1 ಅಂತಿಯೋಕ್ಯಮ ಥೂತೆ ಸಬೆಮ ಖ್ಹಾರು ಪ್ರವಾದಿಬಿ ಬೋಧಕರ್‌ಬಿ ಥೂ; ಇವ್ಣೆ ಕೋಣ್‌ಕತೊ, ಬಾರ್ನಬ, ನೀಗರ್‌ಕರಿ ಬೋಲೈಲಾವಳೊ ಸಿಮೆಯೋನ್‌, ಕುರೇನ್ಯನೊ ಲೂಕ್ಯ,ಹೆರೋದ ರಾಜ಼ನಿ ಜೋ಼ಡ್ಮ ಪಳ್ಯೊತೆ ಮೆನಹೇನ, ಅಜು಼ ಸೌಲ. 2 ಅವ್ಣೆಖ್ಹಾರು ಪ್ರಭುನಿ ಸೇವೆ ಕರುಕರ್ತುಥು ಅಜು಼ ಉಪವಾಸ್ (ಪಾರ‍್ನೆ) ಕರುಕರ್ತುಥು. ಪವಿತ್ರಾತ್ಮನೆ ಇವ್ಣುನ “ಮೇ ವಿಶೇಷ್ ಕಾಮ್ನಖ್ಹಾಜೆ ಬಾರ್ನಬ ಅಜು಼ ಸೌಲನ ಚೂ಼ಣಿಲಿದೊ ಯೋ ಕಾಮ್ನಖ್ಹಾಜೆ ಇವ್ಣುನ ಅಲಕ್‍ಕಾಡ್ಯೊ.” ಕರಿ ಬೋಲ್ಯೊ. 3 ಇನಖ್ಹಾಜೆ ಸಬೆವಾಳು ಉಪವಾಸ್ ರ‍್ಹೀನ್ ಪ್ರಾರ್ಥನೆ ಕರಿನ್ ಬಾರ್ನಬ ಸೌಲನ ಉಪ್ಪರ್ ಹಾತ್‍ಮ್ಹೇಲಿನ್‍ ಇವ್ಣುನ ಬೋಲಿ ಮೋಕ್‍ಲ್ಯು.

4 ಬಾರ್ನಬ ಬಿಜು಼ ಸೌಲ ಪವಿತ್ರಾತ್ಮನೇಸ್ ಬೋಲಿಮೋಕ್‌ಲ್ಯೊ. ಇವ್ಣೆ ಸೆಲ್ಯೂಕ್ಯ ಖ್ಹಯೇರ‍್ನ ಜೈ಼ನ್, ಹಿಜ್ಜಾ಼ಥ ಸೈಪ್ರಸ್ ಟಾಪನ ಜ಼ಹಾಜ಼್‍ಮ ಗಯ. 5 ಬಾರ್ನಬ ಅಜು಼ ಸೌಲ ಸಲಾಮಿಸ್ ಕರಿ ಖ್ಹಯೇರ‍್ನ ಜಾ಼ವಾದಿನ್, ಯೆಹೂದ್ಯರ‍್ನು ಸಬಾ ಮಂದಿರ್‌ಮ ದೇವ್ನಿ ಭೋದನೆನ ಬೋಲ್ಯ. ಮಾರ್ಕಕರಿ ಬೋಲೈರ‍್ಹೋತೆ ಯೋಹಾನ ಇನ ಸೇವೆ ಕರಾನಖ್ಹಾಜೆ ಇನಿ ಜೋ಼ಡ್ಮ ಥೊ.

6 ಇವ್ಣೆ ಯೋ ಟಾಪಾನಿ ಅಖ್ಖಿಬಾಜು಼ ಜಾ಼ತಹುಯಿನ್ ಪಾಫೋಸ್ ಕರಿ ಗಾಮ್‌ನಗಯ. ಇವ್ಣೆ ಜಾ಼ದುಜ಼ಮ್‌ಕರ್‌ ಕರಾವಾಳ ಏಕ್‌ ಯೆಹೂದ್ಯವಾಳನ ಪಾಫೋಸ್ಮ ದೇಖ್ಯ. ಇನು ನಾಮ್ ‘ಬಾರ್‌ಯೇಸು’ ಯೋ ಏಕ್‌ ಝೂ಼ಟುಪ್ರವಾದಿ ಹುಯಿರ‍್ಹೊಥೊ. 