27
ಪೌಲನೆ ರೋಮ್‍ನ ಗಯೋತೆ
1 ಹಮೆ ದರ‍್ಯಾವ್ನ ಮಾರಗ್‍ಥಿ ಇಟಲಿನ ಜಾ಼ವ್ಣುಕರಿ ತೀರ್ಮಾನ್ ಹುಯು. ಪೌಲನಾಬಿ ಬಿಜು಼ ಥೋಡು ಖೈದಿಖ್ಹಾರಾನ ಯೂಲ್ಯ ಕರಿ ಏಕ್‍ಜ಼ಣೊ ಖ್ಹೋಶಿಪಾಯಿನೊ ಮೋಟೊ ಹುಯಿರ‍್ಹೋಥೊ. ಯೋ ರಾಜ಼ನಿ ಡಂಡ್ಮ ಕಾಮ್ ಕರಾವಾಳೊ ಹುಯಿರ‍್ಹೊಥೊ.
2 ತದೆ ಅದ್ರಮಿತ್ತಿಯಥು ಐನ್ ಏಷ್ಯಾನ ಅಲಕ್ ಅಲಕ್ ತಬರ್‌ಖಾನು ಜಾ಼ವಾನ ತಯಾರ್ ಹುಯಿರ‍್ಹಿಥೀತೆ, ಜ಼ಹಾಜ಼್ ಹಮೆ ಚ಼ಢೀನ್ ಚಾ಼ಲ್‌ಕುಚ಼್‌ ಕರ‍್ಯ. ಇನಾಮ ಥೆಸಲೋನಿಕಥೊ ಆಯೋತೆ ಮೆಕೆದೋನ್ಯವಾಳೊ ಅರಿಸ್ತಾರ್ಕ ಹಮಾರಿ ಜೋ಼ಡ್ಮ ಥೊ.
3 ಇನವ್ಹಾಣೆ ಹಮೆ ಸೀದೋನ್‍ಖ್ಹಯೇರ‍್ನ ಜೈ಼ನ್ ಪೋಚ್ಯ. ಯೂಲ್ಯನೆ ಪೌಲನಪರ್ ಗೋರ್‌ ಕರಾವಳೊಹುಯಿನ್, ಇನ ದೋಸ್ತಿಖ್ಹಾರನಕನ ಮದತ್ ಲೀಲ್ಯಾವನಖ್ಹಾಜೆ ಇನ ಹುಕುಮ್ ದಿದೊ.
4 ತದೆ ಹಿಜ್ಜಾ಼ಥ ನಿಕ್ಳಿನ್ ಜ಼ಹಾಜ಼್‍ಮ ಜಾ಼ವಾನಿ ವಖ್ಹತ್‌ಮ ಖ್ಹಾಮ್ಣೆನೊ ವಹಿರೊ ವಾಗುಕರ್ತುಥೂತೆ ಇನಾಖ್ಹಾಜೆ ಹಮೆ ಸೈಪ್ರಸ್ ಟಾಪನ ಖನ್ನೆಕರಿ ಗಯ.
5 ಕಿಲಿಕ್ಯನಾಬಿ ಪಂಫುಲ್ಯನಾಬಿ ಮ್ಹೋರೆ ಹುಯಿರೋತೆ ದರ‍್ಯಾವ್ನ ಉಲಾಂಗಿನ್, ಲುಕೀಯನು ‘ಮುರ’ ಕರಿ ಝ಼ಗೋಕನ ಆಯಿನ್ ಪೋಚ್ಯ.
6 ಹಿಜ್ಜಾ಼ ಇಟಲಿನ ಜಾ಼ವಾನಿ ಅಲೆಕ್ಸಾಂಡ್ರಿಯ ಖ್ಹಯೇರ‍್ನಿ ಜ಼ಹಾಜ಼್ನ ಖ್ಹೋಶಿಪಾಯಿನ ಮೋಟಾನೆ ದೇಖಿನ್, ಹಮೂನ ಇನಾಮ ಛ಼ಡಾಯೊ.
