11
1 Kyɛdɔ ambɛ mbi ani na dafi ani kpaa le kyɛdɔ ambɛ mbi iKrestu nɛni.
Ola mgbi osunu mi ododa
2 Ani tsɛ ema dafi ema wɛ yɛn mi alungwɔ diyɛ gbɛwɛbyi otsootso ama ani gbe nu ema ntonɛ yɛyɛ mani.
3 Onɛnɛ i mina ani onu ema difwi gbɛɛ ikye mgbi ali ongyulɔ li iKrestu, ikye mgbi ali ongyaa li ongyulɔ, ikye mgbi iKrestu di li Imgbasho.
4 Ongyulɔ ta ngwu bibɔ hona gbeesɔ kye angwikye tukwu yɔ, o nu ikye mgban (iKrestu) mmwɛ ba.
5 Ali ongyaa ndi bibɔ hona gbeesɔ yi ikye asisa yɔ, o nu ikye mgban (oban) mmwɛ ba, li ikondu dafi a kpalun otu mani.
6 Ni ongyaa ka yama kye ungwɔ bwa ikye bayɔ no nu ma wulɔn otu; ma ni li ungwɔ ayiwi mbon owulɔ otu yɔ, no kye ungwɔ bwa ikye.
7 Ngwi ongyulɔ dzɛ mi odzɛɛdzɛ bɛyi okwɔkwɔ mgbi Imgbasho nɛ, dzɛ mbisɔ ngwi ongyulɔ ka kye ungwɔ tukwu ikye ba; nghaduu ongyaa li okwɔkwɔ mgbi ongyulɔ.
8 Lubana ongyulɔ tɔ ikpewo ongyaa ba kpaa li ongyaa tɔ ikpewo ongyulɔ aali;
9 A yama ta ongyulɔ ikye ongyaa ba kpaa li ongyaa ngwu a ta ikye ongyulɔ.
10 Mi itɔdzɛ nɛ, bɛyi ikye engyesɔ emi esho yɔ, tishi ni ongyaa sulu ambɛ mgbi mfye mi ikye mgban.
11 Nghaduukpaa, mbi Otsɛ yɔ, ongyaa byabɔ ongyulɔ, ongyulɔ kpaa byabɔ ongyaa.
12 Lubana dafi ongyaa tɔ ikpewo ongyulɔ na li ngha ngwi ongyaa kpaa di mba ongyulɔ yɛyɛ aali. Kpaa alungwɔ duu kyɛ mbi Imgbasho.
13 Gbɔ otsitsi abuabu: li ayin ni ongyaa bibɔ mbi Imgbasho ikye asisaa?
14 Kyɛ atɛɛsɛ ma jo li ungwɔ ayiwi ni otu mgbi ongyulɔ ngwu gbo onbukwɔ,
15 nghaduu kini ongyaa sulu otu tunto mi ikye yɔ, li ingwinda mbon: Lubana a kye otu nun ikye otukwun ikye blibli.
16 Ni i dzɛ inggisɛ otangwodzɛ nɛ yɔ, eyi hona emi iKrestu sulu ali oka idzidza osunu ba.
Ungwogye mgbi Otsɛ ongwi onɔdɛ
17 Mi otsootso ntonɛ yɔ n yama tsɛ ema ba, lubana okwakye mgbi ema li ba yi ombeembe ngha osuse.
18 Ungwɔ ongwi ababɔ, n fwo gbɛɛ ni ema wa tu eka mi okwakye mgbi emi iKrestu yɔ, ogbua-gbua li dzɛ idzidzɛ ema, n pita onoyɛyɛ mi ele.
19 Li ungwɔ otsɛtsɛwo ba, idzidza tɔ gede-gede mi idzidzɛ ema ikye ni Imgbasho difwi ema ama nle kyɔ ayin mani.
20 Ni ema wa kwakye yɔ, li oga mgbi Otsɛ ngwi ema li gye ba.
21 Lubana ema li kwaafɔ giyi oka mi onɔ ngwi ema le gye ma ba. Inggisɛ oka li lu yi enbwa ifu, oka li gye di wa fya.
22 Ema sulu udɛ ngwi ema ka gye di wa mi ele lo? Naadi ema kyi kye ozu mgbi Imgbasho yɛɛ ayayi diyɛ nya ama nsulu unka ba ntonɛ adi? Ni ani ki gbɔsinɛ yi ema? Ni ani ki tsɛ ema yi itɔ ali nɛɛ? N ka tsɛ ba!
23 Lubana ungwɔ ngwi ani tun mbi Otsɛ ma ngwi ani kye nu ema aali: Otsɛ iYesu kyi kyelu ibredi mi otu ngwi a kyon gya mani,
24 ta ngwi o kye angba nu Imgbasho nɛ, o kye mwalu si gbɛɛ, <<Nɛnɛ li ikpewo mgbi ani, ngwi dzɛ ikye ema; kyungwɔnɛ ikye ni ema le wɛ ani na.>>
25 Mi itɔ ofɛ na kpɔɔ, o di kyi kyelu ibwɛ di gbɛɛ, <<Ibwɛ nɛ li ondu odzɛɛdzɛ ofufɛ mi eyi mgbi ani; kyɔ ngha yɛyɛ onɔ ngwi i ka wan mani, ikye ole wɛ ani.>>
26 Lubana alonɔ ngwi ema gye Ibredi di wa ibwɛ nɛ yɔ, ema le noola ikwu Otsɛ nghataa mbise o ka yɛ.
27 Ikyenghanɛ, ali inggisɛ ngye ibredi diyɛ wa ibwɛ mgbi Otsɛ nɛ mi ofɛ nli ayin bayɔ, o kyɔ obube mi ikpewo bɛyi eyi mgbi Otsɛ.
28 I tishi ni inggisɛ kyidi odzɛɛdzɛ mgban duuse no wa gye ibredi na diyɛ wa mi ibwɛ nani.
29 Lubana inggisɛ ta ngwu gye di wa kpaa difwi gbɛɛ li ikpewo mgbi Otsɛ bayɔ, o fwo ewon ikwɔ.
30 Li ungwɔ nkyɔ se ngwi ema kwuba ndɛngyɛ di dotse, ma ema ibyibyi di kwulu kpaa wa.
31 Nghaduu ni eyi kyidi odzɛɛdzɛ mgbi ewe saan yɔ, eyi ka kɛ inai ikwɔ mgbi Imgbasho ba.
32 Ni Otsɛ Imgbasho gbɔ eyi ikwɔ yɔ, O kwo eyi adɔ ikyegbɛɛ ni a wa ngwɔ eyi ikwɔ ungwonyi yi ɛsɛ ba mani.
33 Nghanɛ, emi ongwunani, ni ema ba owa gye ungwogye mgbi Otsɛ yɔ, fɛ ewema na.
34 Inggisɛ mgbi ema ngwu enbwa dɔn yɔ, no gye ungwɔ kyɛ udɛ, ikyegbɛɛ onɔ ngwi ema wa kwakye yi eka ma no ka yɛɛ ungwɔ ikwɔ ofwoofwo ba mani. Ni ani di wa ba ta n ka tso ema ofɛ angbeka mbweele.