1 ಮೇ ಛುಟ್ಕಾರ್ ಕಾಹೆಕಿ ಶು? ಮೇ ಅಪೊಸ್ತಲ ಕಾಹೆಕಿ ಶು? ಮಾರೊ ಪ್ರಭು ಯೇಸುನ ದೇಖ್ಯೊಹುಯೊ ಕೊಯ್ನಿಕಿಶು? ಮೇ ಪ್ರಭುಮ ಕರ‍್ಯೊತೆ ಪ್ರಚಾರ್‌ನಿ ಖ್ಹಣೇದ್ ತುಮೇಸ್ ಕಾಹೆಕಿಶು? 2 ಅಲ್ಹಾವ್ ಅದ್ಮಿನ ಮೇ ಅಪೊಸ್ತಲ ನಾ ಹುಯಿರ‍್ಹುತೋಬಿ ತುಮೂನ ತೋಬಿ ಅಪೊಸ್ತಲ ಹುಯಿರ‍್ಹೋಸ್. ಮೇ ಪ್ರಭುನೊ ಅಪೊಸ್ತಲಕರಿ ಬೋಲೈಲ್ಯವಾನ ತುಮುನ ಮಾರು ಮುದ್ರೊ ನಾಖಿರಾಖ್ಯೋಸ್. 3 ಮನ ವಿಚಾರ್‌ ಕರಾವಾಳನ ಮಾರಿ ಆಸ್ ಜ಼ವಾಬ್. 4 ಹಮುನ ಖಾಣುಪಾಣಿ ಖಾವಾನ ಹಕ್‍ಕೊಯ್ನಿಕಿ ಶು? 5 ಕ್ರಿಸ್ತಮ ವ್ಯಹಾ ಹುಯಿರ‍್ಹವಾಳ ವಿಶ್ವಾಸಿ ಭೈನಿ ಬಾವಣ್ಣ ಬುಲೈಲಿನ್ ಚಾ಼ಲ್ವನ ಬಿಜಾ಼ಖ್ಹಾರ ಅಪೊಸ್ತಲನಿತರ ಪ್ರಭುನ ಭೈಯೇನಿತರ ಅಜು಼ ಕೇಫಾನಿಘೊಣಿ ಹಮೂನ ಹಕ್‍ಕೊಯ್ನಿಕಿ ಶು? 6 ನತರ್, ಮ್ಹಿನತ್‌ಕೊಂತೆ ಜಿವ್ಣು ಕರಾನ ಮನಾಬಿ ಬಾರ್ನಬನಾಬಿ ಹಕ್‌ ಕೊಯ್ನಿಕಿ ಶು? 7 ಖಿವು ಶಿಪಾಯಿಬಿ ಇನು ಶೊಂತ್ ಖರ್ಚ್‌ಥಿ ಚಾ಼ಕ್ರಿ ಕರ್ಶೆಕಿ ಶು? ದ್ರಾಕ್ಷಿನಬಾಗ್‌ನ ಪಿಕಾವವಾಳೊ ಇನುಫಲ್ ಖಾಯಿಕೊಂತೆ ರ‍್ಹಿಶೆಕಿಶು? ಇನ ಮಂಧಾನ ಪಾಳವಾಳೊ ಖೇವೊರ‍್ಹೇವೊ ಇನು ದೂದ್ನ ಪಿಯಾಕೊಂತೆ ರ‍್ಹಿಶೆ? 8 ಮೇ ಬೋಲ್ಯೊತೆ ಖಲಿ ಅದ್ಮಿನಿ ವಾತೆಕಿಶು? ಧರ್ಮಶಾಸ್ತ್ರಬಿ ಅನ ಬೋಲಸ್‌ಕೊಯ್ನಿಕಿ ಶು? 9 ಖಳು ಖುಂದ್ಲಾತೆ ಢಾಂಡನ ಮ್ಹೋಡಾನ ಮ್ಹೋರ್ಕಿನಾಘಾಲ್ನುಕರಿ ಮೋಶೆನ ಧರ್ಮಶಾಸ್ತ್ರಮ ಲೀಖೈರುಸ್. ದೇವ್ ಸೋಚಸ್ತೆ ಢಾಂಡವ್‌ನಖ್ಹಾಜೆಕಿಶು? 