7 ಹಮೆ ಹಳ್ಳೂಥಿ ಕೈಏಕ್ ದನ್‌ಲಗು ಜ಼ಹಾಜ಼್‌ನಿಚಾ಼ಲ್‌ ಕರ್ತಹುಯಿನ್ ಘಣು ಮುಶ್ಕಿಲ್‌ಥಿ ಖ್ಹರ್ತಿನ ಸ್ನೀಡ ಖ್ಹಯೇರ‍್ನ ಐನ್ ಪೋಚ್ಯ. ಖ್ಹಾಮ್ಣೆನೊ ವಹಿರೊ ವಾಗುಕರ್ತುಥೂತೆ ಇನಖ್ಹಾಜೆ, ಯೋ ಮಾರಗ್‍ಮ ಅಗಾಡಿ ಜಾ಼ವಾನ ಹಮೂನ ಕೊಹುಯುನಿ. ಇನಖ್ಹಾಜೆ ಹಮೆ ಕ್ರೇಟ್ ಟಾಪಾನ ಕನಾರೆಕರಿ ಸಾಲ್ಮೋನೆನ ಖನ್ನೆ ಐನ್,
8 ಹಮೆ ಮುಶ್ಕಿಲ್‌ಥಿ, ಯೋ ಟಾಪನ ಕನಾರೆ ಅಗಾಡಿ ಜಾ಼ತಹುಯಿನ್ ಶನ್‌ಗಾರ್ನುಕೊಲ್ಲಿ ಕರಿ ಏಕ್ ಝ಼ಗೊಕನ ಆಯ. ಯೋ ಲಸಾಯಕರಿ ಖ್ಹಯೇರ‍್ನ ಖನ್ನೆ ಥೂ.
9 ಅಮ್ಮಸ್ ಘಣಾದನ್ ನಿಕ್ಳಿಗಯು. ಯೆಹೂದ್ಯರ್‌ನ ಪಟ್ನಿನೊ ದನ್‍ಬಿ ಖ್ಹತಮ್ ಹುಯಿಗಾಥ. ಇನಖ್ಹಾಜೆ ಪೌಲನೆ ದರ‍್ಯಾವ್‌ಮ ನಿಕ್ಳಾನು ಮುಶ್ಕಿಲ್ ಕರಿ ಬೋಲ್ಯೊ.
10 ತದೆ ಪೌಲನೆ ಇವ್ಣುನ, “ಅದ್ಮಿವೊ ಆ ಚಾ಼ಲ್‌ಥಿ ಜ಼ಹಾಜ಼್‌ನಾಬಿ, ಇನಾಮಛಾ಼ತೆ ರಾಛಾ಼ನಾಬಿ, ಅತ್ರೇಸ್‍ಕಾಹೆತೆ ಅಪ್ಣ ಜಾನ್ನಬಿ, ಘಣು ವದೇಖ್ಹ್‌ಬಿ ಲುಕ್ಷಾನ್‌ಬಿ ಉಷೆಕರಿ ಮನ ದೆಖಾವಸ್” ಕರಿ ಝೇತಾಯೊ.
11 ಕತೋಬಿ ಪೌಲನೆ ಬೋಲ್ಯೊತೆ ವಾತೆಥೀಬಿ, ಜ಼ಹಾಜ಼್‌ನೊ ಯಜಮಾನ್ನಿಬಿ ಚ಼ಲಾವವಾಳನಿ ವಾತ್ನ ಖ್ಹೋಶಿಪಾಯಿನ ಮೋಟಾನೆ ಕಾನ್‍ದಿದೊ.
