97
97-küy •••• Perwerdigarning selteniti kélidu!
1 Perwerdigar höküm süridu!
Yer-zémin xush bolsun,
Köpligen arallar shadlansun!
2 Bulutlar we qarangghuluq Uning etrapididur,
Heqqaniyet we adalet textining ulidur;
3 Uning aldida ot yalquni yüridu,
Etraptiki düshmenlirini köydürüp tashlaydu;
4 Uning chaqmaqliri jahanni yorutti,
Yer buni körüp titrep ketti;
5 Perwerdigarning aldida,
Pütkül zéminning igisining aldida,
Taghlar momdek érip kétidu.
6 Asmanlar Uning heqqaniyitini jakarlaydu,
Barliq xelqler Uning shan-sheripini köridu.
7 Oyma heykellerge choqun’ghanlar,
Butlar bilen maxtinip yürgüchilerning hemmisi uyatta qalidu.
Barliq ilahlar, Uninggha sejde qilinglar!
8 Séning hökümliring sewebidin, i Perwerdigar,
Zion anglap shadlandi,
Yehuda qizliri xush boldi.
9 Chünki Sen Perwerdigar pütkül yer yüzi üstidiki eng aliysidursen;
Sen barliq ilahlardin neqeder yuqiridursen!
10 Perwerdigarni söygenler, yamanliqtin nepretlininglar!
U mömin bendilirining jénidin xewer alidu,
Rezillerning changgilidin xalas qilidu.
11 Heqqaniylar üchün nur,
Dili duruslar üchün shadliq térilghandur;
12 Perwerdigardin shadlininglar, i heqqaniylar,
Uning pak-muqeddeslikini yad étip teshekkür éytinglar!