7 ಸೆರ್ಗ್ಯ ಪೌಲಕರಿ ನಾಮ್‍ವಾಳೊ ದೋಸ್ತ್ ಆ ರಾಜ್ಯಪಾಲ್‌ನ ಖನ್ನೆಸ್‌ ಕದೇಬಿ ರ‍್ಹೇತೊಥೊ. ಸೆರ್ಗ್ಯ ಪೌಲ ಅಕ್ಕಲ್‍ವಾಳೊ ಹುಯಿರ‍್ಹೊಥೊ. ಯೋ ದೇವ್ನಿ ವಚನ್ ಖ್ಹಮ್‌ಜಾ಼ನ ಬಾರ್ನಬ, ಸೌಲನ ಬುಲಾಯೊ. 8 ಕತೋಬಿ ಯೊ ಮಂತ್ರವಾದಿ ಹುಯಿರೋತೆ ಎಲುಮ (ಎಲುಮಕರಿ ನಾಮ್ನೊ ಮಂತ್ರವಾದಿ) ವಿರೋದ್ ಹುಯಿರ‍್ಹೋಥೊ. ರಾಜ್ಯಪಾಲ್‌ನೆ ಕ್ರಿಸ್ತಮ ವಿಶ್ವಾಸ್ ನಾ ಕರ್ನುತೆ ತಿಮ್ ಎಲಿಮನೆ ಕೋಶಿಶ್ ಕರ‍್ಯೊ. 9 ತದೆ ಪೌಲಕರಿ ಬೋಲೈಲ್ಯಾವಾಳೊ ಸೌಲ ಪವಿತ್ರಾತ್ಮಥಿ ಭರೈನ್,ಎಲಿಮ ಠರ್‌ಕೈ ದೇಖಿನ್; 10 ಇನೆ “ತೂ ಶೈತಾನ್ನೊ ಛಿಯ್ಯೊ! ಹರ್ ಏಕ್‍ ಅಛ್ಛಾ಼ನಾಬಿ ತೂ ವಹೇರ‍್ಯೊ” ತು ಖರಾಬ್ ಚಾ಼ಲ್‌ಥೀಬಿ ಝೂ಼ಟೆಥೀಬಿ ಭರೈರ‍್ಹೋಸ್. ಅಖ್ಖಿ ನೀತಿನಾಬಿ ವಿರೋದ್ ಕರವಾಳೋಸ್ ತೂ, ಪ್ರಭುನ ಖ್ಹಾಚಾನ, ಝೂ಼ಟಿಕರಿ ಬದ್ಲಾವನ ತೂ ಕದೇಬಿ ಕೋಶಿಶ್ ಕರ್ತೊರ‍್ಹೇಸ್. 11 ಹಂದೇಕ್ ಪ್ರಭು ತಾರಿ ವಿರೋದ್ ಹಾತ್‍ಪಾಡಿರಾಖ್ಯೊಸ್. ತೂ ಕಾಣೊಹುಯಿಶ್ ಥೋಡದನ್ ಶಾತ್ಬಿ ದೇಖಿಶ್‌ ಕೊಯ್ನಿ; ಚಾ಼ಂದ್‌ನು ಉಜಾ಼ಳುಬಿ ದೇಖಿಶ್‍ಕೊಯ್ನಿ.” ಕರಿ ಬೋಲ್ಯೊ. ತದೆ ಎಲಿಮನ ಅಖ್ಖೂಸ್ ಅಂಧಾರುಹುಯಿಗು. ಇನ ಕೋಣ್‌ತೋಬಿ ಹಾತ್‍ಧರಿ ಚ಼ಲಾವಾದೆಕರಿ ಯೋ ಢೂಂಡ್ತೊಹುಯಿನ್ ಫರುಕರ್ತೊಥೊ. 12 ಅನ ದೆಖ್ಯೊತೆ ರಾಜ್ಯಪಾಲ್‌ನೆ ಪ್ರಭುಪರ್ ವಿಶ್ವಾಸ್‍ಕರಿನ್ ಪ್ರಭುನಿಬಾರೆನು ಶಿಕಾಡನು ಖ್ಹಮ್‌ಜಿನ್‌ ಆಶ್ಚರ್ಯ ಕರ‍್ಯೊ.

