10
ಪೌಲ ಇನಿ ಸೇವೆನಿ ಬಾರೇಮ ಬೋಲಿಲಿದೋತೆ
1 ಪೌಲ ಅಪ್ಣಕನ ರ‍್ಹಾವಾನಿ ವಖ್ಹತ್‌ಮ ಶೇದೆವ್‌ನಿತರ ಚಾ಼ಲಿಲ್ಯವಾಳೊಬಿ, ತುಮಾರೇಥಿ ದೂರ್‌ರ‍್ಹಾವಾನಿ ವಖ್ಹತ್‌ಮ ಕಠಣ್‌ಥಿಬಿ ಚಾ಼ಲಿಲ್ಯವಾಳೊ ಹುಯಿರ್‍ಹೊಸ್ ಕರಿ ಬೋಲೈಲ್ಯಾವಳೊ ಯೋ ಪೌಲ ಕರಿ ಮೇ ಕ್ರಿಸ್ತನಿ ಶಾಂತಿನದಿಲ್‍ನಾಬಿ ಗೋರ್‌ನಾಬಿ ಯಾದ್‍ಕರ‍್ಲಿನ್,
2 ತುಮುನ ಗಿಂಗೈಲ್ಯವಾನು ಶಾತ್‍ಕತೊ; ಮೇ ತುಮಾರಕನ ಆವಾನಿ ವಖ್ಹತ್‌ಮ ಕಠಣ್‍ಥಿ ಚಾ಼ಲಿಲ್ಯಾವನ ಮನ ವಖ್ಹತ್ ನಕೊದೆವೊ. ಹಮೆ ಜಗತ್‌ವಾಳನಿ ತರ ಜಿವಿಯೇಸ್‍ಕರಿ ಥೋಡು ಜ಼ಣು ಖ್ಹಮ್‍ಜ಼ಸ್ ಇವ್ಣ ಜೋ಼ಡೆ ಹಿಮ್ಮಥ್ಥಿ ರ‍್ಹೇವ್ಣುಕರಿ ಛೂ಼.
3 ಹಮೆ ಲೋಕ್ಮ ಜಿವವಾಳ ರ‍್ಹಯತೋಬಿ ಹಮಾರಿ ಲಡೈ, ಜಗತ್‌ವಾಳನಿ ಜಂಗ್‍ಭೀಡಾವಾಳ ಕಾಹೆ.
4 ಹಮೆ ಜಂಗ್ ಭಿಡಾನಿ ವಖ್ಹ್‌ತೆ ಉಪಯೋಗ್ ಕರ‍್ಯೇತೆ ಕಫ್ಫನ್‌ಖ್ಹಾರು ಆ ಲೋಕ್‍ನು ಕಾಹೆ. ಯೋ ದೇವ್ನಿ ಗಣ್ತಿಮ ತಾಖತ್‍ವಾಳು ಹುಯಿರ‍್ಹಿನ್, ಕೋಟೆವ್ನ ರಡ್‍ಕೈನಾಖವಾಳು ಹುಯಿರ‍್ಹೂಸ್.
5 ಅಪ್ಣಿ ದೇವ್ನಿ ಗ್ಯಾನ್ನ ವಿರೋದ್ ಉಠಾತೆ ಅಹಂಕಾರ್‌ನ ಅಪ್ಣೆ ನಾಶ್‍ಕರಿನ್, ಹರೇಕ್ ಖ್ಹೂಜ್‍ನಾಬಿ ಕ್ರಿಸ್ತನ ಸಮರ್ಪಣ್‌ ಹುವಾನಿತರ ಯೋ ಅಖ್ಖಾನ ಕೊಂಡಿಲಿಯೇ.
6 ತುಮಾರಿ ಹುಕುಮ್ನ ಮಾನಾನು ಪೂರಹುವಾನಿ ಬಾದ್ಮ ಅಖ್ಖುಸ್ ಹುಕುಮ್ನ ನಾ ಮಾನಾನು ದಾವ್‌ ಕಾಡನ ತಯಾರ್ ಹುಯಿರ‍್ಹಾಸ್.