12 ಯೋ ಬಂದರ್ನೊ ತಬರ್‌ಖೊ ಠಣ್ಣಹಗಾಮ್ ಕಾಡಾನ ಯೋ ಜ಼ಹಾಜ಼್ನ ಅಛ್ಛಿಝ಼ಗೊ ಕೋಥೂನಿ. ಇನಖ್ಹಾಜೆ ಹಿಜ್ಜಾ಼ಥು ನಿಕ್ಳಿನ್, ಜಾ಼ವಾನು ಹುಯುತೊ ಕಿಮ್‍ಬಿ ಫೆನಿಕ್ಸ್‌ ಗಾಮ್ನ ಜೈ಼ನ್ ಹಿಜ್ಜಾ಼ಸ್ ಯೋ ಠಣ್ಣಾ ಹಗಾಮ್‌ ಕಾಡ್ಣುಕರಿ ಘಣು ಅದ್ಮಿ ಖ್ಹೂಜ಼್ ಕರ‍್ಯು. ಫೆನಿಕ್ಸ್‌, ಕ್ರೇಟ್ ಟಾಪಾನು ಏಕ್ ಬಂದರ್ನೊ ತಬರ್‌ಖೊ, ಯೋ ಈಶಾನ್ಯ ದಿಕ್ನಾಬಿ, ಆಗ್ನೇಯ ದಿಕ್ನಾಬಿ, ಆಮಖ್ಹಾಮೆ ಥು.
ದರ‍್ಯಾವ್‌ಮ ತೋಫಾನ್
13 ತದೆ ದಕ್ಷಿಣ್ ಭಣೀಥು ವಹಿರೊ ಹಳ್ಳೇಖ್ಹು ವಾಗಲಗ್ಯೊ. ಇವ್ಣೆ ಉದ್ದೇಶ್ ಹಕ್ಲಾಲ್ ಹುಯುಕರಿ ಖ್ಹೂಜ಼್ ಕರೀನ್, ಲಂಗಾರ್ನ ಛೋ಼ಡಿಲಿನ್, ಕ್ರೇಟ್ ಟಾಪಾನ ಕನಾರೇಸ್‍ಕರಿ ಪಡ್ತಹುಯಿನ್ ಜ಼ಹಾಜ಼್‌ಪರ್ ನಿಕ್‍ಳ್ಯ.
14 ಕತೋಬಿ ಜ಼ರಸ್‍ಘಡೀಮ ಈಶಾನ್ಯ ಮಾರುತ ಕರಿ ಅಪಟ್‌ಝ಼ಪಟ್‌ನೊ ವಹಿರೊ ಟಾಪಾಮ ವಾಗಲಗ್ಯುಥು.
15 ಜ಼ಹಾಜ಼್ ಯೋ ವಹಿರಾಮ ಖ್ಹಪ್‍ಡಿನ್, ಹಮೆ ಕೋಶಿಶ್ ಕರಾನು ಮ್ಹೆಂದಿದ. ಅಜು಼ ಅಗಾಡಿ ಜಾ಼ವಾನ ಕೋ ಹುಯುನ್ತೆ ವಹಿರೊ ಕೀಕಡ್ ವಾಗಸ್ಕಿ ಥೀಕಡ್ ಕರಿಶ್ ಜ಼ಹಾಜ಼್ನ ಧಕೆಲಾವ್ತಹುಯಿನ್ ಗಯು.
16 ಹಮೆ ಕ್ಲೌಡ ಕರಿ ಏಕ್ ನ್ಹಾನು ಟಾಪನ ಓಠೆಕರಿ ಗಯ. ತದೆ ಹಮೆ ಜ಼ಹಾಜ಼್ಮಥೂತೆ ನ್ಹಾನಿದೋಣಿನ ಮಹಿ ಪಾಡಿನ್ ಬರೋಬರ್ ಕರ್ವಾನುಹುಯು.
17 ಇನ ಉಪ್ಪರ್ ಪಾಡಿಹುಯಗು ತದೆ ಶಿಂದ್ರಾನ ಪಾಡಿನ್ ಜ಼ಹಾಜ಼್ನ ಹೇಟ್ ಭಾಂದ್ಯು. ಇನಕೇಡೆಥು “ಸುರ್ತಿಸ್” ಕರಿ ರೇತ್ನೊ ಟಿಮ್ಮಾಮ ಜ಼ಹಾಜ಼್ ಪೇಶಿಜಾ಼ಶೆಕರಿ ಡರ್‌ಥಿ, ಜ಼ಹಾಜ಼್ನ ಉಪ್ಲಿಬಾಜು಼ನು ಜ಼ಹಾಜ಼್ನ ಮಿಲಾವನ ಜಿನಖ್ಹ್‌ನ ಉತಾರಿನ್‌ ವಹಿರೊ ವಾಗುಕರಾತೆ ಬಾಜು಼ಸ್ ಜ಼ಹಾಜ಼್ ತೇಲಾದೆಕರಿ ಮ್ಹೇಲ್ಯು.
