1 ತದೆ ಮಹಾಯಾಜಕನೆ ಸ್ತೆಫನನ, “ಆ ಖಬರ್ ಖ್ಹಾಚು಼ಕಿ ಶು? ಕರಿ ಬೋಲ್ಯೊ. ತದೆ ಇನೆ ಅಮ್ ಜ಼ವಾಬ್ ದಿದೊ, ಮಾರ ಬಾ ಭೈಯೇವೊ, ಮಾರಿ ವಾತೇನ ಖ್ಹಮ್‍ಜೊ, 2 ಅಪ್ಣೊ ಗುರುಗುರಬ್‌ಲ್ಯೊ ಹುಯಿರುತೆ ಅಬ್ರಹಾಮ್‌ನ ಅಪ್ಣೊ ಮಹಿಮೆನೊ ದೇವ್ ದೇಖಾಯೊ. ಅಬ್ರಹಾಮ್ ಖಾರಾನ್‍ ಗಮ್ಮ ಜಿವ್ಣುಕರಾನ ಪಹಿಲೆ ಮೆಸಪಟೋಮಿಯಮ ಥೊ. 3 +ದೇವ್ನೆ ಇನ ತೂ ‘ತಾರ ದೇಖ್ಹ್‌ನಾಬಿ ಮಾಯಮಾತ್ರನ ಮ್ಹೇಲಿನ್ ಮೇ ವತಾಳುತೆ ದೇಖ್ಹ್‌ನ ನಿಕ್‌ಳಿ ಜಾ಼’ ಕರಿ ಬೋಲ್ಯೊ. 4 ಇನಖ್ಹಾಜೆ ಅಬ್ರಹಾಮ್‌ನೆ +ಕಲ್ದಿಯ ದೇಖ್ಹ್‌ನ ಮ್ಹೇಲಿನ್ ಖಾರಾನ್‌ಮ ಜಿವ್ಣುಕರಾನ ಗಯೊ; ಅಬ್ರಹಾಮ್‌ನೊ ಬಾ ಮರಾನ ಬಾದ್ಮ ದೇವ್ನೆ ಇನ ಹಮ್ಕೆ ತುಮೆ ಜಿವ್ಣುಕರುಕರಾಸ್ತೆ ಆ ದೇಖ್ಹ್‌ನಾಸ್ ಬೋಲಿಮೋಕ್‌ಲ್ಯೊ. 5 ಇಮ್ಮಸ್ ಆ ದೇಖ್ಹ್‌ಮ ಇನ +ಹತೇಳಿಯೆತ್ರೆ ಝ಼ಗೋಬಿ ಶೊಂತ್‌ಕರಿ ದಿದೊಕೊಂತೆ; ಇನ ಲಡ್ಕಾಕೊಂತೆ ತದೇಸ್‌ ತೂ ಛಾ಼ತೆ ದೇಖ್ಹ್‌ನ ತುನಾಬಿ ತಾರಿ ಆವ್‌ಶೇತೆ ಖ್ಹಾಮ್ಣೇನಿ ಪಿಳ್ಗಿನ ಹಾತ್ಮ ದೇವ್‍ಕರೂಸ್‍ಕರಿ ವಾಗ್ದಾನ್ ಕರ‍್ಯೊ. 6 ಎತ್ರೇಸ್ ಕಾಹೆತೆ ದೇವ್ನೆ ಇನ ಜೋ಼ಡ್ಮ ಬೋಲ್ಯೊತೆ ಶಾತ್‌ಕತೊ ತಾರು ಪಿಳ್ಗಿವಾಳು ಬಿಜೇಕ್ ದೇಖ್ಹ್‌ಮ ಜಿವ್ಣುಕರ್ಶೆ, ಹಿಜ಼್ಜಾನು ಅದ್ಮಿಖ್ಹಾರು ಇವ್ಣುನ ಗುಲಾಮ್‌ಕರೀಲಿನ್ ಚಾರ್‌ಖ್ಹೊ ವರಖ್ಹ್‌ಲಗು ಖ್ಹತಾವ್‌ಶೆ. 7 ಕತೋಬಿ ‘ತಾರು ಖಾನ್‌ದಾನ್‌ವಾಳು ಗುಲಾಮ್‌ಹುಯಿನ್ ಚಾ಼ಕ್ರಿಕರುಕರಾತೆ ಅಲ್ಹಾವ್‌ ಅದ್ಮಿನ ಮೇಸ್ ತೀರ್ಪ್‌ ದೀಶ್‍ಕರಿ ಬೋಲ್ಯೊ. ಅತ್ರೇಸ್ ಕಾಹೆತೆ ದೇವ್ನೆ, ಇನಪಾರ್ ಇವ್ಣೆ ಯೊ ದೇಖ್ಹ್‌ಮಾಥು ಆ ಝ಼ಗೋಮ ಐನ್ ಮನ ಆರಾದನೆ ಕರ್ಶೆಕರಿ ಬೋಲ್ಯೊ. 