106
106-küy •••• Hudaning wapadarliⱪi wǝ sǝwr-taⱪiti; insanning wapasizliⱪi
1 Ⱨǝmdusana!
Pǝrwǝrdigarƣa tǝxǝkkür eytinglar!
Qünki U meⱨribandur, ǝbǝdiydur Uning meⱨir-muⱨǝbbiti.
2 Pǝrwǝrdigarning ⱪudrǝtlik ⱪilƣanlirini kim sɵzlǝp berǝlǝydu?
Uning bar xan-xɵⱨritini kim jakarlap berǝlǝydu?
3 Bǝhtliktur adalǝtni tutⱪan,
Daim ⱨǝⱪⱪaniyliⱪni yürgüzgǝn kixi!
4 Hǝlⱪinggǝ bolƣan ⱨimmiting bilǝn meni ǝsligǝysǝn, i Pǝrwǝrdigar;
Nijatliⱪing bilǝn yenimƣa kelip hǝwǝr alƣin!
5 Xuning bilǝn, Sǝn talliƣanliringning bǝrikitini kɵrǝy,
Ɵz elingning xadliⱪi bilǝn xad bolay,
Ɵz mirasing bolƣan hǝlⱪing bilǝn pǝhirlinip, yayrap yürǝy!
6 Biz ata-bowilirimiz ⱪatarida gunaⱨ ɵtküzduⱪ,
Ⱪǝbiⱨlik ⱪilduⱪ, yamanliⱪ ǝyliduⱪ.
7 Misirda turƣan ata-bowilirimiz mɵjiziliringni nǝzirigǝ almay,
Kɵp meⱨribanliⱪliringni esigǝ almidi;
Bǝlki dengizda, Ⱪizil Dengiz boyida isyan kɵtürdi.
8 Biraⱪ U ⱪudritimni namayan ⱪilay dǝp,
Ɵz nami üqün ularni ⱪutⱪuzdi.
9 Uning Ⱪizil Dengizƣa tǝnbiⱨ berixi bilǝn,
U ⱪupⱪuruⱪ boldi;
Huddi ⱪaƣjiraⱪ qɵllüktin yetǝklǝp mangƣandǝk,
U ularni dengiz tǝgliridin ⱪuruⱪ ɵtküzdi.
10 Ularni ɵq kɵrgǝnlǝrning ⱪolidin ⱨɵrlükkǝ qiⱪardi,
Ularƣa ⱨǝmjǝmǝt bolup düxmǝn qanggilidin ⱪutⱪuzdi.
11 Yawlarni sular basti,
Ularning ⱨeqbirsi saⱪ ⱪalmidi.
12 Xundila ular Uning sɵzlirigǝ ixǝnq ⱪildi;
Ular Uni küylidi.
13 Ular Uning ⱪilƣanlirini xunqǝ tez untudi,
Nǝsiⱨǝtini kütmidi;
14 Bǝlki dalada aq kɵzlükkǝ baladǝk berildi,
Qɵl-bayawanda Tǝngrini sinidi.
15 Xunga U soriƣinini ularƣa bǝrdi,
Biraⱪ jüdǝtküqi bir kesǝlni janliriƣa tǝgküzdi.
16 Ular bargaⱨda Musaƣa ⱨǝsǝt ⱪildi,
Hudaning muⱪǝddǝs bǝndisi Ⱨarunnimu kɵrǝlmidi.
17 Yǝr eqilip Datanni yutuwǝtti,
Abiramni adǝmliri bilǝn ⱪapsiwaldi.
18 Əgǝxküqiliri arisida ot yeⱪildi;
Yalⱪun rǝzillǝrni kɵydüriwǝtti.
19 Ular Ⱨorǝb teƣida mozay butni yasidi,
Ⱪuyma ⱨǝykǝlgǝ sǝjdǝ ⱪilip,
20 Ɵzlirining pǝhir-xɵⱨriti bolƣuqining orniƣa,
Ot-qɵp yǝydiƣan ɵküzning süritini almaxturdi.
21 Misirda uluƣ ixlarni kɵrsǝtkǝn Nijatkari Tǝngrini ular untudi.
22 Dǝrwǝⱪǝ, Ⱨam diyarida mɵjizilǝr yaratⱪan,
Ⱪizil Dengiz boyida ⱪorⱪunqluⱪ ixlarni kɵrsǝtkǝn Hudani untudi.
23 U ularni ⱨalak ⱪilimǝn degǝnidi —
Ɵz talliƣini Musa ⱪǝⱨrini yandurux üqün Uning aldida ariqi bolup tik turmiƣan bolsa,
— Dǝrwǝⱪǝ xundaⱪ ⱪilƣan bolar idi.
