9
Danaliⱪning sɵzining dawami, buzuⱪ hotunning sɵzliri
1 Danaliⱪ ɵzigǝ bir ɵy selip,
Uning yǝttǝ tüwrükini ornatti.
2 U mallirini soyup,
Esil xarablirini arilaxturup tǝyyarlap,
Ziyapǝt dastihinini yaydi;
3 Dedǝklirini meⱨman qaⱪirixⱪa ǝwǝtti,
Ɵzi xǝⱨǝrning ǝng egiz jaylirida turup:
4 «I saddilar, bu yǝrgǝ kelinglar, — dǝp qaⱪiriwatidu;
Nadanlarƣa:
5 Ⱪeni, nanlirimdin eƣiz tegip,
Mǝn arilaxturup tǝyyarliƣan xarablardin iqinglar;
6 Nadanlar ⱪataridin qiⱪip, ⱨayatⱪa erixinglar,
Yoruⱪluⱪ yolida menginglar», — dǝwatidu.
7 Ⱨakawurlarƣa tǝnbiⱨ bǝrgüqi aⱨanǝtkǝ uqraydu,
Ⱪǝbiⱨlǝrni ǝyibligüqi ɵzigǝ daƣ kǝltüridu.
8 Ⱨakawurlarni ǝyiblimǝ, qünki u sanga ɵq bolup ⱪalidu;
Ⱨalbuki, dana kixini ǝyiblisǝng, u seni sɵyidu.
9 Dana adǝmgǝ dǝwǝt ⱪilsang, ǝⱪli tehimu toluⱪ bolidu;
Ⱨǝⱪⱪaniy adǝmgǝ durus yol kɵrsǝtsǝng,
Bilimi tehimu axidu.
10 Pǝrwǝrdigardin ǝyminix danaliⱪning baxlinixidur,
Muⱪǝddǝs bolƣuqini tonux yoruⱪluⱪtur.
11 Mǝn danaliⱪ sǝndǝ bolsam, künliringni uzartimǝn,
Ɵmrüngning yilliri kɵpiyǝr.
12 Sǝndǝ danaliⱪ bolsa, paydini kɵridiƣan ɵzüngsǝn,
Danaliⱪni mazaⱪ ⱪilsang ziyan tartidiƣanmu ɵzüngsǝn.
13 Nadan hotun aƣzi bisǝrǝmjan, ǝⱪilsizdur,
Ⱨeqnemǝ bilmǝstur.
14 U ixik aldida olturup,
Xǝⱨǝrning ǝng egiz jaylirida orun elip,
15 Udul ɵtüp ketiwatⱪanlarƣa:
16 «Kimki sadda bolsa, bu yǝrgǝ kǝlsun!» — dǝwatidu,
Wǝ ǝⱪilsizlǝrni:
17 «Oƣriliⱪqǝ iqkǝn su tatliⱪ bolidu,
Oƣrilap yegǝn nan tǝmlik bolidu!» — dǝp qarⱪiwatidu.
18 Lekin qaⱪirilƣuqi ɵlüklǝrning uning ɵyidǝ yatⱪanliⱪidin bihǝwǝrdur,
Uning burunⱪi meⱨmanlirining alliⱪaqan tǝⱨtisaraning tǝglirigǝ qüxüp kǝtkǝnlikini u sǝzmǝs.