8 ಇನವಾರ್ ದೇವ್ನೆ ಅಬ್ರಹಾಮ್‍ಥಿ ಒಪ್ಪಂದ ಕರಿಲಿದೊ. ಯೊ ಖ್ಹಣೇದ್ನ ಖ್ಹಾಜೆ ಖ್ಹತ್ನ ಕರಾಯೊ. ಇನೇಥಿಸ್ ಅಬ್ರಹಾಮ್‌ನ ಏಕ್‌ ಛಿಯ್ಯೊ ಹುಯೊ. ಯೊ ಛಿಯ್ಯಾನ ಆಟ್ನ ದನ್ಮ ಖ್ಹತ್ನ ಕರ‍್ಯೊ. ಇನು ನಾಮ್ ಇಸಾಕ್. ಇಮ್ಮಸ್ ಇಸಾಕಬಿ ಇನ ಛಿಯ್ಯೊ ಯಾಕೋಬ್‍ನ ಖ್ಹತ್ನ ಕರ‍್ಯೊ. ಅಜು಼ ಯಾಕೋಬ್‍ನೆ ಇನ ಖ್ಹಾರಾಸ್ ಪರ್ಖ್ಹಾ ಲಡ್ಕಾವ್‍ನ ಖ್ಹತ್ನ ಕರ‍್ಯೊ. ಆ ಪರ್ಖ್ಹಾ ಲಡ್ಕಾಸ್ ಖ್ಹಾಮ್ಣೆ ಭಾರಜ಼ಣ ಗುರುಗುರುಬ್‌ಲ್ಯ ಹುಯು. 9 ಯಾಕೋಬನ ಛಿಯ್ಯಾವ್‌ನೇಸ್ ಯೋಸೇಫನ ಉಪ್ಪರ್ ಬಳಾಪೊ ಕರ‍್ಯು. ಇವ್ಣೆಖ್ಹಾರು ಯೋಸೇಫನ ಧರೀನ್ ಈಜಿಪ್ಟ್‌ನ ಅದ್ಮಿನು ಗುಲಾಮ್ ಬಣೈನ್ ವೇಚಿನಾಖಿದಿದು. ಕತೋಬಿ ದೇವ್ ಯೋಸೇಫನ ಜೋ಼ಡ್ಮಾಸ್ ಥೊ. 10 ಅಜು಼ ಇನ ಆಯೂತೆ ಮುಶ್ಕಿಲ್‌ಥಿ ಛೋ಼ಡೈನ್. ಈಜಿಪ್ಟ್ ದೇಖ್ಹ್‌ನೊ ರಾಜ಼ನ ಖ್ಹಾಮ್ಣೆ ಅಕ್ಕಲ್‌ವಾಳೋಬಿ ದಯಾಕರವಾಳೊಬಿ ಹುವಾನಿತರ ಕರ‍್ಯೊ.ಫರೋಹನೆ ಯೋಸೆಫ್‌ನ ಈಜಿಪ್ಟ್ ದೇಖ್ಹ್‌ನಪರ್‌ಬಿ ಮಹೇಲ್‌ನಪರ್‌ಬಿ ಅಧಿಕಾರಿಕರಿನ್ ನೇಮ್‌ಶಾಯೊ. 11 ತದೆ ಈಜಿಪ್ಟ್ ಅಜು಼ ಕಾನಾನ್ ದೇಖ್ಹ್‌ಮ ಕಾಳ್ದುಕಾಳ್ ಪಡೀನ್ ಜಾ಼ಖ್ಹತ್ ಅದ್ಮಿನ ಖ್ಹತಾಪ್ಣಿ ಹುಯು. ಖಾಣುಕೊಂತೆ ಅಪ್ಣ ಗುರುಖ್ಹಾರಾನ ಘಣು ಮುಶ್ಕಿಲ್‍ಹುಯು. 12 ಕತೋಬಿ ಈಜಿಪ್ಟ್‌ಮ ಅನಾಜ಼್ ಛಾ಼ ಕರಿ ಬೋಲಾನು ಖಬರ್‌ನ ಖ್ಹಮ್‌ಜಿನ್‌ ಯಾಕೋಬನೆ ಪಹಿಲಿಬಾರ್ ಇನ ಛಿಯ್ಯಾವ್‍ನ ಹಿಜ್ಜಾ಼ ಮೋಕ್‌ಲ್ಯೊ. 13 ಅಜು಼ ಇವ್ಣೆ ಬೇನಿವಖ್ಹತ್ ಮಳಾನ ಗಯ. ತದೆ ಯೋಸೇಫನೆ ಇನಿ ಖ್ಹಣೇದ್ ಮಳಾನಿತರ ಕರ‍್ಯೊ. ಅಜು಼ ಯೋಸೇಫನ ಘರ್‌ವಾಳಾನಿ ಬಾರೇಮ ಫರೋಹನ ಮಾಲುಮ್‌ ಪಡ್ಯು. 14 ಇನಪಾರ್ ಯೋಸೇಫ ಇನೊ ಬಾ ಹುಯಿರೋತೆ ಯಾಕೋಬ್‌ನಾಬಿ ಅಜು಼ ಪಾಚ಼್‌ಉಪ್ಪರ್‌ ಖ್ಹಡ್‌ತೀನಿಖ್ಹ್ ಜ಼ಣು ಮಾಯಮಾತ್ರ ಖ್ಹಾರಾನ ಈಜಿಪ್ಟ್ ದೇಖ್ಹ್‌ಮ ಬುಲೈಲಿದೊ. 15 ತದೆ ಯಾಕೋಬಬಿನ್ ಇನ ಛಿಯ್ಯಾ ಇವ್ಣೆ ಮರಾಲಗೂಬಿ ಈಜಿಪ್ಟ್‌ಮಾಸ್ ಥು. 16 ಇನಪಾರ್ ಇನ ಶರೀರ್‌ನ ಶೇಕೆಮ್ಮ ಲೀನ್‌ ಜೈ಼ನ್, ಹಿಜ್ಜಾ಼ ಅಬ್ರಹಾಮ್‌ನೆ ಹಾಮೋರ‍್ನ ಛಿಯ್ಯಾಕನ ರೂಪಾನ ರಪ್ಯಾದೀನ್ ಮೋಲ್ ಲಿದೊಥೋತೆ ಝ಼ಗೋಮ ಮಖ್ಹಾಣ್ಯು ಕರ‍್ಯು. 17 ಕತೋಬಿ ದೇವ್ನೆ ಅಬ್ರಹಾಮ್‍ಥಿ ವಾಗ್ದಾನ ಕರ‍್ಯೊತೆ ವೇಳ್ ಆವಾನಿ ವಖ್ಹತ್ ಈಜಿಪ್ಟ್‌ಮ ಅಪ್ಣು ಯೆಹೂದ್ಯರ್ ಭಡೀನ್ ಜಾ಼ಖ್ಹತ್ ಹುಯು. 18 ತದೆ ಈಜಿಪ್ಟ್‌ಮ ಬಿಜೇಕ್ ರಾಜ಼ ರಾಜ಼್‌ಭಾರ್ ಕರಾನ ಆಯೊ. ಇನ ಯೋಸೇಫನಿ ಬಾರೇಮ ಶಾತ್ಬಿ ಮಾಲುಮ್‍ಕೋಥುನಿ. 19 ಆ ರಾಜ಼ನೆ ಅಪ್ಣ ಗುರುಖ್ಹಾರಪರ್‌ ಬಳಾಪೊ ಕರೀನ್ ಇವ್ಣ ಪೈದಾಖ್ಹ್‌ನ ಲಡ್ಕಾವ್‍ನ ಮರ್‌ನಾಕ್ಣುಕರಿ ಭಾರ್‌ ಕಡೈನಾಖ್ಯೊ.ಅಜು಼ ಅಪ್ಣ ಗುರುಖ್ಹಾರಾನ ಘಣು ಖ್ಹತಾಯು. 20 ಆ ಹಗಾಮ್ಮಾಸ್ ಮೋಶೆ ಪೈದಹುಯೊ. ಯೊ ಘಣು ಶನ್‍ಗಾರ‍್ನೊ ಥೊ ಅಜು಼ ಯೊ ಇನ ಬಾನ ಘರ್‌ಮ ತೀನ್ ಮಹಿನಲಗು ಪಳ್ಯೊ, 21 ತದೆ ಇವ್ಣೆ ಮೋಶೆನ ಭಾರ್‌ ಕಾಡ್‍ನಾಖಮ ಫರೋಹನಿ ಛೋ಼ರಿ ಇನ ಪಾಡಿಲಿಜೈನ್ ಇನೊ ಶೊಂತ್ ಛಿಯ್ಯಾನಿ ಮತ್‍ ಪಾಳಿ. 22 ಈಜಿಪ್ಟ್‌ವಾಳು ಮೋಶೆನ ಇವ್ಣುನ ಮಾಲುಮ್‍ಥೂತೆ ಹರೇಕ್ ಪಢಂತ್‍ನ ಶಿಕಾಡ್ಯು. ಯೋ ಅಕ್ಕಲ್‌ಮ ವಾತೆ ಬೋಲಾಮ ಅಜು಼ ಕಾಮ್ ಕರಾಮಾಬಿ ಜಾ಼ಖ್ಹತ್ ಅಕ್ಲಿಹುಯೊ. 