7
ವ್ಯಹಾನಿ ವಾತೆನಿ ಬಾರೇಮ
1 ತುಮೆ ಲೀಖಿನ್ ಮೋಕ್‍ಲ್ಯೊತೆ ವಾತೆನಿ ಬಾರೇಮ ಮೇ ಬೋಲ್ನುಕತೊ, ತಯೇಡಾನಿ ಶರೀರ್‌ನ ನಾ ಛಿಮಾನುಸ್ ಅದ್ಮಿನ ಅಛ್ಛು಼.
2 ಕತೋಬಿ ವ್ಯಬಿಚಾರ್‌ ಚಾ಼ಲುಕರಾತೆಖ್ಹಾಜೆ ಹರೇಕ್ ಜ಼ಣನಾಬಿ ಶೊಂತ್ ಬಾವಣ್‍ ರ‍್ಹವಾದೆ ಅಜು಼ ಹರೇಕ್‍ಜ಼ಣಿನಾಬಿ ಶೊಂತ್ ಬಾವ್ರಿ ರ‍್ಹವಾದೆ.
3 ಬಾವ್ರಿ ಯೋ ಕರ್ನುತೆ ಕಾಮ್ನ ಕರಾದೆ, ಅಜು಼ ಇಮ್ಮಸ್ ಬಾವಣ್‍ ಯೋ ಕರ್ನುತೆ ಕಾಮ್ನ ಕರಾದೆ. ಭೇಜ಼ಣಾಬಿ ವ್ಹೆತ್ಯು ಜಿವ್ಣಮ ಏಕ್‌ಥಿಏಕ್ ಜ಼ರೂರತ್‌ನ ಪೂರಕರಿನ್ ಥಕ್‌ತೋಡ್ನು.
ವ್ಯಹಾಕೊಂತೆ ಅಜು಼ ಮುಂಡಚ್ಚಿಯೆನಿ ಬಾರೇಮ
4 ಬಾವಣ್ಣ ಇನಿ ಶೊಂತ್ ಶರೀರ್‌ಪರ್‌ ಅದಿಕಾರ್ ಕೊಯ್ನಿ, ಯೊ ಬಾವ್ರಿನ ಛಾ಼. ಇಮ್ಮಸ್ ಪರ್ಖ್ಹಾ ಇನ ಶೊಂತ್ ಶರೀರ್‌ಪರ್‌ ಅಧಿಕಾರ್ ಕೊಯ್ನಿ, ಯೊ ಬಾವಣ್ಣ ಛಾ಼.
5 ಪ್ರಾರ್ಥನೇನಿ ವಖ್ಹತ್‌ನಖ್ಹಾಜೆ ತುಮೆ ಏಕ್‌ಥಿಏಕ್ ಒಪ್ಪಂದಾನ್‍ಥಿ ಥೋಡಿ ವಖ್ಹತ್ ಮ್ಹೇಲಿನ್ ರ‍್ಹಯೇಜಾ಼ಯ್ ಪಣ್ಕಿ ಅಮ್ನಿತರ ನಾ ಕರ‍್ನು. ಶೈತಾನ್ ತುಮಾರಿ ಕಮ್‌ಜೋ಼ರಿನ ದೇಖಿನ್ ತುಮೂನ ಖರಾಬ್‌ಖ್ಹಯಾಲ್‌ಮ ನಾ ಖೇಚಾ಼ನಿತರ ಪಾಛು಼ ಎಕ್ಟು ಹುಯಿಜಾ಼ವೊ.
6 ಮೇ ಅಮ್ ಕರೇಜಾ಼ಯ್‍ಕರಿ ಬೋಲುಕರುತೆ ಹುಕುಮ್ ಕಾಹೆ. ಮಾರಿ ಖಲಿ ಖ್ಹೂಜ಼್ ಹುಯಿರ‍್ಹೀಸ್.
