11
1 ಮೇ ಕ್ರಿಸ್ತನ ಪೀಛೆ ಕಿಮ್ ಚಾ಼ಲೂಸ್ಕಿ ಇಮ್‌ ಮಾರ ಪೀಛೆ ತುಮೆ ಚಾ಼ಲವಾಳ ಹುಯಿರ‍್ಹೇವೊ.
ಆರಾಧನೆಮ ಘುಮ್‍ಟೊ ನಾಖನಿ ಬಾರೇಮ
2 ತುಮೆ ಅಖ್ಖಾಸ್‍ಮಾಬಿ ಮನ ಖ್ಹಯಾಲ್‌ಕರಿನ್ ಮೇ ತುಮೂನ ದೀರಾಖ್ಯೋತೆ ಪದತ್ತಿನ ಘಟ್‍ಥಿ ಧರಿರಾಖ್ಯಸ್‍ಕರಿ ತುಮೂನ ಖ್ಹರವುಸ್.
3 ಹರೇಕ್ ಪರ್ಖ್ಹಾನ ಕ್ರಿಸ್ತ ಮುಡ್‌ಕ್ಯು, ತಯೇಡಾನ ಪರ್ಖ್ಹೊ ಮುಡ್‌ಕ್ಯು ಅಜು಼ ಕ್ರಿಸ್ತನ ದೇವ್ ಮುಡ್‌ಕ್ಯು ಹುಯಿರ‍್ಹೂಸ್ ಕರಿ ಬೋಲಾನು ಯೊ ಮಾಲುಮ್ ರ‍್ಹೇವ್ಣು.
4 ಸಬೇಮ ಇನ ಮುಡ್‌ಕ್ಯಾನ ಮೂಚಿಲೀನ್ ಪ್ರಾರ್ಥನೆ ರ‍್ಹವೊ ಪ್ರವಾದ್‌ನೆ ರ‍್ಹವೊ ಕರಾವಾಳೊ ಪರ್ಖ್ಹೊ, ಯೊ ಇನ ಮುಡ್‌ಕ್ಯಾನ ಖ್ಹರಮ್‌ ಕಾಡಿಲೇಸ್.
5 ಕತೋಬಿ ಮುಡ್‍ಕ್ಯನಪರ್ ಘುಮ್‍ಟೊ ನಾಖಕೊಯಿನ್ತೆ ಪ್ರಾರ್ಥನೆ ಕರಾವಾಳಿ ಪ್ರವಾದ್‌ನೆ ಬೋಲವಾಳಿ ತಯೇಡ ಇನ ಮುಡ್‌ಕ್ಯಾನ ಖ್ಹರಮ್‌ ಕಾಡಾವಾಳಿ ಹುಯಿರ‍್ಹಿಸ್. ಅಮ್ ಕರಾವಾಳಿ ತಯೇಡ ಇನು ಮುಡ್‌ಕ್ಯು ನಾ ಮೂಚಿರಾಖನಾಬಿ ಮುಡ್‌ಕ್ಯು ಬೋಳಿಸೈಲ್ಯವಾಳಿನ ಸಮ ಹುಯಿರ‍್ಹೀಸ್.
6 ಕತೋಬಿ ತಯೇಡ ಘುಮ್‍ಟೊ ನಾಖಿನಾತೊ, ಯೊ ಇನು ಮುಡ್‌ಕ್ಯು ಬೋಳಿಸೈಲ್ಯವಾದೆ. ಕೇಖ್ಹ್‌ ಕತ್‍ರೈಲ್ಯಾವಾನು ರ‍್ಹವೊ ಮುಡ್‌ಕ್ಯು ಬೋಳಿಸೈಲ್ಯವಾನು ರ‍್ಹವೊ ತಯೇಡಾನ ಖ್ಹರಮ್ನಿ ವಾತೆ ಹುಯಿರ‍್ಹಿಉಷೇತೊ, ಯೋ ಘುಮ್‍ಟೊ ನಾಖಿಲ್ಯವಾದೆ.
7 ಪರ್ಖ್ಹೊ ದೇವ್ನಿ ರೂಪ್ ಅಜು಼ ಮಹಿಮೆನು ಪ್ರತಿರೂಪ್ ಹುಯಿರೋತೆ ಇನಖ್ಹಾಜೆ ಮುಡ್‌ಕ್ಯಪರ್ ಘುಮ್‍ಟೊ ನಾಕ್ಣುಕೊಯ್ನಿ. ಕತೋಬಿ ತಯೇಡ ಪರ್ಖ್ಹಾನಿ ಇಜ಼್ಜತ್ ಹುಯಿರೀಸ್.
