16
Mǝdⱨiyǝ oⱪux, bǝht tilǝx
1 Ular Hudaning ǝⱨdǝ sanduⱪini kɵtürüp kirip Dawut uningƣa ⱨazirlap ⱪoyƣan qedirning otturisiƣa ⱪoyup, andin Hudaning aldida kɵydürmǝ ⱪurbanliⱪ bilǝn inaⱪliⱪ ⱪurbanliⱪi sundi.
2 Dawut kɵydürmǝ ⱪurbanliⱪi bilǝn inaⱪliⱪ ⱪurbanliⱪi sunup bolƣandin keyin Pǝrwǝrdigarning namida hǝlⱪⱪǝ bǝht tilidi.
3 U yǝnǝ ǝr-ayal demǝy Israillarning ⱨǝr birigǝ birdin nan, birdin horma poxkili, birdin üzüm poxkili ülǝxtürüp bǝrdi.
Lawiylarning ǝⱨdǝ sanduⱪi aldidiki wǝzipiliri
4 Dawut bir ⱪisim Lawiylarƣa Pǝrwǝrdigarning ǝⱨdǝ sanduⱪi aldida hizmǝttǝ bolux, yǝni dua-tilawǝt oⱪux, Israilning Hudasi Pǝrwǝrdigarƣa tǝxǝkkür-rǝⱨmǝt eytix wǝ küy-munajat oⱪuxni buyrudi.
5 Ularning yolbaxqisi bolsa Asaf, andin Zǝkǝriya idi; baxⱪiliri bolsa Jǝiyǝl, Xemiramot, Yǝⱨiyǝl, Mattitiyaⱨ, Eliab, Binaya, Obǝd-Edom wǝ Jǝiyǝllǝr idi. Ular tǝmbur-qiltar qelixⱪa ⱪoyuldi; Asaf bolsa qanglarni qalatti.
6 Binaya bilǝn Yaⱨaziyǝldin ibarǝt ikki kaⱨin Hudaning ǝⱨdǝ sanduⱪi aldida ⱨǝrdaim kanay qelixⱪa ⱪoyuldi.
Dawutning Pǝrwǝrdigarƣa Ⱨǝmdusana oⱪuƣan küyi
7 Xu küni Dawut Asaf wǝ ⱪerindaxlirini Pǝrwǝrdigarƣa tǝxǝkkür-rǝⱨmǝt eytixⱪa bǝlgilǝp ularƣa birinqidin munu küyni tapxurdi: —
8 «Pǝrwǝrdigarƣa tǝxǝkkür ⱪilinglar,
Uning namini qaⱪirip nida ⱪilinglar,
Uning ⱪilƣanlirini ǝllǝr arisida ayan ⱪilinglar!
9 Uningƣa nahxilar eytip, Uni küylǝnglar,
Uning pütkül karamǝt mɵjiziliri üstidǝ seƣinip oylininglar.
10 Muⱪǝddǝs namidin pǝhirlinip danglanglar,
Pǝrwǝrdigarni izdigüqilǝrning kɵngli xadlansun!
11 Pǝrwǝrdigarni wǝ Uning ⱪudritini izdǝnglar,
Uning yüz-ⱨuzurini tohtimay izdǝnglar.
12 Uning yaratⱪan mɵjizilirini,
Karamǝt alamǝtlirini ⱨǝm aƣzidin qiⱪⱪan ⱨɵkümlirini ǝstǝ tutunglar,
13 I uning ⱪuli Israilning nǝsli,
Ɵzi talliƣanliri, Yaⱪupning oƣulliri!
14 U, Pǝrwǝrdigar — Hudayimiz,
Uning ⱨɵkümliri pütkül yǝr yüzididur.
15 U Ɵzi tüzgǝn ǝⱨdini ǝbǝdiy yadinglarda tutunglar —
— Bu uning ming ǝwladⱪiqǝ wǝdilǝxkǝn sɵzidur —
16 Ibraⱨim bilǝn tüzgǝn ǝⱨdisi,
Yǝni Isⱨaⱪⱪa iqkǝn ⱪǝsimidur.
17 U buni Yaⱪupⱪimu nizam dǝp jǝzmlǝxtürdi,
Israilƣa ǝbǝdiy ǝⱨdǝ ⱪilip berip: —
18 «Sanga Ⱪanaan zeminini berimǝn,
Uni mirasing bolƣan nesiwǝng ⱪilimǝn» — dedi.
19 U qaƣda silǝr ajiz idinglar, adiminglar az ⱨǝm u yǝrdǝ musapir idinglar;
20 Bu ǝldin u ǝlgǝ, bir ⱪǝbilidin yǝnǝ bir ⱪǝbiligǝ kɵqüp yürgǝn.
21 Pǝrwǝrdigar ⱨǝrⱪandaⱪ adǝmning ularni bozǝk ⱪilixiƣa yol ⱪoymidi,
Ularni dǝp padixaⱨlarƣimu tǝnbiⱨ berip: —
22 «Mǝn mǝsiⱨ ⱪilƣanlarƣa tǝgmǝ,
Pǝyƣǝmbǝrlirimgǝ yaman ix ⱪilma!» — dedi.
23 Pütün jaⱨan, Pǝrwǝrdigarni küylǝnglar,
Nijatini ⱨǝr küni elan ⱪilinglar!
24 Uning julasini ǝllǝrdǝ bayan ⱪilinglar,
Uning mɵjizilirini barliⱪ hǝlⱪlǝr arisida jakarlanglar.
