ಕೊರಿಂಥದವರಿಗೆ ಬರೆದ ಎರಡನೆಯ ಪತ್ರಿಕೆ
ಪೌಲನೆ ಕೊರಿಂಥವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
ಮಾಲುಮ್ ಕರಾನು
ಕ್ರಿಸ್ತ ಪೈದಹುಯಿನ್ 55 ವರಖ್ಹ್‌ಥಿ ಧರೀನ್ 56 ವರಖ್ಹ್‌ನಿ ಬಾದ್‌ಮ ಆ ಚಿಟ್ಟಿ ಅಪೊಸ್ತಲ ಪೌಲನೆ ಕೊರಿಂಥ ಸಬೆವಾಳನ ಲೀಖಿಹುಯು ಹುಯಿರ‍್ಹುಸ್. 1:1 ಆ ಚಿಟ್ಟಿನ ಕೊರಿಂಥ ಸಬೆವಾಳನ ಪೌಲನೆ ಲೀಖಿಹುಯಿ ಬೇನಿ ಚಿಟ್ಟಿ ಹುಯಿರ‍್ಹುಸ್. ಪೌಲನು ಘಣು ಗಂಭೀರ್‌ಥಿ ಕೊರಿಂಥವಾಳಾನ ಪಾಛ಼ಳ್ ಲೀಖಿರಾಖ್ಯೊಥೋತೆ ಚಿಟ್ಟೀಮ ಲೀಖಿರಾಖ್ಯೊಥೊ ಕರಿ ಲೀಖಾಪಟ್‌ವಾಳು ನಂಬಸ್‍. 2:3-4 ವಚನ್‍ಮ ಲೀಖೈರುತೆ ತಿಮ್ ಆ ಚಿಟ್ಟಿನು ಖಿವೂಬಿ ಕಾಗತ್ಅಖ್ಖು ಅಪ್ಣಾಮ ಕೊಯ್ನಿ. 2 ಕೊರಿಂಥ ಚಿಟ್ಟಿ ಘಣೇಥಿ ಪೌಲನೆ ಮೆಸೆಡೋನಿಯಮ ರ‍್ಹವಾನಿವಖ್ಹ್‌ತೆ ಲೀಖಿರಾಖ್ಯೊಸ್ 2:13.
ಕೊರಿಂಥವಾಳಾನ ಲೀಖ್ಯುತೆ ಭೇನಿ ಚಿಟ್ಟಿ ಘಣು ವಿಶೇಷ್‍ನು ಹುಯಿರ‍್ಹುಸ್. ಅನಾಮ ಅಪ್ಣು ಶೊಂತ್‍ನು ಅಜು಼ ದಿಲ್ನ ಮಾಯ್ನೆಥಿ ಭರೈಹುಯಿ ಚಿಟ್ಟಿ ಹುಯಿರ‍್ಹಿಸ್. ಪೌಲನೆ ಕೊರಿಂಥ ಸಬೇನಿ ಬಾರೇಮ ಅನೇಥಿ ಲಿದಿಹುಯಿ ವಾತೆನಿ ಬಾರೇಮ ಘಣು ಖುಷಿನ ಒತಾಳಿದೇಸ್. ಆ ಚಿಟ್ಟೀಮ ಜೂ಼ನಿ ಒಪ್ಪಂದನ ಆಧಾರ್‌ಕರೀನ್ ನವೇಥಿ ಶಿಕಾನು ಘಣು ಛೋ಼ಡಿನ್ ಬೋಲಿರಾಖ್ಯುಸ್ತೆ ಅಪ್ಣೆ ದೇಕ್‍ಯೇಸ್. ವಿಶೇಷ್‌ಥಿ ಪೌಲನೆ ಯೆರೂಸಲೇಮ್‌ನ ವಿಶ್ವಾಸಿಖ್ಹಾರನ ಮದತ್ ಹುವಾನಖ್ಹಾಜೆ ಪೈಶ ಜ಼ಮಕರಾನಿ ಬಾರೇಮ ಪೌಲನೆ ವಾಟ್‌ ವತಾಳಾಮ ಬೋಲಿವತಾಳಸ್ 8—9 ಹಜ಼್ಜ ಥೋಡುಜ಼ಣು ಅಪೊಸ್ತಲ್‌ಖ್ಹಾರು ಸಬೆನ ಭಾರ್‌ ಖ್ಹುಮಾರ್‌ಜ಼ಣು ಅದ್ಮಿವೋನು ಉಪಚಾರ್‌ನ ಲೀನ್‍ ಇವ್ಣುನ ಪೌಲನು ವಿರೋದಿಕರಾನ ದೇಖುಕರ್ತುಥು. ಇವ್ಣೆ ಪೌಲನಿ ಅದಿಕಾರ್‌ನ ಉಪ್ಪರ್ ಕೈರಾಡೋಳೆ ದೇಖುಕರ್ತುಥು. ಬೇನಿ ಕೊರಿಂಥವಾಳಾನ ಲೀಖಿರಾಖ್ಯುತೆ ಚಿಟ್ಟಿನ ಖ್ಹರ್ತಿಮ ಇನೆ ಯೇಸುಕ್ರಿಸ್ತನೊ ಏಕ್‌ ಅಪೊಸ್ತಲನು ಅದಿಕಾರ್‌ನ ಲೀರಾಖ್ಯೊಥೊ ಕರಿ ಬೋಲಾನು ಆ ಹುಕುಮ್ ಘಣೇಥಿ ಘಣು ಖ್ಹಮಜ಼್‌ಮ ಆವಸ್.
