77
77-küy •••• Derdmen derdini töküp teselli tapidu
1 Neghmichilerning béshi Yedutun’gha tapshurulghan, Asaf yazghan küy: —
Awazim Xudagha kötürüldi, men peryad qilimen;
Awazim Xudagha kötürüldi, U manga qulaq salidu.
2 Béshimgha kün chüshkende, men Rebni izdidim;
Kéchiche qolumni duagha kötürüp, bosh qoymidim;
Jénim tesellini xalimay ret qildi.
3 Men Xudani eslep séghindim, ah-zar qildim;
Séghinip oylinip, rohim parakende boldi.
Sélah.
4 Sen méning közümni yumdurmiding;
Chongqur gheshlik ilkide bolghanliqimdin sözliyelmeyttim.
5 Men: «Kona zamandiki künlerni,
Qedimki yillarni xiyal qilimen;
6 Kéchilerde éytqan naxshamni esleymen;
Könglümde chongqur xiyal sürimen» — dédim;
Rohim intilip izdimekte idi;
7 — «Reb menggüge tashliwétemdu?
U qaytidin iltipat körsetmemdu?
8 Uning özgermes muhebbiti emdi menggüge tügep kettimu?
Uning wedisi ewladtin-ewladqiche inawetsiz bolamdu?
9 Tengri méhir-shepqitini körsitishni üntudimu?
U ghezeplinip Öz rehimdilliqini toxtitiwettimu?».
Sélah.
10-11 Andin men mundaq dédim: — «Bundaq désem bolmaydu, bu étiqadimning ajizliqi emesmu!
Hemmidin Aliy Bolghuchining ong qolining yillirini,
Yeni Yahning qilghanlirini — yad étimen;
Qedimdin buyanqi karametliringni esleymen.
12 Séning barliq ishligenliring üstide séghinip oylinimen;
Séning qilghanliring üstide istiqamet qilimen;
13 I Xuda, yolung bolsa pak-muqeddesliktidur;
Xudadek ulugh bir ilah barmidur?
14 Möjiziler Yaratquchi Ilahdursen;
El-milletler ara Sen küchüngni namayan qilding.
15 Öz biliking bilen Öz xelqingni,
Yeni Yaqup we Yüsüpning perzentlirini hörlükke chiqarghansen;
Sélah.
16 Sular Séni kördi, i Xuda, sular Séni kördi;
Titrek ularni basti,
Déngiz tegliri patiparaq boldi.
17 Qara bulutlar sularni töküwetti;
Asmanlar zor sadasini anglatti;
Berheq, Séning oqliring terep-terepke étildi.
18 Güldürmamangning awazi qara quyunda idi,
Chaqmaqlar jahanni yorutti;
Yer yüzi alaqzade bolup tewrendi.
19 Séning yolung okyan-déngizlarda,
Qedemliring chongqur sulardidur,
Ayagh izliringni tapqili bolmaydu.
20 Sen qoy padisini baqqandek,
Musa we Harunning qoli bilen Öz xelqingni yétekliding».