23 ಯೊ ಚಾ಼ಳಿಖ್ಹ್ ವರಖ್ಹ್‌ನೊ ಹುಯೊ ತದೆ ಇನ ಇಸ್ರಾಯೇಲ್ ಭೈಯೇನ ಮಳಾನು ಅಛ್ಛು಼ಥು ಕರಿ ದಿಲ್‌ಮಹುಯು. 24 ತದೆ ಈಜಿಪ್ಟ್‌ವಾಳು ಏಕ್‍ಜ಼ಣು ಇಸ್ರಾಯೇಲ್‌ವಾಳ ಏಕ್‍ ಜ಼ಣಾನ ಗಲತ್‌ಥಿ ಘಣು ಖ್ಹತಾಪ್ಣಿ ದೇವ್‍ಕರ್ತುಥುತೆ ಇನ ಮೋಶೆನೆ ಮಾರಿನ್ ಬದಲ್ ಕಾಡಿಲಿದೊ. 25 ಅಮ್ಮಸ್ ದೇವ್ನೆ ಇನ ಹಾತೇಥಿ ಬಚಾ಼ವ್‍ಶೆ ಕರಿ ಇನ ಭೈಯೇನ ಮಾಲುಮ್‌ಪಡ್‍ಶೆ ಕರಿ ಲ್ಹಾಯೋಥೊ ಕತೋಬಿ ಇವ್ಣೆ ಮಾಲುಮ್ ಕೋ ಕರ‍್ಯಥಾನಿ. 26 ಇನವ್ಹಾಣೆ ಮೋಶೆನೆ ಯೆಹೂದ್ಯರ್‌ನ ಬೇಜ಼ಣ ಮಾರಮಾರಿ ಖಾವಾನು ದೇಖ್ಯೊ. ಇವ್ಣುನ ಖ್ಹಮ್‍ಜಾ಼ಡಾನಟೇಕೆ ‘ದೋಸ್ತಿವೊ ಭೈಯೇ ಭೈಯೇಸ್ ಹುಯಿರಾಸ್! ತುಮೆ ಏಕ್‌ಥಿಏಕ್ ಠಗಾವಾನು ಶನಕರೋಸ್‌? ಕರಿ ಇವ್ಣುನ ಸಮಾಧಾನ್ ಕರಾನ ಆಯೊ. 27 ಬಿಜೇಕ್ ಜ಼ಣೊ ಗಲತ್‌ ಕರಾವಾಳೊ ಏಕ್‍ಜ಼ಣೊ ಮೋಶೆನ ಪೀಠೆ ಧಕೇಲ್‍ತೊ ಹುಯಿನ್, ತುನ ಹಮಾರಪರ್‌ ಅದಿಕಾರಿ ಕರೀನ್‌ಬಿ, ನ್ಯಾವ್ಣೊ ಕರೀನ್‌ಬಿ ಮ್ಹೇಲ್ಯುತೆ ಕೋಣ್‌? 28 ಕಾಲೆ ಯೊ ಈಜಿಪ್ಟ್‌ವಾಳನ ಮಾರ‍್ಯೂತೆ ತಿಮ್ಮಸ್ ಮನಾಬಿ ಮಾರಿನಾಕ್ಣು ಕರಿ ಛಾ಼ಕಿಶು? ಕರಿ ಬೋಲ್ಯೊ. 29 ಅನ ಖ್ಹಮ್‍ಜ್ಯೊತೆ ಮೋಶೆ ಡರಿನ್ ಈಜಿಪ್ಟ್‌ನ ಮ್ಹೇಲಿನ್ ಮಿದ್ಯಾನ್‍ ದೇಖ್ಹ್‌ಮ ಜೈ಼ನ್ ಖ್ಹಣೇದ್‌ಕೊಂತೆ ಅದ್ಮಿನಿತರ ಜಿವ್ಣು ಕರ‍್ಯೊ. ಹಿಜ್ಜಾ಼ ಯೊ ಬೇ ಪರ್ಖ್ಹಾ ಲಡ್ಕಾನೊ ಬಾಹುಯೊ. 30 ಚಾ಼ಳಿಖ್ಹ್ ವರಖ್ಹ್‌ನೊ ಹುಯೊತದೆ ಸೀನಾಯಿ ಪಹಾಡ್ನ ಖನ್ನೆಥೂತೆ ಜ಼ಂಗಳ್‌ನ ಏಕ್‌ ಕಾಟಾನಿ ಡಾಗ್‌ಮ ಆಗ್‍ನಿ ಝ಼ಲ್‌ಪಟ್‌ ಲಾಗುಕರ್ತುಥುತೆ ಇನಾಮ ದೇವ್‌ನೊ ದೂತ ಇನ ದೆಖಾಯೊ. 31 ಮೋಶೆನೆ ಆಶ್ಚರ್ಯಥಿ ದೇಖಾನ ಖನ್ನೆ ಗಯೊ. ತದೆ ಇನೆ ಪ್ರಭುನೊ ಏಕ್‌ ಅವಾಜ಼್ ಖ್ಹಮ್‍ಜ್ಯೊ. 