13 ಪೌಲ ಅಜು಼ ಇನ ಜೋ಼ಡ್‍ವಾಳು ಪಾಫೋಸ್‍ಥು ಜ಼ಹಾಜ಼್‌ಪರ್ ನಿಕ್ಳಿನ್, ಪಂಫುಲ್ಯ ತಬರ್‌ಖಾನು ಪೆರ್ಗೆಕರಿ ಖ್ಹಯೇರ‍್ನ ಇವ್ಣೆ ಆಯು. ಕತೋಬಿ ಯೋಹಾನ ಇವ್ಣುನ ಮ್ಹೇಲಿನ್ ಯೆರೂಸಲೇಮ್‌ನ ಪಾಛೊ಼ ಫರಿಗಯೊ. 14 ಇವ್ಣೆ ಪೆರ್ಗೆ ಗಾಮ್‍ಥ ನಿಕ್ಳಿನ್ ಪಿಸಿದ್ಯ ತಬರ್‌ಖಾನು ಮಳ್ಯುಹುಯು ಅಂತಿಯೋಕ್ಯನ ಆಯ. ಇವ್ಣೆ ಸಬ್ಬತ್‌ ದನ್ಮ ಯೆಹೂದ್ಯರ‍್ನು ಸಬಾಮಂದಿರ್‌ಮ ಜೈ಼ನ್ ಬೇಶಿಗಯ. 15 ಮೋಶೆನ ಧರ್ಮಶಾಸ್ತ್ರಕನ ಅಜು಼ ಪ್ರವಾದಿಖ್ಹಾರನ ದಪ್ತರ್‌ನ ಪಢೈ ಹುಯಿಜಾ಼ವಾದಿನ್ ಸಬಾಮಂದಿರ್‌ನೊ ಗಲ್‍ಢಖ್ಹಾರಾನೆ ಪೌಲ ಬಾರ್ನಬ, “ಭೈಯೇ ಭೇನೆವೊ, ಅದ್ಮಿಖ್ಹಾರಾನ ಮದತ್ ಹುವಾನಿತರ ಶಾತ್ತೋಬಿ ಭಾಲಿನಿವಾತೆ ಬೋಲ್ನುಕರಿ ಉಷೇತೊ ತುಮೆ ಬೋಲೊ” ಕರಿ ಇವ್ಣಕನ ಬೋಲಿ ಮೋಕ್‍ಲ್ಯು. 16 ತದೆ ಪೌಲನೆ ಉಠಿಭೀರಿನ್ ಇನಿವಾತ್ ಖ್ಹಮಜ಼್‌ಣುಕರಿ ಅದ್ಮಿಖ್ಹಾರಾನ ಹಾತ್‌ನೊ ಝಾ಼ಲೊದೀನ್ ಶಾತ್‍ಬೋಲ್ಯೊಕತೊ; ಮಾರ ಯೆಹೂದ್ಯ ಭೈಯೇವೊ, ಖ್ಹಾಚ ದೇವ್ನ ಆರಾದನೆ ಕರಾವಾಳು ಅದ್ಮಿವೊ ಮಾರಿವಾತೆನ ಕಾನ್‍ದೇವೊ! 17 ಅಪ್ಣೊ ಇಸ್ರಾಯೇಲ್‌ನೊ ದೇವ್ ಹಮಾರ ಗುರುಗುರಬ್‌ಲ್ಯನ ಚೂ಼ಣಿಲಿದೊ. ಈಜಿಪ್ಟ್‌ಮ ಜಿವ್ಣುಕರುಕರ್ತುಥೂತೆ ಇನ ಅದ್ಮಿಖ್ಹಾರಾನ ದೇವ್ ಮದತ್‍ಕರಿನ್ ಮೋಟೊ ದೇಖ್ಹ್‌ಕರಿ ಭಡಾಯೊ. ದೇವ್ ಇನಿ ಮೋಟಿಶಕಥ್ಥಿ ಇವ್ಣುನ ಯೊ ದೇಖ್ಹ್‌ಮ ಚ಼ಲಾಯೊ. 18 ಯೊ ಖ್ಹುಮಾರ್ ಚಾ಼ಳಿಖ್ಹ್ ವರಖ್ಹ್ ಲಗು ಜ಼ಂಗಳ್‌ಮ ಇವ್ಣುನ ಖ್ಹಮಾಳಿಲಿದೊ. 19 ಕಾನಾನ್ ದೇಖ್ಹ್‌ಮ ಥೂತೆ ಅಲ್ಹಾವ್‌ ಅದ್ಮಿವೋನು ಖ್ಹಾತ್ ಮುಲಕ್ನ ನಾಶ್‍ಕರಿನ್, ಯೋ ಝ಼ಗೋನ ಇವ್ಣುನ ವಾಗ್ದಾನ್ ಕರಿದಿದೊ. 20 ಆ ಖ್ಹಾರು ಖ್ಹುಮಾರ್ ಚಾರ್ ಖ್ಹೊ ಅಡೈವಿಖ್ಹ್‌ ವರಖ್ಹ್ ಘಟಿಗಯು. ಇನಕೇಡೆಥು ಪ್ರವಾದಿಹುಯಿರೋತೆ ಸಮುವೇಲನ ಹಗಾಮ್‍ಲಗು ದೇವ್ ಅಪ್ಣ ಅದ್ಮಿನ ನ್ಯಾವ್‍ನೊ ಅದಿಪತಿನ ದಿದೊ. 