ಕಾಡಿದೇಖೊ
1. ಪೌಲನೆ ಸಬೆವಾಳನ ಚಿಟ್ಟಿನ ಫಡಿವತಾಳಾನ ಶುರುಕರಸ್ 1:1-7—1:7
2. ಇನಕೇಡೆಥು ಪೌಲ ಇನಿ ನಿಕ್ಳಿಜಾ಼ವಾನಿ ಉದ್ಧೇಶ್‍ಮ ಇನೆ ಬದಲಾವ್‍ ಕರ‍್ಯೊತೆ ಇನಿ ಬಾರೇಮ ಅಜು಼ ಇನಿ ಪೀಛೆನಿ ಚಿಟ್ಟೀಮ ಇನ ಮಾಲುಮ್ ಹುಯುತೆ ಇನ ಫರೈನ್ ಬೋಲ್ಯೋತೆ. 1:8—7:16
3. ಇನಕೇಡೆಥು ಯೊ ಯೆರೂಸಲೇಮ್‌ನ ವಿಶ್ವಾಸಿನಖ್ಹಾಜೆ ಪೈಶ ಜ಼ಮಕರಾನಿ ಬಾರೇಮ ಇಷಾರ್ಕೊ ದೇಸ್. 8:1—9:15
4. ಖ್ಹರ್ತಿಮ ಪೌಲನೆ ಇನ ಅಪೊಸ್ತಲನಿ ಹಕ್ನಿ ಬಾರೇಮ ಹುಕುಮ್ ಕರ್ತೊಹುಯಿನ್, ಅಜು಼ ಇನಿ ಅಗ್ಲಿ ಚಿಟ್ಟಿನಿ ಬಾರೇಮ ಹೊಷಾರಿ ಕರಸ್. 10:1—13:10
1
1 ದೇವ್ನಿ ಮರ್ಜಿಥಿ ಕ್ರಿಸ್ತ ಯೇಸುನೊ ಏಕ್‍ಜ಼ಣೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ ಅಜು಼ ಇನೊ ವಿಶ್ವಾಸಿ ಭೈ ಹುಯಿರೋತೆ ತಿಮೊಥೆಯ ಕೊರಿಂಥಮ ಛಾ಼ತೆ ದೇವ್ನಿ ಸಬೇನಾಬಿ, ಅಖಾಯ ತಬರ್‌ಖಾಮ ಛಾ಼ತೆ ದೇವ್ನಿ ಅದ್ಮಿಯೇವ್‍ನ ಲೀಖಾನು ಶಾತ್‌ಕತೊ:
2 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥೀಬಿ, ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
ಪೌಲ ದೇವ್ನ ಕರ‍್ಯೊತೆ ಧನ್ಯವಾದ್ ಅಖ್ಖು
3 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೊ ಬಾಬಿ, ದೇವ್‌ಬಿ ಹುಯಿರ‍್ಹೋತೆ ಇನ ಧನ್ಯವಾದ್. ಯೋ ಗೋರ್‌ಥಿ ಭರೈರ‍್ಹಾವಾಳೊ ಬಾಬಿ. ಅಖ್ಖಿ ತರಾಥಿ ಭಾಲಿ ದ್ಯವಾಳೊ ದೇವ್ ಹುಯಿರೋಸ್.