32 ದೇವ್ನೆಯಿನ, ಮೇಸ್ ತಾರೊ ಗುರುಗುರಬ್‌ಲ್ಯ ಹುಯಿರಾತೆ ಅಬ್ರಹಾಮ್ ಇಸಾಕ್ ಯಾಕೋಬನೊ ದೇವ್‌ ಕರಿ ಬೋಲ್ಯೊ. ಮೋಶೆ ಡರ್‌ಥಿ ಕಾಪಲಗ್ಯೊ. ಯೊ ಟಾಪ್‍ಣ್ಯನಾಬಿ ದೇಖಾನ ಭಾಲಿ ಕೋಥೂನಿ. 33 ಪ್ರಭುನೆ ಇನ ತಾರು ಖೋಖ್ಹ್‌ಡು ಕಾಡಿನಾಖಿದೆ ಹಮ್ಕೆ ತು ಭಿಯೋತೆ ಝ಼ಗೊ ಪರಿಶುದ್ ಹುಯಿರುಸ್. 34 ಅದ್ಮಿಖ್ಹಾರು ಈಜಿಪ್ಟ್ ದೇಖ್ಹ್‌ಮ ಜಾ಼ಖ್ಹತ್ ಖರಾಬ್ ಹಾಲತ್ಮ ರ‍್ಹವಾನು ಮೆ ದೇಖಿರಾಖ್ಯೊಸ್. ಮಾರ ಅದ್ಮಿಖ್ಹಾರಾನು ಅಂದ್ರೋಖ್ಹ್‌ನ ಮೆ ಖ್ಹಮ್‍ಜ್ಯೊ. ಮೆ ಇವ್ಣುನ ಬಚಾ಼ಡನಖ್ಹಾಜೆ ಉತ್ರಿರ‍್ಹೋಸ್. ಹಮ್ಕೇಸ್ ಮೆ ತುನ ಈಜಿಪ್ಟ್‌ಮ ಮೋಕ್ಲುಕರುಸ್ ಕರಿ ಬೋಲ್ಯೊ. 35 ಇವ್ಣೆ ಖೆವ ಮೋಶೆನ ನಕೊಕರಿ ಝಿಟ್ಕಾರಿನ್, ‘ತುನ ಅದಿಕಾರಿ ಕರೀನ್‌ಬಿ, ನ್ಯಾವ್ಣೊ ಕರೀನ್‌ಬಿ ಮ್ಹೇಲ್ಯುತೆ ಕೋಣ್‌?’ ಕರಿ ಕಿನೆ ಬೋಲ್ಯುಕಿ, ಇನಾಸ್ ದೇವ್ನೆ ಡಾಗ್‌ಮ ದೆಖೈನ್ ದೂತಾಥಿ ಅದಿಕಾರಿಬಿ, ಛುಟ್ಕಾರ್‌ ಕರಾವಾಳನಬಿ ನೇಮಕ್‌ ಕರ‍್ಯೊ.+ 36 ಇನಖ್ಹಾಜೆ ಮೋಶೆನೆ ಅದ್ಮಿಖ್ಹಾರನ ಈಜಿಪ್ಟ್ ದೇಖ್ಹ್‌ಮಾಥು ಬುಲೈಲಿ ಆಯೊ. ಯೊ ಖ್ಹಣೇದ್‍ನು ಕಾಮ್‌ಖ್ಹಾರು, ಅದ್ಬುತ್‌ಕಾಮ್‌ಖ್ಹಾರಥಿ ಈಜಿಪ್ಟ್‌ಮಾಬಿ ಅಜು಼ ಲಾಲ್‍ದರ‍್ಯಾವ್‍ಮಾಬಿ ಚಾ಼ಳಿಖ್ಹ್ ವರಖ್ಹ್ ಜ಼ಂಗಳ್‌ಮ ಚ಼ಲೈಲಿನ್ ಆಯೊ. 37 ಯೋ ಮೋಶೆನೇಸ್, ದೇವ್ನೆ ಮನ ಉಠಾಡಾನಿ ತರಸ್ ತುಮಾರ ಅದ್ಮಿಮಾಸ್‌ ಏಕ್‌ ಪ್ರವಾದಿನ ತುಮಾರಮಸ್ ಉಠಾಡ್‌ಶೆ, ಕರಿ ಇಸ್ರಾಯೇಲ್‌ನ ಅದ್ಮಿಖ್ಹಾರಾನ ಬೋಲ್ಯೊ. 