7 ತುಮೆ ಖಲಿ ಭಾರ್‌ ದೆಖಾವನು ದೇಖೊಸ್‍, ಕೋಣ್ ತೋಬಿ ಇನ ಕ್ರಿಸ್ತವಾಳೋಕಿ ಇಮ್ಮಸ್ ಹಮೇಬಿ ಕ್ರಿಸ್ತವಾಳಕರಿ ಮಾಲುಮ್ ಕರಿಲ್ಯಾವಾದೆ.
8 ಹಮೂನ ಛಾ಼ತೆ ಅದಿಕಾರ್‌ನಿ ಬಾರೇಮ ಹಮೆ ಏಕ್‌ ಘಡಿ ಜಾ಼ಖ್ಹತ್ ಖ್ಹರೈಲಿದಾತೋಬಿ ಇಮ್‌ ಖ್ಹರೈಲ್ಯಾವಾಮ ಮೇ ಖ್ಹರ್‌ಮವ್‌ಕೊಯ್ನಿ. ಕತೋಬಿ ಯೋ, ತುಮುನ ರಡ್‍ಕೈನಾಕ್ಣುಕರಿ ಕಾಹೆ. ಭಾಂದ್‍ಣುಕರಿ ಪ್ರಭು ಆ ಅಧಿಕಾರ‍್ನ ಮನ ದೀರಾಖ್ಯೊಸ್.
9 ಮೇ ಚಿಟ್ಟಿಲೀಖಿನ್ ತುಮುನ ಡರವ್‌ಕರುಸ್ ಕರಿ ನಕೊ ಲಾಜ಼್‌ಶು.
10 “ಇನೇಥಿ ಆಯುತೆ ಚಿಟ್ಟಿ ಖ್ಹಾರು ಕಠಣ್‍ನುಬಿ ತಾಖತ್‍ವಾಳುಬಿ ಹುಯಿರ‍್ಹೂಸ್. ಕತೋಬಿ ಶರೀರ್‌ಥಿ ಯೊ ಕಮ್‌ಜೋ಼ರಿಹುಯಿನ್ ಇನಿ ವಾತೆ ಖ್ಹಾರಿ ಕಾಮ್ನಕೊಯ್ನಿತೇಬಿ ಹುಯಿರ‍್ಹಿಶೆ” ಕರಿ ಥೋಡು ಜ಼ಣು ಬೋಲಸ್.
11 ಅಥ್ರಾನವಾಳು, ಹಮೆ ದೂರ್ ರ‍್ಹಾವಾನಿ ವಖ್ಹತ್‌ಮ, ಚಿಟ್ಟಿಯೇಮ ಲೀಖೈರ‍್ಹಿತೆ ವಾತ್ಮ ಕಿಮ್ ಛಿಯೇಕಿ ಖನ್ನೆ ರ‍್ಹವಾನಿವಖ್ಹ್‌ತೆ, ಕಾಮ್ಮಾಬಿ ಎಥ್ರಾನಸ್‍ವಾಳಕರಿ ಮಾಲುಮ್ ಕರಿಲ್ಯಾವಾದೆ.
12 ಇವ್ಣು ಇವ್ಣೇಸ್ ಖ್ಹರೈಲ್ಯಾವಾಳನಿ ಜೋ಼ಡ್ಮ ಹಮೆ ಸಮಾನ್ ಕರಿಲ್ಯಾವಾನ ಕೋಶಿಶ್ ಕರುಕೊಯ್ನಿ. ಇವ್ಣಾಸ್‍ಮ ಇವ್ಣೆ ಆಳ್ತಿ ಕರೀನ್, ಇವ್ಣುನ ಇವ್ಣೇಸ್ ಸಮಾನ್ ಕರಿಲೇಸ್, ಇವ್ಣುನ ಶಾತ್ಬಿ ಮಾಲುಮ್ ಕೊಯ್ನಿಕರಿ, ಆಸ್ ಅಖ್ಖು ಓತಾಳಸ್‍.