4 ಅಪ್ಣುನ ಖ್ಹತಾಪ್ಣಿ ಹುವಾನಿ ವಖ್ಹತ್‌ಮ ಯೋ ಅಪ್ಣುನ ಸಮಾಧಾನ್ ಕರಸ್; ಖ್ಹತಾಪ್ಣಿಮ ರ‍್ಹೇಯ್ತೆ ಬಿಜ಼ ಅದ್ಮಿನ ಸಮಾಧಾನ್ ಕರಾನ ಅನೇಥಿ ಅಪ್ಣೆ ಜಿನುಬಿ ಶಕತ್‌ವಾಳ ಹುಯೆಸ್. ದೇವ್ ಅಪ್ಣುನ ಸಮಾಧಾನ್ ಕರಾತೆ ತಿಮ್ಮಸ್ ಅಪ್ಣೆ ಜಿನುಬಿ ಇವ್ಣುನ ಸಮಾಧಾನ್ ಕರಾವಾಳ ಹುಯಿರ‍್ಹಿಯೇಸ್.
5 ಅಪ್ಣೆ ಕ್ರಿಸ್ತನಿ ಕೈಯೇಕ್ ದರದ್ಮ ಭಾಗ್‌ಲ್ಯವಾಳ ಹುಯಿರ‍್ಹಿಯೇಸ್. ಅಮ್ನಿಸ್ ಪರಕ್ಮ ಕ್ರಿಸ್ತಥಿ ಜಾ಼ಖ್ಹತ್ ಭಾಲಿಮಾಬಿ ಅಪ್ಣೆ ಭಾಗ್‌ ಹುಯಿರ‍್ಹಿಯೆಸ್.
6 ಅಪ್ಣೆ ಖ್ಹತಾಪ್ಣಿ ಲಿಯೇಸ್ತೆ ಇನಖ್ಹಾಜೆ ತುಮುನ ಸಮಾಧಾನ್‍ಬಿ ರಕ್ಷಣೆಬಿ ಮಳ್‍ಶೆ, ಅಪ್ಣೆ ಸಮಾಧಾನ್‌ಥಿ ರ‍್ಹವಾಳ ಹುಯಿರ‍್ಹಾತೊ ಯೊ ತುಮೂನ ಸಮಾಧಾನ್ನಖ್ಹಾಜೆ ಹುಯಿರ‍್ಹುಸ್. ಮೇ ಲೀರಾಖ್ಯೊತೆ ದರದ್ಮ ತುಮೆ ಶಾಂತಿಥಿ ಖ್ಹಮಾಳಿಲ್ಯವಾನಿಘೊಣಿ ಯೊ ತುಮೂನ ಭಾಲಿದೇಸ್.
7 ತುಮಾರಿ ಬಾರೇಮ ಹಮೂನ ಛಾ಼ತೆ ಭರೋಖ್ಹೊ ಘಟ್‍ಛಾ಼ ಶನಕತೊ ತುಮೆ ಹಮಾರಿ ಭಾಲಿಮಾಬಿ ಭಾಗ್‌ಲ್ಯವಾಳ ಹುಯಿರಾಸ್ತೆ ತಿಮ್ಮಸ್ ಮದತ್‌ಲ್ಯಾವಮಾಬಿ ಭಾಗ್‌ಲ್ಯವಾಳ ಹುಯಿರಾಸ್‍ಕರಿ ಹಮೂನ ಖ್ಹಮಜ಼್‌ಮ ಆಯಿರ‍್ಹುಸ್.
