ಕೆವ್ಹಿ ಪರಕ್‍ಮಾಬಿ ನಷ್ಟ್ ಹುಯುಕೋಯ್ನಿ.
10 ದೇವ್ನಿ ಖ್ಹೂಜ಼್‌ನಿತರ ಹುಯಿರುತೆ ದುಖ್ ದಿಲ್‌ನಾಬಿ, ಜೀವಿತ್‍ನಾಬಿ ಬದ್ಲಾವಸ್ ಆ ಬದ್‍ಲಾವ್ಣಿ ರಕ್ಷಣೆ ಭಣಿ ಚ಼ಲಾವಸ್. ಆ ಮನ್ ಫರಿಜಾ಼ವಾನಿ ಬಾರೇಮ ಅಪ್ಣೆ ಡರ‍್ವಾನು ಶಾತ್ಬಿ ಕೊಯ್ನಿ. ಕತೋಬಿ ಲೋಕ್‍ಥಿ ಆವಾತೆ ದುಖ್ ಮರಣ್ಣ ಬುಲಾವಸ್‌.
11 ತುಮೆ ದೇವ್ನಿ ಮನ್ನಿ ಅನುಸಾರ್ ಲಿದಾತೆ ದುಖ್ ತುಮಾರಮ ಕೆತ್ರುಕ್ಕಿ ಹುಮ್ಮಖ್ಹ್‌ನು ಹುಯಿರುಸ್. ಯೋ ದುಖ್ ತುಮಾರಮ ಘಣು ಮನ್‌ಲಗಾಡವಾಳ ಹುಯಿರ‍್ಹವಾನಿತರ ಕರಿರಾಖ್ಯುಸ್; ತುಮೆ ಗ್ರಿಸ್ತಿಥಿ ಚಾ಼ಲಾನ ಕೆತ್ರೇಕ್ಕಿ ಕೋಶಿಶ್‌ಕರ‍್ಯ, ಕೆತ್ರೇಕ್ಕಿ ಖ್ಹತಾಪ್ಣಿ ಪಡ್ಯ, ಕೆಥ್ರಾ಼ನುಕಿ ಡರ್‌ವತಾಳ್ಯ, ಮಾರಿ ಬಾರೇಮ ವೇಚ಼್‌ಣೆ ಕರಾಖ್ಹರ್ಕು ಕರ‍್ಯು; ಅಪರಾದಿಖ್ಹಾರನ ಖ್ಹತಾವ್ಣುಕರಿ ಆಖ್ಹ್ ಆವಾಖ್ಹರ್ಕು ಕರ‍್ಯು. ಯೊ ತಕ್ಲಿಬ್‍ನಿ ಕೆವ್ಹಿ ಬಾರೆಮಾಬಿ ತುಮೆ ಅಪರಾದಿ ಕೋ ಹುಯಿರ‍್ಹಾಥಾನಿ ಕರಿ ವತಾಳಿಲಿದ.
12 ಮೇ ಯೋ ಚಿಟ್ಟಿ ಲೀಖ್ಯೋತೆ ಗಲತ್‌ ಕರಿರಾಖವಾಳನಖ್ಹಾಜೆ ಕಾಹೆ, ಆ ಗಲತ್‌ಥಿ ದುಖ್‍ಮ ಪಡವಾಳನ ಖ್ಹಾಜೇಬಿ ಕಾಹೆ. ಕತೋಬಿ ಹಮಾರಿ ಬಾರೇಮ ತುಮುನ ಛಾ಼ತೆ ಮೋಟಿ ವೇಚ಼್‌ಣೆನ ತುಮೆ ದೇವ್ನ ಖ್ಹಾಮ್‌ಣೆದೇಖಾನಿತರ ಹೋಣುಕರಿ ಯೋ ಚಿಟ್ಟಿನ ಲೀಖ್ಯೋತೆ.
13 ಇನಖ್ಹಾಜೇಸ್ ಹಮೂನ ಭಾಲಿಮಳೀತೆ, ತುಮೆಅಖ್ಖು ತೀತನ ಮನ್ನ ಜಾ಼ಖ್ಹತ್ ಶಂತೋಖ್ಹ್‌ ಕರ‍್ಯಾತೆದೇಖಿನ್ ಹಮೂನ ಬಿಜೂ಼ಬಿ ಖ್ಹುಶಿಹುಯು,
14 ತೀತನ ಖ್ಹಾಮ್ಣೆ ಮೇ ತುಮುನ ಖ್ಹರಾಯೊ. ಯೋ ಖ್ಹಾಚಕರಿ ತುಮೆ ವತಾಳ್ಯ. ಹಮೆ ತುಮುನ ಬೋಲ್ಯಾತೆ ಹರೇಕ್ ಖ್ಹಾಚ ಹುಯಿರ‍್ಹುಥು. ಹಮೆ ತೀತನ ಖ್ಹಾಮ್ಣೆ ತುಮಾರಿ ಬಾರೇಮ ಬೋಲ್ಯಾತೆ ಖ್ಹರಾವ್ಣಿನಿವಾತೆ ಖ್ಹಾರಿ ಖ್ಹಾಚ ಕರಿ ದೆಖಾಯು.
15 ತುಮೆ ದಿಲ್ಮ ಡರಿನ್ ಕಾಪವಾಳ ಹುಯಿನ್ ಇನಿ ಜೋ಼ಡ್ಮ ಮಳಿಗಾತೆ ಇನಾಮ ತುಮಾರಿ ವಿಧೇಯತೆ ದೆಖಾಯು, ಯೊ ಇನ ಖ್ಹಯಾಲ್ ಕರಿಲ್ಯಾವಾನಿ ವಖ್ಹ್‌ತೆ ತುಮಾರಪರ್ ತೀತನಿ ಪ್ಯಾರ್ ಜಾ಼ಖ್ಹತ್ ಹುಯಿರ‍್ಹೀಸ್.
16 ಖ್ಹಾರೀಸ್‍ ವಾತ್ನಿ ಬಾರೇಮ ತುಮಾರಾಪರ್ ಮನ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಖ್ಹುಶಿಕರೂಸ್.