7 ಮೇ ರ‍್ಹವಾನಿತರ ಅಖ್ಖೂಸ್ ಅದ್ಮಿಖ್ಹಾರು ರ‍್ಹೇವ್ಣುಕರಿ ಮಾರಿ ಆಖ್ಹ್. ಕತೋಬಿ ದೇವ್ನೆ ಹರೇಕ್‍ನಾಬಿ ವಿಶೇಷ್ ವರ ಮಳಿರ‍್ಹೀಸ್. ಏಕ್‍ಜ಼ಣಾನ ಏಕ್‍ಪರಕ್‍ನಿ ವರ ರ‍್ಹಯೂತೊ ಬಿಜೇಕ್ನ ಏಕ್‍ಪರಕ್ನು ವರ ಹುಯಿರ‍್ಹೂಸ್.
8 ಬಿಣ್‍ ವ್ಯಹಾವಾಳು ಅಜು಼ ಮುಂಡಚ್ಚಿಯೇನಿ ಬಾರೇಮ ಮೇ ಬೋಲಾನು ಶಾತ್‍ಕತೊ, ಮೇ ರ‍್ಹವಾನಿಘೋಣಿ ಎಕ್ಲೊ ರ‍್ಹವಾನುಸ್ ಇವ್ಣುನ ಅಛ್ಛು಼.
9 ಇವ್ಣೆ ಖ್ಹಮಾಳಿನ್ ನಾರ‍್ಹಯುತೊ, ವ್ಯಹಾಕರಾದೆ. ಶನಕತೊ ಭೋಗ್ನಿ ಹರಖ್ಹ್‌ಥಿ ಕೊರ್‌ಗಾಥೀಬಿ ವ್ಯಹಾ ಕರಿಲ್ಯಾವನುಸ್ ಬರೋಬರ್.
10 ವ್ಹೆತ್ಯಾವ್ನ ಮೇ ಆ ಹುಕುಮ್ ದೆವುಸ್. ಆ ಹುಕುಮ್ ಮಾರುಕಾಹೆತೆ ಪ್ರಭುನು ಹುಯಿರ‍್ಹೂಸ್. ಬಾವಣ್‍ ಇನ ಬಾವ್ರಿನ ಮ್ಹೇಲ್ನುಸ್ ನಾ.
11 ಬಾವಣ್‍ ಇನ ಬಾವ್ರಿನ ಮ್ಹೇಲಿದಿದಿತೊ ಯೊ ಹುಯಿರೀತೆ ಅಜೇಕ್ ವ್ಯಹಾ ನಾಕರ‍್ನು. ನಾರ‍್ಹಯುತೊ ಬಾವ್ರಿನ ಜೋ಼ಡ್ಮ ಪಾಛು಼ ಮಳಿಜಾ಼ವ್ಣು. ಅಜು಼ ಬಾವ್ರಿ ಇನಿ ಬಾವಣ್ಣ ನಾ ಮ್ಹೇಲ್ನು.
12 ಬಿಜು಼ಖ್ಹಾರು ಅದ್ಮಿಖ್ಹಾರಾನ ಬಾರೇಮ ಮೇ ಬೋಲಾನು ಶಾತ್‍ಕತೊ ಆ ಖ್ಹಾರಿ ವಾತೇನ ಬೋಲುಕರುತೆ ಮೇಸ್ ಪಣ್ಕಿ ಪ್ರಭುಕಾಹೆ. ಕ್ರಿಸ್ತಮ ಭೈನ ಏಕ್‍ಜ಼ಣಿ ಕ್ರಿಸ್ತ ವಿಶ್ವಾಸ್ಕೊಂತೆ ಬಾವಣ್‍ ರ‍್ಹಯುತೊ ಅಜು಼ ಯೋ ಇನಿ ಜೋ಼ಡ್ಮ ಸಂಸಾರ್ ಕರೀನ್ ಜಿವ್ಣುಕರಾನ ಮಾನಿಲಿದಿತೊ ಯೋ ಪರ್ಖ್ಹೊ ಇನ ನಾ ಮ್ಹೇಲ್ನು.
