90
Tɵtinqi bɵlüm •••• 90-küy •••• Ⱨayatni ⱪǝdirlǝydiƣan danaliⱪ
1 Hudaning adimi bolƣan Musaning duasi: —
Ya Rǝbbim,
Sǝn barliⱪ dǝwrdǝ bizgǝ makan bolup keliwatisǝn;
2 Taƣlar wujudⱪa kǝlmǝstin burun,
Sǝn yǝr wǝ alǝmni xǝkillǝndürmǝstin burun,
Əzǝldin ǝbǝdgiqǝ Tǝngridursǝn.
3 Sǝn insanni tupraⱪⱪa aylandurup: —
«Ⱨǝy, insan baliliri, ⱪaytinglar!» — dǝysǝn.
4 Mana, Sening nǝziringdǝ ming yil —
Ɵtüp kǝtkǝn tünügünki bir kün,
Tündiki bir jesǝktur, halas.
5 Sǝn adǝmlǝrni su taxⱪinidǝk elip ketisǝn,
Ular ɵtüp kǝtkǝn bir uyⱪudǝk,
Tang sǝⱨǝrdǝ ünüp qiⱪⱪan ot-qɵpkǝ ohxaydu —
6 Ətigǝndǝ ular kɵkirip ünidu,
Keqisi bolsa kesilip, solixip ketǝr.
7 Qünki biz ƣǝziping bilǝn yoⱪaymiz,
Ⱪǝⱨring bilǝn dǝkkǝ-dükkidǝ ⱪalimiz.
8 Sǝn ⱪǝbiⱨliklirimizni kɵz aldingƣa,
Yoxurun ⱪilmixlirimizni jamalingning nuri aldiƣa ⱪoydung.
9 Barliⱪ künlirimiz dǝrƣǝziping astida ɵtüp ketidu,
Yillirimizni bir uⱨ tartix bilǝnla tügitimiz.
10 Ɵmrimizning yilliri yǝtmix yil,
Maƣdurimiz bar bolsa sǝksǝn yil;
Biraⱪ ularning pǝhri japa wǝ biⱨudiliktur;
Ⱨayat tezlik bilǝn üzǝr,
Mana, biz uqup kǝttuⱪ.
11 Sanga bolƣan ⱨɵrmǝt-ǝyminixning az-kɵplükigǝ ⱪarap ⱨesablinidiƣan,
Aqqiⱪingning xidditini kim bilsun?
12 Xunga kɵnglimizni danaliⱪⱪa ⱪoyuximiz üqün,
Künlirimizni sanaxni bizgǝ ɵgǝtkǝysǝn!
13 Yenimizƣa ⱪaytⱪaysǝn, i Pǝrwǝrdigar, Seni ⱪaqanƣiqǝ...?!
Ⱪulliringƣa rǝⱨim ⱪilƣaysǝn!
14 Bizni ǝtigǝndǝ ɵzgǝrmǝs muⱨǝbbiting bilǝn ⱪandurƣaysǝn;
Undaⱪta barliⱪ künlirimizdǝ küylǝrni yangritip xadlinimiz.
15 Sǝn bizni japaƣa qɵmgǝn künlǝrgǝ asasǝn,
Külpǝtni kɵrgǝn yillirimizƣa asasǝn yǝnǝ hursǝn ⱪilƣin!
16 Uluƣ ixliring ⱪulliringƣa kɵrüngǝy,
Xanu-xǝwkiting ularning oƣulliriƣimu axkara bolƣay!
17 Pǝrwǝrdigar Hudayimizning xerin mǝrⱨǝmiti üstimizdǝ bolƣay,
Ⱪolimizning ixlirini üstimizgǝ bǝrikǝtlik ⱪilƣaysǝn,
Bǝrⱨǝⱪ, ⱪolimizning ixlirini bǝrikǝtlik ⱪilƣaysǝn!