18 ಇನವ್ಹಾಣೆ ತೋಫಾನ್ನೊ ವಹಿರೊ ಅಪಟ್ಜ಼ಫಟ್ ವಾಗಲಗ್ಯುತೆ ದೇಖಿನ್, ಅದ್ಮಿಖ್ಹಾರು ಜ಼ಹಾಜ಼್‍ಮ ಥೂತೆ ಥೋಡು ಖ್ಹಾಮನ್‍ಖ್ಹಾರು ಫೇಕಿದಿದು.
19 ಇನ ತೀನ್ ದನ್ಮ ಜ಼ಹಾಜ಼್‌ವಾಳನೇಸ್, ಜ಼ಹಾಜ಼್‌ನು ರಾಛಾ಼ವ್‌ನಾಸ್ ಪಾಡಿನ್ ಫೇಕಿದಿದು.
20 ಕೈಏಕ್ ದನ್‌ಲಗು ಚಾ಼ಂದ್‍ನ ರ‍್ಹವೊ, ಶುಕ್ಕರ್‌ನ ರ‍್ಹವೊ ದೇಖಾನ ಕೊಹುಯುನಿ. ತೋಫಾನ್ ಮೋಟುಸ್ ಹೋತುಆಯು. ಹಮೆ ಬಚಿಜಾಶುಕರಿ ಬೋಲಾನಿ ವಿಶ್ವಾಸ್ ಹಮಾರಮಾಥಿ ನಿಕ್ಳಿಗೈಥಿ.
21 ಯೋ ಅದ್ಮಿಖ್ಹಾರು ಘಣಾದನ್‍ಥು ಖಾಣುಖಾದೂಥು ಕೊಯ್ನಿ. ತದೆ ಏಕ್‍ದನ್ ಪೌಲ ಉಠಿ ಭೀರಿನ್ ಇವ್ಣುನ “ಅಲಾ ಅದ್ಮಿವೊ, ಕ್ರೇಟ್ ಟಾಪಾಥು ನಿಕ್ಳೊನಕೊ ಕರಿ ಮೇ ತುಮೂನ ಬೋಲ್ಯೊ. ತುಮೆ ಮಾರಿವಾತೆ ಖ್ಹಮಜ಼್‌ಣುಥು. ತದೆ ತುಮೂನ ಅತ್ರೆ ವದೇಖ್ಹೊ ಲುಕ್ಷಾನ್‌ ಕೋ ಹುಯುಹೋತ್ನಿ.
22 ಹಮ್ಕೆತೋಬಿ ತುಮೆ ಭಾಲಿಥಿ ರ‍್ಹೇವೊಕರಿ ತುಮೂನ ಬುದ್ದಿಬೋಲುಸ್; ಜ಼ಹಾಜ಼್ ನಾಶ್‍ಉಶೇ ಪಣ್ಕಿ ತುಮಾರಮ ಏಕ್‍ಜ಼ಣುಬಿ ಜಾನ್‌ ಕಾಡಿಲೆಶೆಕೊಯ್ನಿ.
23 ಗೈತೆರಾತ್, ದೇವ್‍ಕಂಥೊ ಏಕ್ ದೂತ ಮಾರಕನ ಆಯೋಥೊ. ಯೋಸ್ ದೇವ್ನ ಮೇ ಆರಾದನೆ ಕರುಸ್ತೆ ಮೆ ಇನೋಸ್.
24 ಯೋ ದೇವ್ನದೂತನೆ, ‘ಪೌಲ, ಡರ್‌ನಕೊ ತೂ ಕೈಸರೈನ ಖ್ಹಾಮ್ಣೆ ಭೀರೆವ್ಣು. ತಾರಿ ಜೋ಼ಡೆ ಜ಼ಹಾಜ಼್‍ಮ ಓಳೆಜಾ಼ಸ್‍ತೆ ಖ್ಹಾರಾಸ್ ಅದ್ಮಿನ ಜಾನ್ನ ಬಚಾ಼ಡುಕರುಸ್ತೆ, ತಾರ ಉಪ್ಪರ್‌ಲ್ಯ ದಯಾನಖ್ಹಾಜೆ ಕರಿ ಬೋಲ್ಯೊ.
