1 ಪೌಲನೆ ದೆರ್ಬೆ ಅಜು಼ ಲುಸ್ತ್ರಕರಿ ಖ್ಹಯೇರ್‌ಮ ಗಯೊ.ಹಿಜ್ಜಾ಼ ತಿಮೊಥೆಕರಿ ಏಕ್‍ಜ಼ಣೊ ಕ್ರಿಸ್ತನೊ ವಿಶ್ವಾಸಿ ಥೊ. ತಿಮೊಥೆನಿ ಆಯ ಯೆಹೂದ್ಯವಾಳಿ ಹುಯಿರ‍್ಹೀಥಿ ಅಜು಼ ಬಾ ಗ್ರೀಕ್‍ವಾಳೊ ಹುಯಿರ‍್ಹೋಥೊ. 2 ಲುಸ್ತ್ರ ಅಜು಼ ಇಕೋನ್ಯ ಖ್ಹಯೇರ‍್ನು ವಿಶ್ವಾಸಿಖ್ಹಾರು ತಿಮೊಥೆನ ಮರ್ಯಾದಿ ದೇತುಥು. ಅಜು಼ ಇನಿ ಬಾರೇಮ ಅಛ್ಛೂ಼ಸ್ ಬೋಲ್ತುಥು. 3 ಪೌಲ ತಿಮೊಥೆನ ಇನಕೇಡೆ ಬುಲೈಲಿನ್ ಜಾ಼ವ್ಣುಕರಿ ಇಷ್ಟಕರ‍್ಯೊ. ಯೊ ಝ಼ಗೋಮ ಥೋತೆ ಯೆಹೂದ್ಯರ್‌ನ ತಿಮೊಥೆನೊ ಬಾ ಗ್ರೀಕ್‍ನೊಕರಿ ಮಾಲುಮ್‌ಥೂತೆ ಇನಖ್ಹಾಜೆ ಇನ ಖ್ಹತ್ನ ಕರಾಯೊ. 4 ಇನಕೇಡೆಥು ಪೌಲ ಅಜು಼ ಇನ ಜೋ಼ಡೆ ರ‍್ಹವಾಳುಖ್ಹಾರು ನಂಗರ್‌ಥಿ ನಂಗರ್ ಫರ‍್ಯು. ಯೆರೂಸಲೇಮ್ಮಥೂತೆ ಅಪೊಸ್ತಲರ‍್ನಿ ಅಜು಼ ಗಲ್‌ಢವ್‍ನಿ ಖ್ಹೂಜ಼್‌ನ ಇವ್ಣೆ ವಿಶ್ವಾಸಿಖ್ಹಾರನ ಬೋಲಿನ್ ಇನ ಪಾಡೀನ್ ಚಾ಼ಲ್‌ನುಕರಿ ಬೋಲ್ಯೊ. 5 ಅಮ್ಮಸ್ ಕ್ರಿಸ್ತನು ಸಬೆಖ್ಹಾರು ದನ್‍ಥಿ ದನ್ ವಿಶ್ವಾಸ್ಮ ಭಡಾಲಗ್ಯು. ಸಬೆಖ್ಹಾರು ವಿಶ್ವಾಸ್ಮ ಘಟ್‍ಥಿ ಭೀರಿನ್ ವಿಶ್ವಾಸಿ ದನ್‍ಪರ್ ದನ್ ಜಾ಼ಖ್ಹತ್ ಹುವಾಲಗ್ಯು.

