19
Atsa mi esho
1 Ngwi ungwɔnɛ wa nyɛ nɛ, ani fwo ungwɔ dafi agwudu otsɛɛtsɛ mgbi ibyi inggisɛ mi esho le wulu gbɛɛ:
<<Tsɛ Imgbasho!
Owatɔ-watɔ yi okwɔkwɔ bɛyi
mfye li mgbi Imgbasho mgbi eyi,
2 ikyesinɛ ikwɔ mgban li otsitsi di li ayin.
Lubana o ngwɔ angbodzi owagbai ongyaa
ongwu nkye ɛsɛ kyi mbee yi
amah mgban ogboogbo na ikwɔ.
Imgbasho yile mkpa kpan ikyekyɛ o ngwɔ engbidɔ mgban.>>
3 A diyɛ wulu gbɛɛ:
<<Tsɛ Imgbasho!
Iwu ntɔ mbon na lu
esho gyegwu-gyegwu.>>
4 Engyukwo osudenɛ bɛyi atta owamyɛ nghi enɛ lakɛ esɛ di sunu Imgbasho, nsɔdzɛ itsuutɔ nani. A gbɛɛ:
<<No dzɛ ngha,
Tsɛ Imgbasho!>>
5 Nɛ ela tɔ mi itsuutɔ na, le gbɛɛ:
<<Tsɛ Imgbasho mgbi eyi,
ema engbidɔ mgban duu,
ema nli mion,
wita mbi ama oyɛyikpa nghataa
lu mbi ama onghaangha duu!>>
6 Nɛ ani fwo ungwɔ dafi agwudu mgbi ibyi inggisɛ, dafi okadu-kadu mgbi eni bɛyi onikyɔ akpala, le wulu gbɛɛ:
<<Tsɛ Imgbasho!
Ikyesinɛ Otsɛ Imgbasho mgbi eyi
Onghaangha li utɔ.
7 Ni eyi tsatsa di shɛ ewo ta di nun mmwɛ!
Ikyekyɛ eba okwokyiikwokyi mgbi
Ongwummala gyɔ wa,
ongyaa ofufɛ mgban ma
wewo dzɛ le fɛ-fɛ.
8 A kye angwuto ondlɛndlɛ,
nkwɔkwɔ di gbosinɛ,
kye nun gbɛɛ no kyi wo.>>
(Angwuto ondlɛndlɛ nɛ, li ambɛ mgbi ali osaan mgbi emi osaan.)
9 Nɛ ongyesɔ na nya ani gbɛɛ, <<Lɔ gbɛɛ: <Ogbumse li ama ngwu a bɔɔ ma oga ongwi onɔdɛ mgbi eba okwokyiikwokyi mgbi Ongwummala mani!> >> O di kiyayi gbɛɛ, <<Ntonɛ li elodzɛ otsitsi mgbi Imgbasho aani.>>
10 Mi odzɛ nɛ, ani gbɛsɛ lankɛ iyayi ikye osu nun. Kpaa o nya ani gbɛɛ, <<Ka kyɔ ngha ba! Ani kpaa li ongbidɔ ungwonyi yi abu bɛyi engwunabu ama nkyɔ obwɛndɛ mi ikye oyɛyɛ mgbi ama mbi iYesu mani. Sunu Imgbasho! Lubana itɔdzɛ mgbi oyegbɔ yɔ, li onu obwɛndɛ ngbosa mi ikye iYesu.>>
Ongye otɔ mmya dɔdzɛ
mmya onzundzɛ
11 Ta ani di esho kwulu ladzɛ man mmya onzundzɛ kwudzɛ mi iyayi mgbi ani, ongye otɔn ma a kwun gbɛɛ Oyɛyɛ bɛyi Otsitsi. Yi emyɛmyɛ o li gbiikwɔ di gblika.
12 Inɛ mgban dzɛ dafi ola onaabɔ mani, okpapyi dile kwuba mi ikye mgban. A lɔn iyi mi ewo ngwi inggisɛ onyi kpaa ye ba li ongwu yuon ta.
13 O meewo mi angwuto ngwi a kye tswokɛ eyi, ma iyi mgban li Elodzɛ Imgbasho.
14 Oblakwutsɛ emi esho le kyɛdɔn, le tɔ mmya onzundzɛ di wo angwuto onzundzɛ, ondlɛndlɛ gbosinɛ.
15 Okwusunkli ogyigye ngwi o ka kye kwɔdzɛ ɛsɛ tɔ mi ondu mbon. <<O ka kye ma teyi yi okwuta utɔ ashashi.>> O ka nu itingga okwulewo mgbi Imgbasho Onghaangha tɔ, dafi a kye afɔ jiyɛ awawa ekwɔ ni eni tɔ mi ele nɛni.
16 A lɔ iyi dɔdzɛ angwuto mi oba agya ita mgban gbɛɛ:
Utɔ mgbi emi utɔ bɛyi Otsɛ mgbi emi otsɛ,
17 Nɛ ani di ongyesɔ kwudzɛ onɔ, o kwu ingwunɔ ama nle bulu mi esho duu ela okwukwo gbɛɛ, <<Ba wa kwakye yi eka mi onikyɔ oga ongwi onɔdɛ mgbi Imgbasho nɛ na.
18 Ba na adzi ni ema gye mmbwɛ mgbi emi utɔ yi emi agyegika yi emi angbodzi inggisɛ yi mmbwɛ mmya yi ama otɔ ma yi mmbwɛ mgbi ali inggisɛ duu, ama nbyi abɔ ewoma yi ofyɛɛ yi ama oyɛyikpa bɛyi ama olɔngbɔ duu.>>
19 Nɛta ani di mmbwaba na bɛyi utɔ emi ɛsɛ nɛ yi ama oblakwutsɛ mgbi ama kwakye yi eka ikye ogblika yi inggisɛ otɔ mmya na bɛyi obyi oblakwutsɛ mgban.
20 Kpaa a kyi bwalu mmbwaba nani, bɛyi ama ogbɛɛsɛ atsika ama nkyɔ ambɛ ama okwulewo ikye mgban mani. Yi ambɛ okwulewo ntonɛ, o kpagya ama ngbɛ ambɛ mgbi mmbwaba di sunu adagyɛ mgban ma wo. Ama efa duu, a gbe ma ngwuta wokɛ utɔ mgbi udola nle gbɛ yi ofufu odaka mi ele.
21 Ama nsisi ma a ngwɔ ma mi okwusunkli ntɔ mi ondu mgbi ongwu nle tɔ mmya mani, man ingwunɔ duu kwakye gye ikwɔ mgbi ama di kwoolo.