37
37-küy •••• Yahxilar bilǝn yamanlarning tǝⱪdiri •••• «elipbǝ tǝrtiplik» küy
1 Dawut yazƣan küy: —
|א| Yamanliⱪ ⱪilƣuqilar tüpǝylidin ɵzüngni kɵydürmǝ,
Nakǝslǝrgǝ ⱨǝsǝt ⱪilma.
2 Qünki ular ot-qɵplǝrdǝk tezla üzüp taxlinidu,
Yumran ɵsümlüklǝrgǝ ohxax tozup ketidu.
3 |ב| Pǝrwǝrdigarƣa tayan, tirixip yahxiliⱪ ⱪil,
Zeminda makanlixip yaxap, Uning wapa-ⱨǝⱪiⱪitini ozuⱪ bilip ⱨuzurlan.
4 «Pǝrwǝrdigarni hursǝnlikim» dǝp bilgin,
U arzu-tilǝkliringgǝ yǝtküzidu.
5 |ג| Yolungni Pǝrwǝrdigarƣa amanǝt ⱪil;
Uningƣa tayan, U qoⱪum tilikingni ijabǝt ⱪilidu.
6 |ד| U ⱨǝⱪⱪaniyliⱪingni nurdǝk,
Adalitingni qüxtiki ⱪuyaxtǝk qaⱪnitidu.
7 |ד| Pǝrwǝrdigarning aldida tinq bolup, Uni sǝwrqanliⱪ bilǝn küt;
Ⱨaramdin ronaⱪ tapⱪan adǝm tüpǝylidin,
Yaman niyǝtliri ixⱪa axidiƣan kixi tüpǝylidin ɵzüngni kɵydürmǝ.
8 |ה| Aqqiⱪingdin yan, ƣǝzǝptin ⱪayt,
Ɵzüngni kɵydürmǝ;
U pǝⱪǝt seni yamanliⱪⱪa elip baridu.
9 Qünki yamanliⱪ ⱪilƣuqilar zemindin üzüp taxlinidu;
Pǝrwǝrdigarƣa tǝlmürüp kütkǝnlǝr bolsa,
Zeminƣa igidarqiliⱪ ⱪilidu.
10 |ו|: Kɵzni yumup aqⱪuqila, rǝzil adǝm ⱨalak bolidu;
Uning makaniƣa sǝpselip ⱪarisang, u yoⱪ bolidu.
11 Biraⱪ yawax-mɵminlǝr zeminƣa mirasliⱪ ⱪilidu,
Wǝ qǝksiz arambǝhxliktin ⱨuzurlinidu.
12 |ז| Rǝzil adǝm ⱨǝⱪⱪaniyƣa ⱪǝst ⱪilidu;
Uningƣa qixlirini ƣuqurlitip hiris ⱪilidu;
13 Lekin Rǝb uningƣa ⱪarap külidu;
Qünki Rǝb uning bexiƣa kelidiƣan künni kɵridu.
14 |ח| Yawaxlar wǝ yoⱪsullarni yiⱪitix üqün,
Yoli duruslarni ⱪirip taxlax üqün,
Rǝzillǝr ⱪiliqini ƣilipidin suƣurup elip,
Oⱪyasining kiriqini tartip tǝyyarlidi.
15 Lekin ⱪiliqi bolsa ɵz yürikigǝ sanjilidu,
Oⱪyaliri sunduruwetilidu.
16 |ט| Ⱨǝⱪⱪaniylardiki «az»,
Kɵpligǝn yamanlarning bayliⱪliridin ǝwzǝldur.
17 Qünki rǝzillǝrning bilǝkliri sundurulidu;
Lekin Pǝrwǝrdigar ⱨǝⱪⱪaniylarni yɵlǝydu;
18 |י| Pǝrwǝrdigar kɵngli duruslarning künlirini bilidu;
Ularning mirasi mǝnggügǝ bolidu.
19 Ular eƣir künlǝrdǝ yǝrgǝ ⱪarap ⱪalmaydu;
Ⱪǝⱨǝtqiliktimu ular toⱪ yüridu.
20 |כ| Biraⱪ rǝzillǝr ⱨalak bolidu;
Pǝrwǝrdigar bilǝn ⱪarxilaxⱪuqilar qimǝnzardiki gül-giyaⱨdǝk tozup ketidu;
Ular tügǝydu;
Is-tütündǝk tarⱪilip tügǝydu.
