3
Mae hap de ol: Kristen zisi de nol gwibiridan hap, a kirekam de zisi em dam tasïk gwibin.
1 Ola an eiwa de tanganna: “Men nara Kristen zisi de nol gwibiridan hap dwam gwenna, zen sap syala dawem naka dwam gwibiꞌira.”
2 Hwëna zen diki enho kles gwesïn srëm naka de dam tasïnkïm.
We dan son zisi bëjen.
Zen diki aha zi de blikip gwesïblïn naka,
hen enlala tatete naka,
hen zënaka de zerinik gwe-gwen naka,
hen zisi de lup gulin gwen naka,
hen zisi de Alap mo olkam tawa ta gwibin nika.
3 Hen Kristen zisi de nol gwibiridan hap,
ho mamak otde gwen soson zini bëjen.
Darak soson zini hen bëjen.
Zen diki enlala sae-sae naka,
hen umlae enlala naka.
Hen te-ala hap de hole-hle gwe-gwen zisi bëjen dam tasïn.
4 Zen diki we wal walas zemka de dawemkam kara ta gwibin nika,
hen walas zemka de dawemkam tïtï ta gwibin nika– zen dikim zënaka i-san i-san gwe-gweblan hap hen blikip gwesïk gweblan hap.
5 Sap zi de dawemkam we wal walas zemka nol gwibiridan srëmna, kire zini bëjen dawemkam Kristen bose zemka nol gwibiridan.
6 Nër hom de Kristen gwen zini hen bëjen. Ki hwëna sa anakan bolte-bolte gwera, “Ëe an mamna.” Dowal mo kïgïna in kirekam bolte-bolte gwekake, zen in zep Alap hëp tyaka.
7 Zen diki kïtak de zi de sam gwesïblïn naka, sap hen Kristen srëm zi zen sam gwesïblïn. Hwëna sam gwesïblïn srëmkam, zen sa dowal mo kïgï mo zolak kyan hera. Ki hwëna ahakore nik sa swrë dal.
Mae hap de ol: Kristen zi mo tahasa de trï so gwizimdin hip de zini, a kire naka em dam tasïk gwibin.
8 Kristen zi mo tahasa de trï so gwizimdin hip de zini hen kirekam.
Zen hen diki tïngare zi mo sam gwesïblïn naka em dam tasïk gwibin.
Mahal dare syakna bëjen.
Hen ho mamak otde gwen soson zisi bëjen.
Hen te-alasa dikim gul irin hip de boton gwe-gwen zisi bëjen.
9 Zen diki ëngaya gwen hap de ol dawemna mensa Alap nëp hïl gïlzimki, desa zen enho lalakkam gwirensïn hen taïblïbin.
10 Kristen zi mo tahasa de trï so gwizimdin hip de zini na-en bahem totoresa dam tasïk gwibin. Diki nonol em akasibirida gwen. Mensa hla tanna, “An aïrïs,” dekam sap esa dam lasïk gwibir.
11 We walkam dena, Kristen zi mo tahasa de trï so gwizimdin hip de dam gulsunnu, zen hen diki tïngare zi mo sam gwesibin nika em dam tasïk gwibin.
Boton ol gol halasen gwenna bahem.
Zen diki enlala tatete naka
hen taïblïbin nika.
12 An ahana Kristen zi mo tahasa de trï so gwizimdin hip de zi hip dena:
Zen hen we dan son zisi bëjen.
Zen hen diki we wal walas zemka de dawemkam kara ta gwibin nika de dam tasibin.
13 Zen de dawemkam Alap mo syalak mas gwibirida gwenkam, zen dekam sa desa hen blikip neisibirida gwer. Hen dekam sa Kristus hup dena udobe naban donbirida gwer, hen dekam molya nasalsibirida gwek.
Mae hap de ol: Alap mes ol aning gunnu nëbe mae hap hïl gïlzimki.
14 Timotius Bak, suratna an ama ki sap ep ale gulbluꞌan, hwëna ëe ama tangan dwam gweꞌan– nabakam de sap emsa duweblazan hap.
15 Hwëna ëe de holo gwenkam, zen suratna ansa de karatda gunkum esa anakan tame gulu, “ËKristen gwen aya-wal oso-walya, zen diki kirekam de lowehe gwek.” Sap Ngaya Zini Alap mes eiwa de ola nëbe mae hap hïl gïlzimki. Zep auhu-kamanak de jematna, zen men kiye– gol tenya hen gol mokona, ola insa de zen moko gun hup.
16 Eiwa, ol aning gunnu mensa Alap nëp hïl gïlzimki, zen dawem tangaranna. Ola in nen dikim Alap hon ëtal gwesïn hïp dena. Zëno ausuna, zen kïtak Kristus Yesus onak lwaꞌan:
Zen zi timkim nwe-mase gwe zaka,
Alap mo Enhona man nëp Desa anakan zertreizimki, “An eiwa Zen tangan.”
Alap mo dam taha nakore zini man hen kara da nasen gwek.
Hwëna ki zep Alap zëre mo ngatannak dep zer ine halka.
Zëbe hap dena zi-ë zi-ë san mes nol haladak,
hen Desa de taïblïblan zini tïngare langnak ki lowehen daꞌan.