Muⱪeddes Kalam (yǝngi yeziⱪ) Pǝnd-nǝsiⱨǝtlǝr 12

1 Kimki tǝrbiyini ⱪǝdirlisǝ, bilimnimu sɵygüqidur;

Lekin tǝnbiⱨkǝ nǝprǝtlǝngǝn nadan-ⱨamaⱪǝttur.

2 Yahxi niyǝtlik adǝm Pǝrwǝrdigarning iltipatiƣa erixǝr;

Əmma Pǝrwǝrdigar ⱨiylǝ-mikirlik adǝmning gunaⱨini bekitǝr.

3 Adǝmlǝr yamanliⱪ ⱪilip amanliⱪ tapalmas;

Lekin ⱨǝⱪⱪaniylarning yiltizi tǝwrǝnmǝs.■

4 Pǝzilǝtlik ayal erining tajidur;

Əmma uni uyatⱪa salƣuqi hotun uning ustihinini qiritǝr.■

5 Ⱨǝⱪⱪaniy adǝmning oy-pikri durus ⱨɵküm qiⱪirar;

Yamanlarning nǝsiⱨǝtliri mǝkkarliⱪtur.□

6 Yamanlarning sɵzliri ⱪan tɵkidiƣan ⱪiltaⱪtur;

Lekin durusning sɵzi adǝmni ⱪiltaⱪtin ⱪutuldurar.■

7 Yamanlar aƣdurulup, yoⱪilar;

Lekin ⱨǝⱪⱪaniylarning ɵyi mǝzmut turar.□ ■

8 Adǝm ɵz zerikliki bilǝn mahtaxⱪa sazawǝr bolar;

Əgri niyǝtlik kixi kɵzgǝ ilinmas.

9 Peⱪir turup hizmǝtkari bar kixi,

Ɵzini qong tutup aq yürgǝn kixidin yahxidur.■

10 Ⱨǝⱪⱪaniy adǝm ɵz uliƣinimu asrar;

Əmma rǝzil adǝmning bolsa ⱨǝtta rǝⱨimdilliⱪimu zalimliⱪtur.■

11 Tirixip teriⱪqiliⱪ ⱪilƣan deⱨⱪanning ⱪorsiⱪi toⱪ bolar;

Əmma ham hiyallarƣa berilgǝn kixining ǝⱪli yoⱪtur.■

12 Yaman adǝm yamanliⱪ ⱪiltiⱪini kɵzlǝp olturar;

Əmma ⱨǝⱪⱪaniy adǝmning yiltizi mewǝ berip turar.

13 Yaman adǝm ɵz aƣzining gunaⱨidin tutular;

Ⱨǝⱪⱪaniy adǝm muxǝⱪⱪǝt-ⱪiyinqiliⱪtin ⱪutular.□ ■

14 Adǝm ɵz aƣzining mewisidin ⱪanaǝt tapar;

Ɵz ⱪoli bilǝn ⱪilƣanliridin uningƣa yandurular.■

15 Əhmǝⱪ ɵz yolini toƣra dǝp bilǝr;

Əmma dǝwǝtkǝ ⱪulaⱪ salƣan kixi aⱪilanidur.■

16 Əhmǝⱪning aqqiⱪi kǝlsǝ, tezla bilinǝr;

Zerǝk kixi ⱨaⱪarǝtkǝ sǝwr ⱪilar, sǝtqilikni axkarilimas.□

17 Ⱨǝⱪiⱪǝtni eytⱪan kixidin adalǝt bilinǝr;

Yalƣan guwaⱨliⱪ ⱪilƣuqidin aldamqiliⱪ bilinǝr.■

18 Bǝzlilǝrning yeniklik bilǝn eytⱪan gepi adǝmgǝ sanjilƣan ⱪiliqⱪa ohxar;

Biraⱪ aⱪilanining tili dǝrdkǝ dǝrmandur.■

19 Rastqil mǝnggü turƣuzulidu;

Lǝwzi yalƣan bolsa birdǝmliktur.□

20 Yamanliⱪning koyida yürgüqining kɵnglidǝ ⱨiylǝ saⱪlanƣandur;

Amanliⱪni dǝwǝt ⱪilƣuqilar huxalliⱪⱪa qɵmǝr.