21 |ל| Rǝzil adǝm ɵtnǝ elip ⱪayturmaydu;
Əmma ⱨǝⱪⱪaniy adǝm meⱨribanliⱪ bilǝn ɵtnǝ beridu;
22 Qünki Pǝrwǝrdigar rǝⱨmǝt ⱪilƣanlar zeminƣa igǝ bolidu,
Biraⱪ uning lǝnitigǝ uqriƣanlar üzüp taxlinidu;
23 |מ| Mǝrdanǝ adǝmning ⱪǝdǝmliri Pǝrwǝrdigar tǝripidindur;
Rǝb uning yolidin hursǝn bolidu.
24 U teyilip kǝtsimu, yiⱪilip qüxmǝydu;
Qünki Pǝrwǝrdigar uning ⱪolini tutup yɵlǝp turidu.
25 |נ| Mǝn yax idim, ⱨazir ⱪerip ⱪaldim;
Lekin ⱨǝⱪⱪaniylarning taxliwetilgǝnlikini,
Yaki pǝrzǝntlirining nan tiligǝnlikini ǝsla kɵrgǝn ǝmǝsmǝn;
26 U kün boyi mǝrd-meⱨriban bolup ɵtnǝ beridu;
Uning ǝwladlirimu hǝlⱪⱪǝ bǝrikǝt yǝtküzidu.
27 |ס| Yamanliⱪni taxlanglar, yahxiliⱪ ⱪilinglar,
Mǝnggü yaxaysilǝr!
28 Qünki Pǝrwǝrdigar adalǝtni sɵyidu,
U Ɵz mɵmin bǝndilirini taxlimaydu;
Ular mǝnggügǝ saⱪlinidu;
|ע| Lekin rǝzillǝrning ǝwladliri üzüp taxlinidu.
29 Ⱨǝⱪⱪaniylar yǝr-jaⱨanƣa igǝ bolidu,
Əbǝdil’ǝbǝdgiqǝ uningda makan tutup yaxaydu.
30 |פ| Ⱨǝⱪⱪaniy adǝmning aƣzi danaliⱪ jakarlaydu;
Uning tili adil ⱨɵkümlǝrni sɵzlǝydu;
31 Ⱪǝlbidǝ Hudaning muⱪǝddǝs ⱪanuni turidu;
Uning ⱪǝdǝmliri teyilip kǝtmǝs.
32 |צ| Rǝzillǝr ⱨǝⱪⱪaniy adǝmni paylap yüridu;
Ular uni ɵltürgüdǝk pǝytni izdǝp yüridu.
33 Lekin Pǝrwǝrdigar uni düxmǝnning qanggiliƣa qüxürmǝydu;
Yaki ⱨɵkümdǝ uni gunaⱨⱪa pütmǝydu.
34 |ק| Pǝrwǝrdigarni tǝlmürüp küt,
Uning yolini qing tutⱪin;
U sening mǝrtiwǝngni kɵtürüp, zeminƣa igǝ ⱪilidu ,
Rǝzillǝr ⱨalak ⱪilinƣanda,
Sǝn buni kɵrisǝn.
35 |ר| Mǝn rǝzil adǝmning zomigǝrlik ⱪiliwatⱪinini kɵrdüm,
U huddi ayniƣan baraⱪsan yapyexil dǝrǝhtǝk ronaⱪ tapⱪan.
36 Biraⱪ u ɵtüp kǝtti,
Mana, u yoⱪ boldi;
Mǝn uni izdisǝmmu, u tepilmaydu.
37 |ש| Mukǝmmǝl adǝmgǝ nǝzǝr sal,
Durus insanƣa ⱪara!
Qünki bundaⱪ adǝmning ahir kɵridiƣini arambǝhx hatirjǝmlik bolidu.
38 Itaǝtsizlǝr bolsa birliktǝ ⱨalak bolixidu;
Ularning kelǝqiki üzülidu;
39 |ח| Biraⱪ ⱨǝⱪⱪaniylarning nijatliⱪi Pǝrwǝrdigardindur;
U eƣir künlǝrdǝ ularning küqlük panaⱨidur.
40 Pǝrwǝrdigar yardǝm ⱪilip ularni saⱪlaydu;
U ularni rǝzillǝrdin saⱪlap ⱪutⱪuzidu;
Qünki ular Uni baxpanaⱨi ⱪilidu.