38 ಇನೇಸ್ ಸೀನಾಯಿ ಪಹಾಡ್‌ಮ ಇನಿಜೋ಼ಡ್ಮ ವಾತೆಬೋಲ್ಯೊತೆ ದೇವ್ನ ದೂತನಾಬಿ ಅಪ್ಣ ಗುರುಖ್ಹಾರಾನಾಬಿ ಜ಼ಂಗಳ್‌ಮ ಥೂತೆ ಸಬೇಮರ‍್ಹೀನ್ ಜಾನ್ನಿ ವಚನ್ನ ಲೀನ್ ಅಪ್ಣುನ ದ್ಯವಾಳೊ ಹುಯಿರೋಸ್. 39 ಕತೋಬಿ ಅಪ್ಣೊ ಗುರುಖ್ಹಾರು ಇನಿ ವಾತೆನ ಖ್ಹಮ್‌ಜಾ಼ನ ದಿಲ್‌ಕೊಂತೆ ಇನ ಮ್ಹೇಲಿನ್, ಈಜಿಪ್ಟ್‌ಮ ಪಾಛು಼ ಚ಼ಲೆಜಾ಼ವ್ಣು ಕರಿ ದೇಖ್ಯು. 40 ಇವ್ಣೆಖ್ಹಾರು ಆರೋನ್ನ, ‘ಮೋಶೆನೆ ಈಜಿಪ್ಟ್ ದೇಖ್ಹ್‌ ಥು ಬುಲೈಲಾಯೊ. ಕತೋಬಿ ಇನ ಶಾತ್ ಹುಯಿಗಯು ಕರಿ ಹಮೂನ ಮಾಲುಮ್‌ ಕೊಹುಯುನಿ. ಇನಖ್ಹಾಜೆ ಹಮೆ ಖ್ಹಾಮ್ಣೆ ಜಾ಼ವಾನಟೇಕೆ ಅಜು಼ ಹಮುನ ಚ಼ಲಾವನಟೇಕೆ ದೇವ್‌ನು ಮೂರತ್‌ ಕರೀನ್ ದೇ ಕರಿ ಬೋಲ್ಯು’. 41 ತದೆ ಯೊ ದನ್ಮ ಢಾಂಡನಿಘೊಣಿ ಏಕ್‌ ಫುತ್‍ಳು ಬಣೈನ್ ಇನಖ್ಹಾಮ್ಣೆ ಬಲಿದಿದು. ಅಜು಼ ಮಿಝ಼್‌ವಾನ್ಬಿ ಖಡಾಯು ಯೋ ಅದ್ಮಿಖ್ಹಾರು ಮಗನ್‌ ಹುಯು. 42 ಇನಖ್ಹಾಜೆ ದೇವ್ನೆ ಇವ್ಣೇಥಿ ಮ್ಹೋಡು ಫರೈನ್, ಆಬ್‌ನ ಶುಕ್ಕರ್‌ನ ಪೂಜ಼ ಕರಿಲ್ಯವಾದೆಕರಿ ಇವ್ಣುನ ಮ್ಹೇಲಿದಿದೊ. ಅನಿಬಾರೇಮ ಪ್ರವಾದಿನ ಪುಸ್ತಕ್‌ಮ ಅಮ್ ಲೀಖೈರುಸ್; ದೇವ್ ಅಮ್‍ ಬೋಲಾಸ್, ಇಸ್ರಾಯೇಲ್‌ನ ಖಾನ್‌ದಾನ್‌ವಾಳವೊ! ತುಮೆ ಚಾ಼ಳಿಖ್ಹ್ ವರಖ್ಹ್‌ಲಗು ಜ಼ಂಗಳ್‌ಮರ‍್ಹಾವಾನಿ ವಖ್ಹ್‌ತೆ ತುಮೆ ಮನ ಬಲಿ ಚ಼ಢಾಯಾಥಾಕಿ ಶು? 43 ತುಮೆ ತುಮಾರ ಜೋ಼ಡ್ಮ *ಮೊಲೋಖ ದೇವ್‌ನು ಡೇರಾನಾಬಿ ಅಜು಼ ರೆಫಾನ್ ದೇವ್ತಿನೊ ಶುಕ್ಕರ್‌ನ ರೂಪ್‍ನು ಫುತ್‍ಳಿನ ಢೊಯಿಲೀನ್ ಆರಾದನೆಕರಾನ ವಳೇಜಾ಼ತಥಾತೆ ಇನಖ್ಹಾಜೆ ಮೆ ತುಮೂನ ಬಾಬಿಲೋನ್ನ ಖ್ಹಾರ್ಕೊಟ್‌ಮ ಮೋಕ್ಲಿದಿಶ್‌ಕರಿ ಲೀಖಿರಾಖ್ಯುಸ್. 