25 ಇನಖ್ಹಾಜೆ, ಅದ್ಮಿವೊ ಭಾಲ್‍ಥಿ ರ‍್ಹವೊ. ಮನ ಬೋಲೈರ‍್ಹುತೆ, ಪರಕ್ಮಸ್ ಉಷೆಕರಿ ಮೇ ದೇವ್‍ಪರ್ ವಿಶ್ವಾಸ್ ಕರುಸ್.
26 ಕತೋಬಿ ಅಪ್ಣೆ ಕೆಹೂಕಿ ಏಕ್ ಟಾಪಾನಿ ಕನಾರಿನ ಫೋಚು಼ಕರಿಯೇಸ್, ಕರಿ ಬೋಲ್ಯೊ.
27 ಚೌ಼ಧಾನಿ ರಾತ್ಮ ಹಮೆ ಆದ್ರಿಯ ದರ‍್ಯಾವ್‌ಮ ಯೊ ಜ಼ಹಾಜ಼್ ವ್ಹವ್‌ತುಹುಯಿನ್, ಜಾ಼ತರ‍್ಹವಾನಿ ವಖ್ಹತ್‌ಮ, ಖ್ಹುಮಾರ್ ಅಧಿರಾತ್ಮ ಇನ ಚ಼ಲಾವವಾಳನೆ ಹಮೆ ಜ಼ಮೀನ್ನ ಖನ್ನೆ ಅಯಿಗ ಕರಿ ಲಾಝ್ಯು.
28 ತದೆ ಅಳ್ತಿನು ಗುಂಡ್ ಮ್ಹೇಲಿನ್ ಪಾಣಿನಿ ಗಧಾರ‍್ನ ತರೀಪ್ಷ ಕರಾಮ, ಯೋ ಖ್ಹುಮಾರ್ ಏಕ್ ಖ್ಹೋ ಡೋಡಿಖ್ಹ್‌ ಅಡಿ ಗಧಾರ್ ಛಾ಼ ಕರಿ ಮಾಲುಮ್ ಕರಿಲಿದ. ಇವ್ಣೆ ಬಿಜು಼ ಥೋಡಿ ದೂರ್ ಜೈ಼ನ್, ಪಾಛು಼ ಅಳ್ತಿನು ಗುಂಡ್ ಮ್ಹೇಲಿನ್ ದೇಖಾಮ, ಖ್ಹುಮಾರ್ ಯೋ ಖ್ಹಡ್‌ಚಾರೀಖ್ಹ್ ಅಡಿ ಥು.
29 ಜ಼ಹಾಜ಼್ ಬಂಡಾನ ಟಕ್ಕರ್ ಖಾಶೆಕರಿ ಡರಿನ್ ಜ಼ಹಾಜ಼್ನ ಪೀಠೆಥು ಚಾರ್ ಲಂಗಾರ್ನ ಪಾಣಿನ ಮಹಿ ಮ್ಹೇಲಿನ್ ಒಗ್ಗಿ ವ್ಹಾಣು ಹುವಾದೆಕರಿ ಪ್ರಾರ್ಥನೆ ಕರ‍್ಯು.
30 ಜ಼ಹಾಜ಼್ ಚ಼ಲವಾಳು ಥೋಡುಜ಼ಣು, ಲಪೀನ್ ದೋಣಿನ ದರ‍್ಯಾವ್‌ಮ ಉತ್‌ರೈನ್ ನಿಕ್ಳಿ ಜಾ಼ವ್ಣುಕರಿ ಜ಼ಹಾಜ಼್ನ ಖ್ಹಾಮ್ಣೆಥೂತೆ ಲಂಗಾರ್ ಅಖ್ಖಾನ ಹೇಟ್ ಉತಾರಾನು ಭಾಣು ಕರ‍್ಯು.