8 ಶನಕತೊ ತಯೇಡಥಿ ಪರ್ಖ್ಹೊಕಾಹೆ, ಕತೋಬಿ ಪರ್ಖ್ಹೇಥಿ ತಯೇಡ ಉಬ್ಜಿರ‍್ಹೀಸ್.
9 ತಯೇಡನಖ್ಹಾಜೆ ಪರ್ಖ್ಹೊ ಉಬ್‍ಜ್ಯೊಕೊಯ್ನಿ. ಕತೋಬಿ ಪರ್ಖ್ಹಾನಖ್ಹಾಜೆ ತಯೇಡ ಉಬ್ಜಿರ‍್ಹೀಸ್.
10 ಅನಖ್ಹಾಜೇಥಿ ಸೊರ್ಗ ದೂತರ‍್ನ ಖ್ಹಾಮ್ಣೆ ಇನು ಬಾವ್ರಿನ ಹಕ್‌ಮ ಛಾ಼ಕರಿ ವತಾಳನಖ್ಹಾಜೆ ಘುಮ್‍ಟೊ ನಾಖಾನು ಜ಼ರೂರತ್ ಹುಯಿರ‍್ಹುಸ್.
11 ಕತೋಬಿ ಪ್ರಭುಮ ಮಳಿರ‍್ಹವಾಮ ಪರ್ಖ್ಹೊಕೊಂತೆ ತಯೇಡಬಿ ತಯೇಡಕೊಂತೆ ಪರ್ಖ್ಹೋಬಿ ಪೂರ ಕೊ ಹುಯಿರ‍್ಹೇಯ್ನಿ.
12 ಶನಕತೊ ತಯೇಡ ಪರ್ಖ್ಹಾಥಿ ಪೈದಹುವಸ್. ಕತೋಬಿ ಖ್ಹಾರುಸ್ ದೇವ್‍ಥಿಸ್ ಹುಯಿರ‍್ಹುಸ್.
13 ತುಮಾರಮ ತುಮೇಸ್ ವಿಚಾರ್‌ ಕರಿನ್‌ ತೀರ್ಮಾನ್‌ ಕರಿಲೆವೊ. ತಯೇಡ ಘುಮ್‍ಟೊಕೊಂತೆ ದೇವ್ನ ಪ್ರಾರ್ಥನೆ ಕರಾನು ಬರೋಬರ್ ಕಿಶು?
14 ಪರ್ಖ್ಹೊ ಕೇಖ್ಹ್‌ ವಧೈಲಿದೋತೊ ಯೊ ಇನ ಖ್ಹರಮ್‌ ಕರಿ ದೆಖಾಡಸ್ನಿ.
15 ತಯೇಡ ಕೇಖ್ಹ್‌ ವಧೈಲಿದಿತೊ ಯೋ ಇನ ಘುಮ್ಟಾನ ಬದಲ್ ದೆವೈರ‍್ಹೀನ್ ಕೇಖ್ಹ್‌ ಇನ ಶನ್‌ಗಾರ್‌ನ ಏಕ್‌ ಭಾಗ್‌ ಹುಯಿರ‍್ಹುಸ್. ಮಾಮೂಲಿಮ ತುಮೂನ ಮಾಲುಮ್‍ಪಡಕೊಯ್ನಿ ಕಿಶು?
16 ಕತೋಬಿ ಅನಿಬಾರೇಮ ಕೋಣ್ತೋಬಿ ಅಬ್ಬಾಜ಼ಬ್ಬಿ ಕರಾನು ರ‍್ಹಿಯುತೊ ಇನ ಮೇ ಅತ್ರೇಸ್ ಬೋಲುಸ್; ಅಥ್ರಾನಿ ಪದತ್ತಿ ಹಮಾರಮ ರ‍್ಹವೊ ಅಜು಼ ದೇವ್ನಿ ಸಬೆವ್‌ಮ ರ‍್ಹವೊ ಕೊಯ್ನಿ.
ಪ್ರಭುನಿ ಭೋಜನ್ನಿ ಬಾರೇಮ ಶಿಕಾಡನು
(ಮತ್ತಾಯ 26:26-29; ಮಾರ್ಕ 14:22-25; ಲೂಕ 22:14-20)
17 ಹಮ್ಕೆ ತುಮೂನ ಬೋಲಾನ ಆಯೋತೆ ವಾತೆಮ ತುಮೂನ ಖ್ಹರವ್‍ಕೊಯ್ನಿ, ಶನಕತೊ ತುಮೆ ಸಬೆ ಹುಯಿನ್ ಮಳಿನ್ ಆವಾನಿ ವಖ್ಹ್‌ತೆ ಅಛ್ಛು಼ ಹುವಾಥೀಬಿ, ಜಾ಼ಖ್ಹತ್ ಲುಕ್ಷಾನ್‌ ಹುವ್‍ಕರಸ್.