6 ಏಷ್ಯಾ ಮುಲಕ್‌ಮ ಪೌಲ ಇವ್ಣೆಖ್ಹಾರು ಸುವಾರ್ತೆನ ಬೋಲಿನ್ ನಾ ವತಾಳ್ಣುಕರಿ ಪವಿತ್ರಾತ್ಮನೆ ಖ್ಹಮ್‍ಜಾ಼ಡಿರಾಖ್ಯೊಥೊ. ಇನಖ್ಹಾಜೆ ಇವ್ಣೆ ಫ್ರಿಜಿಯ, ಅಜು಼ ಗಲಾತ್ಯ ತಬರ್‌ಖಾನಿ ವಾಟೆ ಗಯ. 7 ಪೌಲ ಅಜು಼ ತಿಮೊಥೆ ಇವ್ಣೆ ಮುಸಿಯ ನಂಗರ‍್ನ ಖನ್ನೆ ಗಯ. ತದೆ ಇವ್ಣೆ ಬಿಥೂನ್ಯ ನಂಗರ್‌ಮ ಜಾ಼ವ್ಣು ಕರಿ ಥಾ. ಕತೋಬಿ ಯೇಸುನ ಆತ್ಮನೆ ಹಿಜ್ಜಾ಼ಬಿ ಜಾ಼ವಾನ ಕೊ ಮ್ಹೆಲ್ಯುನಿ. 8 ಇನಖ್ಹಾಜೆ ಇವ್ಣೆ ಮುಸಿಯ ನಂಗರ್‌ಪರ್ ಕರಿ ನೇರ್ ತ್ರೋವ ಖ್ಹಯೇರ್‌ಮ ಆಯ. 9 ಯೋ ರಾತ್ಮ ಪೌಲನ ಏಕ್‌ ದರ್ಶನ್‌ಹುಯು. ಮೆಕೆದೋನ್ಯನೊ ಏಕ್‍ಜ಼ಣೊ ಹಿಜ್ಜಾ಼ಭೀರಿನ್; ಮೆಕೆದೋನ್ಯಮ ಐನ್ ಹಮೂನ ಮದತ್ ಕರ್‌” ಕರಿ ಗಿಂಗೈಲಿದೊ. 10 ಪೌಲನೆ ಯೋ ದರ್ಶನ್ ದೇಖಿನ್, ತದ್‌ನು ತದೇಸ್‌ ಹಿಜ಼್ಜಾನ ಅದ್ಮಿನ ಸುವಾರ್ತೆನ ಖ್ಹಮ್‍ಜಾ಼ಡಾನಖ್ಹಾಜೆ ದೇವ್ನೆ ಹಮೂನ ಬುಲೈರಾಖ್ಯೊಸ್ ಕರಿ ಮಾಲುಮ್ ಕರಿಲಿನ್ ಮೆಕೆದ್ಯೋನ್ಯನ ಜಾ಼ವಾನ ಇವ್ಣೆ ತಯಾರ್ ಹುಯ.

11 ಹಮೆ ತ್ರೋವಥು ಜ಼ಹಾಜ಼್ ಚ಼ಢೀನ್ ಸಮೊಥ್ರಾ ಐನ್, ಬಿಜೇಕ್ ದನ್ನೆ ನೆಯಾಪೊಲಿ ಖ್ಹಯೇರ‍್ನ ಪೋಚಿನ್ ಹಿಜ್ಜಾ಼ಥ ಫಿಲಿಪ್ಪಿನ ಆಯ. 12 ಫಿಲಪ್ಪಿಕರಿ ಬೋಲಾನು ಮೆಕೆದೋನ್ಯನು ಖ್ಹಯೇರ್ ಹುಯಿರ‍್ಹುಥು. ರೋಮ್‍ವಾಳಾನು ರ‍್ಹವಾನು ಝ಼ಗೋ ಹುಯಿರ‍್ಹೀಥಿ. ಹಜ್ಜಾ಼ ಥೋಡ ದನ್ ರ‍್ಹಯ. 13 ಖ್ಹಯೇರ‍್ನ ಭಾರ್‌ ಥೂತೆ ನದ್ದಿನ ಕನಾರಿನ ಖನ್ನೆ ಯೆಹೂದ್ಯರ‍್ನು ಪ್ರಾರ್ಥನೆನಿ ಝ಼ಗೊರ‍್ಹೆವ್ಣುಕರಿ ಸಬ್ಬತ್‌ ದನ್ಮ ಹಿಜ್ಜಾ಼ಗಯಾಥ. ಹಿಜ್ಜಾ಼ ಥೋಡಿ ತಯೇಡ ಅಯಿರ‍್ಹೀಥಿ. ತದೆ ಹಮೆ ಬೇಶಿನ್ ಇವ್ಣೇಥಿ ವಾತೆ ಬೋಲ್ಯ. 14 ಹಮಾರಿ ಬೋಧನೆ ಖ್ಹಮ್‍ಜ್ಯುತೆ ತಯೇಡಾವ್ಮ ಲಿಡಿಯಾಬಿ ಏಕ್‍ಜ಼ಣಿ. ಆ ಹೈರಿತೆ ಥುವತೈರ ಖ್ಹಯೇರ್‌ವಾಳಿ; ಹೈರಿತೆ ರಾಯಿಜಾ಼ಮಣ್ಣ ರಂಗ್ನು ಲುಂಗ್ಡು ವೇಚಿನ್ ಧಂದೊ ಕರಾವಾಳಿ ಹುಯಿರ‍್ಹೀಥಿ. ಆ ಖ್ಹಾಚ ದೇವ್ನ ಆರಾದನೆ ಕರ್ತೀಥಿ. ಪೌಲನ ಬೋಧನೆನ ಕಾನ್‍ಜೋ಼ಡಿ ಖ್ಹಮ್‍ಜಾ಼ನಿತರ ಪ್ರಭುನೆ ಇನ ದಿಲ್ನ ಛೋ಼ಡಾಯೊ. ಪೌಲನೆ ಬೋಲ್ಯೊತೆ ಖ್ಹಾರು ಇನೆ ವಿಶ್ವಾಸ್‌ಕರಿ. 15 ಲಿಡಿಯ ಅಜು಼ ಇನ ಘರ್‌ಮಥೂತೆ ಖ್ಹಾರುಜ಼ಣು ಬ್ಯಾಪ್ತಿಸ್ಮ ಕರೈಲಿದು. ಇನೆ, “ಪ್ರಭುನಿ ಖ್ಹಾಚ ವಿಶ್ವಾಸಿಕರಿ ತೀರ್ಮಾನ್‌ ಕರ್ತ ಉಷೇತೊ, ಹಮಾರ ಘರ್‌ಮ ಐನ್ ರ‍್ಹವೊ” ಕರಿ ಗಿಂಗೈನ್ ಹಮೂನ ಜು಼ಲಮ್‍ಕರಿ.

16 ಏಕಹಲ್ಲ, ಹಮೆ ಪ್ರಾರ್ಥನೆ ಝ಼ಗೋನ ಜಾ಼ವಾನಿ ವೇಳ್ಮ ಗಾರೋಡಿನಿ ಏಕ್‍ಜ಼ಣಿ ದಾಸಿ ಹಮಾರ ಖ್ಹಾಮ್ಣೆ ಆಯಿ. ಯೋ ಫಾಲ್‌ಬೋಲ್‍ಥೀತೆ ಇನೇಥಿ ಇನೊ ಯಜಮಾನ್ನ ಘಣು ನಫ್ಫೊ ಹೋತುಥು. 17 + ಪೌಲಬಿನ್ ಹಮೆ ಜಾ಼ವನಿವಖ್ಹ್‌ತೆ, ಯೊ ಚಿಕ್ರಿ ಬೋಲ್ತಿಹುಯಿನ್, “ಆ ಅದ್ಮಿಖ್ಹಾರು ಘಣೊಊಚೊ಼ ದೇವ್ನು ಸೇವಕ್ ಹುಯಿರ‍್ಹಾಸ್; ತುಮಾರ ಜಾನ್ನ ರಕ್ಷಣೆನು ಮಾರಗ್‌ನ ಅವ್ಣೆ ಬೋಲುಕರಸ್” ಕರಿ ಬೋಲ್ತಿ ರ‍್ಹೇತಿಥಿ. 