13 ಇಮ್ಮಸ್ ಏಕ್‌ ತಯೇಡನ ಕ್ರಿಸ್ತಮ ವಿಶ್ವಾಸ್ಕೊಂತೆ ಬಾವ್ರಿರ‍್ಹೀನ್ ಯೋ ಇನಜೋ಼ಡೆ ಸಂಸಾರ್ ಕರಾನ ಮಾನಿಲಿದಿತೊ ಯೊ ತಯೇಡ ಇನ ನಾ ಮ್ಹೇಲ್ನು.
14 ಶನಕತೊ ಕ್ರಿಸ್ತಮ ವಿಶ್ವಾಸ್ಕೊಂತೆ ಬಾವ್ರಿ ಇನಿ ಬಾವಣ್ಣಖ್ಹಾಜೇಥಿ ಸಮರ್ಪಣ್‌ ಹುವಾನಿಘೊಣಿ ಹುಯೊ. ಇಮ್ನಿಸ್ ಪರಕ್ಮ ವಿಶ್ವಾಸ್ಕೊಂತೆ ಬಾವಣ್‍ ಇನ ಬಾವ್ರಿನಖ್ಹಾಜೇಥಿ ಸಮರ್ಪಣ್‌ ಹುವಾನಿಘೊಣಿ ಹುಯಿ. ಇಮ್‌ ನಾ ರ‍್ಹಿಯುಹೊತ್ತೊ ತುಮಾರ ಲಡ್ಕಖ್ಹಾರು ಅಪವಿತ್ರಸ್ ಹುಯಿರ‍್ಹುಹೊತ್. ಕತೋಬಿ ಇವ್ಣೆ ಪವಿತ್ರ ಹುಯಿರ‍್ಹೂಸ್.
15 ಕತೋಬಿ ಕ್ರಿಸ್ತ ವಿಶ್ವಾಸ್ಕೊಂತೆ ಏಕ್‍ಜ಼ಣು ಮ್ಹೇಲಿನ್ ಜಾ಼ವ್ಣುಕರಿ ನಿರ್ಧಾರ್ ಕರ‍್ಯೊತೊ ಯೊ ಪರ್ಖ್ಹೊ ಮ್ಹೇಲಿನ್ ಜ಼ವಾದೆ. ಅಮ್ನಿ ಪರಕ್ ಚಾ಼ಲ್ಯುತೊ ಕ್ರಿಸ್ತಮ ಭೈನ ರ‍್ಹವೊ, ನತರ್ ಭೇನ್ ರ‍್ಹವೊ ಜಿಮ್ಮೆದಾರಿ ಕಾಹೆ. ಸಮಾಧಾನ್‍ಮ ರ‍್ಹೇವ್ಣುಕರಿ ದೇವ್ನೆ ಅಪ್ಣುನ ಬುಲೈರಾಖ್ಯೊಸ್.
16 ಅಲಿ ವಿಶ್ವಾಸಿ ಬಾವಣ್‍ ತೂ ತಾರ ಬಾವ್ರಿನ ಬಚಾ಼ಡಿಲಿಶ್‍ಕರಿ ತುನ ಕಿಮ್ ಮಾಲುಮ್‌? ಅಲ ವಿಶ್ವಾಸಿ ಬಾವ್ರಿ, ತೂ ತಾರಿ ಬಾವಣ್ಣ ಬಚಾ಼ಡಿಲಿಶ್‍ಕರಿ ತುನ ಕಿಮ್ ಮಾಲುಮ್‌?