44 +ದೇವ್ ರ‍್ಹೆತೊಥೋತೆ ಡೇರೊ ಜ಼ಂಗಳ್ಮ ಅಪ್ಣ ಗುರುಖ್ಹಾರಾಕನ ಥು. ಮೋಶೆನಿ ಜೋ಼ಡ್ಮ ವಾತೆ ಬೋಲ್ಯೊತೆ ದೇವ್‌, ತುನೆ ದೆಖ್ಯೋತೆ ಶಕಲ್ನಿ ಪರಕ್ಮಾಸ್ ಇನ ಕರ್ನುಕರಿ ಹುಕುಮ್ ದಿದೊ. 45 ಅಪ್ಣ ಬಾಬ್‍ದಾದ್‍ವ್ನೆ ಇನ ಗುರುಗುರಬ್‍ಲ್ಯಥು ಲಿದು. ಇವ್ಣೆ ಯೆಹೋಶುವನ ಪಾಲನ್‍ ಕರ್ತು ಅಯಿನ್ ದೇವ್ನೆ ಧಕೇಲಿ ದಿದಾಹುಯ ಅಲಕ್ ಅದ್ಮಿನ ದೇಖ್ಹ್‌ನ ಕಬ್‍ಜಾ಼ ಕರಿಲಿದು. ತದೆ ಯೊ ಡೇರಾನ ಘರ್‌ನ ಇವ್ಣ ಜೋ಼ಡ್ಮಾಸ್ ಪಾಡಿಲಿನ್ ಕಾನಾನ್ ದೇಖ್ಹ್‌ಮ ಆಯು. ಅಜು಼ ದಾವೀದನು ಹಗಾಮ್ ಲಗೂಬಿ ಯೊ ಹಿಜ್ಜಾ಼ಸ್ ಥೂ. 46 ದಾವಿದನೆ ದೇವ್ನಿ ಸನ್ನಿಧಿಮ ದಯಾಲೀನ್ ಯಾಕೋಬ್‍ನಿ ಪಿಳ್ಗಿನಖ್ಹಾಜೆ ಪ್ರಾರ್ಥನೇನಿ ಮಂದಿರ್‌ ಭಾಂದನ ಹುಕುಮ್ ದೇವ್ಣುಕರಿ ದೇವ್ನ ಬಿಂತಿ ಕರಿಲಿದೊ. 47 ಕತೋಬಿ ಸೊಲೊಮೋನ್ನೇಸ್ ಪ್ರಾರ್ಥನೇನು ಮಂದಿರ್‌ನ ಭಂದಾಯೊ. 48 ಪ್ರವಾದಿ ಬೋಲಾತೆತಿಮ್ ಪರಮಂಡಲ್‌ನೊ ದೇವ್ ಅದ್ಮಿನ ಭಾಂದಾತೆ ಘರ್‌ಮ ರ‍್ಹವವಾಳೊ ಕಾಹೆ. 49 ಪ್ರಭುನೆ ಅಮ್‌ ಬೋಲ್ಯೊ, ‘ಸೊರ್ಗ ಮಾರು ಸಿಂಹಾಸನ್ ಜ಼ಮೀನ್ ಮಾರೊ ಗೋಡಾನೊ ರಚ್ಚೊ಼ ತುಮೆ ಮನ ಕಿಮ್ನು ಘರ್ ಭಾಂದ್‍ಶು? ಮಾರು ಅರಾಮ್‌ನ ಬರೋಬರ್‌ನಿ ಝ಼ಗೊ ಕಿಜ್ಜಾ಼ ಛಾ಼? 50 ಆ ಅಖ್ಖು ಮಾರ ಹಾತ್ನೆಸ್ ಬಣಾವಟ್ ಕರ‍್ಯುನಿ, ಕರಿ ಪ್ರಭುಸ್ ಬೋಲ್ಯೊ. 51 ಸ್ತೆಫನನೆ ಅಮ್‍ ಬೋಲ್ಯೊಕಿ, “ಮೊಂಡಿಹುಯಿರಾತೆ ತುಮೆ ತುಮಾರ ದಿಲ್ನ ದೇವ್ನ ಕೋ ದಿದಾನಿ ಇನ ಕಾನ್‍ಲಗಾಡ್ಯಾಬಿ ಕೊಯ್ನಿ. ಪವಿತ್ರ ಆತ್ಮಾನ ಕಾಮ್ನ ವಿರುದ್ಧಥಿ ಚಾ಼ಲವಾಳ ಹುಯಿರಾಸ್. ತುಮಾರ ಗುರುಗುರಬ್‍ಲ್ಯ ಕಿಮ್‌ಥಾಕಿ ತುಮೇಬಿ ಇಮ್ಮಸ್ ಹುಯಿರಾಸ್. 