Муқеддес Калам (кирил йезиқ) Зәбур 143

143

143-күй •••• Падишаһниң ниҗатлиғи — хәлиқниң бәхити

1 Давут язған күй: —

Қоллиримға җәң қилишни,

Бармақлиримға урушни үгитидиған,

Мениң Қорам Тешим Пәрвәрдигарға тәшәккүр-мәдһийә қайтурулсун!■

2 Мениң өзгәрмәс шәпқитим вә мениң қорғиним,

Мениң егиз мунарим вә ниҗаткарим,

Мениң қалқиним вә таянғиним, мән Униңдин һимайә тапимән;

У Өз хәлқимни қол астимда бойсундурғучидур!■

3 И Пәрвәрдигар, Сән униңдин хәвәр алидикәнсән, адәм дегән зади немә?

Униң тоғрилиқ ойлайдикәнсән, инсан балиси дегән немә?■

4 Адәм болса бир нәпәстурла, халас;

Униң күнлири өтүп кетиватқан бир көләңгидур, халас.■

5 И Пәрвәрдигар, асманларни егилдүрүп чүшкәйсән;

Тағларға тегип улардин ис-түтәк чиқарғайсән;■

6 Чақмақларни чаққузуп уларни тарқитивәткәйсән;

Оқлириңни етип уларни қийқас-сүрәнгә салғайсән;■

7 Жуқиридин қоллириңни узитип,

Мени азат қилғайсән;

Мени улуқ сулардин,

Яқа жуттикиләрниң чаңгилидин чиқарғайсән.

8 Уларниң ағзи қуруқ гәп сөзләйду,

Оң қоли алдамчи қолдур.□

9 И Худа, мән Саңа атап йеңи нахша ейтимән;

Онтарға тәңкәш болуп Саңа күйләрни ейтимән.□

10 Сән падишаларға ниҗатлиқ-ғәлибә беғишлайсән;

Қулуң Давутни әҗәллик қиличтин қутулдурисән.

11 Мени қутулдурғайсән, ят жуттикиләрниң қолидин азат қилғайсән;

Уларниң ағзи қуруқ гәп сөзләйду,

Оң қоли алдамчи қолдур.

12 Шундақ қилип оғуллиримиз яшлиғида пухта йетилгән көчәтләргә охшайду,

Қизлиримиз ордичә нәқишләнгән түврүкләрдәк болиду;

13 Ашлиқ амбарлиримиз толдурулуп,

Түрлүк-түрлүк озуқлар билән тәминләйдиған,

Қойлиримиз отлақлиримизда миңлап, түмәнләп қозилайдиған;

14 Калилиримиз боғаз болидиған;

Һеч ким бесип кирмәйдиған, һеч ким җәңгә чиқмайдиған;

Кочилиримизда һеч җедәл-ғовға болмайдиған; □

15 Әһвали шундақ болған хәлиқ немидегән бәхитликтур!

Худаси Пәрвәрдигар болған хәлиқ бәхитликтур!

■ 143:1 2Сам. 22:35; Зәб. 17:35 ■ 143:2 2Сам. 22:48; Зәб. 17:48-49 ■ 143:3 Аюп 7:17; Зәб. 8:5; 30:8; Ибр. 2:6 ■ 143:4 Аюп 8:9; 14:2, 3; Зәб. 39:6-7; 61:10; 101:12; Яқ. 4:14 ■ 143:5 Зәб. 18:8-10; 103:32 ■ 143:6 1Сам. 7:10; 2Сам. 22:8; Зәб. 17:14-15 □ 143:8 «Оң қоли алдамчи қолдур» — бәлким қәсәм қилғанда қолини ялғандин көтәргән яки башқилар билән келишкәндә ялғандин қоллашқан. □ 143:9 «Онтарға тәңкәш болуп саңа күйләрни ейтимән» — «онтар» он тарлиқ чилтардәк бир саз. □ 143:14 «Калилиримиз боғаз болидиған...» — башқа бир хил тәрҗимиси: «Улақлиримиз еғир жүкләрни көтиридиған....».