ದೇವ್ನು ಬುಲಾವತೆ ತಿಮ್ ಚಾ಼ಲೊ
17 ಕತೋಬಿ ಹರೇಕ್‍ಜ಼ಣಾನ ಪ್ರಭುನೆ ದಿರಾಖ್ಯೊಸ್ತೆ ಜಿಮ್ಮೇದಾರಿನಾಬಿ. ಅಜು಼ ಇನೆ ಇವ್ಣುನ ಶನಖ್ಹಾಜೆ ಬುಲಾಯೋಕಿ ಇನಾಬಿ ಬರೋಬರ್ ಜಿವ್ಣುಕರಾದೆ. ಅಮ್ ನಿಯಮಸ್ ಅಖ್ಖೀಸ್ ಸಬೆಮ ಚಾ಼ಲಿಲೇವ್ಣುಕರಿ ಮೇ ಶಿಕಾಡುಸ್.
18 ದೇವ್ ಬುಲಾಯೋತೆ ದನ್ಮ ಕೋಣ್‌ತೋಬಿ ಖ್ಹತ್ನ ಹುಯಿರ‍್ಹವಾನು ರ‍್ಹಯುತೊ ಇನ ಖ್ಹತ್ನ ಕರಾಯೋತೆ ಇನಖ್ಹಾಜೆ ಸೋಚಾನು ಹೋಣುಕೊಯ್ನಿ. ದೇವ್ ಬುಲಾವನಿ ವಖ್ಹತ್‌ಮ ಕೋಣ್‌ತೋಬಿ ನಾ ಖ್ಹತ್ನ ಕರೈರಾಖ್ಯೊತೊ ಯೋ ಖ್ಹತ್ನಕರಾವನಿ ಜ಼ರೂರತ್ ಕೊಯ್ನಿ.
19 ಖ್ಹತ್ನ ಕರಾವನುಕಿ ನತರ್ ಖ್ಹತ್ನ ಕರಾವ್ಣುಕರಿ ಯೋಸ್ ಮುಖ್ಯ ಕಾಹೆ. ದೇವ್ನು ಹುಕುಮ್‌ನ ಪಾಡಿನ್ ಚಾ಼ಲನೂಸ್ ಮುಖ್ಯ ಹುಯಿರ‍್ಹುಸ್.
20 ದೇವ್ ಬುಲಾವನಿ ವಖ್ಹ್‌ತೆ ಹರೇಕ್‍ಜ಼ಣೊ ಖಿವಿ ಲಖಣ್ ರ‍್ಹೇಸ್ಕಿ ಯೋ ರಹಾಮಸ್ ರ‍್ಹೇಣು.
21 ದೇವ್ ಬುಲಾವನಿ ವಖ್ಹ್‌ತೆ ತೂ ಬಿಜೇಕ್ನ ಗುಲಾಮ್ ಹುಯಿರೊ ಉಷೇತೊ ಸೋಚ್‍ನಕೊ. ಕತೋಬಿ ಛುಟ್ಕಾರ್ ಹುವಾನ ಅವಕಾಶ್ ಮಳಿತೊ ತೂ ಛುಟ್ಕಾರ್ ಹುಯಿಜಾ಼.
22 ಶನಕತೊ ಪ್ರಭುಥಿ ಬುಲಾವನಿ ವಖ್ಹ್‌ತೆ ಗುಲಾಮ್ ರ‍್ಹವಾಳೊ ಪ್ರಭುಮ ಛುಟ್ಕಾರ್ ಹುಯಿರ‍್ಹೊಸ್. ಪ್ರಭು ಬುಲಾವನಿ ವಖ್ಹ್‌ತೆ ಛು಼ಟೊರ‍್ಹವಾಳೊ ಹಮ್ಕೆ ಕ್ರಿಸ್ತನ ಗುಲಾಮ್ ಹುಯಿರ‍್ಹೋಸ್.
23 ತುಮೆ ಮೋಲ್ ಲೆವೈರ‍್ಹಾಸ್. ಇನಖ್ಹಾಜೆ ತುಮೆ ಅದ್ಮಿನ ಗುಲಾಮ್ ನಕೊ ಹುಯಿರ‍್ಹಿಶು.