21 ಆ ಹುವಾದಿನ್ ಅದ್ಮಿಖ್ಹಾರು ಇವ್ಣುನ ರಾಜ಼ ಹೋಣುಕರಿ ಬೋಲಿದಿದು. ದೇವ್ ಇವ್ಣುನ ಕೀಷಾನೊ ಛಿಯ್ಯೊ ಸೌಲನ ದಿದೊ. ಸೌಲ ಬೆನ್ಯಾಮೀನ್ ಖೂಮ್‌ವಾಳೊ ಯೋ ಚಾ಼ಳಿಖ್ಹ್ ವರಖ್ಹ್ ರಾಜ಼ ಹುಯಿರೋಥೊ 22 ದೇವ್ ಸೌಲನ ಕಾಡಿನಾಖನಪಾರ್ ದಾವೀದನ ಇವ್ಣೊ ರಾಜ಼ ಬಣಾಯೊ, “ಇಷಯನೊ ಛಿಯ್ಯೊ ದಾವೀದ ಮನ ಮಳ್ಯೊ, ಯೋ ಮಾರಾ ದಿಲ್ನ ಲಾಗ್ಯೊಹುಯೊ, ಯೊ ಮಾರಿ ಆಖ್ಹ್‌ನಿತರಾಸ್ ಕಾಮ್ ಕರಸ್. ಕರಿ ದೇವ್ ದಾವೀದ್‍ನಿ ಬಾರೇಮ ಸಾಕ್ಷಿ ಬೋಲಿರಾಖ್ಯೊಸ್. 23 ದೇವ್ ಇನಿ ವಾಗ್ದಾನಿಘೋಣಿಸ್ ದಾವೀದ್‍ನಿ ಖಾನ್‍ದಾನ್‍ಮಾಥು ಏಕ್‍ಜ಼ಣಾನ ಇಸ್ರಾಯೇಲ್‍ವಾಳನೊ ರಕ್ಷಕ್ ಕರಿ ಮೋಕ್ಲಿರಾಖ್ಯೊಸ್, ಯೋಸ್ ಯೇಸು. 24 ಯೇಸು ಆವಾನ ಅಗಾಡಿ ಯೋಹಾನ ಇಸ್ರಾಯೇಲ್ ಅದ್ಮಿಖ್ಹಾರಾನ, ‘ತುಮಾರಿ ಪಾಪ್ನಖ್ಹಾಜೆ ಪಶ್ಚತ್ತಾಪ್ ಕರೀನ್ ದೇವ್‌ಭಣಿ ಫರಿಜೈನ್ ಬ್ಯಾಪ್ತಿಸ್ಮ ಕರೈಲೇವೊ’ ಕರಿ ಬೋಧನೆ ಕರ‍್ಯೊ. 25 ಮೇ ಕೋಣ್‌ಕರಿ ತುಮೆ ಸೋಚೊಸ್? ಮೆ ಕ್ರಿಸ್ತಕಾಹೆ, ಯೋ ಮಾರ ಪಾಛ಼ಳ್ ಆವ್‌ಶೆ ಇನಿ ಖೋಖ್ಹ್‌ಡಾನಿ ಡೋರಿನಾಬಿ ಛೋ಼ಡಾನಾಬಿ ಮೇ ಲ್ಹಾಯೇಕ್‍ಕೊಯ್ನಿ’ ಕರಿ ಯೋಹಾನ ಇನು ಕಾಮ್‍ಕರಿನ್ ಖ್ಹರ್ತಿಕರಾನಿ ವೇಳ್ಮ ಬೋಲಿರಾಖ್ಯೊಸ್. 26 ಮಾರ ಭೈಯೇವೊ, ಅಬ್ರಹಾಮ್‌ನಿ ಖಾನ್‍ದಾನ್‍ವಾಳವೋ, ಖ್ಹಾಚ ದೇವ್ನ ಆರಾದನೆ ಕರುಕರಾತೆ ಯೆಹೂದ್ಯರ್‌ಕಾಹೆತೆ ಅದ್ಮಿವೊ, ಖ್ಹಮ್‍ಜೊ! ಆ ರಕ್ಷಣೆನು ವಚನ್ ಮೋಕ್‍ಲೈರ‍್ಹುತೆ ಅಪ್ಣಖ್ಹಾಜೇಸ್. 