18 ಕಿಮ್‌ಕತೊ ಪಹಿಲೆ, ತುಮೆ ಸಬೆಹುಯಿನ್ ಮಳಿನ್ ಆವಾನಿ ವಖ್ಹ್‌ತೆ ತುಮರಾಮ ಕಚ಼್ಚರ್‌ ಹುವಾನು ಖ್ಹಮ್‍ಜು಼ಸ್. ಅನ ಜ಼ರ ವಿಶ್ವಾಸ್‍ಬಿ ಕರುಸ್.
19 ಥೋಡುಜ಼ಣು ದೇವ್‍ಥಿ ಯೋಗ್ಯಕರಿ ಬೋಲೈಲ್ಯವಾಳು ಛಾ಼ಕರಿ ದೆಖಾವನಖ್ಹಾಜೆ ತುಮಾರಮ ಬೇಭಾಗ್‌ ಹುವಾನು ಜ಼ರೂರತ್ ಅನೇಥಿ ಕೋಣ್ ಬರಬ್ಬರ್‌ ಛಾ಼ಕರಿ ಮಾಲುಮ್ ಪಡಾಸ್‌.
20 ಇನಖ್ಹಾಜೆ ತುಮೆ ಸಭೆಹುಯಿನ್ ಮಳಾನಿ ವಖ್ಹ್‌ತೆ ತುಮೆ ಕರಸ್ತೆ ಪ್ರಭುನು ಭೋಜನ್ ಯೊ ಪ್ರಭುನು ಭೋಜನ್ ಕಾಹೆ.
21 ಶನಕತೊ, ಹರೇಕ್‍ಜ಼ಣು ಬಿಜೇಕ್ ಜ಼ಣಾನಖ್ಹಾಜೆ ಟಿವಾವಕೊಂತೆ ಇನು ಭೋಜನ್ನ ಅಗಾಡಿಸ್ ಶುರುಕರಸ್. ಅನೇಥಿ ಏಕ್‍ಜ಼ಣೊ ಭುಕ್ಯೊರ‍್ಹೇಸ್, ಬಿಜೇಕ್ ಜ಼ಣೊ ಪೀರಾಖಸ್.
22 ಖಾವಾನಬಿ, ಪೀಯಾನಾಬಿ ತುಮೂನ ಘರ್ ಕೊಯ್ನಿಕಿ ಶು? ನತರ್ ದೇವ್ನಿ ಸಬೆನ ಝೀಟ್ಕಾರೀನ್ ಶಾತ್ಬಿಕೊಂತೆ ಇವ್ಣುನ ಖ್ಹರಮ್‌ ಕಾಡೋಸ್‍ಕಿ ಶು? ಮೇ ತುಮೂನ ಶಾತ್ ಬೋಲು? ಮೇ ತುಮೂನ ಖ್ಹರಾಯೆಜಾ಼ಯ್? ಆ ಬಾರೇಮ ಖ್ಹಚಂಬಿ ಕೊಯ್ನಿ.
23 ಮೇ ಪ್ರಭುಥಿ ಲೀಲಿದೋತೆ ಯೊ ತುಮೂನ ದಿನಾಖ್ಯೊ; ಪ್ರಭು ಹುಯಿರೋತೆ ಯೇಸು ಯೊ ಧರೈ ದೆವೈಗಯೋತೆ ರಾತ್ಮ ರೋಟಾನ ಪಾಡಿನ್,
24 ಧನ್ಯವಾದ್ ಕರೀನ್, ತೋಡಿನ್ “ಆ ತುಮಾರಖ್ಹಾಜೆ ಹುಯಿರ‍್ಹುತೆ ಮಾರು ಶರೀರ್, ಮನ ಯಾದ್‌ಕರಾನಖ್ಹಾಜೆ ಅನ ಕರೊ” ಕರಿ ಬೋಲ್ಯೊ.
25 ಯೋಸ್ ಪರಕ್ಮ ಖಾಣು ಹುವಾದಿನ್ ಇನೆ ಕಟೋರಿನ ಪಾಡೀನ್ ಬೋಲ್ತೊಹುಯಿನ್, “ಆ ಕಟೋರಿ ಮಾರ ಲ್ಹೋಯಿಥಿ ಮುದ್ರೊ ನಖೈರ‍್ಹೂತೆ ನವು ಒಪ್ಪಂದ ಹುಯಿರುಸ್. ತುಮೆ ಅನಾಮ ಪೀಯಾನಿ ಖ್ಹಾರಿ ವಖ್ಹ್‌ತೆ ಮನ ಯಾದ್ ಕರಿಲ್ಯಾವಾನಖ್ಹಾಜೆ ಪೀಯೊ” ಕರಿ ಬೋಲ್ಯೊ.
