4
Dowal mo kïgïna kim Yesussu akasïblïkake:
(Mrk. 1:12-13; Luk. 4:1-13)
1 Alap mo Enhona ki zep Yesussu zi srëm lang san dep zersong gweka– zëwe dikim dowal mo kïgï akasïblïn hap.
2 Yaklana empat-pulu enkam Yesus tembane gwen srëmkam zëwe gwë gweka. Dekam usakna mes tangan sabak gweka.
3 Hwëna dowal mo kïgïna dekam zep zë gublu zaka, “Em san Alap mo Tanesa hom?– zebe usak naban gwëꞌaraye. Kasona ansa emki gublundan– roti hap de ëjowen hap.”
4 Yesus ki zep hwëna ding gulbluka, “Alap mo olak man lwak,
‘Zini tembane en nakon hom lowehe gwenan. Hwëna tïngare Alap mo ola mensa ësane gwe-gwenan, zen dekon hen ki lowehe gwenan.’ ”
5 Dekam zep hwëna dowal mo kïgïna in Yesussu owaskam Yerusalem san dep zersong gweka– ëna mensa Alap orep Israelk de zi hip dam tasizimki, zëre hap de gol yawalsa de zë taun hup. Zao zep dowal mo kïgïna in Alap mo gol bolak drëne seka.
6 Dekon zep etan gubluka, “Em san Alap mo Tanesa hom?– ki emki heya gwe inen. Sap Alap mo olak ebe hap dena anakan lwak,
‘Alap zëre mo dam taha nakore zisi sa emsa de dawem enkam kara ta gwen hap gubiridala.
Zëno mae mo taha tere san esa tënda gwera, zep em molye ba karek maena goltoweka.’
Zep em san ema Alap mo ola insa taïblïbiꞌira? Ki emki heya gwe inen.”
7 Yesus ki zep hwëna ding gulbluka, “Alap mo olak man hen lwak,
‘Bian Alapsa totoresa bahem anakare hap akasïblïn, “Wëhë asa mas gweblaꞌanka?” ’ ”
8 Hwëna etan dekon ki zep Yesussu owaskam kwatap yawal san dep zersong gweka. Dekon zep tïngare auhu-kamanak de ïrïk gïnnï ansa goltrëblaka– hëndep zëwe de kire-kire dawem naban.
9 Zao zep etan gubluka, “Insa ki hlauluda, ëe asa ebe hap kïtak tapbla gulblul– em de hwëna bi gwibin hip. Hwëna nonol bokle kom soblan naban em asa boltere tan.”
10 Yesus ki zep jala ban ding gulbluka, “Zi Golliwe Bak, em song gwen! Sap Alap mo olak man lwak,
‘Bian Alap ensa em boklena kom so gweblan,
hen Desa en em blikip gwesïk gweblan.’ ”
11 Hëndep ki zep dowal mo kïgïna in Yesussu hli ta guk halka. Hwëna Alap mo dam taha nakore zini dekam zep tembanekam mas nëblazak.
Yesus kim Galileak syala kon gwesibir hanakake:
(Mrk. 1:14-15; Luk. 4:14-15)
12 Yesus kim salka, “Yohanissi mes bwinak se dyaink,” dekam zep Galilea san ahulsuk halka.
13 Dekam Zen hom zëre mo ëna Nazaret gwëka. Zen hwëna Kapernaumk gwë gweka– Ho Gutuna Galilea mo alpnak, Zebulon ne Naftali nik mo zi ausu mo langnak.
14 Yesus insa zao gwëka, zen Alap mo dwam gwibin sin ki lwak– dekam de Yesaya Bak mo hamal hap de ol ayang gunnuk zaun hup, mensa anakan ayang gulkuke,
15 “Em in zene Zebulon ne Naftali nik mo ausu nakore zini lowe heꞌan,
hen Ho Gutuna Galilea mo ora alp san de wenya,
sap weyana Yordan mo men eihyanak de wenya,
hëndep Yahudi srëm zi ausu nakore zini men zen langna Galileak hen lowehe gwenan:
16 Em in zene angkam kawesïnnïk lowehe gweꞌan,
hwëna em esa sërkam de ngatan yawalsa hla kul.
Em in zene juwen zi mo lang kawesïnnïk lowehe gwenan,
hwëna ebon mae onak sa ngatanna yakla nwe de hata sezan makan emsa zïlsïbirida zala.”
17 Zep Yesus in kim Kapernaumk gwë gweka, dekam zep zë hëndep tawa tabinkim kon gwesibir hanaꞌanka. Man zë gubirida gweka, “Ere mae mo karek-karek nakon em ëhalen, sap Alap Zëna angkam man kon gwesïk hanaꞌara– teipsïnkïm de nësa ïrïk gïnkïmye.”
Yesus kim hogwe tahyo gwen zini empat enkam zëre hon de ang ta gwen hap kwang guluda kïnïkake:
(Mrk. 1:16-20; Luk. 5:1-11)
18 Yesus kim Ho Gutuna Galilea mo alp san gwë haꞌanka, dekam zep zë hogwe tahyo gwen zi darena akeꞌanka. Ahana Simon– men desa hen “Petrus”kum nen gweblanan, oso zem Andreas han. Ho gutunak iwe hogwesa jalakam zertahyoꞌanka.
19 Yesus ki zep zë guzim zika, “Asa em ang ëblan. Ëe asa emsa zisi de hwëna lahyo gwen hap tawa sol.”
20 Dekam zep hëndep jalana insa hli koso guk halka– Yesussu dikim hwëna ang ëblan hap.
21 Dekon kim deban zisong gweka, dekam zep etan aha zi darena akeꞌanka. Zen hen oso zeban zergwëꞌanka. Zen Yakobus ne Yohanis ne– Zebedeus Bak mo walas dare. Zen bi zik zëre mo bul tahannak zinikinꞌinka, jalasa zë zioto tasibiꞌinka. Zao zep hen desa kirekam guzim zika.
22 Zen hen zao zep hëndep bulu insa hli kulki, hen bi zemka zëwe hli laka. Zëna dekam zep hen Yesussu ang ëblaka.
Yesus kim tawa tabir song gwekake hen zi sang-sangna kim dawem tabir song gwekake:
(Luk. 6:17-19)
23 Yesus dekam zep tïngare Galilea mo langnak de ë-ëna zëre hon de ang ta gwen wenya in han ziamjanbir song gweka, hen zëwe Yahudi mo but srëm gol-gol san tawa tabir song gweka. Zen Alap Zën de ïrïk gïn hïp de ol dawemkam tawa tabir song gweka, hen kirekam-kirekam zi sang-sangsa dawem tabir song gweka.
24 Galilea kon kim Yesus hup de ola insa tïngare Siria mo lang san nol haladak, dekam zep zi beyam-byana kirekam-kirekam sang-sang karek nabare wenya nolëyaïng gwe-gwezak. Sap dowal mo tïlbiridanna, hen ëtïlsïn-tïlsïn wenya, hen taha-tana teisya inen srëm wenya, desa kïtak nolëyaïng gwe-gwezak. Hen Yesus dekam zep kïtak dawem ta gwibirki.
25 Dekam zini beya tangan nik zep Yesussu ang në gweblak. Ahakon Galilea korena, ahakon lang bosena Ëna Dare Taha-tap korena, hen ahakon tïngare Yerusalem mo lang nakorena, hëndep ahakon weyana Yordan mo men eihya nakorena.