27 ಯೆರೂಸಲೇಮ್‍ ಜಿವ್ಣು ಕರುಕರ್ತುಥೂತೆ ಅದ್ಮಿಖ್ಹಾರು ಇವ್ಣು ಅದಿಕಾರಿ ಖ್ಹಾರುಬಿ ಯೋ ರಕ್ಷಕ್ ಕರಿ ಖ್ಹಣೇದ್ ಕರಿಲಿದುಕೊಯ್ನಿ. ಪ್ರವಾದಿಖ್ಹಾರು ಯೇಸುನಿ ಬಾರೇಮ ಲೀರಾಖ್ಯುಥೂತೆ ವಾತೆಖ್ಹಾರಿ ಮಾಲುಮ್ ಕೊ ಹುಯುನಿ ಹರೇಕ್ ಸಬ್ಬತ್ ದನ್ಮ ಇವ್ಣೆ ಫಡ್‍ತುಥೂತೆ ವಾತೆ ಪೂರಹುಯು. ಕತೋಬಿ ಇವ್ಣೆ ಮಾಲುಮ್‌ ಕರಿಲಿದುಕೊಯ್ನಿ. ಯೋ ಯೆಹೂದ್ಯರ್ ಖ್ಹಾರು ಯೇಸುನ ಅಪರಾದಿಕರಿ ತೀರ್ಪ್‌ದಿದು. ಅಮ್ ಕರಾಥಿ ಪ್ರವಾದಿಖ್ಹಾರಾನಿ ವಾತೆನ ಚಾ಼ಲಖ್ಹರ್ಕು ಕರ‍್ಯು.” 28 ಯೇಸುನ ಮರಣ್ಣಿ ದಂಡನೆ ದ್ಯವಾನ ಬರೋಬರ್‌ನಿ ಕಾರಣ್ ನಾಮಳ್ಯುತೋಬಿ ಇನ ಮರಾವ್ಣುಕರಿ ಪಿಲಾತನ ಬೋಲಿಲಿದು. 29 ಪವಿತ್ರ ಪುಸ್ತಕ್‌ಮ ಲೀಖೈರುತೆ ಪರಕ್ಮ ಯೇಸುನ ಹುವಾನುಥೂತೆ ಅಖ್ಖೀಸ್ ಖ್ಹತಾಪ್ಣಿನ ಯೆಹೂದ್ಯರ್‌ನೆ ಇನ ದಿದು. ಇನಪಾರ್ ಇವ್ಣೆ ಶಿಲ್‌ಬೆಪರ್‌ಥು ಯೇಸುನ ಹೇಟ್ ಉತಾರಿನ್‌ ಘವಿಮ ಘಾಲ್ಯು. 30 ಕತೋಬಿ ದೇವ್ನೆ ಇನ ಮರ‍್ಯಹುಯಮಾಥು ಜೂತೊ ಕರೀನ್ ಉಠಾಡ್ಯೊ, 31 ಆ ಹುಯಿಗು ತದೆ ಗಲಿಲಾಯಥು ಯೇಸುನಿ ಜೋ಼ಡ್ಮ ಯೆರೂಸಲೇಮ್ಮ ಆಯುಥೂತೆ ಇವ್ಣೆ ಕೈಏಕ್ ದನ್‌ಲಗು ಇನದೇಖ್ಯು. ಹಮ್ಕೆ ಇವ್ಣೇಸ್ ಅಪ್ಣ ಅದ್ಮಿಖ್ಹಾರಾನ ಸಾಕ್ಷಿಹುಯಿರ‍್ಹುಸ್. 32 ದೇವ್ ಹಮಾರ ಗುರುಗುರಬ್‌ಲ್ಯನ ಕರ‍್ಯೊತೆ ವಾಗ್ದಾನ್ನಿ ಬಾರೇಮ ಸುವಾರ್ತೆನ ಹಮೆ ತುಮೂನ ಬೋಲಿಯೇಸ್. 33 ತುಮೆ ಇವ್ಣ ಖಾನ್‍ದಾನ್‍ವಾಳ ಹುಯಿರ‍್ಹಾಸ್. ದೇವ್ ಯೇಸುನ ಮರ‍್ಯಹುಯಮಾಥು ಜೂತೊಕರೀನ್ ಉಠಾಡಾಥಿ ಯೋ ವಾಗ್ದಾನ್ನ ಅಪ್ಣಖ್ಹಾಜೆ ಚ಼ಲೈರಾಖ್ಯೊಸ್. ಅನಿ ಬಾರೇಮ ಬೇನಿ ಕೀರ್ತನೇಮ ಅಮ್ ಲೀಖೈರ‍್ಹುಸ್. ‘ತೂ ಮಾರೊ ಛಿಯ್ಯೊ ಹಮ್ಕೇಸ್ ಮೇ ತುನ ಬಾ ಹುಯಿರ‍್ಹೊಸ್.’ 