52 ಜಿವ್ತಥಾತೆ ಪ್ರವಾದಿಮ ಖ್ಹಾರಜ಼ಣನ ತುಮಾರ ಗುರುಖ್ಹಾರು ಖ್ಹತಾಯು. ನೀತಿವಾಳೊ ಎಕ್ಕಸ್‍ಜ಼ಣೊ ಹುಯಿರೋತೆ ಯೊ ಪಹಿಲೆಸ್ ಆವ್‍ಶೆಕರಿ ಖ್ಹಮ್‍ಜಾ಼ಯುಥು. ಕತೋಬಿ ತುಮಾರು ಗುರುಖ್ಹಾರು ಯೋ ಪ್ರವಾದಿಖ್ಹಾರನ ಮಾರಿನಾಖ್ಯು. ಹಮ್ಕೆ ತುಮೆ ಧರಿದೀನಸ್ ಇನ ಮರೈನಾಖ್ಯ. 53 ತುಮೆ ಸೊರ್ಗ ದೂತರ್‌ಥಿ ನೇಮಕ್ ಹುಯೊತೆ ದೇವ್ನು ಧರ್ಮಶಾಸ್ತ್ರನ ಸ್ವೀಕಾರ್ ಕರ‍್ಯಾತೋಬಿ ಇನಿನಿತರ ಚಾ಼ಲ್ಯಕೊಯ್ನಿ” ಕರಿ ಬೋಲ್ಯೊ.

54 ಆ ವಾತ್ನ ಖ್ಹಮ್‍ಜ್ಯುತೆ ನ್ಯಾವ್ನಿಸಭೆನು ಘಲ್ಡುಖ್ಹಾರು ಘಣು ಖಿಜೈನ್ ಸ್ತೆಫನನ ಉಪ್ಪರ್ ದಾತ್‍ಚಾ಼ಯು. 55 ಕತೋಬಿ ಯೊ ಪವಿತ್ರ ಆತ್ಮಥಿ ಭರೈನ್ ಸೊರ್ಗಭಣಿ ದೇಖಿನ್, ದೇವ್ನಿ ಮಹಿಮೆನಬಿ, ದೇವ್ನ ಖಾವಿಬಾಜು಼ಮ ಭಿಯೋತೆ ಯೇಸುನಾಬಿ ದೇಖ್ಯೊ. 56 ತದೆ ಇನೆ, “ದೇಖೊ ಪರ್‌ಲೋಕ್ ನಿಕ್‍ಳೈರ‍್ಹೂತೆ; ಅದ್ಮಿನೊ ಛಿಯ್ಯೊ ದೇವ್ನ ಖಾವಿಬಾಜು಼ಮ ಭಿಯೋತೆ ಮೆ ದೇಖುಕರುಸ್” ಕರಿ ಬೋಲ್ಯೊ. 57 ತದೆ ಯಹುದ್ಯರ್‌ಖ್ಹಾರು ಜೋ಼ರೇಥಿ ಚಿಕ್ರಿನ್, ಕಾನ್ನ ಮೂಚಿಲೀನ್, ಎಕ್ಟುಹುಯಿನ್ ನಾಶಿಆಯಿನ್, 58 ಇನ ನಂಗರ‍್ನ ಭಾರ್‌ ಧಕೇಲಿಜೈ಼ನ್ ಮಾರಿನಾಖನ ಇನಪರ್ ಬಂಡೊ ಫೇಕ್ಯು. ಇನ ವಿರೋದ್‌ ಸಾಕ್ಷಿ ಬೋಲ್ಯುತೆ ಇವ್ಣೆ ಇವ್ಣ ಝ಼ಗ್ಗಾನ ಕಾಡಿನ್ ಸೌಲಕರಿ ಏಕ್‍ ಜ಼ಣಾನ ಗೋಡಾಕನ ಮ್ಹೇಲ್ಯು. 59 ಸ್ತೆಫನನ ಉಪ್ಪರ್ ಬಂಡೊ ಫೇಕುಕರ್ತುಥೂತೆ ತದೆ ಯೋ ಪ್ರಾರ್ಥನೆ ಕರ್ತೊ ಹುಯಿನ್ “ಯೇಸು ಪ್ರಭು, ಮಾರ ಆತ್ಮಾನ ಸ್ವೀಕಾರ್‌ಕರೀಲೆ” ಕರಿ ಬೋಲ್ಯೊ. 60 ಅಜು಼ ಯೊ ಢುಕ್‍ಣ್ಯ ಮಾಂಡೀನ್ ಪ್ರಭು, ಆ ಪಾಪ್ನ ಅವ್ಣಪರ್ ನಕೊ ಲಗಾಡಿಷ್!” ಕರಿ ಜೋ಼ರೇಖ್ಹು ಚಿಕ್ರಿನ್ ಮರಿಗೊ.