3
Mae hap de ol: Alap mo Tanena in, Zen Musa Bak onakon teipsïn tanganna.
1 Zen in zep, aya-wal oso-wal, sap nësa mes Alap hlïl inki– zëre onak de enho lalak enkam lowehe gwen hapye, zep nen dawem enkam Yesussu tame tan. Sap nen ema zëbe hap dena damnak anakan ëgu gweꞌan, “Zen Alap zer soneka, hen nëbe mae hap Zen mes nwe-mase gweka– Alap mo golak de syal tan zi mo Teipsïn Tanganna.”
2 Sap Zen Alap zëre mo taïblïblan tanganna, zen zep Alap syala in hap dam tasïkï– men kirekam hen orep Musa Baksa taïblïblakake, zen de Alap zëre mo nga yala Israelsa syal gwe-gweblan hap.
3-6 Zep teipsïnnï nonol sap Alap Zën, zao Yesus, zao Musa. 4Hwëna men zen tangan kïtak bi gwibiꞌira, Zen Alap Zën. Zen Zen nga yala insa bi gweblaꞌara, hen kama bi tanganna Zen. 5Musa Bak zen hwëna Bi Tangan Zini in hon de syal gwe-gwen zi. Zen hen taïblïblan tanganna, zep dawemkam Alap zëre mo dwam gwibin sin zëre mo ngana insa syal gweblaka. Hen zëre mo syala kon ngein sin dep dena anakan goltrei gwizimki, “Abon onakore teipsïn zini sa hata zala.” 3bZep Yesus, Zen Musa onakon teipsïn tangaranna, 3a,6asap Zen bi tangan Zini in mo Walas tangan, hen Alap mes Desa Zen de hëndep denaban ngana insa kara ta gwen hap taïblïblaka. 6bZep nen an eiwa Kristus mo nga– nen de aïrïn srëmkam Zëbon en anakarekam ëblol gwe-gwenkamye, “Zen sa kïtak nëbe mae hap syal gwe-gwibir-zimdi.”
Mae hap de ol: Bap nen Alapsa de taïblïblanna baes tan.
7 Zen zep Alap mo Enhona nësa gubiridaꞌara,
“Namen de yaklanak Alap zëre mo olsa em i-san i-san gwe-gwibin.
8 Bahem ere mae mo auyan-aza mo kim ënol drak-drak gwe-gwen–
zen men kirekam sasa lang nakon Abon onakon de te so gwen hap ëasas gwe-gwekke.
Zen dekam zep anakarekam Asa nakasïk gweblak, ‘Alap wëhë nësa karek tabiꞌinka?’
9 Eno mae mo auyan-azana sap mes hla nul gwek–
owas-owasna mensaë empat-pulu tahunkam syal gwe-gwibir-zimkye.
Hwëna zen nama dekam Asa kareksa de gulin halasen gwenkam nakasïk gweblak.
10 Zen in zebë tangan hëndep blalen gwibiridak,
zebë anakan gubiridak,
‘Zen molya etan Abon osan dep lwanda halzak,
sap Asa de i-san i-san gweblanna mes tangan baes tak.’
11 Zen in zebë desa jala ban anakan gu-gubiridak,
‘Mensa langna zao de golëteinikirin hip gu-gubirida guk,
zen hwëna toton molya zë yaïng gwek.’ ”
12 Zen in zep, aya-wal oso-wal, dawem! Bap nen Israel mo kim ëgwën. Em ema ahakore nik Ngaya Zini Alapsa hli lanank– dekam de ere mae mo enho karek lam tan san ang tan hap. Ki hwëna dekam esa Zënaka de taïblïblan nakon ëbutehal gwer.
13 Zep emsa de ahanaka karek ora san dep yasik tan srëm hap, emki enaka yakla jamkam tïtï ta gwibin. Sap Alap mo olak men anakan lwak:
“Namen de yaklanak Alap zëre mo olsa em i-san i-san gwe-gwibin.”
“Namen de yakla”kam mensa guku, zëno enlalana, nen de yakla jamkam nënaka tïtï ta gwibin hip. Sap kire srëmkam, ki nëre mae mo karekna in zen sa nëp dërek gwe-gwizim, hëndep zen sa nësa al tasibir. Zep esa hëndep ënol drak-drak gwer, hëndep dekam esa Alapsa langa lasïl.
14 Hwëna nëne Alapsa de taïblïblannak tatem ëzauk gweꞌak, men kire enkam nonol lone sennak laïblïblakke, nen dekam esa aumwa hap de yaklanak, mensa Kristus nëbe mae hap hamal gulzimki, desa kïtak ulin.
15 Zep nen bap nen Alap mo ola insa eititi gwe-gwibin– men zen anakan lwakye,
“Namen de yaklanak Alap zëre mo olsa em i-san i-san gwe-gwibin.
Bahem ere mae mo auyan-aza mo kim ënol drak-drak gwe-gwen–
zen men kirekam Abon onakon de te so gwen hap ëasas gwe-gwekye.”
16 Zen kirekam banakare zi? Zen sap dwan zëre mae mo ikim am Alap mo ola ësane gwe-gwek! Zen hwëna ba hap etan zëre onakon de wet so gwen hap ëasas gwe-gwek? Zen men sap Musa Bak Mesir kon gwiswe soneka!
17 Hen zen banakare zisi Alap empat-pulu tahun enkam jal gwibirida gweka? Zen sap Israel mo auyan-azana– men zen karekna nulin halasen gwekke. Hëndep zep zëre mae mo tok-tokna hli nulida song gwek– sasa lang san kim sek gwe song gweꞌan zakye.
18 Hen zen banakare zisi Alap anakan gu-gubiridaka?–
“Mensa langna zao de golëteinikirin hip gu-gubirida guk,
zen hwëna toton molya zë yaïng gwek.”
Zen men zen Alapsa de taïblïblan hap baes takke.
19 Zep angkam mes tangan dam gwesïnïn: Zen mae hap Alap mo golëteinikirin langnak yaïng gwe srëm gwek: Sap zen hom Zënaka daïblïblak.