10 ಖ್ಹಾಚಮಾಬಿ,ಅಪ್ಣಖ್ಹಾಜೇಸ್ ಯೋ ಬೋಲಸ್ ಕೊಯ್ನಿಕಿಶು? ಓಹೊ. ಅಪ್ಣಖ್ಹಾಜೆ ಲೀಖೈರ‍್ಹುಸ್. ನಾಗ್ರವಾಳೊ ಪಿಕಾವ್ಣಿಮ ಇನು ಭಾಗ್‌ ಮಳ್‌ಶೆಕರಿ ಭರೋಖ್ಹಾಥಿ ಕರ‍್ನು. ಅಜು಼ ಖಳುಕರವಾಳೊ ಇನ ಖ್ಹುಗ್ಗಿಮ ಭಾಗ್‌ ಮಳ್‌ಶೆಕರಿ ಆಖ್ಹ್‌ಥಿ ಖಳುಕರ‍್ನು. 11 ಹಮೆ ತುಮಾರಮ ಆತ್ಮೀಕ್ ಹುಯಿರ‍್ಹುತೆ ಪಂಡಾನ ನಾಖ್ಯಾತೊ ಇನ ಬದಲ್ ತುಮಾರೇಥಿ ಜಗತ್ನ ಉಬ್‍ಜಾ಼ವ್ಣಿನ ಜಿನಖ್ಹ್‌ನ ವ್ಹಾಡನು ಮೋಟಿ ವಾತ್‍ಕಿಶು? 12 ಅಲ್ಹಾವ್ನ ತುಮಾರಪರ್ ಅತ್ರೆ ಅಧಿಕಾರ್ ರ‍್ಹಿಯುತೊ ಹಮೂನ ಬಿಜು಼ ಕೆತ್ರೆ ಜಾ಼ಖ್ಹತ್ ರ‍್ಹೇಣುನಿ? ಕತೋಬಿ ಹಮೆ ಯೋ ಅದಿಕಾರ್‌ನ ಚ಼ಲಾಯಕೊಯ್ನಿ. ಕ್ರಿಸ್ತನಿ ಸುವಾರ್ತೆ ನಾ ಆಡುಹೋಣುಕರಿ ಆ ಅಖ್ಖಾನ ಖ್ಹಮಾಳಿಲೀದ. 13 ದೇವ್ನಿ ಮಂದಿರ್‌ಮ ಚಾ಼ಕ್ರಿ ಕರವಾಳು ದೇವ್ನ ಮಂದಿರ್‌ಥು ಇವ್ಣ ಜಿವ್ಣು ಚ಼ಲಾವ್ಣುಕರಿ ಅಜು಼ ಚಾ಼ಚ಼ರ್‌ಕನ ಚಾ಼ಕ್ರಿಕರವಾಳು ಹಿಜ್ಜಾ಼ ಆವಸ್ತೆ ರಾಛ಼ವ್‍ಮ ವಾಟೊ ಹುಯಿರ‍್ಹೇಸ್‍ ಕರಿ ತುಮೂನ ಮಾಲುಮ್ ಕೊಯ್ನಿ?+ 14 ಆಸ್ ಪರಕ್ಮ ಪ್ರಭುನೇಬಿ ಸುವಾರ್ತೆನ ಬೋಲಿದ್ಯಾವಳು ಯೋ ಸುವಾರ್ತೆಥೀಸ್ ಜಿವ್ಣುಕರಿ ಹುಕುಮ್ ಕರ‍ಖ್ಯೊಸ್. 15 ಮೇತೊ ಅನಾಮ ಏಕ್‌ನಾಬಿ ಪಾಲನ್ ಕರ‍್ಯೊಕೊಯ್ನಿ. ಮನ ಶಾತ್ತೊಬಿ ಮಳ್‌ಣುಕರಿ ಉದ್ದೇಶ್‌ಥಿ ಲೀಖುಕರುಕೊಯ್ನಿ. ಕಿನಾತೋಬಿ ಆ ಖ್ಹರಾವ್ಣಿಥಿ ಫಾಯಿದೊ ನಾಹುಯುತೊ ಮೇ ಮರಿಜಾ಼ವನೂಸ್ ಅಛ್ಛು಼. 