31 ತದೆ ಪೌಲನೆ ಖ್ಹೋಶಿಪಾಯಿನ ಮೋಟನಾಬಿ ಶಿಪಾಯಿಖ್ಹಾರಾನ, “ಆ ಜ಼ಹಾಜ಼್ ಚ಼ಲವವಾಳೊ ಜ಼ಹಾಜ಼್‍ಮ ನಾರ‍್ಹಯುತೊ ತುಮಾರೊ ಜಾನ್‌ ಬಚಾ಼ವನ ಉಶೇಸ್‍ ಕೊಯ್ನಿ” ಕರಿ ಬೋಲ್ಯೊ.
32 ಇನಖ್ಹಾಜೆ ಶಿಪಾಯಿಖ್ಹಾರನೆ, ಶಿಂದ್ರಾವ್‍ನ ಕತ್ರೀನ್ ದೋಣಿಯೇನ ಪಾಣಿಮ ಮ್ಹೆಂದಿದ.
33 ವ್ಹಾಣುಹುವಾನ ಮ್ಹಯಿಮಾ ಪೌಲನೆ ಇವ್ಣ ಖ್ಹಾರಾಜ಼ಣನ ಶಾತ್ಬಿ ಖಾವೊಕರಿ ಗಿಂಗೈಲಿದೊ ಅಜು಼ “ತುಮೆ ಗಯೋತೆ ಚೌ಼ಧರೋಜ಼್ಥೂಬಿ ಖಾಣುಸ್ ಖಾದಸ್‌ಕೋಯ್ನಿ.
34 ಹಮ್ಕೆ ತುಮೆ ದರ‍್ರಾಖ್ಹುತೊಬಿ ಖಾಣು ಖಾವ್ಣುಕರಿ ತುಮೂನ ಗಿಂಗೈಲೆವುಸ್. ತುಮೆ ಜೂತುರ‍್ಹೀನ್ ಬಚ಼್‌ಣುಕತೊ, ತುಮೂನ ಖಾಣಾನಿ ಜ಼ರೂರತ್ ಛಾ಼. ತುಮಾರಮ ಕೋಣ್‌ಬಿ ತುಮಾರ ಮುಡ್‌ಕ್ಯಾನೊ ಏಕ್ ಕೇಖ್ಹ್‌ಬಿ ಗುಮೈಲಿಶುಕೊಯ್ನಿ. ಕರಿ ಬೋಲ್ಯೊ.
35 ಅಮ್ ಬೋಲಿನ್ ಪೌಲನೆ, ರೋಟಾನ ಪಾಡಿ ಖ್ಹಾರಾನ ಖ್ಹಾಮ್ಣೆ ದೇವ್ನ ಧನ್ಯವಾದ್‌ಕರೀನ್‌ ತೋಡಿ ಖಾವಲಗ್ಯೊ.
36 ತದೆ ಇವ್ಣೇಬಿಖ್ಹಾರು ಭಾಲ್‍ಲೀನ್, ಖಾಣುಖಾದು.
37 ಯೋ ಜ಼ಹಾಜ಼್‍ಮ ಹಮೆ ಬೇಖ್ಹೊ ಛೋ಼ಉಪ್ಪರ್ ಖ್ಹಡ್‌ತೀನಿಖ್ಹ್ ಜ಼ಣು ಥಾ.
38 ಹಮೆ ಬಶ್‍ಹುವಾಎತ್ರು ಖೈಹುವಾದೀನ್, ಬಿಜ಼ ಘವ್‌ನ ದರ‍್ಯಾವ್‌ಮ ಫೇಕಿನ್, ಜ಼ಹಾಜ಼್ನ ವಜನ್ನ ಕಮ್‍ಕರ‍್ಯ.
ಜ಼ಹಾಜ಼್ ಫುಟಿಗೈತೆ
39 ವ್ಹಾಣು ಹುವಾದಿನ್ ಜ಼ಹಾಜ಼್ ಚ಼ಲಾವವಾಳು ಜ಼ಮೀನ್ನ ದೇಖ್ಯು. ಕತೋಬಿ ಯೋ ಖೆವಿ ದೇಖ್ಹ್‌ನಿ ಝ಼ಗೊಕರಿ ಮಾಲುಮ್ ಪಡ್ಯುಕೊಯ್ನಿ. ಇವ್ಣೆ ದೇಖ್ಯುತೆ ಏಕ್ ರೇತ್ನಿ ಖಾರಿ ರ‍್ಹಯೂತೊ ಹಿಜ್ಜಾ಼ ಜ಼ಹಾಜ಼್ನ ಲೀಜೈ಼ನ್ ಭೀರಾಕ್ಣುಕರಿ, ಸೋಚ್ಯು.