24 ಭೇನೆ ಭೈಯೇವೊ ಹರೇಕ್‍ಜ಼ಣುಬಿ ದೇವ್‍ಥಿ ಬುಲಾವನಿ ವಖ್ಹ್‌ತೆ ಖಿವಿ ಲಖಣ್‍ಮ ಥಾಕಿ ಯೋಸ್ ಪರಕ್ಮ ದೇವ್ನ ಜೋ಼ಡ್ಮ ರ‍್ಹವೊ.
ವ್ಹೆತ್ಯುಕಾಹೆತೆ ಅಜು಼ ಮುಂಡಚ್ಚಿಯೆನು ಸವಾಲ್‌
25 ವ್ಯಹಾಕೊಂತೆ ಕವಾರವ್ನಿ ಬಾರೇಮ ಪ್ರಭುಥಿ ಖಿವಿ ಹುಕುಮ್ ಮನ ಕೋ ಮಳ್ಯುನಿ. ಕತೋಬಿ ವಿಶ್ವಾಸ್‌ನ ಯೋಗ್ಯ ಹುಯಿರ‍್ಹವಾನಖ್ಹಾಜೆ ಪ್ರಭುಥಿ ಮನದೆವೈರ‍್ಹೀತೆ ದಯಾನ ಲೀನ್ ಮಾರಿ ಸೋಚ್ಮ ಬೋಲುಸ್.
26 ಹಮ್ಕೇನು ಕಠಣ್ ದನ್ನಖ್ಹಾಜೆ ಏಕ್‌ ಪರ್ಖ್ಹೊ ಕಿಮ್ ಛಾ಼ಕಿ ಇಮ್ಮಸ್ ರ‍್ಹವಾನು ಅಛ್ಛು಼ಕರಿ ಮೇ ಸೋಚುಸ್.
27 ತುನ ಬಾವಣ್‍ ಛಾ಼ಕತೊ ಇನೇಥಿ ಅಲಕ್ ಹುವಾನ ಕೋಶಿಶ್ ನಕೊಕರ್. ತುನವ್ಯಹಾ ನಾ ಹುಯಿರೊ ಉಷೇತೊ ಬಾವಣ್‍ಕರಾನ ಢೂಂಡ್‍ನಕೊ.
28 ಏಕ್‌ ವಖ್ಹತ್‌ಮ ತೂ ವ್ಯಹಾ ಕರ‍್ಯೊತೋಬಿ ಯೋ ಪಾಪ್‍ಕಾಹೆ. ಕವಾರಿ ವ್ಯಹಾ ಕರಿತೋಬಿ ಪಾಪ್‍ಕಾಹೆ. ಕತೋಬಿ ವ್ಯಹಾಕರಿಲ್ಯವಾಳನ ಕೈಯೆಕ್ಕಿ ದುಖ್ ಆವ್‌ಶೆ ಯೋ ತುಮೂನ ನಾ ಹೋಣುಕರಿ ಬೋಲಾನುಸ್ ಮಾರಿ ಖ್ಹಯಾಲ್ ಹುಯಿರ‍್ಹೀಸ್.
29 ಅಲ ಭೇನೆ ಭೈಯೆ, ಮೇ ಶಾತ್‌ ಬೋಲುಕರುಸ್‍ಕತೊ, ವಖ್ಹತ್ ತೀರ ಕಮ್‍ಛಾ಼ತೆ ಇನಖ್ಹಾಜೆ ಅನ ಅಗ್ಗಳ್ ಬಾವಣ್‍ರ‍್ಹವಾಳ ಇವ್ಣೆ ಅಮ್ ಬಾವಣ್‍ ಕೊಯ್ನಿಕರಿಬಿ ಜಿವ್ಣು.