21 Ⱨǝⱪⱪaniy adǝmning bexiƣa ⱨeq külpǝt qüxmǝs;

Ⱪǝbiⱨlǝr bala-ⱪazaƣa qɵmülǝr.

22 Yalƣan sɵzlǝydiƣanning lǝwliri Pǝrwǝrdigarƣa yirginqliktur;

Lekin lǝwzidǝ turƣanlarƣa U apirin eytar.

23 Pǝmlik adǝm bilimini yoxurar;

Biraⱪ ǝhmǝⱪ nadanliⱪini jakarlar.■

24 Tirixqan ⱪol ⱨoⱪuⱪ tutar;

Ⱨurun ⱪol alwanƣa tutular.■

25 Kɵngülning ƣǝm-ǝndixisi kixini mükqǝytǝr;

Lekin meⱨribanǝ bir sɵz kixini roⱨlandurar.■

26 Ⱨǝⱪⱪaniy kixi ɵz dosti bilǝn birgǝ yol izdǝr;

Biraⱪ yamanlarning yoli ɵzlirini adaxturar.□

27 Ⱨurun ɵzi tutⱪan owni pixurup yeyǝlmǝs;

Biraⱪ ǝtiwarliⱪ bayliⱪlar tirixqanƣa mǝnsuptur.□

28 Ⱨǝⱪⱪaniyliⱪning yolida ⱨayat tepilar;

Xu yolda ɵlüm kɵrünmǝstur.

■ 12:3 Pǝnd. 10:25 ■ 12:4 1Kor. 11:7 □ 12:5 «... oy-pikri durus ⱨɵküm qiⱪirar» — yaki: «...oy-pikri durustur». ■ 12:6 Pǝnd. 1:11,18; 11:9 □ 12:7 «Yamanlar aƣdurulup, yoⱪilar» — baxⱪa birhil tǝjimisi: «Yamanlar aƣdurulƣanda, yoⱪilar». ■ 12:7 Zǝb. 37:36-40; Pǝnd. 11:21 ■ 12:9 Pǝnd. 13:7 ■ 12:10 Ⱪan. 25:4 ■ 12:11 Pǝnd. 28:19 □ 12:13 «Yaman adǝm ɵz aƣzining gunaⱨidin tutular» — yaki «Eƣizdiki itaǝtsizliktin rǝzil tuzaⱪ qiⱪar». ■ 12:13 Pǝnd. 10:14; 18:7 ■ 12:14 Pǝnd. 13:2 ■ 12:15 Pǝnd. 3:7 □ 12:16 «...ⱨaⱪarǝtkǝ sǝwr ⱪilar, sǝtqilikni axkarilimas» — ibraniy tilida bu ikki ibarǝ «ikki bisliⱪ» bir sɵz bilǝnla ipadilǝngǝn. ■ 12:17 Pǝnd. 14:5 ■ 12:18 Zǝb. 57:4; 59:7; Pǝnd. 16:27 □ 12:19 «rastqil» — ibraniy tilida «ⱨǝⱪiⱪǝtning lewi». «lǝwzi yalƣan bolsa birdǝmliktur.» — ibraniy tilida «yalƣanqi til bolsa birdǝmliktur». ■ 12:23 Pǝnd. 13:16; 15:2 ■ 12:24 Pǝnd. 10:4 ■ 12:25 Pǝnd. 15:13 □ 12:26 «Ⱨǝⱪⱪaniy kixi ɵz dosti bilǝn birgǝ yol izdǝr» — baxⱪa hil tǝrjimiliri: «Ⱨǝⱪⱪaniy kixi ɵz dostining kɵnglidikini tǝkxürǝr», «Ⱨǝⱪⱪaniy kixi dost tutuxta sǝgǝk bolar» yaki «Ⱨǝⱪⱪaniy kixi ɵz dostiƣa yol kɵrsitǝr». □ 12:27 «Biraⱪ ǝtiwarliⱪ bayliⱪlar tirixqanƣa mǝnsuptur» — baxⱪa birhil tǝrjimisi: «Biraⱪ tirixqan kixi ɵz tǝǝlluⱪatini ǝtiwarlaydu».