25 Qünki Pǝrwǝrdigarimiz uluƣdur,
Zor ⱨǝmdusanaƣa layiⱪtur;
U barliⱪ ilaⱨlardin üstün, Uningdin ⱪorⱪux kerǝktur;
26 Qünki barliⱪ ǝllǝrning ilaⱨliri — butlar halas,
Biraⱪ Pǝrwǝrdigar asman-pǝlǝkni yaratⱪandur.
27 Xanuxǝwkǝt wǝ ⱨǝywǝt Uning aldida,
Ⱪudrǝt wǝ huxluⱪ Uning jayididur.
28 Pǝrwǝrdigarƣa tǝǝlluⱪini bǝrgǝysilǝr, i ǝl-ⱪǝbililǝr,
Pǝrwǝrdigarƣa xan-xǝrǝp wǝ ⱪudrǝtni bǝrgǝysilǝr!
29 Pǝrwǝrdigarning namiƣa layiⱪ bolƣan xan-xɵⱨrǝtni Uningƣa bǝrgǝysilǝr;
Sowƣa-salam elip Uning aldiƣa kiringlar,
Pǝrwǝrdigarƣa pak-muⱪǝddǝslikning güzǝllikidǝ sǝjdǝ ⱪilinglar;
30 Pütkül yǝr-yüzi, Uning aldida titrǝnglar!
Dunya mǝzmut ⱪilinƣan, u tǝwrǝnmǝs ǝsla.
31 Asmanlar xadlansun, wǝ yǝr-jaⱨan hux bolsun,
Əllǝr arisida elan ⱪilinsun: —
«Pǝrwǝrdigar ⱨɵküm süridu!».
32 Dengiz-okyan wǝ uningƣa tolƣan ⱨǝmmǝ quⱪan selip jux ursun!
Dalilar ⱨǝm ulardiki ⱨǝmmǝ yayrisun!
33 U qaƣda ormandiki pütkül dǝrǝhlǝr Pǝrwǝrdigar aldida yangritip nahxa eytidu;
Qünki mana, U pütün jaⱨanni soraⱪ ⱪilixⱪa kelidu!
34 Pǝrwǝrdigarƣa tǝxǝkkür eytinglar!
Qünki U meⱨribandur,
Əbǝdiydur Uning meⱨir-muⱨǝbbiti.
35 Wǝ: Bizni ⱪutⱪuzƣin, i nijatimiz bolƣan Huda!
Bizni yeningƣa yiƣiwalƣaysǝn,
Muⱪǝddǝs namingƣa tǝxǝkkür ⱪilixⱪa,
Yayrap Seni mǝdⱨiyilǝxkǝ,
Bizni ǝllǝrdin ⱪutⱪuzup qiⱪⱪaysǝn! — dǝnglar!
36 Israilning Hudasi bolƣan Pǝrwǝrdigarƣa,
Əzǝldin ta ǝbǝdgiqǝ tǝxǝkkür-mǝdⱨiyǝ ⱪayturulsun!
Pütkül hǝlⱪ «Amin!» dedi ⱨǝmdǝ Pǝrwǝrdigarƣa ⱨǝmdusana oⱪuxti.
Ibadǝt qediridiki baxⱪa wǝzipilǝr
37 Dawut xu yǝrdǝ, yǝni Pǝrwǝrdigarning ǝⱨdǝ sanduⱪi aldida ⱨǝr kündiki wǝzipigǝ muwapiⱪ, ǝⱨdǝ sanduⱪi aldidiki hizmǝttǝ dawamliⱪ boluxⱪa Asaf bilǝn uning ⱪerindaxlirini ⱪaldurup ⱪoydi;
38 Ularning iqidǝ Obǝd-Edom bilǝn uning ⱪerindaxliridin atmix sǝkkiz kixi bar idi; xuningdǝk Yǝdutunning oƣli Obǝd-Edom bilǝn Hosaⱨ dǝrwaziwǝnlikkǝ ⱪoyuldi.
39 Kaⱨin Zadok bilǝn uning kaⱨin ⱪerindaxliri Gibeon egizlikidiki Pǝrwǝrdigarning qediri aldida,
40 Pǝrwǝrdigarning Israilƣa tapiliƣan ⱪanun-ǝⱨkamlirida barliⱪ yezilƣini boyiqǝ, ⱨǝrküni ǝtisi-ahximi kɵydürmǝ ⱪurbanliⱪ ⱪurbangaⱨi üstidǝ Pǝrwǝrdigarƣa atap kɵydürmǝ ⱪurbanliⱪlarni sunuxⱪa ⱪoyuldi.
41 Ular bilǝn billǝ bolƣanlar, yǝni Ⱨeman, Yǝdutun wǝ ⱪalƣan tallanƣanlar, xundaⱪla barliⱪ ismi tizilƣanlar Pǝrwǝrdigarƣa tǝxǝkkür-rǝⱨmǝt eytixⱪa ⱪoyuldi (qünki Uning ɵzgǝrmǝs muⱨǝbbiti ǝbǝdgiqidur!).
42 Ⱨeman wǝ Yǝdutun bolsa nǝƣmiqilikkǝ, jümlidin kanay, jang-jang wǝ barliⱪ mǝdⱨiyǝ sazlirini qelixⱪa mǝs’ul ⱪilindi. Yǝdutunning oƣulliri dǝrwaziƣa ⱪaraxⱪa ⱪoyuldi.
43 Bu ixlardin keyin barliⱪ hǝlⱪ ɵz ɵylirigǝ ⱪaytixti; Dawutmu ɵz ɵyidikilǝrgǝ bǝht tilǝxkǝ ⱪaytti.