34 +ದೇವ್ ಯೇಸುನ ಮರ‍್ಯಹುಯಮಾಥು ಜೂತೊಕರೀನ್ ಉಠಾಡ್ಯೊತೆ ಇನಖ್ಹಾಜೆ, ಯೋ ಬಿಜು಼ ಕದೇಬಿ ಮಖ್ಹಾಣ್ಯಮ ಪೇಶಿನ್ ಖ್ಹಡ್‍ಶೆಕೊಯ್ನಿ ಕರಿ ಬೋಲಾನಿ ಬಾರೇಮ ದೇವ್ನೆ ಅಮ್ ಬೋಲಿರಾಖ್ಯುತೆ ಶಾತ್‌ಕತೊ; ಮೇ ಖ್ಹಚ್ಚೆಂಬಿ ದಾವೀದನ ಕರ‍್ಯೊತೆ ವಾಗ್ದಾನ್ನ ವಾರ್ಖ್ಹಾ ಅಖ್ಖಾನ ತುಮುನಾಬಿ ದೆವುಸ್.” ಯೊ ವಿಶ್ವಾಸ್‌ನುಸ್ ಕರಿ ಬೋಲೆಜಾ಼ಯ್‌. 35 + ‘ತೂ ತಾರ ವಿಶ್ವಾಸ್‌ನೊ ಸೇವಕ್‌ನ ಮಖ್ಹಾಣ್ಯನ ಖ್ಹಡ್ವಾನ ಮ್ಹೇಲಿಶ್‍ಕೊಯ್ನಿ’ ಕರಿ ಬೋಲಿರಾಖ್ಯೊಸ್. 36 ದಾವೀದ್‌ನೆ ಜಿವ್ತೊಥೋತೆ ದನ್‌ಖ್ಹಾರು ದೇವ್ನಿ ಚಿತ್ತಾನಿಘೊಣಿ ಜಿವ್ಯೊ. ಇನಪಾರ್ ಯೊ ಮರಿಗಯೊ,ದಾವಿದನ ಇನ ಗುರುಖ್ಹಾರಾನಿ ಜೋ಼ಡ್ಮ ಮಖ್ಹಾಣ್ಯು ಕರ‍್ಯು. ಇನಿ ಶರೀರ್ ಖ್ಹಡಿಗಯು. 37 ಕತೋಬಿ ದೇವ್ ಮರಣ್‌ಥು ಜಿವ್ತೊಹುಯಿನ್ ಉಠ್ಯೊತೆ ಯೇಸುನು ಶರೀರ್ ಮಖ್ಹಾಣ್ಯಮ ಖ್ಹಡೈಗಯುಕೊಯ್ನಿ. 38 ಮೋಶೆನ ಧರ್ಮಶಾಸ್ತ್ರಥೀಸ್ ತುಮೆ ಛುಟ್ಕಾರ್‌ ಹುಯಿನ್ ನೀತಿವಾಳಕೊಯ್ನಿ ಕರಿ ಬೋಲೈರ‍್ಹಾಸ್.ಇನಖ್ಹಾಜೆ ಭೈಯೇವೊ, ಆ ತುಮೂನ ಮಾಲುಮ್ ರ‍್ಹವಾದೆ; ಯೇಸುಥೀಸ್ ತುಮಾರಿ ಪಾಪ್ನ ಕ್ಷಮಾಪಣ್ ಮಳ್‌ಶೆಕರಿ ಬೋಲುಸ್. 39 ಅನಖ್ಹಾಜೆಸ್ ಯೇಸುಮ ವಿಶ್ವಾಸ್ ಕರಾವಾಳ ಹರೇಕ್‍ಜ಼ಣಾನ ಇನೇಥಿಸ್ ಇವ್ಣ ಅಖ್ಖಾಪಾಪ್‍ನ ಕ್ಷಮಾಪಣ್ ಮಳ್‍ಶೆ. ಧರ್ಮಶಾಸ್ತ್ರಥಿ ತುಮಾರಿ ಪಾಪ್ನ ಛೋ಼ಡಾವನ ಹುವಾಕೊಯ್ನಿ. 