☰ Ayup 16
16
Ayup yene jawab béridu — Ershte turidighan Guwahchi
1 Andin Ayup jawaben mundaq dédi: —
2 Men mushundaq geplerni köp anglighanmen;
Siler hemminglar azab yetküzidighan ajayib teselli bergüchi ikensiler-he!■
3 Mundaq watildap qilghan gepliringlarning chéki barmu?
Silerge mundaq jawab bérishke zadi néme qutratquluq qildi?
4 Xalisamla özüm silerge oxshash söz qilalayttim;
Siler méning ornumda bolidighan bolsanglar,
Menmu sözlerni baghlashturup éytip, silerge zerbe qilalaytim,
Béshimnimu silerge qaritip chayqiyalayttim!
5 Halbuki, men eksiche aghzim bilen silerni righbetlendürettim,
Lewlirimning tesellisi silerge dora-derman bolatti.
6 Lékin méning sözlishim bilen azabim azaymaydu;
Yaki gépimni ichimge yutuwalisammu, manga néme aramchiliq bolsun?
7 Biraq U méni halsizlandürüwetti;
Shundaq, Sen pütkül ailemni weyran qiliwetting!□
8 Sen méni qamalliding!
Shuning bilen ehwalim manga guwahliq qilmaqta;
Méning oruq-qaqshal bedinim ornidin turup özümni eyiblep guwahliq qilidu!□
9 Uning ghezipi méni titma qilip,
Méni ow oljisi qilidu;
U manga qarap chishini ghuchurlitidu;
Méning düshminimdek közini alayitip manga tikidu.□  ■
10  Ademler manga qarap mazaq qiliship aghzini achidu;
Ular nepret bilen mengzimge kachatlaydu;
Manga hujum qilay dep sep tüzidu.
11  Xuda méni eskilerge tapshurghan;
Méni rezillerning qoligha tashliwetkeniken.
12  Eslide men tinch-amanliqta turattim, biraq u méni pachaqlidi;
U boynumdin silkip bitchit qiliwetti,
Méni Öz nishani qilghaniken.■
13  Uning oqyachiliri méni qapsiwaldi;
Héch ayimay U üchey-baghrimni yirtip,
Ötümni yerge töküwetti.
14  U u yer-bu yérimge üsti-üstilep zexim qilip bösüp kiridu;
U palwandek manga qarap étilidu.
15  Téremning üstige böz rext tikip qoydum;
Öz izzet-hörmitimni topa-changgha sélip qoydum.□
  ■
16-17 Gerche qolumda héchqandaq zorawanliq bolmisimu,
Duayim chin dilimdin bolghan bolsimu,
Yüzüm yigha-zaridin qizirip ketti;
Qapaqlirimni ölüm sayisi basti.□
18  Ah, yer-zémin, qénimni yapmighin!
Nale-peryadim toxtaydighan’gha jay bolmighay!□
19  Biraq mana, asmanlarda hazirmu manga shahit Bolghuchi bar!
Ershlerde manga kapalet Bolghuchi bar!
20  Öz dostlirim méni mazaq qilghini bilen,
Biraq közüm téxiche Tengrige yash tökmekte.□
21  Ah, insan balisi dosti üchün kélishtürgüchi bolghandek,
Tengri bilen adem otturisidimu kélishtürgüchi bolsidi!■
22  Chünki yene birnechche yil ötüshi bilenla,
Men barsa qaytmas yolda méngip qalimen.□
 
 
■ 16:2 Ayup 13:4 □ 16:7 «Biraq U méni halsizlandürüwetti; shundaq, Sen pütkül ailemni weyran qiliwetting! — 8 we 9-ayettiki «U» we «Sen» Xudani körsitidu. □ 16:8 «Sen méni qamalliding!» — yaki: «Sen méni qurutuwetting!». «Shuning bilen ehwalim manga guwahliq qilmaqta!» — Ayupning shu bichare ehwali: «Sen choqum éghir bir gunah qilghansen, bolmisa bu külpet béshinggha chüshmigen bolatti» dep özige guwahliq qilghandek qilidu. □ 16:9 «Uning ghezipi méni titma qilip,...» — yaki «U tumshuqi bilen méni titma qilip,...». Mushu yerde Ayup Xudani özige yirtquch haywandek zerbe qiliwatidu, dep éytmaqchi. ■ 16:9 Ayup 10:16,17; 13:24 ■ 16:12 Ayup 7:20; Yigh. 3:12 □ 16:15 «Téremning üstige böz rext tikip qoydum; öz izzet-hörmitimni topa-changgha sélip qoydum» — bu ayettiki «böz rext» qedimki zamanlarda ademning qattiq matem tutush, pushayman qilish yaki towa qilishinimu ipadileytti. Mushu yerde, shübhisizki, «matem tutush»ni bildürmekchi. «Öz izzet-hörmitimni topa-changgha sélip qoydum» dégini ibraniy tilida «Münggüzümni topa-changgha sélip qoydum» dégenliktur. Kalining yaki buqining münggüzi ademning küch-qudriti hem abruyining simwoli bolidu. ■ 16:15 Ayup 30:19 □ 16:16-17 «Qapaqlirimni ölüm sayisi basti» — yaki «Zulmetlik qarangghuluq sayisi basti». □ 16:18 «Nale-peryadim toxtaydighan’gha jay bolmighay!» — démek, «Ijabet bolmighuche peryadim herdaim hem Xudagha hem ademlerge awarichilik bolsun». □ 16:20 «Öz dostlirim méni mazaq qilghini bilen...» — ayetning birinchi qismining yene birxil terjimisi, «Manga wakalet bolghuchi méning dostum iken». ■ 16:21 Ayup 31:35; Top. 6:10; Yesh. 45:9; Rim. 9:20 □ 16:22 «Yene birnechche yil ötüshi bilenla, men barsa qaytmas yolda méngip qalimen» — Ayup bezide «bu dunyadin pat arida kétimen» dep, bezide «birnechche yil azablar méni kütidu» dep oylaydu. U birinchi imkaniyetni nisbeten yaxshi dep qaraydu, elwette.
☰