8 ಭೇನೆ ಭೈಯೇವೊ, ಹಮೆ ಏಷ್ಯಾ ತಬರ್‌ಖಾಮ ಖ್ಹಮಾಳ್ಯಾತೆ ಖ್ಹತಾಪ್ಣಿನಿ ಬಾರೇಮ ತುಮೂನ ಮಾಲುಮ್‌ಪಡಾದೆ ಕರಿ ಹಮಾರಿ ಖ್ಹಯಾಲ್ ಹುಯಿರಿಸ್, ಹಿಜ್ಜಾ಼ ಹಮೂನ ಕೈಏಕ್ ಮೋಟಿ ಖ್ಹೂಜ಼್‍ಥಿ. ಯೋ ಖ್ಹೂಜ಼್‌ಖ್ಹಾರಿ ಹಮಾರಿ ಶೊಂತ್ ಶಕಥ್ಥಿಬಿ ಘಣುಥು. ಜಾನ್‍ಖ್ಹಮೇದ್ ಬಚಾ಼ನಿ ವಿಶ್ವಾಸ್ ಹಮೆ ಮ್ಹೆಲಿದಿದ.
9 ಅಪ್ಣೆ ಮರಿಜಾ಼ಶುಕರಿ ಅಪ್ಣೆ ಮಾಲುಮ್ ಕರಿರಾಖ್ಯಥ. ಅಪ್ಣೆ ಅಪ್ಣಪರ್ ಭರೋಖ್ಹೊ ನಾ ರಾಕ್ಣುತೆ ಮರ‍್ಯಾಹುಯಾನ ಉಠಾಡವಾಳೊ ದೇವ್ನ ಉಪ್ಪರಸ್ ಭರೋಖ್ಹೊ ರಾಕ್ಣುಕರಿ ಆ ಅಖ್ಖು ಹುಯುತೆ.
10 ಮರಣ್ಣಿ ಆ ಘಣ ಖತ್ರೇಥಿ ದೇವ್ನೆ ಹಮೂನ ರಕ್ಷಣೆ ಕರ‍್ಯೊ. ಅಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ. ಹಮೆ ಇನಾಮ ಭರೋಖ್ಹೊ ರಾಖಿರಾಖ್ಯಾಸ್. ಯೋ ಹಮೂನ ಬಿಜು಼ ಖ್ಹಾಮ್ಣೆಬಿ ರಕ್ಷಣೆ ಕರ್ಶೆ
11 ಆ ನಾಹುಯಿನ್ ತುಮೆ ತುಮಾರಿ ಪ್ರಾರ್ಥನೆಥಿ ಹಮೂನ ಮದತ್ ಕರುಕರಸ್. ತದೆ ತುಮಾರಿ ಪ್ರಾರ್ಥನೆಥಿ ದೇವ್ ಹಮೂನ ಆಶೀರ್ವಾದ್‌ ಕರಿರಾಖ್ಯೋತೆ ದೇಖಿನ್ ಕೈಏಕ್ ಜ಼ಣು ಹಮಾರ ಭಣೀಥು ದೇವ್ನ ಧನ್ಯವಾದ್‍ನಿ ಸ್ತುತಿ ಕರ್ಶೆ.
ಪೌಲನಿ ಖ್ಹೂಜ಼್‌ಮ ಬದ್‍ಲಾವ್ಣಿ
12 ಹಮೆ ಆ ವಾತ್ನಿ ಬಾರೇಮ ಕಂಡಿ ಛ಼ಡೈಲಿಯೇಸ್ಕಿ, ಹಮೆ ಖಲಿ ಅದ್ಮಿವೋನಿ ಅಕ್ಕಲ್‍ನ ಲಿದಾಕೊಂತೆ ದೇವ್ನ ವಾರ್‌ಖ್ಹಾನ ಆಖ್ಹ್‌ರಾಮ ಪರಿಶುದ್ಧಬಿ ನಿಯತ್‍ವಾಳಾಬಿ ಹುಯಿನ್ ಆ ಜಗತ್ಮ ತುಮಾರಿ ಬಾರೇಮ ಚಾ಼ಲಿಲಿದಾಕರಿ ಹಮಾರು ದಿಲ್‌ ಹಮೂನ ಸಾಕ್ಷಿ ಬೋಲಸ್.