30 ರೋವವಾಳು ನಾ ರೊವಾನಿತರಾಬಿ, ಶಂತೋಖ್ಹ್‌ ಕರವಾಳು ನಾ ಶಂತೋಖ್ಹ್‌ ಕರಾನಿತ್ರಬಿ, ಮೋಲ್‍ಲ್ಯವಾಳು ಸೋಚೊ, ಹಮಾರಕನ ಶಾತ್ಬಿ ಕೊಯ್ನಿಕರಿ ಮಾರು ಕಾಹೆಕರೀಬಿ,
31 ಜಗತ್‌ನು ಭೋಗ್‌ಮ ರ‍್ಹವವಾಳು ಇನಾಮಾಸ್ ಮಗನ್‌ ನಕೊರ‍್ಹಿಶು. ಶನಕತೊ ಆ ಜಗತ್‌ನು ವೈಭೋಗ್ ಬದ್ಲಿಜಾ಼ಶೆ.
32 ಕತೋಬಿ ತುಮೆ ವೇಚ಼್‌ಣೆ ನಾಕರ‍್ನುಕರಿ ಬೋಲಾನುಸ್ ಮಾರಿ ಹರಖ್ಹ್ ಹುಯಿರ‍್ಹುಸ್. ಬಿಣ್‍ ವ್ಯಹಾವಾಳು ಇನುಯೋ ಪ್ರಭುನ ಕಿಮ್ ಪಸಂದ್‍ಕರಾವ್ಣು ಕರಿ ಪ್ರಭುನು ಖ್ಹಾರಕಾಮ್ನಿ ಬಾರೇಮ ಸೋಚಸ್.
33 ಕತೋಬಿ ವ್ಯಹಾ ಹುಯಿರ‍್ಹವಾಳೊ ಏಕ್‍ಜ಼ಣೊ ಆ ಜಗತ್ನ ಕಾಮ್ಮ ಡುಬಿರ‍್ಹೋಸ್. ಯೋ ಇನಿ ಬಾವಣ್ಣಾ ಪಸಂದ್ ಕರಾವಮಸ್ ಕೋಶಿಶ್ ಕರಾವಾಳೊ ಹುಯಿರ‍್ಹೋಸ್.
34 ಅಜು಼ ಅನಖ್ಹಾಜೆ ವ್ಯಹಾಕೊಂತೆ ಅಜು಼ ವ್ಯಹಾ ಹುಯಿರ‍್ಹೇಯ್ತೆ ಇಮ್‌ ಭೇಬಾಜು಼ ಖೇಚಾ಼ವನಿಘೋಣಿ ಹುಯಿರ‍್ಹೇಸ್. ನತರ್ ಏಕ್‌ ವ್ಯಹಾ ಕೋಹುಯಿರೆನ್ತೆ ಕವಾರಿಯೆ ಇನುಯೋ ಶರೀರ್ ಆತ್ಮಮ ಕಿಮ್ ಪರಿಶುದ್ ರ‍್ಹೇವ್ಣುಕರಿ ಪ್ರಭುನಿ ಕಾಮ್ನ ಬಾರೇಮ ಸೋಚಸ್. ಕತೋಬಿ ವ್ಹೆತ್ತಿ ಜಗತ್ನ ಕಾಮ್ಮ ಡುಬಿರ‍್ಹೇಸ್, ಯೋ ಇನೊ ಬಾವ್ರಿನ ಪಸಂದ್ ಕರಾವ್ಣುಕರಿ ದೇಖಾಸ್.
35 ಆ ವಾತೆ ತುಮಾರ ಠಗಾವನಖ್ಹಾಜೆ ಕಾಹೆ ಫಾಯಿದಾನಖ್ಹಾಜೆಸ್‌. ಕತೋಬಿ ತುಮೆ ಬರೊಬರ್‌ನ ಮಾರಗ್‍ಮ ಜಿವ್ಣುಕರ‍್ನುಕರಿ ಮಾರಿ ಆಖ್ಹ್. ಅಜು಼ ತುಮೆ ತುಮಾರಿ ವಖ್ಹತ್‌ನ ಬಿಜ಼ ಕಾಮ್ನ ನಾದೇವ್ಣುತೆ ಪ್ರಭುನಿ ಸೇವೆಮ ಭರ್‌ಪೂರ್‌ಥಿ ಅರ್ಪಣ್‍ ಕರ‍್ನು.