18 ಕೈಏಕ್ ದನ್‍ಲಗೂಬಿ ಅಮ್ಮಸ್ ಬೋಲುಕರ್ತಿಥಿ. ಇನಖ್ಹಾಜೆ ಪೌಲ ಬೇಜಾರ್ ಹುಯಿನ್, ಯೊ ತಯೇಡಾಮ ಛಾ಼ತೆ ಖರಾಬ್ಆತ್ಮ, ‘ಮ್ಹೆಂದಿನ್ ನಿಕ್ಳಿಜಾ಼’ ಕರಿ ಯೇಸುಕ್ರಿಸ್ತನ ನಾಮ್‍ಥಿ ಹುಕುಮ್ ದೆವುಸ್ ಕರಿ ಬೋಲ್ಯೊ. ಯೋ ವಖ್ಹತ್‌ಮಾಸ್‌ ಯೋ ಖರಾಬ್ಆತ್ಮ ಇನ ಮ್ಹೇಲಿನ್ ಚ಼ಲಿಗಯು. 19 ಯೋ ದೆಖ್ಯೊತೆ ದಾಸಿನೊ ಯಜಮಾನ್ನೆ ರಪ್ಯ ಕಮಾವನು ಉಷೆ ಕೊಯ್ನಿಕರಿ ಮಾಲುಮ್ ಕರಿಲಿನ್, ಪೌಲನಾಬಿ ಸೀಲನ ನಂಗರ‍್ನ ನ್ಯಾವ್ನ ಅದಿಕಾರಿಕನ ಖೇಚಿಲಿಗು. 20 ಹಿಜ್ಜಾ಼ ಪೌಲನಾಬಿ ಸೀಲನ ಅಧಿಕಾರಿನ ಖ್ಹಾಮ್ಣೆ ಇವ್ಣುನ ಬುಲೈಲಿಜೈ಼ನ್ “ಆ ಅದ್ಮಿಖ್ಹಾರು ಯೆಹೂದ್ಯರ್ ಹುಯಿರುಸ್, ಅವ್ಣೆ ಖ್ಹಯೇರ‍್ನ ಕಲಾವ್ಣಿಕರಿನ್ ಗಲಾಟ್ ಉಠಾಡುಕರಸ್.” 21 ರೋಮ್‌ವಾಳ ಹುಯಿರಾತೆ ಅಪ್ಣ ನಿಯಮ್‌ನಿ ವಿರೋದ್‌ನು ಕಾಮ್ ಅವ್ಣೆ ಅದ್ಮಿಖ್ಹಾರಾನ ಬೋಲುಕರಸ್ ಕರಿ ಬೋಲ್ಯು. 22 ತದೆ ಅದ್ಮಿಖ್ಹಾರು ಪೌಲಬಿನ್ ಸೀಲನ ವಿರೋದ್ ಹುಯಿರ‍್ಹುಥು ತದೆ ಅದಿಕಾರಿನೆ ಪೌಲ ಸೀಲನ ಲುಂಗ್ಡಾವ್‍ನ ಫಾಡಿನ್ ಇವ್ಣ ಭೇಜ಼ಣಾನ ಲಠ್ಠೇಥಿ ಜಾ಼ಖ್ಹತ್ ಮಾರ್ ದೇವಾಡ್ಣುಕರಿ ಹುಕುಮ್‌ಕರ‍್ಯೊ. 23 ಇವ್ಣುನ ಘಣೇಥಿ ಮಾರ್‌ಖಡೈನ್‌ ಹುಯಿಗು ತದೆ ಜೇಲ್‌ಮ ಘಲೈನ್ “ಇವ್ಣುನ ಘಣು ಹೊಷಾರ್‌ಥಿ ಜೇಲ್‌ನ ಕಾವ್ಲಿಕರ‍್ನು ಕರಿ ಅಧಿಕಾರಿನ ಹುಕುಮ್‌ ದಿದೊ. 24 ಇನೆ ಯೊ ಹುಕುಮ್‌ನ ಪಾಡಿನ್ ಇವ್ಣುನ ಜೇಲ್‌ನ ಮಹಿನ ಕೋಣಾಮ ಘಾಲಿನ್ ಇವ್ಣ ಗೋಡಾವ್‍ನ ಲಾಕ್ಡಾನ ಫಣಾಶಿನ ಇಚ಼್‌ಮ ಘಾಲಿನ್ ಖ್ಹಂಕಳ್‌ಥಿ ಜ಼ಡ್‍ಕಾಯು. 25 ಅಧಿರಾತ್ಮ ಪೌಲಬಿ ಸೀಲನೆ ಪ್ರಾರ್ಥನೆ ಕರ್ತಹುಯಿನ್ ದೇವ್ನ ಸ್ತುತಿನು ಗೀದ್‌ ಬೋಲುಕರ್ತಾಥ. ಹಿಜ಼್ಜಾಥೂತೆ ಖೈದಿಖ್ಹಾರು ಖ್ಹಮ್‍ಜು಼ಕರ್ತುಥು. 