13 ತುಮೆ ಫಡ್ನು ಅಜು಼ ಪೂರ ಪರಕ್ಮ ಮಾಲುಮ್ ಕರಿಲೇವ್ಣುಕರಿ ಪಣ್ಕಿ ಮನ ಮಾಲುಮ್ ಛಾ಼. ಶನಖ್ಹಾಜೆಬಿ ಕಾಹೆ. ಖ್ಹರ್ತಿಲಗು ತುಮೂನ ಅರ್ಥ ಉಷೆಕರಿ ಭರೋಖ್ಹೊ ಕರೀನ್ ಮೇ ಮಾಲುಮ್ ಕರಿಲೇವುಸ್.
14 ತುಮೆ ಪಹಿಲೇಸ್ ಹಮೂನ ಮಾಲುಮ್ ಕರಿರಾಖ್ಯಸ್. ಹಮೆ ಪ್ರಭು ಯೇಸುಮ ಕಂಡಿಚ಼ಡೈಲ್ಯವಾನ ಕಾರಣ್ ಹುಯಿರ‍್ಹಿಯೇಸ್. ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತ ಪಾಛೊ಼ ಆವಾನ ದನ್ಮ ತುಮೆ ಹಮಾರಿ ಭರೋಖ್ಹಾಮ ಛಾ಼ತೆ ತಿಮ್ ಹಮೆ ತುಮಾರಿ ಭರೋಖ್ಹಾಮ ರ‍್ಹಿಶುಕರಿ ತುಮೆ ಮಾನಿಲೇವೊಸ್.
15 ಮೇ ಆ ಅಖ್ಖೀಸ್ ವಾತೆನ ಘಣು ವಿಶ್ವಾಸ್ ಕರಿ ರಾಖ್ಯೋಥೊ. ಇನಾಖ್ಹಾಜೆ ತುಮೂನ ಪಹಿಲೆ ಮಳಾನ ಮೇ ಅಖ್ಖಿ ಖ್ಹೂಜ಼್ ಕರಿರಾಖ್ಯೋಥೊ. ತದೆ ತುಮೂನ ಬೇಪಟ್ ಆಶೀರ್ವಾದ್‌ ಹುವಾನುಥು.
16 ಮೇ ಮೆಕೆದೋನಿಯನ ಜಾ಼ವಾನಿ ವಖ್ಹತ್‍ಬಿ ಬಿಜು಼ ಹಿಜ್ಜಾ಼ಥೊ ಪಾಛೊ಼ ಫರಿ ಆವಾನಿ ವಖ್ಹತ್‍ಮಾಬಿ ತುಮಾರಕನ ಆವ್ಣುಕರಿ ಥೊ. ಬಿಜು಼ ಯೂದಾಯ ತಬರ್‌ಖಾಮ ಜಾ಼ವಾನ ತುಮಾರೇಥಿ ಮದತ್ ಮಾಂಗ್‍ಣು ಕರಿ ಥೊ.
17 ಅಮ್‍ ಸೋಚ್ಯೊತೆ ಇನಖ್ಹಾಜೆ ಮೇ ಘುಂಜ್‍ಳಾವ್ಣಿನೊ ಖ್ಹಯಾಲ್ನೊ ಥೋಕಿಶು? ಇವ್ಣೆತೊ ಜಗತ್ನಿ ಖ್ಹೂಜ಼್‌ಮ ಸೋಚಾನಿ ವಖ್ಹತ್‌ಮ “ಓಹೊ, ಓಹೊ” ಕರಿಬಿ ಯೋಸ್ ವಖ್ಹತ್‌ಮ “ಕೊಯ್ನಿ, ಕೊಯ್ನಿ” ಕರಿಬಿ ಬೋಲಸ್ ಕೊಯ್ನಿಕಿ ಶು?
18 ತುಮೆ ದೇವ್ನ ವಿಶ್ವಾಸ್ ಕರಾವಾಳ ರ‍್ಹಯಾತೊ, ಹಮೆ ತುಮುನ ಎಕ್ಕಸ್ ವಖ್ಹತ್‌ಮ “ಓಹೊ” ಬಿಜು಼ “ಕೊಯ್ನಿ” ಕರಿ ಬೋಲ್ಯ ಕೊಯ್ನಿಕರಿ ತುಮೆ ವಿಶ್ವಾಸ್ ಕರ್ಶು.
