11
IPol bɛyi ama ogbikye iYesu emi atsika
1 I minɛn gbɛɛ ema ki shitukwu yɛn mi ongwɛ ikwangha mgbɛn nɛni; ma ema le kyɔ ngha kpaa wa.
2 N le kyoofu inggisɛ Imgbasho ikye ema. Ema dzɛ dafi ongwongyaa n ye ongyulɔ waba, ngwu ani zondu gbɛɛ o ka bongyulɔ onyi nli iKrestu abuon nani.
3 Nghaduu imio wen gbɛɛ, dafi ifa nose kpagya Ifa wo mi ɛwɛ nɛ, kaba itukwu mgbi ema kawa lu enggengga mi otsitsi bɛyi osuusunu ngwi ema le sunu iKrestu nɛni.
4 Lubana ni inggisɛ ba wa gbɔdzɛ iYesu oka idzidza yi iYesu ngwu eyi le gbɔ nɛ, hona ni ema gbɛ onodzi idzidza yi ongwu ema teyi gbɛ nɛ naadi gbɛ esɔ oka idzidza yi esɔ ngwi ema tsekise fwo nɛ yɔ, ema li gbela yan plɛ.
5 Nghaduu n tsɛwɛ gbɛɛ <<ama ogbikye iYesu ama okpɔngɔ ntona>> a ngha ani ba.
6 Kanaba ani li inggisɛ ngwu a tso ani odzɛ ogbɔɔgbɔ saan ba, kpaa n dzɛ yi ozoyeye. Eyi nu odzɛ nɛ gbosa lo ema mi ali ofɛ duu.
7 Nghanɛ li ungwɔ obube gbɛɛ di ani yile ewani esɛ ikye okyile ema esho mi ogbɔ Esɔ Osuse mgbi Imgbasho nya ema ayayii?
8 Li ungwɔ obube gbɛɛ di ani gbɛ awuya mbi emi iKrestu angbeka ikye otobyi ema ba.
9 Onɔ ngwi ani dzɛ yi ema di mina ungwɔ ma, n li okye mbi ema ba, lubana ama onoyɛyɛ nkyɛ iMasidonia nu ani ungwɔ ngwi ani mina. Ani kye ewani dzɛkɛ mi ali ofɛ duu gbɛɛ nin ka li okye mbi ema ba, n dika kiyayi okyɔ ngha.
10 Ngwi otsitsi mgbi iKrestu ka dzɛ mbi ani nɛ tayɔ, inggisɛ onyi mi ayɛsɛ mgbi Akaya ka kwɔ ani abɔ otsigɛgɛ mgbi ani nɛ ba.
11 Ani gbɛ awuya mbi ema ba gbɛɛ di ekyɛ kyɔ? Ikyegbɛɛ ema kpa ani itukwu ba naadi sinɛ? Imgbasho ye, ema kpa ani itukwu.
12 Ani dika kiyayi okyungwɔ ngwi ani le kyɔ nɛni ikye otukwu ofɛ mbi ama nle pita ofɛ onu ma di gbɛɛ ama le kyidɔ ungwonyi yi eyi ntonani.
13 Lubana itɔ inggisɛ ntona li ama ogbikye iYesu emi atsika, emi idɔ ama okpagya inggisɛ wo, le kye ewoma tso dafi ama ogbikye iKrestu.
14 Li odzɛ okwulewo ba, lubana Owapɛ olodu abuon le kyɔ ɛwɛ kyɛ gbɛɛ ongwu li ongyesɔ mgbi osa.
15 Li odzɛ okwulewo ba, ni engbidɔ mgban tole kyɔ ɛwɛ kyɛ dafi engbidɔ mgbi osaan yɔ, Imgbasho ka kwo ma adɔ mi ongyɛɛngyɛ dafi okyɔɔkyɔ mgbi ama dzɛ mani.
IPol tsaabɔ igɛgɛ mi adzɛ
mgban ogyeegye
16 N di yilen gbɔ: Ni inggisɛ onyi ka kye ani gbɛɛ di ani li ikwangha inggisɛ ba. Kpaa kini ema kye ngha yɔ, gbɛ ani dafi ema li gbɛ ikwangha inggisɛ, gyɔ nin tsaabɔ igɛgɛ gwee mani.
