10
Iesude 72 Le Namarikdarda
mizmiz 10 nosik 1-20
1 Keubu, Oplelut wader 72 le etakri a yabi namarikdarda bakiauda bausi neis neis nakasirweretlare gair au utebge, a gair kebi utebge ge nade Iesu tababu ikasereder able utebge le darasmerlare.
2 Iesude yabi daratagerda, “Aukaka nur pe abi epe kepkep dorgele uridli ko lewer waitgare. Wa Ople damsawem erkepasamu, e lukemle dali nurira, ya wayakai e wader dorgele ko wataramarkare abra nur waditkimdare.
3 Wa bakiaware! Kaka wabi damarkeda bakiaware baus a wa ya nole aseseredlekak urder mokakalam mamoi waurder yabidoge aregareg eburge.
4 Wa nole bakir aisawem lugarapem, nole epeikak, a nole tetergablukak. Wa nole gabge bakowa le mir daratagrawem.
5 Nade wa metage barotwa wage kikem detkartawem, “Mapodan gairleem muige able metage.”
6 Ese able lelut mapodan lag waikerer ge wadawer, wabi mapodanira werkab ya abidoge wadawer. Ese able lelut nole mapodan lag waikerer, wage waba werkab ko abialam adem ikadarawem.
7 Wa no ge able netat metage uridwa. Erwawem a iriawem nalu lu wi wabi wadaiswerawem, ableglam dorgele e sikak dali tabara bodomalam wairep. Ese wa bakiawawem nerut metalam nerut metaem, wage ko tabakomeretwa able metaem nade ya wa urder.
8 Nade wa bakiawawem muige able utebge, able legize wabi wadirpawem, wi wabi lewer wadaiswerawem wage erwawem.
9 Wa gimgim le ge nadgirawem able utebge, a able le ge daratagrawem, “Kotor Basalaya pe tabakiamuda wabim maikem.”
10 Ese wa bakiawawem nerut utebge barotwa, a legize nole wabi wadirpawem, wage ko adem bakiawawem gabge bauswa a wage detautawem,
11 “Kiki wabi utebira pi kerbi teterlam adem etkaperdeda ko waba sirip obarkare. Agekar Agudira Basalaya pe tabakiamuda wabim maikem.”
12 Kaka wabi detagreda, Keub Gergerge, Agudira omar pe aukakale ikeredi witwit leem Sodomira ya abra omar wadikereder leem able utebira.
13 Wai Korazin! Wai Betsaida! Wabi legize ya asiasi wadigiare! Ese able etamilam ge bakerda muige wabidoge eipuge ge bakerda muige Tayage a Saidonge able le pe turidli wi no obamri tabara okasosok wali wamida a tababu tibiu obatimwareda ko merbi waditomerteda wi taba witlam tabatareda!
14 Keub Gergerge Agudira omar ya Taya a Saidon leem aukakale waikereder ya abra omar wabi leem wadikereder.
15 Marim Kapanam! Nako ma laglag nali mari kotorem nagisrare? Mari ya adem wataratimdare Asiasi Utebem!”
16 Iesude eudige tabara memegle daratagerda, “Netide wabi wadasorlare wi kari ko wanasorlare. Netide wabi detwakeda wipe kari ko natwakeda. Netide kari natwakli epe Agudi ko detwakli ge kari taramarikda.”
72 Le Tabakomerti
17 Nade able 72 le tabakomerti wige au sererge urder. Wi detautlare, “Ople keriba aukaka sasrim nagri able demonide ko kerbi dasreda nade ki mari neige ki yabi au kelarkelar daratagreda!”
18 Iesude eudige yabi nakerda, “Ka Satanai geka dasmerer e takesmeri kotorlam mokakalam perper.
19 Wa asrare! Ka wabi kelar daiswerda ya wayakai wa umele wabi teteru tabo a bokani daraskimelare, a wader sasrimsasrim lu pa Kurablera daragriwerteda, a umerkak wabi nalugide ya wabi wadireslare.
20 Wa nole sererge uridwa ableglam wabi adud lamargize wabi dasorlare. Wa sererge uridwa ableglam waba nei inoko kotorge taraisirwerteda.
