☰ Ayup 18
18
Bildadmu «Yamanlarning yaman aⱪiwiti» toƣruluⱪ sɵz ⱪilidu
1 Xuhaliⱪ Bildad jawabǝn mundaⱪ dedi: —
2 Sǝndǝk adǝmlǝr ⱪaqanƣiqǝ mundaⱪ sɵzlǝrni tohtatmaysilǝr?
Silǝr obdan oylap beⱪinglar, andin biz sɵz ⱪilimiz.
3 Biz nemixⱪa silǝrning aldinglarda ⱨaywanlar ⱨesablinimiz?
Nemixⱪa aldinglarda ǝhmǝⱪ tonulimiz?□
4 Ⱨǝy ɵzüngning ƣǝzipidǝ ɵzüngni yirtⱪuqi, seni dǝpla yǝr-zemin taxliwetilǝmdu?!
Taƣ-taxlar ɵz ornidin kɵtürülüp ketǝmdu?!□
  ■
5 Ⱪandaⱪla bolmisun, yaman adǝmning qiriƣi ɵqürülidu,
Uning ot-uqⱪunliri yalⱪunlimaydu.
6 Qediridiki nur ⱪarangƣuluⱪⱪa aylinidu,
Uning üstigǝ asⱪan qiriƣi ɵqürülidu.
7 Uning mǝzmut ⱪǝdǝmliri ⱪisilidu,
Ɵzining nǝsiⱨǝtliri ɵzini mollaⱪ atⱪuzidu.
8 Qünki ɵz putliri ɵzini torƣa ǝwǝtidu,
U dǝl torning üstigǝ dǝssǝydiƣan bolidu.
9 Ⱪiltaⱪ uni tapinidin iliwalidu,
Tuzaⱪ uni tutuwalidu.■
10  Yǝrdǝ uni kütidiƣan yoxurun arƣamqa bar,
Yolida uni tutmaⱪqi bolƣan bir ⱪapⱪan bar.
11  Uni ⱨǝr tǝrǝptin wǝⱨimilǝr besip ⱪorⱪitiwatidu,
Ⱨǝm ular uni iz ⱪoƣlap ⱪoƣlawatidu.■
12  Maƣdurini aqarqiliⱪ yǝp tügǝtti;
Palakǝt uning yenida paylap yüridu.□  ■
13  Ɵlümning qong balisi uning terisini yǝwatidu;
Uning ǝzalirini xoraydu.□
14 U ɵz qediridiki amanliⱪtin yulup taxlinidu,
Ɵlümning tunjisi uni «wǝⱨimilǝrning padixaⱨi»ning aldiƣa yalap apiridu.■
15  Ɵyidikilǝr ǝmǝs, bǝlki baxⱪilar uning qedirida turidu;
Turalƣusining üstigǝ günggürt yaƣdurulidu.□
16  Uning yiltizi tegidin ⱪurutulidu;
Üstidiki xahliri kesilidu.
17  Uning ǝslimisimu yǝr yüzidikilǝrning esidin kɵtürülüp ketidu,
Sirtlarda uning nam-abruyi ⱪalmaydu.□  ■
18 U yoruⱪluⱪtin ⱪarangƣuluⱪⱪa ⱪoƣliwetilgǝn bolup,
Bu dunyadin ⱨǝydiwetilidu.