40 ಇನಖ್ಹಾಜೆ ಪ್ರವಾದಿಖ್ಹಾರನ ದಪ್ತರ್‌ಮ ಬೋಲೈರ‍್ಹುತೆ ತುಮೂನ ನಾಚಾ಼ಲ್ನು ತಿಮ್ ದೇಖಿಲೇವೊ. ಯೋ ಶಾತ್‍ಕತೊ; 41 ‘ಹಂದೇಖೊ ಚಿಂಘಾವವಾಳವೊ, ಆಶ್ಚರ್ಯ ಕರ್ತಹುಯಿನ್ ನಾಶ್‍ಹುಯಿಜಾ಼ವೊ. ತುಮಾರ ಹಗಾಮ್ಮ ಮೇ ಏಕ್‌ ಕಾಮ್ ಕರೀಶ್; ಬಿಜೆಕ್‍ಜ಼ಣೊ ಇನ ಛೋ಼ಡಿವತಾಳ್ಯೊ ತೋಬಿ ಇನ ತುಮೆ ವಿಶ್ವಾಸ್ ಕರ್ಶು ಕೊಯ್ನಿ!’ ಕರಿ ಬೋಲ್ಯೊ. 42 ಪೌಲ,ಬಾರ್ನಬ ಸಬಾಮಂದಿರ್‌ಮಾಥು ಜಾ಼ವಾನಿ ವಖ್ಹ್‌ತೆ ಆ ವಾತೆನಿ ಬಾರೇಮ ಬಿಜೂ಼ಬಿ ಜಾ಼ಖ್ಹತ್ ಹಮೂನ ಬೋಲಿ ದ್ಯವಾನಖ್ಹಾಜೆ ಅಗ್‍ಲ್ಯ ಸಬ್ಬತ್‌ ದನ್‌ಲಗು ಪಾಛ಼ ಆವ್ಣುಕರಿ ಅದ್ಮಿಖ್ಹಾರಾನೆ ಇವ್ಣುನ ಬೋಲಿಲಿದು. 43 ಸಭೆ ಖ್ಹತಮ್ ಹುವಾದಿನ್ ಕೈಏಕ್ ಯೆಹೂದ್ಯರ್ ಖ್ಹಾರು ಹಿಜ಼್ಜಾಥೂತೆ ಬಾರ್ನಬನ ಪೀಠೆಗಯು. ಯೆಹೂದ್ಯನಿ ಜಾ಼ತ್ಮಮಳ್ಯುಹುಯು ಅಜು಼ ಯೆಹೂದ್ಯರ್‌ಕಾಹೆತೆ ಇವ್ಣೆ ಇನಿ ಜೋ಼ಡ್ಮಥು. ಜಾ಼ಥ್ಥಿ ಜಾ಼ತ್‍ ಬದಲ್ಯುಹುಯು ಇವ್ಣೆಜಿನೂಬಿ ಖ್ಹಾಚದೇವ್ನ ಆರಾದನೆ ಕರ್ತುಥು. ಪೌಲ ಬಾರ್ನಬ ಇವ್ಣಿ ಜೋ಼ಡ್ಮ ವಾತ್ ಬೋಲಿನ್, ದೇವ್ನಿ ವಾರ್ಖ್ಹಮಾಸ್ ವಿಶ್ವಾಸ್‌ರಾಖಿನ್ ಅಗಾಡಿ ಭಡ್ನುಕರಿ ಇವ್ಣುನ ಹುಮ್ಮಖ್ಹ್‌ ಕರ‍್ಯಾ. 44 ಅಗಲ್ಯ ಸಬ್ಬತ್ ದನ್ನೆ ಪ್ರಭುನು ವಚನ್ ಖ್ಹಮ್‌ಜಾ಼ನಖ್ಹಾಜೆ ಘಣುಜ಼ಣು ಖ್ಹಯೇರ‍್ನು ಅದ್ಮಿಖ್ಹಾರು ಆಯಿನ್ ಭರಾಯು. 45 ಅನದೆಖ್ಯುತೆ ಯೆಹೂದ್ಯರ್ ಖ್ಹಾರಾನೆ ಘಣು ಬಳಾಪೊಕರಿನ್ ಪೌಲನೆ ಬೋಲ್ಯೊತೆ ವಾತೆನ ವಿರೋದ್ ಹುಯಿನ್ ಅಬ್ಬಾಜ಼ಬ್ಬಿಥಿ ದೂಷಣೆನಿ ವಾತೆಬೋಲ್‍ತು ರ‍್ಹಿಯು. 