16 ಮೇ ಸುವಾರ್ತೆನ ಬೋಲ್ಯೊತೋಬಿ ಖ್ಹರಾವನು ಶಾತ್‌ಕೊಯ್ನಿ; ಯೊ ಬೋಲಾನು ಮಾರಿ ಜಿಮ್ಮೆದಾರಿ. ಮೇ ಸುವಾರ್ತೆನ ನಾ ಬೋಲ್ಯೊತೊ ಮಾರಿ ಹಾಲ್ನ ಶಾತ್‌ಕರಿ ಬೋಲು! 17 ಮೇ ಶೊಂತ್‍ ಮರ್ಜಿಥಿ ಆ ಕಾಮ್‍ಕರ‍್ಯೊಹೊತ್ತೊ ಮನ ಪ್ರತಿಫಲ್ ಮಳ್‍ಶೆ; ಕತೋಬಿ ಮೇ ಕರ್ನುಸ್‌ಕರಿ ಮೇ ಕರ‍್ಯೊ. 18 ಇಮ್‍ಕತೊ ಮನ ಮಳಾತೆ ಇನಾಮ್ ಶಾತ್? ಮೇ ಸುವಾರ್ತೆನ ಬೋಲಾನಿ ವಖ್ಹ್‌ತೆ ಇನೇಥಿ ಮಳಾತೆ ಪ್ರತಿಫಲ್‌ನಿ ಹಕ್‌ನ ಲೇಯಿಕೊಂತೆ ಇನ ಫುಗಟ್ಮ ಬೋಲನುಸ್ ಮನ ಮಳ್ಯುತೆ ಪ್ರತಿಫಲ್ ಹುಯಿರ‍್ಹುಸ್. 19 ಮೇ ಅಖ್ಖಿ ವಿಚಾರ್‌ಮ ಛುಟ್ಕಾರ್ ಹುಯಿರ‍್ಹತೋಬಿ ಘಣುಜ಼ಣಾನ ಮಾರಿ ಕಬ್‌ಜಾ಼ಮ ರಾಕ್ಣುಕರಿ ಮೇ ಅಖ್ಖಾನ ದಾಸಹುಯೊ. 20 ಯೆಹೂದ್ಯವಾಳನ ಕಮೈಕರಾನಖ್ಹಾಜೆ ಯೆಹೂದ್ಯರ್‌ನ ಮೇ ಯೆಹೂದ್ಯವಾಳೊ ಹುಯೊ. ಮೆ ಧರ್ಮಶಾಸ್ತ್ರನ ಅಧೀನ್‍ ನಾ ಹುಯೊತೋಬಿ, ಧರ್ಮಶಾಸ್ತ್ರನ ಕಬ್‌ಜಾ಼ಮ ರ‍್ಹವಳಾನ ಕಮೈಕರಿಲ್ಯವಾನಖ್ಹಾಜೆ ಇವ್ಣಖ್ಹಾಜೆ ಧರ್ಮಶಾಸ್ತ್ರನ ಅಧೀನ್ ಹುವಾಳನಿತರ ಹುಯೊ. 21 ಮೇ ದೇವ್ನಿ ಧರ್ಮಶಾಸ್ತ್ರಮ ನಾ ರ‍್ಹಿಯೊನಾತೋಬಿ ಕ್ರಿಸ್ತನಿ ನಿಯಮ್ಮ ಪಡಿಗಯೊ; ಭಾರ್‌ ರ‍್ಹವಾಳಾನ ಕಮೈ ಕರಾನಖ್ಹಾಜೆ ಧರ್ಮಶಾಸ್ತ್ರನಭಾರ್‌ ರ‍್ಹವಾಳಾನಿಘೊಣಿ ಹುಯೊ. ಅನಿ ಮತ್ಲಬ್‌ ದೇವ್ನಿ ನಿಯಮ್ನ ಅದೀನ್ ಹುಯೊ ಕರಿಕಾಹೆ, ಕ್ರಿಸ್ತನಿ ನಿಯಮ್ನನಾಬಿ ಅಧೀನ್ ಹುಯಿರ‍್ಹೊಸ್. 