19  Əl-yurtta ⱨeqⱪandaⱪ pǝrzǝntliri yaki ǝwladliri ⱪalmaydu,
U musapir bolup turƣan yǝrlǝrdimu nǝsli ⱪalmaydu.■
20  Uningdin keyinkilǝr uning künigǝ ⱪarap alaⱪzadǝ bolidu,
Huddi aldinⱪilarmu qɵqüp kǝtkǝndǝk.□
21  Mana, ⱪǝbiⱨ adǝmning makanliri xübⱨisiz xundaⱪ,
Tǝngrini tonumaydiƣan kixiningmu orni qoⱪum xundaⱪtur. □
 
 
□ 18:3 «Biz nemixⱪa silǝrning aldinglarda ⱨaywanlar ⱨesablinimiz?» — «silǝr» degǝn sɵzgǝ ⱪariƣanda, Bildadning bu sɵzining pǝⱪǝt Ayupⱪila ⱪilinƣan ǝmǝslikini bildüridu. Ularning yenida gǝp angliƣuqilardin bǝzilǝr Ayupning jasarǝtlik sɵzlirini anglap uningƣa ⱪol ⱪoydimu-ya? □ 18:4 «Ⱨǝy ɵzüngning ƣǝzipidǝ ɵzüngni yirtⱪuqi, seni dǝpla ... taƣ-taxlar ɵz ornidin kɵtürülüp ketǝmdu?!» — Ayup 16-bab, 9-ayǝttǝ, «U (Huda)ning ƣǝzipi meni titma ⱪildi» degǝn. Bildad, xübⱨisizki, bu gǝpni mazaⱪ ⱪilip: «Sening yirtilixing Hudaning ƣǝzipi bilǝn ǝmǝs, bǝlki ɵz-ɵzüngning ƣǝzipi bilǝndur» demǝkqi. Bildad yǝnǝ Huda insandin uluƣ ⱨǝm aliy bolƣaqⱪa, Ayup uning bilǝn didarlixay, ⱨuzuriƣa kirip uning bilǝn sɵzlixǝy dǝp ɵz ǝⱪlidin adaxⱪan, dǝp mazaⱪ ⱪilidu — demǝkqi. Bildad «Insanning Huda bilǝn biwasitǝ sɵzlixixi, kɵrüxüxi zadi mumkin ǝmǝs» degǝn kɵzⱪaraxta bolidu. Biraⱪ Ayup ahirida ⱨǝⱪiⱪǝtǝn Huda bilǝn kɵrüxidu; uning üstigǝ biz Ayupni Hudani ɵzining ǝng yeⱪin ⱨǝmraⱨi dǝp bilgǝn kixi, dǝp kɵrǝlǝymiz (29:4). ■ 18:4 Ayup 13:14; Zǝb. 113:6; Yǝx. 54:10; Mat. 10:29-31; Rim. 8:32 ■ 18:9 Ayup 5:5 ■ 18:11 Ayup 15:21; Yǝr. 6:25; 46:5; 49:29 □ 18:12 «Maƣdurini aqarqiliⱪ yǝp tügǝtti» — baxⱪa bir hil tǝrjimisi «Balayi’apǝt uni yutuwetixkǝ aqkɵzlük bilǝn kütiwatidu...» ■ 18:12 Ayup 15:23 □ 18:13 «ɵlümning qong balisi» — bǝlkim birhil kesǝlni (Ayupning kesilini?) kɵrsitidu. ■ 18:14 Ayup 8:13, 14; 11:20; Pǝnd. 10:28 □ 18:15 «...baxⱪilar uning qedirida turidu» — yaki « ...ot uning qedirida turidu». □ 18:17 «Sirtlarda...» — yaki: «Yaylaⱪlarda...» yaki «Dalada...». ■ 18:17 Zǝb. 109:13; Pǝnd. 10:7 ■ 18:19 Yǝx. 14:22; Yǝr. 22:30 □ 18:20 «Huddi aldinⱪilar qɵqüp kǝtkǝndǝk» — Bildad eytⱪan «aldinⱪilar»ning ɵz dǝwridiki rǝzil adǝmlǝrning ǝⱨwaliƣa ⱪarap qɵqüp kǝtkǝnlikini kɵrsitixi mumkin. Baxⱪa birhil tǝrjimisi: «Mǝxriⱪtikilǝr uning künigǝ ⱪarap alaⱪzadǝ bolidu, mǝƣribtikilǝr uning künigǝ ⱪarap alaⱪzadǝ bolidu, mǝxriⱪtikilǝrmu qɵqüp ketidu». □ 18:21 «Mana, ⱪǝbiⱨ adǝmning makanliri xübⱨisiz xundaⱪ, Tǝngrini tonumaydiƣan kixiningmu orni qoⱪum xundaⱪtur» — Bildadning bu sɵzliridǝ: «ⱪǝbiⱨ adǝm», «Tǝngrini tonumaydiƣan kixi» degini, «sǝn Ayuptin baxⱪa kixi ǝmǝs» demǝkqi.
☰