Muqeddes Kalam (latin yéziq) Zebur 52

52-küy •••• Xudaning hökümi we shepqiti

1 Neghmichilerning béshigha tapshurulup oqulsun dep, Dawut yazghan «Masqil»; Édomluq Doeg Saul padishahning yénigha bérip: «Dawut Aximelekning öyige kirdi» dep ayghaqchiliq qilghandin kéyin yézilghan: —

I nochi batur,

Néme üchün rezillikingdin maxtinisen?

Tengrining özgermes muhebbiti menggülüktur. □ ■

2 Ötkür ustira kebi,

Tiling zeher chachmaqchi,

U yalghanchiliq toquwatidu.

3 Sen yaxshiliqning ornida yamanliqni,

Heq sözleshning ornida yalghanchiliqni yaxshi körisen;

4 Haman ademni nabut qilidighan sözlerni yaxshi körisen, i aldamchi til!□

5 Berheq, Tengri oxshashla séni menggüge yoqitidu;

U séni tutuwalidu, yeni öz chédiringdin tartip chiqidu;

Tiriklerning zéminidin séni yiltizingdin qomurup tashlaydu.

Sélah.

6 Heqqaniylar buni körüp qorqushidu,

We uni mesxire qilip külüp: —

7 «Qaranglar, Xudani öz yölenchisi qilmighan adem,

Peqet öz bayliqlirining köplükige tayan’ghan adem;

U ach közlüki bilen küchlendi» — deydu.

8 Men bolsam Xudaning öyide ösken baraqsan zeytun derextekmen,

Men Xudaning özgermes muhebbitige menggüge tayinimen. □

9 Men Sanga ebedil’ebed teshekkür éytimen;

Chünki Sen bu ishlarni qildingsen;

Mömin bendiliring aldida naminggha telmürüp kütimen;

Mushundaq qilish eladur.□

□ 52:1 «Édomluq Doeg Saul padishahning yénigha bérip: «Dawut Aximelekning öyige kirdi» dep ayghaqchiliq qilghandin kéyin yézilghan» — shu chaghda Saul padishah Dawut peyghemberni öltürmekchi idi. Dawut peyghember qéchip, Abimelek dégen bir kahin (yeni Xudaning ibadetxanisidiki xizmetchisi)ning öyi aldigha kélip yardem soridi. Abimelek yardem berdi. Kéyin Saul padishah Abimelek we uning ailisidikilerni pütünley dégüdek qiriwetti (Tewrat «1Sam.» 21-, 22-bab). «...Néme üchün rezillikingdin maxtinisen? Tengrining özgermes muhebbiti menggülüktur» — bashqa xil terjimiliri: — (1) «... Némishqa kün boyi maxtinisen, Tengri aldida yirginchlik boldungsen»; (2) «... Némishqa mömin bendilerge yetküzgen ziyandin maxtinisen? Kün boyi tiling halaketni oylaydu». ■ 52:1 1Sam. 22:9-23 □ 52:4 «Haman ademni nabut qilidighan sözler» — ibraniy tilida «Haman ademni yutuwétidighan sözler». □ 52:8 «Men bolsam Xudaning öyide ösken baraqsan zeytun derextekmen» — «zeytun derixi» eng uzun ömürlük derexlerdin biri. □ 52:9 «Mömin bendiliring aldida naminggha telmürüp kütimen; mushundaq qilish eladur» — bashqa birxil terjimisi «Mömin bendiler aldida namingni telmürüp kütimen; chünki naming ewzeldur».