22 ಕಮ್‌ಜೋ಼ರಿವಾಳಾಮ ಇವ್ಣುನ ಕಮೈಕರಾನಖ್ಹಾಜೆ ಕಮ್‌ಜೋ಼ರಿವಾಳಾನಿ ಬೀಚ್ಮ ಮೇಬಿ ಕಮ್‌ಜೋ಼ರಿವಾಳೊ ಹುಯೊ. ಖಿವಿ ತರೀ‌ಖಾಮತೋಬಿ ಥೋಡಾನ ಬಚಾ಼ಡ್‌ಣುಕರಿ ಖ್ಹಾರನಖ್ಹಾಜೆ ಖ್ಹಾರನಿಘೋಣಿ ಹುಯೊ. 23 ಆ ಅಖ್ಖಾನ ಸುವಾರ್ತೆನಖ್ಹಾಜೇಸ್ ಕರೀನ್. ಮೇ ಬೀಜಾ಼ನಿ ಜೋ಼ಡ್ಮ ಸುವಾರ್ತೆನ ವಾರ್ಖ್ಹಾಮ ಭಾಗ್‍ಲ್ಯವಾನಖ್ಹಾಜೆ ಆ ಅಖ್ಖು ಕರುಕರೂಸ್. 24 ಖೇಲ್ನ ಮೈದಾನ್‌ಮ ಕೈಯೇಕ್‌ಜ಼ಣು ನಖ್ಹಾನ ಖೇಲ್ಮ ಭಾಗಿಹುವಾಸ್, ಕತೋಬಿ ಖಲಿ ಏಕ್‍ಜ಼ಣೊ ಜೂತಸ್ ಕರಿ ತುಮೂನ ಮಾಲುಮ್ ಕೊಯ್ನಿಕಿಶು? ಇವ್ಣಿನಿಘೋಣಿ ತುಮೇಬಿ ಇನಾಮ್ ಜುತಾನ ಖ್ಹಾಜೆಕರಿ ಮಿಲಾವೊ. 25 ಹರೇಕ್‍ಜ಼ಣು ಖೇಲ್‍ ಖೇಲವಾಳು ಯೊ ಅಖ್ಖಿ ಬಾರೆವ್‌ಮ ಶಿಕೆಹುಯೊ ಹುಯಿರ‍್ಹೆಸ್. ಇವ್ಣೆ ಖರಾಬ್ ಹುಯಿಜಾ಼ಸ್ ಕೊಯ್ನಿತೆ ಕಿರೀಟ್ನ ಲ್ಯವಾನಖ್ಹಾಜೆ ಹಿಮ್ಮತ್ ಕರಸ್. ಕತೋಬಿ ಅಪ್ಣೆತೋಬಿ ಕದೇಬಿ ಮಟಿಜಾ಼ಯಿಕೊಂತೆ ಕಿರೀಟ್ನ ಲ್ಯವಾನಖ್ಹಾಜೆ ಹಿಮ್ಮತ್ ಕರಾವಾಳು ಹುಯಿರ‍್ಹಾಸ್. 26 ಇನಖ್ಹಾಜೆ ಮೇಬಿ ಶುಶತ್‍ಕೊಂತೆ ನಾಖ್ಹುಕೊಯ್ನಿ, ವಹಿರಾನಿಜೋ಼ಡೆ ಮಾರ್‌ಪೀಟ್ ಕರಾನಿಘೋಣಿ ಲಡುಕೊಯ್ನಿ. 27 ಬಿಜ಼ಖ್ಹಾರನಿ ಜೋ಼ಡ್ಮ ಬೋಧನೆ ಕರಾನ ಪಾರ್ ತದೆ ಮೇಸ್ ನಾಲಾಯಕ್‌ ನಾ ಹುವಾನಖ್ಹಾಜೆ ಶರೀರ್‌ನ ನಿಶತ್ ದೀನ್ ಮಾರಿ ಚಪ್ಪಣ್‌ಮಾಸ್ ರಾಖುಸ್.