19 ಶನಕತೊ ಸಿಲ್ವಾನಾಬಿ, ತಿಮೊಥೆಬಿ ಬಿಜು಼ ಮೇ ತುಮುನ ಬೋಧನೆ ಕರ‍್ಯೊತೆ ದೇವ್‌ನೊ ಛಿಯ್ಯೊಹುಯಿರ‍್ಹೊತೊ ಯೇಸುಕ್ರಿಸ್ತ ಓಹೊ ಕರಿಬಿ ಕೊಯ್ನಿಕರಿಬಿ ಬೇ ತರ ಕೋಥೂನಿ. ಕ್ರಿಸ್ತಮ ಕದೇಬಿ ರ‍್ಹೇಸ್ತೆ “ಓಹೊ” ಕರೀಸ್.
20 ಶನಕತೊ ದೇವ್ನೆ ಕರ‍್ಯೊತೆ ವಾಗ್ದಾನ್ ಅಖ್ಖು “ಓಹೊ” ಕರಿ ಜ಼ವಾಬ್ ಹುಯಿರ‍್ಹುಸ್. ಇನಖ್ಹಾಜೇಸ್ ಕ್ರಿಸ್ತಥಿ ದೇವ್ನ ಮಹಿಮೆನಖ್ಹಾಜೆ ಅಪ್ಣೆ “ಆಮೆನ್” ಕರಿ ಬೋಲಿಯೇಸ್.
21 ದೇವ್ ತುಮುನಾಬಿ ಹಮೂನ ಏಕ್‍ಕರಿ ಮಳೈರಾಖ್ಯೊಸ್. ಅಜು಼ ಅಪ್ಣುನ ಅಬಿಷೇಕ್ ಕರೀನ್ ಕ್ರಿಸ್ತನಿ ಗಳ್‌ಜೋ಼ಡ್ಮ ಏಕ್‌ ಹುಯಿರಾಸ್. ಅನ ಖುದ್ ದೇವಸ್ ಕರಿರಾಖ್ಯೊಸ್.
22 ಹಮೆ ಇನವಾಳಕರಿ ವತಾಳನಖ್ಹಾಜೆ ಇನೆ ಹಮಾರಪರ್ ಮುದ್ರೊ ನಾಖಿರಾಖ್ಯೋಸ್. ಯೋ ಹಮೂನ ಕರ‍್ಯೊತೆ ವಾಗ್ದಾನ್ನ ಚ಼ಲಾವ್‌ಷೆ ಕರಿ ಬೋಲಾನ ಪವಿತ್ರಾತ್ಮನಾಸ್ ಅಪ್ಣ ದಿಲ್ಮ ದೀರಾಖ್ಯೊಸ್.
23 ತುಮಾರಕನ ಕೊರಿಂಥಮ ಆಯೊಕೊಯ್ನಿ. ಇನಖ್ಹಾಜೆ ಮೇ ದಿಲ್‌ ಭರೈನ್ ಬೋಲುಕರುಸ್, ಅನ ದೇವಸ್ ಸಾಕ್ಷಿ ಹುಯಿರ‍್ಹೊಸ್.
24 ತುಮಾರಿ ವಿಶ್ವಾಸ್‌ನ ಕಬ್‌ಜಾ಼ಮ ರಾಖಾನ ಹಮೆ ಕೋಶಿಶ್ ಕರುಕರೇಸ್ ಕರಿ ಮೇ ಬೋಲುಕರುಕೊಯ್ನಿ. ತುಮೆ ವಿಶ್ವಾಸ್‌ಮ ಘಟ್‍ಛಾ಼ ಕತೋಬಿ ಹಮೆ ತುಮಾರಿ ಖ್ಹುಶಿನಖ್ಹಾಜೆ ತುಮಾರಿ ಜೋ಼ಡ್ಮಕಾಮ್‍ ಕರಾವಾಳ ಹುಯಿರ‍್ಹಾಸ್.