5
Afɛ ofulu-fulu yi ongwummala
1 Nɛ ani di afɛ ofulu-fulu mi abugye mgbi ongwu nsɔdzɛ itsuutɔ nani, ngwi a lɔ ungwɔ mi ali agyan duu kye kwobɛ imbe egyafa.
2 Ani diyɛ di ongyesɔ odatu le noola mi ela okwukwo gbɛɛ, <<Li emɛ mɛ okye fwɛlu okwobɛ di kwulu afɛ na?>>
3 Nghaduu inggisɛ onyi mi esho naadi mi ɛsɛ hona mi ikpɛsɛ yagba okwulu afɛ na naadi winɛ di ifun kpaa ba,
4 Ani tsukwu diyɛ tsukwu ikyekyɛ a tu inggisɛ onyi nka kwulu afɛ na hona winɛ di ifun ba.
5 Nɛ engyukwo ntona onyi nya ani gbɛɛ, <<Ka tsukwu ba! Dika, Ugaba mgbi etɔ mgbi emi iJuda, Etɔ mgbi iDevedi ngha wa. O ka yagba kwulu afɛ na yi okwobɛ-kwobɛ egyafa ntonani.>>
6 Nɛ ani di Ongwummala, le dinɛ dafi a teyi ngwɔn mani, kwudzɛ mi idzidzɛ itsuutɔ, atta owamyɛ nghi enɛ bɛyi engyukwo ntona loka won. O dzɛ yi agbe nghi egyafa yi inɛ egyafa, ngwi li Onodzi egyafa mgbi Imgbasho ngwi a kye dɛsɔ nu ɛsɛ duu mani.
7 O ba wa kye gbɛlu afɛ ofulu-fulu na mi abugye mgbi ongwu nsɔdzɛ itsuutɔ nani.
8 Man ngwi o kye gbɛlu nɛ, atta owamyɛ nghi enɛ ntona bɛyi engyukwo osudenɛ ntona lakɛ esɛ mi iyayi Ongwummala nani. Ama duu dzɛ yi ozuna a di byi uga abashi nmbwo yi ungwɔ ogbungbɛ mi ifun, ngwi li ibɔ mgbi emi osaan.
9 A di shashi ofufɛ gbɛɛ:
<<Abu mɛ okyi kyelu afɛ ofulu-fulu
di kye kwulu okwobɛ-kwobɛ mgban ntonani,
ikyekyɛ a ngwɔ abu,
ma yi eyi mgbi abu, abu gya inggisɛ
mi ali udzɛ bɛyi ondudzɛ,
bɛyi inggisɛ yi ɛsɛ duu ikye Imgbasho.
10 Abu nu ma yɛɛ esutɔ bɛyi ama ofifɛ
ikye osunu Imgbasho mgbi eyi,
a dika kye ɛsɛ nɛ teyi.>>
11 Nɛ ani ndinɛ si fwo ela engyesɔ ibyibyi, mmbwo mgbi ama li idubu idubu, yi idubu iwyo akpe idubu iwyo. A kpakɛkɛ wo itsuutɔ bɛyi atta owamyɛ bɛyi engyukwo ntonani.
12 Mi ela okwukwo a shashi gbɛɛ:
<<Omɛɛmɛ li Ongwummala,
ongwu a ngwɔn,
o kye gbɛlu mfye yi
aludu yi ozoyeye yi ɛnɛpɛ
yi mmwɛ yi okwɔkwɔ bɛyi otsɛɛtsɛ!>>
13 Nɛ ani fwo ali atta mi esho duu bɛyi mi ɛsɛ nɛ bɛyi mi ikpɛsɛ bɛyi mi ekyoo okwukwo, bɛyi alungwɔ nto mboma duu, le shashi gbɛɛ:
Mbi ongwu nsɔdzɛ itsuutɔ
yi mbi Ongwummala
ni otsɛɛtsɛ yi mmwɛ yi okwɔkwɔ bɛyi mfye
dzɛ mbon, nghataa gyegwu!>>
14 Adan owamyɛ nghi enɛ ntona gbɛɛ, <<No dzɛ ngha,>> man engyukwo ntona lakɛ esɛ di sunu.