36 ಏಕ್‌ ವೇಳ್ಮ ಏಕ್‍ಜ಼ಣೊ ಖ್ಹಗೈಹುಯಿರ‍್ಹವಾಳಿ ಕವಾರಿನಿ ಜೋ಼ಡ್ಮ ಖ್ಹಮಾಳನ ಕೊಹೊವಾಂತೆ ಮಳಾನ ಯೊ ಜಾ಼ಖ್ಹತ್ ಹರ್ಖ್ಹವಾಳೊ ಉಷೇತೊ ಅಜು಼ ವ್ಯಹಾಹುಣುಕರಿ ಹರಖ್ಹ್‌ಯುತೊ ಯೋ ವ್ಯಹಾ ಕರಿಲ್ಯವಾದೆ. ಅಮ್‍ಕರಾಥಿ ಯೊ ಪಾಪ್ ಕಾಹೆ.
37 ಕತೋಬಿ ಏಕ್‍ಜ಼ಣೊ ಎಕ್ಕಸ್ ಖ್ಹೂಜ಼್‌ನೊ ರ‍್ಹೀನ್ ಜು಼ಲಮ್‌ ಶಾತ್‍ಕೊಂತೆ ಇನಿ ಮರ್ಜಿನ ಚ಼ಲಾವನಿ ಹಕ್‌ರ‍್ಹಾವಳೋ ರ‍್ಹೀನ್ ಯೋ ಕವಾರಿನ ವ್ಯಹಾ ಕರಿಲ್ಯಾವನು ನಕೋಕರಿ ಇನ ದಿಲ್ಮ ಖ್ಹಯಾಲ್ ಕರಿಲಿದೋತೊ ಯೋ ಇಮ್ಮಸ್ ಕರಾನು ಅಛ್ಛು಼.
38 ಅಮ್‍ರ‍್ಹೀನ್ ಯೊ ಕವಾರಿನ ವ್ಯಹಾಕರಿಲ್ಯವಾನು ಅಛ್ಛು಼ಸ್, ವ್ಯಹಾ ಕರಿಲೇಯಿ ಕೊಂತೆ ರ‍್ಹವಾನುಬಿ ಅಜೂ಼ಬಿ ಅಛ್ಛು಼ಸ್.
39 ಏಕ್‍ಜ಼ಣಿ ತಯೇಡ ಇನೊ ಬಾವ್ರಿ ಬಚಿರ‍್ಹಾವಲಗು ಇನ ಛುಟ್ಕಾರ್‌ವಾಳಿ ಕೊ ಹುಯಿರ‍್ಹಿನಿ. ಬಾವ್ರಿ ಮರಿಗೋತೊ ಯೊ ತಯೇಡ ಹೋಣುತೆ ಇನ ವ್ಯಹಾ ಕರಾನ ಛುಟ್ಕಾರ್ ಹುಯಿರ‍್ಹೇಸ್. ಕತೋಬಿ ಯೋ ಪ್ರಭುನ ವಿಶ್ವಾಸಿ ಹುಯಿರ‍್ಹೇಣು.
40 ರ‍್ಹೀನ್‌ಬಿ ವ್ಯಹಾ ನಾ ಕರೀನ್ ಇಮ್ಮಸ್ ರ‍್ಹವಾನು ಇನ ಕೆತ್ರೇಕ್ಕಿ ಶಂತೋಖ್ಹ್‌ ಹುಯಿರ‍್ಹುಸ್‌ಕರಿ ಮಾರಿ ಖ್ಹಯಾಲ್‍ಕರಿರಾಖ್ಯೊಸ್. ಅಜು಼ ಮನಾಬಿ ದೇವ್ನು ಆತ್ಮ ಛಾ಼ಕರಿ ಖ್ಹಯಾಲ್ ಕರುಸ್.