24 Ular yǝnǝ güzǝl zeminni kǝmsitip rǝt ⱪildi,
Uning wǝdisigǝ ixǝnmidi;
25 Bǝlki qedirlirida ⱪaⱪxap yürüp,
Pǝrwǝrdigarning awaziƣa ⱪulaⱪ salmidi.
26 Xunga U ularƣa ⱪǝsǝm ⱪilip ⱪol kɵtürüp: —
Silǝrni qɵldǝ yiⱪitip tügǝxtürimǝn —
27 Əwladliringlarnimu ǝllǝr arisida yiⱪitip tügǝxtürüp,
Yaⱪa yurtlar ara tarⱪitiwetimǝn» — dedi.
28 Ular Baal-Peor butⱪa ɵzini etip qoⱪunup,
Ɵlüklǝrgǝ atiƣan ⱪurbanliⱪlarni yedi.
29 Ular ⱪilmixliri bilǝn Uning aqqiⱪini kǝltürdi,
Ular arisida waba ⱪozƣaldi;
30 Finiⱨas turdi-dǝ, ⱨɵküm yürgüzdi,
Xuning bilǝn waba tosuldi;
31 Bu ix Finiⱨasⱪa ⱨǝⱪⱪaniyǝt dǝp ⱨesablandi,
Uning nǝsligimu ǝwladidin ǝwladiƣiqǝ, ǝbǝdiy xundaⱪ ⱨesablandi.
32 Ular yǝnǝ Pǝrwǝrdigarni meribaⱨ suliri boyida ƣǝzǝpkǝ kǝltürdi,
Ularning sǝwǝbidin Musaƣimu zǝrǝr yǝtti;
33 Qünki ular uning roⱨini teriktürdi,
Uning lǝwliri bihǝstiliktǝ gǝp ⱪilip saldi.
34 Ular Pǝrwǝrdigarning ǝmrigǝ hilapliⱪ ⱪilip,
Xu yǝrdiki ⱪowmlarni yoⱪatmidi;
35 Bǝlki yat ǝllǝr bilǝn arilixip,
Ularning ⱪiliⱪlirini ɵgǝndi;
36 Ularning butliriƣa qoⱪundi,
Bular ɵzlirigǝ bir tuzaⱪ bolup qiⱪti;
37 Qünki ular ɵz oƣul-ⱪizlirini soyup, jinlarƣa ⱪurbanliⱪⱪa beƣixlidi.
38 Xundaⱪ ⱪilip ular bigunaⱨ ⱪanni,
Yǝni Ⱪanaandiki butlarƣa atap ⱪurbanliⱪ ⱪilip, ɵz oƣul-ⱪizlirining ⱪenini tɵkti;
Zemini ⱪanƣa bulƣinip kǝtti.
39 Ular ɵz ⱪilmixliri bilǝn bulƣandi;
Ⱪiliⱪliri bilǝn paⱨixǝ ayaldǝk buzuldi.
40 Xunga Pǝrwǝrdigar Ɵz hǝlⱪidin ⱪattiⱪ ƣǝzǝplǝndi,
U Ɵz mirasidin yirgǝndi;
41 Ularni yat ǝllǝrning ⱪoliƣa bǝrdi,
Ularƣa ɵqmǝnlǝr ular üstidin ⱨɵkümranliⱪ ⱪildi.
42 Düxmǝnliri ularni ǝzdi,
Ular yaw ⱪoli astida egilip püküldi.
43 Kɵp ⱪetim Pǝrwǝrdigar ularni ⱪutⱪuzdi;
Biraⱪ ular bolsa, ɵz haⱨixliri bilǝn Uningƣa asiyliⱪ ⱪildi,
Ular ɵz ⱪǝbiⱨliki bilǝn pǝs ⱨalƣa qüxti.
44 Xundaⱪtimu U ularning nalǝ-pǝryadini angliƣanda,
Ularning jǝbir-japaliriƣa etibar bǝrdi;
45 Ⱨǝm ular bilǝn tüzgǝn ǝⱨdisini ǝslidi,
Zor meⱨir-xǝpⱪiti bilǝn, ƣǝzipidin yandi,
46 U ularni sürgün ⱪilƣanlarning ⱪǝlbidǝ rǝⱨim oyƣatti.
47 Bizni ⱪutⱪuzƣaysǝn, i Pǝrwǝrdigar Hudayimiz!
Muⱪǝddǝs namingƣa tǝxǝkkür eytixⱪa,
Tǝntǝnǝ ⱪilip Seni mǝdⱨiyilǝxkǝ,
Bizni ǝllǝr arisidin yeningƣa yiƣiwalƣaysǝn!
48 Israilning Hudasi bolƣan Pǝrwǝrdigarƣa,
Əzǝldin ta ǝbǝdgiqǝ tǝxǝkkür-mǝdⱨiyǝ ⱪayturulsun!
Pütkül hǝlⱪ «Amin» desun!
Ⱨǝmdusana!