13 ಹಮೇ ತೋಬಿ ಹಮಾರಿ ಯೋಗ್ಯತೆನ ಮ್ಹೇಲಿನ್, ಖ್ಹರೈ ಲಿಯೇಕೊಂತೆ ದೇವ್ ಹಮೂನ ದೀರಾಖ್ಯೋತೆ ಹುಕುಮ್ಮ ರ‍್ಹೀನ್ ಖ್ಹರೈಲಿಯೇಸ್. ಆ ಹುಕುಮ್ಮ ರ‍್ಹೀನ್ ತುಮಾರಲಗು ಐರ‍್ಹಾಸ್.
14 ಹಮೆ ಕ್ರಿಸ್ತನಿ ಸುವಾರ್ತೆನ ಬೊಲ್ತಹುಯಿನ್‍ ಅಖ್ಖೇಥಿ ಅಗಾಡಿ ತುಮಾರಕನ ಆಯಾತೆ ಇನಖ್ಹಾಜೆ ತುಮಾರಪರ್ ಅಧಿಕಾರ್‌ಕೊಂತೆ ತಿಮ್, ಹುಕುಮ್ನ ಮ್ಹೇಲಿನ್ ವಳ್ಯಾಜ಼ಯೇ ಕೊಯ್ನಿ. ಕ್ರಿಸ್ತನಿ ಸುವಾರ್ತೆನ ಬೋಲ್ತಾಹುಯಿನ್ ಹಮೆ ತುಮಾರಾಕನ ಐರ‍್ಹಾಸ್‍ನಿ.
15 ಹಮೆ ಮಿತ್‌ಮೀರಿನ್ ಬಿಜೇಕ್‍ಜ಼ಣಾನ ಮಿನ್ಹತ್‍ನ ಫಲ್ನ ಲೀಲಿನ್‌ ಆ ಹಮಾರು ಕರಿ ಬೋಲಿಲ್ಯಾವಾಳ ಕಾಹೆ. ಕತೋಬಿ ಹಮಾರಿ ವಿಶ್ವಾಸ್ ಜಾ಼ಖ್ಹತ್ ಹುವಾತೆ ತಿಮ್ ತುಮಾರೇಥಿ ಹಮಾರು ಕಾಮ್ ಬಿಜೂ಼ಬಿ ಭಡ್ತುಜಾ಼ಶೆ.
16 ಶನಕತೊ ತುಮಾರ ಖ್ಹಯೇರ್‌ಥಿ ದೂರ್ ರ‍್ಹೇಯ್ತೆ ತಬರ್‌ಖಾಮಾಬಿ ಸುವಾರ್ತೆನ ಖ್ಹಮ್‍ಜಾ಼ಡ್ನು ಕರಿ ಆಖ್ಹ್ ಹಮೂನ ಛಾ಼. ಕತೋಬಿ ಬಿಜು಼ ಜ಼ಣು ಕಾಮ್‍ಕರ‍್ಯಾಹುಯ ತಬರ್‌ಖಾಮ ಹಮೆ ಕಾಮ್‍ಕರಿನ್ ಮೋಟಕರಿ ಬೋಲಿಲ್ಯಾವಾನ ಹಮೂನ ಆಖ್ಹ್‌ಕೊಯ್ನಿ.
17 ಕತೋಬಿ ಭಡವಾಳೊ ಪ್ರಭುಮಾಸ್ ಭಡಾದೆ.
18 ತಿನುತ್ಯೋಸ್ ಖ್ಹರೈಲ್ಯಾವಾಳೊ ಯೋಗ್ಯಕಾಹೆ. ಪ್ರಭು ಕಿನ ಖ್ಹರಾವಸ್ಕಿ ಯೋಸ್ ಖ್ಹಾಚಾಮ ಯೋಗ್ಯ.