46 ಕತೋಬಿ ಪೌಲ,ಬಾರ್ನಬನೆ ಜಾ಼ಖ್ಹತ್ ಹಿಮ್ಮಥ್ಥಿ ವಾತೆಬೋಲಿನ್, “ಹಮೆ ದೇವ್ನಿ ವಚನ್ ಯೆಹೂದ್ಯರ್ ಹುಯಿರಾತೆ ತುಮೂನ ಪಹಿಲೆ ಬೊಲ್ನುಸ್‍ ಬೋಲ್ನುಥು. ಕತೋಬಿ ತುಮೆ ಇನ ಧಕೇಲಿದಿನ್ ಹರ್‌ಹಮೇಶಾನಿ ಜಿ಼ಂದ್‌ಗಿ ಕೋ ಮಳ್‍ಶೇನಿಕರಿ ತೀರ್ಪ್‌ ಕರಿಲಿದಾತೆ ಇನಖ್ಹಾಜೆ, ಹಮೆ ಅಲ್ಹಾವ್‌ ಜಾ಼ತ್‍ವಾಳಭಣಿ ಜ಼ಯೇಸ್. 47 ಶನಕತೊ ಪ್ರಭುನೆ ದಿದೋತೆ ಹುಕುಮ್‌ ಅಮ್‍ ಛಾ಼, ‘ಜಗತ್ನೊ ಖ್ಹರ್ತಿಲಗು ಛಾ಼ತೆ ಅದ್ಮಿಖ್ಹಾರಾನ ತೂ ರಕ್ಷಕ್ ಹುಯಿರ‍್ಹೇವ್ಣು ಕರಿ ಮೇ ತುನ ಯೆಹೂದ್ಯರ್‌ಕಾಹೆತೆ ಅದ್ಮಿನ ಉಜಾ಼ಳು ಕರಿ ಬಣೈರಾಖ್ಯೊಸ್.” 48 ಪೌಲನಿ ಆ ವಾತೆನ ಖ್ಹಮ್‍ಜ್ಯುತೆ ಅಲ್ಹಾವ್‌ ಅದ್ಮಿಖ್ಹಾರು ಘಣು ಖುಷಿಕರೀನ್ ಪ್ರಭುನಿ ವಾತೇನಖ್ಹಾಜೆ ಸ್ತುತಿ ಕರ‍್ಯು. ಹಮೇಶಾನಿ ಜಿ಼ಂದ್‌ಗಿ ಲೀಲ್ಯಾವನ ಚೂ಼ಣೈರ‍್ಹುತೆ ಖ್ಹಾರೂಸ್ ವಿಶ್ವಾಸ್ ಕರ‍್ಯು. 49 ಪ್ರಭುನಿ ವಚನ್ನ ಯೋ ಖ್ಹಯೇರ‍್ನಿ ಅಖ್ಖಿಸ್‍ಬಾಜು಼ ಫೈಲಾಯು. 50 ಕತೋಬಿ ಯೆಹೂದ್ಯರ್ ಖ್ಹಾರು ಥೋಡಿ ಇವ್ಣಿ ಜಾ಼ತ್ನಿ ಭಕ್ತೆ ಶೌಕಾರ್ ತಯೇಡಾವ್‍ನ ಅಜು಼ ಖ್ಹಯೇರ‍್ನ ಗಲ್‌ಢಖ್ಹಾರು ದೇವ್ನ ಆರಾದನೆ ಕರುಕರ್ತುಥು. ಇವ್ಣೆ ಖ್ಹಾರು ಮಳಿನ್ ಪೌಲ ಬಾರ್ನಬನ ಉಪ್ಪರ್ ಇರಾದೊ ಕರ್ನುತೆ ತಿಮ್ ಇವ್ಣುನ ವಹೇರ‍್ಯ ಬಣ್ಣುತೆ ತಿಮ್ ಕರೀನ್, ಪೌಲ ಬಾರ್ನಬನ ಯೊ ತಬರ್‌ಖಾಥು ಭಾರ್‌ ನಖ್ಹಾಡಿದಿದು. 51 ಇನಖ್ಹಾಜೆ ಪೌಲ,ಬಾರ್ನಬನೆ ಇವ್ಣುನ ಝೇತೈನ್‌ ಇವ್ಣ ಗೋಡಾನಿ ಧೂಳ್‌ನ ಝ಼ಟ್ಕಿನಾಖಿದೀನ್, ಇಕೋನ್ಯ ಖ್ಹಯೇರ‍್ನ ಗಯ. 52 ಅಂತಿಯೋಕ್ಯಮ ಥೂತೆ ವಿಶ್ವಾಸಿಖ್ಹಾರು ಖ್ಹುಶಿಥಿ ಥು. ಬಿಜು಼ ಪವಿತ್ರಾತ್ಮಥಿ ಭರೈರೂಥು.