17 Abɔ ngwi ani kye tsigɛgɛ nɛ ani le gbɔdzɛ dafi Ongyukwo li gbɔ ma ba, kpaa dafi ikwangha inggisɛ mani.
18 Ngwi inggisɛ ibyibyi le tsaabɔ igɛgɛ dafi ɛsɛ le kyɔ nɛ, ani kpaa ka tsaabɔ igɛgɛ.
19 Ngwi ema di gbɛɛ ema kwiinɛ nɛ, li kpa ema okwakye yi emi ikwangha.
20 Mi odzimɔ yɔ, ema li gbela yi ama nkwu ema ofyɛɛ kpaa hona ama okwu ema inɛ mbe naadi ama ogye ema mmgbe hona kye ewo ma dzɛ gɔgɔ naadi ta ema afɛ mi inɛ kpaa mani.
21 I kwu ani ayiwi ogbɛɛ eyi kwiinɛ ba nyɛsɛ okyɔ itɔ ali nani.
Ni a ka tsaabɔ igɛgɛ yɔ, ani kpaa ka tsaabɔ igɛgɛ, nghaduu li idɔ mgbi ayayi.
22 A li emi iHibruu? A li emi Israii? A li emi ongwɛ Abrahan? Li ngha ani kpaa dzɛ aali.
23 A li engbidɔ mgbi iKrestuu? (N le gbɔdzɛ nɛ dafi ani dzɛ yɛyɛ ba mani.) Nghaduu n kyɔn idɔ tishi ngha ma. A li kye ani wo obawi alonɔ-alonɔ duu, a nghao gbo ani ibe, n di ikwongye inɛ akpe ibyibyi.
24 Emi iJuda gbo ani onitse osudiwyo diwyegyanɛ akpe eda.
25 A gbo ani ibe yi okwuta akpe eta, a tsɛ ani akwutsɛ onɔɔlɔlɔ, iwudza gbobu yɛn akpe eta mi eni, n la ifu onekyoo egbe onyi yi otu onyi.
26 N le dzagaba alonɔ duu. N kpatsɛ yi ibli mi ekyoo, n kpatsɛ yi ibli mi abɔ emumyi, n kpatsɛ yi ibli mi abɔ emi ɛsɛ mgbi ani, n kpatsɛ yi ibli mi abɔ Udzengye; n kpatsɛ yi ibli mi ogalu, n kpatsɛ yi ibli mi agwɔ agwɔ, n kpatsɛ yi ibli mi onekyoo; n di kpatsɛ yi ibli mbi ama okyɔ odzimgbasho ɛwɛ.
27 N kyidɔ di gbili diyɛ nuna ba; N ye ungwɔ ngwi a kwun di enbwa yi ekweni di gye ungwogye ba onɔ ibyibyi; Ofu yi ani n di dzɛ ibiba kpaa.
28 Mi ungwɔ ntonɛ duu kpaa, ani kye itukwu mgbi ani fakɛ mbi emi iKrestu duu alegbe-alegbe.
29 Onɔ ngwi angbeka dzewatsi ma ewo li kwulu len. Onɔ ngwi a gyila angbeka kaka ungwɔ obube ma, itingga li kyɔ ani.
30 Ni ani ka tsaabɔ igɛgɛ kyɛmɛ yɔ, n ka tsaabɔ igɛgɛ mi ungwɔ ama nnu ani dzewatsi mani.
31 Imgbasho Otsɔ Otsɛ iYesu, ongwu ndzɛ mbisɔ a ka tsan igyegwu na, ye dafi n le mwonya ba mani.
32 Mi iDamasiko ma, iGɔna nbyidzɛ abɔ Utɔ Areta nu ma dzɛ ogalu iDamasene wo ikye obwa ani.
33 Nghaduu a kye ani wokɛ uya nyɛ ofaawo tɔ mi ikpishi man ani dzidzɛ tɔ mi abɔn.