40 ಇನಖ್ಹಾಜೆ ಹಮೆಖ್ಹಾರು ಅಖ್ಖಾ ಲಂಗಾರ್ನ ಕತ್ರೀನ್ ದರ‍್ಯಾವ್‌ಮ ಮ್ಹೆಂದಿದ. ಅಜು಼ ಚುಕ್ಕಾಣಿನ ಶಿಂದ್ರಾವ್‍ನ ಗಾಟ್ನ ಛೋ಼ಡಿನ್ ಜ಼ಹಾಜ಼್ನ ಖ್ಹಾಮ್ಣೆ ಥೂತೆ ಜ಼ಂಡಾನ ವಹಿರಾಮ ಪಾಡಿಭಾಂದಿನ್ ಜ಼ಹಾಜ಼್ನ ಕನಾರಿಭಣಿ ಚ಼ಲಾವ್‌ತು ನಿಕ್‍ಳ್ಯ.
41 ಕತೋಬಿ ಜ಼ಹಾಜ಼್ ರೇತ್‍ನ ದಿಬ್ಬನ ಟಕ್‌ರೈನ್, ಇನು ಮ್ಹೋರಾನು ನೋಕ್‍ ರೇತ್ಮ ಗಡೀಗು. ಜ಼ಹಾಜ಼್ ಅಗಾಡಿ ಚಾ಼ಲಾನ ಹುಯುಕೋಯ್ನಿ. ತದೆ ಮೋಟ ಝೋ಼ಕಾಳ್ಯ ಆಯಿನ್ ಜ಼ಹಾಜ಼್ನ ಪೀಠೆಥು ಮಾರ್‌ಪಡೀನ್, ಫುಟಿನ್‌ ಟುಕ್‌ಡಾ ಹುಯಿ ಪಡಾಲಗ್ಯುಥು.
42 ತದೆ ಕೈದಿಖ್ಹಾರು ತೀರಾಕ್‌ಮಾರಿನ್ ಲಪಿನಿಕ್‌ಳಿ ಜಾ಼ಶೆಕರಿ ಶಿಪಾಯಿಖ್ಹಾರು ಇವ್ಣುನ ಮರ್‌ನಾಖಿ ದೇವ್ಣುಕರಿ ಸೋಚ್ಯು.
43 ಕತೋಬಿ ಖ್ಹೋಶಿಪಾಯಿನ ಮೋಟಾನೆ ಪೌಲನ ಬಚಾ಼ಡ್ನುಥು. ಇನಖ್ಹಾಜೆ, ಇವ್ಣೆ ಇಮ್‌ ನಾ ಕರ್ನುತೆ ತಿಮ್ ದೇಖಿಲಿದೊ. ಅನಬದಲ್ ತೀರಾಕ್ ಮಾಲುಮ್ ರ‍್ಹವಾಳು ಪಾಣಿಮ ಉತ್ರಿನ್ ತೀರಾಕ್‌ಮಾರಿ ಕನಾರಿನ ಜಾ಼ವ್ಣುಕರಿ, ಹುಕುಮ್ ದಿದೊ.
44 ಅಜು಼ ಉಭ್ರಿಹುಯು ಅದ್ಮಿಖ್ಹಾರು ಪಲ್ಗಾನ ಉಪ್ಪರ್ ನತರ್ ಜ಼ಹಾಜ಼್ನ ಟುಕ್ಡಾವ್‍ನ ಮದಥ್ಥಿ ಜಾ಼ವ್ಣುಕರಿ ಬೋಲ್ಯು. ಇಮ್ಮಸ್ ಹಮೆ ಖ್ಹಾರುಜ಼ಣು ಕನಾರಿನ ಬಚಿನ್ ಪೋಚಿಗಯ.