26 ತದೆ ಅಫ್ಪರ್‌ಥೂಸ್ ಮೋಟು ಭೂಕಂಪ್ ಹುಯು; ಖ್ಹಾರ್ಕೊಟ್‌ನು ಹದಿಪಾಯ ಹಲಿರ‍್ಹೀಗು. ಯೋಸ್ ವೇಳ್ಮ ಬಾಕಲ್‍ಅಖ್ಖು ನಿಕ್ಳಿಗಯು, ಅಖ್ಖಾಸ್ ಖೈದಿನು ಖ್ಹಂಕಳ್‌ಖ್ಹಾರು ಛು಼ಟಿ ಪಡಿಗಯು. 27 ಜೇಲ್‌ನೊ ಅದಿಕಾರಿ ನಿಂದರ್‌ಥಿ ಹೊಷಾರಿಹುಯಿನ್, ಬಾಕಲ್ ಅಖ್ಖು ನಿಕ್ಳಿರ‍್ಹುಥೂತೆ ದೇಖಿನ್ ಖೈದಿಖ್ಹಾರು ಮಿಲೈಚ಼ಲಿಗೂ ಕರಿ ಲ್ಹಯಿನ್ ತಲ್ವಾರ್‌ಥಿ ಭೋಕೈನ್ ಮರಿಜಾ಼ವ್ಣು ಕರಿ ಥೊ. 28 ಕತೋಬಿ ಪೌಲನೆ ಊಚಿ ಆವಾಜ಼್‌ಥಿ ಚಿಕ್ರಿನ್ ಇನ; ತೂ ಶಾತ್ಬಿ ಲುಕ್ಷಾನ್‌ ನಕೊ ಕರಿಲಿಶ್‌. ಹಮೆ ಅಖ್ಖಾಸ್‍ಜ಼ಣ ಹಜ್ಜಾ಼ಸ್ ಛಿಯೆ ಕರಿ ಬೋಲ್ಯೊ. 29 ಖ್ಹಾರ್ಕೊಟ್‍ನೊ ಅಧಿಕಾರಿನೆ ಚಿಮ್ನಿನ ಮಂಗಾವ್ತೊಹುಯಿನ್ ಒಗ್ಗಿಸ್‌ಮ ಮಹಿ ಜೈ಼ನ್ ಡರ್‌ಥಿ ಕಾಪ್ತೊಹುಯಿನ್ ಪೌಲ ಅಜು಼ ಸೀಲನ ಗೋಡಾಪರ್ ಆಡ್‍ಪಡ್ಯೊ. 30 ಅಜು಼ ಇವ್ಣುನ ಭಾರ್‌ ಬುಲೈಲಿನ್ ಐನ್, “ಮಾಲಿಕ್ ರಕ್ಷಣೆ ಮಳ್‌ಣುಕತೊ ಮೆ ಶಾತ್‌ ಕರ‍್ನು?” ಕರಿ ಬೋಲ್ಯೊ. 31 ಇವ್ಣೆ ಇನ, “ಪ್ರಭು ಯೇಸುಪರ್ ವಿಶ್ವಾಸ್ ಕರ್‌ ತದೆ ತುನಾಬಿ ತಾರ ಘರ್‌ವಾಳಾನಾಬಿ ರಕ್ಷಣೆ ಮಳ್‌ಶೆ” ಕರಿ ಬೋಲ್ಯೊ. 32 ಯೋ ಅದಿಕಾರಿನಾಬಿ ಇನ ಘರ್‌ವಾಳ ಅಖ್ಖಾಸ್ನ ಪ್ರಭುನಿ ವಚನ್ ಖ್ಹಮ್‍ಜಾ಼ಡ್ಯ. 33 ಇನಕೇಡೆಥು, ಯೋಸ್ ರಾತ್ನಿ ವಖ್ಹತ್‌ಮ ಬುಲೈಲಿಜೈ಼ನ್ ಇವ್ಣ ಘಾವ್ನ ಧೋಯೊ. ತದೇಸ್‌ ಯೋಬಿ ಇನ ಘರ್‌ವಾಳಾನ ಖ್ಹಮೇದ್ ಬ್ಯಾಪ್ತಿಸ್ಮ ಕರೈಲಿದೊ. 