7
Inggisɛ idubu ideli onyi
ngwusefa dɔn enɛ
ngwu a kye ambɛ dzɛ ma
1 Ngwi ungwɔnɛ wa nyɛ nɛ, ani di engyesɔ nghi enɛ kwudzɛ ayɛ enɛ mgbi ɛsɛ le kwulu awo mi ayɛ enɛ mgbi ɛsɛ gbɛɛ no ka fa mi ikpɛsɛ naa mi ekyoo okwukwo hona mi ekwɔ onyi kpaa ba.
2 Nɛ ani di ongyesɔ oka tɔkyɛ mi onosa, yi ambɛ mgbi Imgbasho oshishe. O kwu ela mi ela okwukwo kɛ mbi engyesɔ nghi enɛ ama ngwu a teyi kye mfye nu ma gbɛɛ nu ma dzili ɛsɛ bɛyi ekyoo okwukwo ntona gbɛɛ:
3 <<Ka dzili ɛsɛ naa ekyoo okwukwo hona ekwɔ ba, nghataa ni eyi kye ambɛ dzɛ engbidɔ mgbi Imgbasho mgbi eyi mi ebeshu se.>>
4 Nɛman ani fwo mmbwo mgbi ama ngwu a kye ambɛ dzɛ ma mani: Idubu ideli onyi ngwusefa dɔn enɛ mi ali agwɔ mgbi iSrai duu.
5 Mi agwɔ mgbi iJuda a kye ambɛ
dzɛ inggisɛ idubu iwyodefa,
mi agwɔ mgbi iRubɛn idubu iwyodefa,
mi agwɔ mgbi iGadi idubu iwyodefa,
6 mi agwɔ mgbi Ashɛ idubu iwyodefa,
mi agwɔ mgbi iNaftali idubu iwyodefa,
mi agwɔ mgbi iManase
idubu iwyodefa,
7 mi agwɔ mgbi iSimiɔn idubu iwyodefa,
mi agwɔ mgbi iLevi
idubu iwyodefa,
mi agwɔ mgbi iSaka
idubu iwyodefa,
8 mi agwɔ mgbi iDzebulun idubu iwyodefa,
mi agwɔ mgbi iJose idubu iwyodefa,
mi agwɔ mgbi iBenjamin idubu iwyodefa.
Ibyi inggisɛ ama nwo angwuto
onzundzɛ
9 Ngwi ungwɔnɛ wa nyɛ nɛ, ani di ibyi inggisɛ mi iyayi mbi ani ngwu inggisɛ onyi ka gbɔ ma gbɛ ba, kyɛ mi ali ɛsɛ yi agwɔ yi inggisɛ yi ondudzɛ duu, gbeka kwudzɛ iyayi itsuutɔ bɛyi iyayi Ongwummala. A wo angwuto onzundzɛ di byi abade mi abɔ mgbi ama.
10 A si kwu ela mi ela okwukwo gbɛɛ:
<<Owatɔ-watɔ kyɛ mbi
Imgbasho mgbi eyi,
Ongwu nsɔdzɛ itsuutɔ,
bɛyi mbi Ongwummala.>>
11 Engyesɔ ntona duu kwudzɛkɛ kpakɛkɛ wo itsuutɔ di kpatsɛ engyukwo ntona yi atta owamyɛ ntonani. A tukwukɛ esɛ gbe ikye wɛɛsɛ mi iyayi itsuutɔ si sunu Imgbasho,
12 le gbɛɛ:
<<No dzɛ ngha!
Otsɛ-tsɛ yi okwɔkwɔ
yi ozoyeye yi angba yi
mmwɛ yi mfye yi apa
no dzɛ mbi Imgbasho mgbi eyi
nghataa imbisɔ gyegwu.
No dzɛ ngha!>>
13 Nɛ onyi mbi engyukwo ntonɛ byi ani ita gbɛɛ, <<Ama nwo angwuto onzundzɛ ntonɛ ma, a li ele, a di kyɛ ole kyɛ?>>
14 Ani si nu uka gbɛɛ, <<Ongyukwo, abu ye.>>
Ta o gbɛɛ, <<Ntonɛ li ama ntasɛ mi adzɛ okwukwo nani; a kye salu angwuto mgbi ama non yɛɛ onzundzɛ mi eyi mgbi Ongwummala.
15 Ikyenghanɛ,
<<a to iyayi itsuutɔ mgbi Imgbasho
dile sunun onɔ yi otu mi ozu
mgban okwukwo nani;
man ongwu nsɔdzɛ itsuutɔ na ka
kye iwulu abɔ mgban tukwu ma.
16 Akponyi kpaa enbwa ka dɔ ma ba;
ekweni kpaa dika kwu ma ba.
Onɔ ka tsɛ ma ba,
naadi olola onyi kpaa ba.
17 Ikyesinɛ Ongwummala ndzɛ mi idzidzɛ
itsuutɔ na ka li inggisɛ ongyo ma;
o ka gbe ma teyi lu mi uteeni oshishe.
Man Imgbasho ka fɔ ma etse inɛ duu.>>