26 ಶನಕತೊ ಕದೆಕದೇಬಿ ತುಮೆ ಆ ರೋಟಾನ ಖಾಸ್ಕಿ,ಅಜು಼ ಆ ಕಟೋರಿಮ ಪೀಯಾಸ್ಕಿ ತದೆ ಯೊ ಆವಾನಿ ವಖ್ಹ್‌ತೆ ಪ್ರಭುನಿ ಮರಣ್ಣ ಊಚು಼ ಪಾಡ್ತು ರ‍್ಹಿಶು.
27 ಅಮ್‍ಛಾ಼ತೆ ಇನಖ್ಹಾಜೆ ಕೋಣ್ತೋಬಿ ನಾಲಾಯಕ್‌ ಹುಯಿನ್ ಪ್ರಭುನ ರೋಟಾನ ಖಾದುತೊ ಕೊಯಿಂತೊ, ಇನ ಕಟೋರಿಮ ಪೀದುತೊ ಯೋ ಪ್ರಭುನ ಶರೀರ್‌ನಾಬಿ ಲ್ಹೋಯಿನಾಬಿ ಧೋಕ ಕರಾವಾಳೊ ಹುಯಿರ‍್ಹಿಶೆ.
28 ಕತೋಬಿ ಹರೇಕ್ ಅದ್ಮಿ ಇನು ಯೊ ತರೀಪ್‌ಶ ಕರಿಲ್ಯವಾಳೊ ಹುಯಿನ್ ಯೊ ರೋಟಾಮ ಪಾಡಿಲೀನ್ ಖಾವಾದೆ, ಯೋ ಕಟೋರಿಮ ಪೀಯಾದೆ.
29 ಶನಕತೊ ಪ್ರಭುನು ಶರೀರ್‌ಕರಿ ಪರ್ಖಿಲೇಯಿಕೊಂತೆ ಖೈನ್ ಪೀಯವಾಳು ಇಮ್‌ ಖೈನ್ ಪೀಯಾಥಿ ಇವ್ಣಪರ್ ನ್ಯಾವ್ನಿ ತೀರ್ಪ್‌ನ ಲೀಲಾವಳು ಹುಯಿರ‍್ಹುಸ್.
30 ಅನೇಥಿ ತುಮಾರಮ ಘಣು ಅದ್ಮಿ ಕಮ್‌ಜೋ಼ರಿಬಿ, ರೋಗ್‍ವಾಳುಬಿ ಹುಯಿರ‍್ಹಿಶೆ. ಅಜು಼ ಕೈಏಕ್ ಜ಼ಣು ಮರಿರ‍್ಹೂಸ್.
31 ಅಪ್ಣುನ ಅಪ್ಣೆಸ್ ಪರ್ಖಿಲಿದಾತೊ ನ್ಯಾವ್ನಿ ಝ಼ಗೋಮ ಭೀರಿಶುಕೊಯ್ನಿ.
32 ಕತೋಬಿ ಪ್ರಭು ಅಪ್ಣುನ ನ್ಯಾವ್ನಿ ಝ಼ಗೋಮ ಭೀರಾಖನಿ ವಖ್ಹ್‌ತೆ, ಅಪ್ಣೆ ಜಗತ್‍ವಾಳಾನಿ ಜೋ಼ಡ್ಮ ಖ್ಹತಾಪ್ಣಿಮ ಖ್ಹಪಡ್ನು ನಾ ಕರಿ ಯೋ ಅಪ್ಣುನ ನಿಶತ್‌ ದೇಸ್.
33 ಅಮ್ ಛಾ಼ತೆಖ್ಹಾಜೆ ಮಾರ ಭೇನೆ ಭೈಯೇವೊ, ತುಮೆ ಭೋಜನ್ನಖ್ಹಾಜೆ ಮಳಿನ್ ಆವಾನಿ ವಖ್ಹ್‌ತೆ ಏಕ್‌ಥಿ ಏಕ್‍ಜ಼ಣಾನ ಖ್ಹಾಜೆ ಜ಼ಪಿರ‍್ಹವೊ.
34 ಕೋಣ್ತೋಬಿ ಭುಕ್ಯೊರ‍್ಹಿಯೋತೊ ಯೊ ಘರ್‌ಮಾಸ್ ಖಾವಾದೆ. ಅನೇಥಿ ತುಮೆ ದೇವ್ನಿ ತೀರ್ಪ್‌ಮ ಮಳಿನ್ ಆವ್ಣು ನಾ. ಬಿಜು಼ ಉಬ್ರಿಹುಯಿ ವಾತೆಖ್ಹಾರಿ ಮೇ ಐನ್‌ ಖ್ಹಮ್‍ಜಾ಼ಡಿಶ್.