5
Mbi engyukwo bɛyi mmafa
1 Ema ama ogbe inggisɛ teyi mi okwakye mgbi emi iKrestu, n le lɔ afɛ ikye okwu ema ɛwɛ wo. Ani kpaa li inggisɛ ogbe inggisɛ teyi, di li obwɛndɛ mi adzɛ ogyeegye mgbi iKrestu, dika wodzɛ mi okwɔkwɔ mgban onɔ ngwi a kawa kye tso eyi mani.
2 Ngyo ifyungwɔ mgbi Imgbasho nto abɔ mgbi ema nani, gbinɛbyi ma itukwu asisa, ka kyɔ dafi a le si abu siisi ba. Ka kyɔ ikye ungwɔ ngwi abu ka tu mi ele ma ba, nghaduu kyɔ ikyegbɛɛ di abu dzɛ yi imina okyɔ Imgbasho idɔ.
3 Ka kye okye egyɛgyɛ dɔ ama ngwu a gbe wo abu abɔ ntonɛ ba, kpaa tso ma ambɛ osuse mgbi abu.
4 Onɔ ngwi ikye mgbi ama ongyo ifyungwɔ wa ba yɔ, abu ka gbɛ okpapyi okwɔkwɔ nka sila ba nani.
5 Mi itɔ ofɛ na kpɔɔ, ema mmafa, siikyenu ama nli engyukwo ema mani. Ema duu, yile ewo esɛ nu ewema ikyekyɛ,
<<Imgbasho li gbela yi ama okyile ewo esho ba,
kpaa li kyumse yi ama oyile ewo esɛ.>>
6 Ikyenghanɛ yile ewema esɛ, mi iwulu abɔ odatu mgbi Imgbasho, gyɔ ngwi o ka kyile ema esho ni onɔ wa gyɔ yɔ.
7 Gbe okakewo mgbi ema duu dɔn ubɔ ikyekyɛ li ongwu li gbinɛbyi ema.
8 Gbɛwɛdzɛ ngyo ewema di kwasisa. Ongyikyili mgbi ema olodu, dzɛ dafi ugaba nle tsagwudu mani, le pita inggisɛ ni ongwu tangha.
9 Fwa ikwangha yan, kwulɛsɛ kpɔklɔɔ mi oyɛyɛ onuunu, lubana ema ye dafi emi ongwunema mi ɛsɛ duu le nyɛ mi itɔ adzɛ ntonɛ mani.
10 Ma Imgbasho mgbi elela duu, nkwu ema ela ba okwɔkwɔ mgban ogyegwu ndzɛ yi odondu ba mbi iKrestu na, ongwu abuon ka yile abu kwitse di nu abu fyumfye di nu abu kwudzɛ kpɔklɔɔ, ni abu gyadzɛ ongwonɔ gwee nyɛ yɔ.
11 Mfye no dzɛ mbon gyegwu gyegwu. No dzɛ ngha.
Angba olɛlɛ
12 Yi abɔ oyaaya mgbi iSaila ngwu ani kyon wuuta gbɛɛ o li inggisɛ iKrestu oyɛyɛ na, n lɔ ongwɛ afɛ na kɛ mbi ema, le kwu ema ɛwɛ wo dile kyɔ obwɛndɛ gbɛɛ nɛnɛ li elela mgbi Imgbasho otsitsi. Kwudzɛ mi ele fyumfye.
13 Okwakye mgbi emi iKrestu ongwi iBabyilon ngwi Imgbasho sadun ungwonyi yi ema na, dɛsɔ angba mbi ema. Ongwani iMaki kpaa dɛsɔ angba.
14 Ta ewema angba tsɛkwulu eka otso okpitukwu. Iyu no dzɛ yi ema ama ndzɛ mbi iKrestu duu. No dzɛ ngha.