19
Israil xaⱨzadilirigǝ bir mǝrsiyǝ
1 — «Əmdi sǝn, Israil xaⱨzadilirigǝ bir mǝrsiyǝni aƣzingƣa elip mundaⱪ dǝp oⱪuƣin: —
2 «Xirlar arisida anang ⱪandaⱪ bir qixi xir idi!
U yax xirlar arisida yatⱪan, u arslanlirini beⱪip ⱪuwwǝtlidi.
3 U arslanliridin birini qong ⱪildi, u yax xir bolup qiⱪti;
U owni tutup yirtixni ɵgǝndi;
U adǝmlǝrnimu yǝwetǝtti.
4 Əllǝr uningdin hǝwǝr anglidi;
U ularning ora toziⱪida tutuwelindi;
Ular uning burniƣa ilmǝkni selip,
Misir zeminiƣa epkǝtti.
5 Qix xir ɵzining arminini bikar kütkinini,
Ümidning yoⱪalƣanliⱪini kɵrüp,
U baxⱪa bir arslinini elip,
Uni beⱪip yax xir ⱪildi;
6 U xirlar arisida uyan-buyan kǝzdi;
U yax xir bolup,
Owni tutup yirtixni ɵgǝndi;
U adǝmlǝrnimu yǝwetǝtti.
7 U ularning istiⱨkamlirini buzup,
Ularning xǝⱨǝrlirini harabǝ ⱪiliwǝtti;
Zemin wǝ uning üstidiki ⱨǝmmisi uning ⱨɵrkirigǝn awazi bilǝn dǝkkǝ-dükkigǝ qüxti.
8 Andin ǝllǝr uning ǝtrapidiki rayonlardin kelip uningƣa ⱪarxi qiⱪti;
Ular uning üstigǝ torini yeyip taxlidi;
U ularning ora toziⱪida tutuwelindi.
9 Ular burniƣa ilmǝk selip ⱪǝpǝskǝ solidi;
Uni Babilning padixaⱨiƣa apardi;
Ular uni torliriƣa eliwaldi;
Xuning bilǝn uning awazi Israil taƣlirida ⱪaytidin anglanmaydu.
10 Sening anang üzümzaringda bir üzüm teli idi;
U su boyida tiklǝngǝnidi;
Sularning molluⱪidin,
U intayin mewilik, kɵp xahlik boldi.
11 Uning küqlük xahliri bar idi,
Ⱨɵküm sürgüqilǝrning xaⱨanǝ ⱨasiliriƣa layiⱪ idi;
Uning boyi bulutlardinmu egiz kɵkkǝ taⱪaxti,
U egizliki wǝ xahlirining nurƣunliⱪi bilǝn kɵrünǝrlik idi;
12 Biraⱪ u ⱪǝⱨr bilǝn yulundi,
U yǝrgǝ taxlandi,
Xǝrⱪ xamili mewisini ⱪurutiwǝtti;
Uning küqlük xahliri sunduruldi, ⱪaƣjirap kǝtti;
Ot ularni yutuwaldi.
13 Ⱨazir u qɵl-bayawanda,
Qangⱪaⱪ, susiz bir yǝrdǝ tikildi;
14 Uning xahlirining birsidin ot qiⱪip,
Uning bihliri ⱨǝm mewisini yutuwaldi;
Xuning bilǝn uningda ⱨɵkümdarning xaⱨanǝ ⱨasisi bolƣudǝk küqlük xehi ⱪalmidi.
Bu sɵzlǝr mǝrsiyǝdur, bular pǝⱪǝt mǝrsiyǝ üqünla ixlitilidu».