Samarialera Ad Abisir Mir Ge Iudayale Upiditidarer
mizmiz 10 nosik 25-37
25 Netat kerkerge, able Gelar Erwerle ekweilu laglag Iesui wadamisri taba miru. Able kimiaret eudige Iesui itmeri, “Erwerle, ka nalu lu akailu ya wayakai ka niai idid tarpeilu?”
26 Ege Iesude abi detagri, “Nalu lu pe naisirwerteda muige Gelar Ziawalige? Ma nalu waitager able ziawalilam?”
27 Ege abi able kimiaride ikaidari, “Ma omarge mara Ople mara Agud ikerwa kemerkemer mari nerkepu, a kemerkemer mari lamaru, a kemerkemer mari kelaru, a kemerkemer mari idoniu” a “Ma omarge mara le maikes maridoge able orwairorwair mokakalam ma mabu omarge bakeli”.
28 Ege Iesude abi ikaidari, “Ma nalu pema kari detagri e barkak dikeredi. Ese ma mena able lu ikerer ma ya mena idid nawer.”
29 Ege able kimiar dawer tababu obakaida aukaka wadali gair legize abi wadasmereda, e Iesui ga itmeri, “Kara nete le dali maikes karidoge?”
30 Iesude abi detagri, “Nade able le bakiamuda Ierusalemaem Zerikolam, abi wader erwamlegize erpeidarda gair lu abi adem etkamerda, a abi eresa. Nade wi abi dikaireta gab dege, e maike weumida.
31 Ege Iudaya merkem ko tikasireder able gabge. Nade e tabakiamuda able kimiar erdari ege no bakiamuda able gabge nerut pekge.
32 Able orwairorwair merkemira upiatidarle ga tidikasereder. E ko tabakiamuda able utebge osmeda, e able kimiar erdari e ko no bakiamuda nerut pekge able gabge.
33 Samariale e ga tikasireder, abra mimi tidikereder taba able utebge osmeda nade ge able kimiar dawer. Nade ge abi Samarialelut erdari ege abra aukaka nas abim barki.
34 E bakiamuda abi erdari ege waina a wakaiso napaiterdi abi zizge a able ziz bad amer wali mogu irpi, keubu ga able kimiaride abi ikaidari taba eburge igimudari ya able eburgize le wanaiseda. Ege abi igardi able metage ya nade wi le wanaseserdeda. E abi ge able metage imridari.
35 Nerut gergerge e able meta aseseredle neis zoromzorom bakir nakwari a abi detagri, “Ma able kimiar aseseredwa. Ka nade yaka tarakomeilu ka mari yaka koka bodomalam nakailu ese ma ya nalu lu abim ikerer.”
36 Iesude eudige detauti, “Maridoge pe nako dikeredi, nete yabialam able neis a netat le ge maikesle dawer able kimiarira ge abi erwamlegize eresa?”
37 Ege eudige able Gelar Erwerle akaidari Iesui ikaidari, “Able kimiaride ge abi nasdigari.” Ege eudige Iesu akaidari abi detagri, “Ma bakiamu eosmer ma ge mara omar ikai wader leem aukakale obai mokakalam able kimiarira aukaka omar dikeredi wader leem.”
Iesu, Mata A Maria
mizmiz 10 nosik 38-42
38 Nade Iesu a abra memegle yaba mimi mena kei ikereder, Iesu bakiamuda able utebge nade ge able koskir dawer abra nei dikereder Mata, ge e Iesui dabgeri taba metaem.
39 Matara nerut berbet dawer abra nei dikereder Maria, e sepge imireder Iesura mir dasrer.
40 Mata nole ge tadawer Mariaidoge ablelam e baugwater mitkar lu dararsirlare. E eudige akaida Iesui ikaidari, “Ople, nako mama dikepwali e seksek dikeredi kari berbetide nakairti paka tebteb nali nole upiatidarkak mitkar dorge kaka ikeli? Ma abi detager e watabakamu kari upiwanati!”
41 Ege Oplelut abi ikaidari, “Mata! Mata! Mama au sagim digili a au mitkar lugize mari nausakeda.
42 No netat barkak lu ikeredi ma ikerer: Mariade emetu itutida able netat barkak lu, a ei umerkak ya adem obakau abialam.”