15
1 Mulayim jawab ƣǝzǝpni basar;
Ⱪopal sɵz aqqiⱪni ⱪozƣar.
2 Aⱪilanilǝrning tili bilimni jari ⱪilar;
Əhmǝⱪning aƣzi ⱪuruⱪ gǝp tɵkǝr.
3 Pǝrwǝrdigarning kɵzi ⱨǝr yǝrdǝ yürǝr;
Yahxi-yamanlarni kɵrüp turar.
4 Xipa yǝtküzgüqi til huddi bir «ⱨayatliⱪ dǝrihi»dur;
Tili ǝgrilik kixining roⱨini sundurar.
5 Əhmǝⱪ atisining tǝrbiyisigǝ pisǝnt ⱪilmas;
Lekin atisining tǝnbiⱨigǝ ⱪulaⱪ salƣan zerǝk bolar.
6 Ⱨǝⱪⱪaniyning ɵyidǝ gɵⱨǝrlǝr kɵptur;
Biraⱪ yamanning tapawiti ɵzigǝ awariqilik tapar.
7 Dananing lǝwliri bilim tarⱪitar;
Əhmǝⱪning kɵnglidin ⱨeq bilim qiⱪmas.
8 Yamanlarning ⱪurbanliⱪi Pǝrwǝrdigarƣa yirginqliktur;
Duruslarning duasi Uning hursǝnlikidur.
9 Yamanlarning yoli Pǝrwǝrdigarƣa yirginqliktur;
Lekin ⱨǝⱪⱪaniyǝtni intilip izdigüqini U yahxi kɵrǝr.
10 Toƣra yoldin qiⱪⱪanlar azabliⱪ tǝrbiyini kɵrǝr;
Tǝnbiⱨgǝ ɵq bolƣuqi ɵlǝr.
11 Tǝⱨtisara wǝ ⱨalakǝt Pǝrwǝrdigarning kɵz aldida oquⱪ turƣan yǝrdǝ,
Insan kɵnglidiki oy-pikirni ⱪandaⱪmu Uningdin yoxuralisun?!
12 Ⱨakawur tǝnbiⱨ bǝrgüqini yaⱪturmas;
U aⱪilanilǝrdin nǝsiⱨǝt elixⱪa barmas.
13 Kɵngül xad bolsa, hux qiray bolar;
Dǝrd-ǝlǝm tartsa, roⱨi sunar.
14 Yorutulƣan kɵngül bilimni izdǝr;
Əⱪilsizning aƣzi nadanliⱪni ozuⱪ ⱪilar.
15 Ezilgǝnlǝrning ⱨǝmmǝ künliri tǝstǝ ɵtǝr;
Biraⱪ xad kɵngül ⱨǝrkünini ⱨeyttǝk ɵtküzǝr.
16 Zor bayliⱪ bilǝn biaramliⱪ tapⱪandin,
Azƣa xükür ⱪilip, Pǝrwǝrdigardin ǝymǝngǝn ǝwzǝl.
17 Nǝprǝt iqidǝ yegǝn bordaⱪ gɵxtǝ ⱪilinƣan katta ziyapǝttin,
Meⱨir-muⱨǝbbǝt iqidǝ yegǝn kɵktat ǝwzǝl.
18 Terikkǝk kixi jedǝl qiⱪirar;
Eƣir-besiⱪ talax-tartixlarni tinqlandurar.
19 Ⱨurunning yoli tikǝnlik ⱪaxadur,
Durus adǝmning yoli kɵtürülgǝn yoldǝk daƣdamdur.
20 Dana oƣul atisini xad ⱪilar;
Əⱪilsiz adǝm anisini kǝmsitǝr.
21 Əⱪli yoⱪ kixi ǝhmǝⱪliⱪi bilǝn huxtur;
Yorutulƣan kixi yolini toƣrilap mangar.
22 Mǝsliⱨǝtsiz ix ⱪilƣanda nixanlar ǝmǝlgǝ axmas;
Mǝsliⱨǝtqi kɵp bolƣanda muddialar ǝmǝlgǝ axurular.
23 Kixigǝ jayida bǝrgǝn jawabidin hux bolar,
Dǝl waⱪtida ⱪilƣan sɵz nǝⱪǝdǝr yahxidur!
24 Ⱨayatliⱪ yoli ǝⱪilliⱪ kixini yuⱪiriƣa baxlayduki,
Uni qongⱪur tǝⱨtisaradin ⱪutⱪuzar.
25 Pǝrwǝrdigar tǝkǝbburning ɵyini yuluwetǝr;
Biraⱪ U tul hotunlarƣa pasillarni turƣuzar.
26 Yamanlarning oy-pikri Pǝrwǝrdigarƣa yirginqliktur;
Biraⱪ sap dilning sɵzliri sɵyümlüktur.
27 Aq kɵz kixi ɵz ailisigǝ awariqilik kǝltürǝr;
Para elixⱪa nǝprǝtlǝngǝn kixi kün kɵrǝr.
28 Ⱨǝⱪⱪaniy adǝm ⱪandaⱪ jawab berixtǝ ⱪayta-ⱪayta oylinar;
Yaman adǝmning aƣzidin xumluⱪ tɵkülǝr.
29 Pǝrwǝrdigar yaman adǝmdin yiraⱪtur;
Biraⱪ U ⱨǝⱪⱪaniyning duasini anglar.
30 Hux kɵzlǝr kɵngülni xadlandurar;
Hux hǝwǝr ustihanlarƣa gɵx-may ⱪondurar.
31 Ⱨayatliⱪⱪa elip baridiƣan tǝnbiⱨkǝ ⱪulaⱪ salƣan kixi danalarning ⱪataridin orun alar.
32 Tǝrbiyǝni rǝt ⱪilƣan ɵz jenini har ⱪilar;
Tǝnbiⱨgǝ ⱪulaⱪ salƣan yorutular.
33 Pǝrwǝrdigardin ⱪorⱪux adǝmgǝ danaliⱪ ɵgitǝr;
Awwal kǝmtǝrlik bolsa, andin xɵⱨrǝt kelǝr.