34 ಇನಪಾರ್ ಪೌಲ ಅಜು಼ ಸೀಲನ ಇನ ಘರೆ ಬುಲೈಲೀಜೈ಼ನ್ ಖಾಣು ಖಡಾಯೊ. ಯೋ ಇನ ಘರ್‌ವಾಳಾನ ಜೋ಼ಡ್ಮ ದೇವ್ನ ನಂಬಿನ್ ಶಂತೋಖ್ಹ್‌ ಪಡ್ಯೊ. 35 ಇನವ್ಹಾಣೆ ಅಧಿಕಾರಿನ ಮೋಟಾನೆ ರೋಮ್‍ನ ಖ್ಹಾರ್ಕೊಟ್‌ನ ಅಧಿಕಾರಿನ, “ಆ ಅದ್ಮಿಖ್ಹಾರಾನ ಮ್ಹೇಲಿದೆ” ಕರಿ ಥೋಡ ಶಿಪಾಯಿಥಿ ಬೋಲಿಮೋಕ್‌ಲ್ಯೊ. 36 ಖ್ಹಾರ್ಕೊಟ್‍ನೊ ಅಧಿಕಾರಿನೆ ಪೌಲನ, “ಹಮಾರೊ ಮೋಟಾ ಅಧಿಕಾರಿನೆ, ತುಮೂನ ಮ್ಹೆಲಿದ್ಯವಾದೆ ಕರಿ ಬೋಲಿ ಮೋಕ್‍ಲೈರಾಖ್ಯೊಸ್. ಇನಖ್ಹಾಜೆ ತುಮೆ ಸಮಾಧಾನ್‌ಥಿ ಚ಼ಲೆಜಾ಼ವೊ” ಕರಿ ಬೋಲ್ಯೊ. 37 ಪೌಲನೆ ಇನ, “ಹಮೆ ಕರ‍್ಯಾತೆ ಖರಾಬ್ ಕಾಮ್ ಶಾತ್‌ಕರಿ ಬೋಲ್ಯೊಕೊಂತೆ; ಹಮೂನ ಅಖ್ಖಾನ ಖ್ಹಾಮ್ಣೆ ಮಾರಿನ್ ಜೇಲ್‌ಮ ಘಲಾಯು; ಹಮೆ ರೋಮ್‍ನ ಪ್ರಜೇಸ್ ಹಮ್ಕೆ ಹಮೂನ ಲಪಾಡಿನ್ ಭಾರ್‌ ಮೋಕ್ಲಸ್‍ಕೀ ಶು? ಇಮ್‌ ನಾಹೋಣು; ಯೋಸ್ ಐನ್ ಹಮೂನ ಭಾರ್‌ ಬುಲೈಲಿ ಜಾ಼ವ್ಣು.” ಕರಿ ಬೋಲ್ಯೊ. 38 ಶಿಪಾಯಿಖ್ಹಾರನೆ, ಅಧಿಕಾರಿಖ್ಹಾರನ ಬೋಲಖ್ಹತರ್ ಪೌಲನೆ ಹಮೆ ರೋಮ್‍ನ ಪ್ರಜೆಕರಿ ಬೋಲ್ತಾನ ಇನ ಅಧಿಕಾರಿಖ್ಹಾರು ಡರಿಗಯು. 39 ಇನಖ್ಹಾಜೆ ಪೌಲ ಅಜು಼ ಸೀಲನ ಪೊಖ್ಹ್‌ಲೈ ವಾತೆ ಬೋಲ್ತುಹುಯಿನ್ ಇವ್ಣುನ ಭಾರ್‌ ಬುಲೈಲಿಗಯು. ತುಮೆ ಆ ಖ್ಹಯೇರ‍್ನ ಮ್ಹೇಲಿದಿನ್ ಚ಼ಲೆಜಾ಼ವೊ ಕರಿ ಬೋಲಿಲಿದು. 40 ಕತೋಬಿ ಪೌಲಬಿ ಸೀಲನೆ ಜೇಲ್‌ಥು ನಿಕ್ಳಿನ್ ಲಿಡಿಯಾನ ಘರೆಗಯ. ಹಿಜ್ಜಾ಼ ಇವ್ಣೆ ಥೋಡ ವಿಶ್ವಾಸಿನ ದೇಖಿನ್ ಇವ್ಣುನ ಭಾಲಿದೀನ್ ಹಿಜ್ಜಾ಼ಥ ಚ಼ಲೇಗಯ.