Муқеддес Калам (кирил йезиқ) Амос 2

Моаб һәққидә

1 Пәрвәрдигар мундақ дәйду:

—«Моабниң үч гунайи, бәрһәқ төрт гунайи үчүн, униңға чүшидиған җазани яндурмаймән,

Чүнки у Едомниң падишасиниң устиханлирини көйдүрүп һак қиливәтти.

2 Һәм Мән Моаб үстигә от әвәтимән,

От Кериотниң ордилирини жутувалиду;

Вә Моаб чуқан-сүрәнләр билән, қия-чиялар билән, канай садаси билән өлиду.

3 Вә Мән уларниң һакимини арисидин үзүп ташлаймән,

Униң әмирлирини униң билән биллә өлтүрүветимән, — дәйду Пәрвәрдигар.

Йәһуда һәққидә

4 Пәрвәрдигар мундақ дәйду: —

«Йәһуданиң үч гунайи, бәрһәқ төрт гунайи үчүн, униңға чүшидиған җазани яндурмаймән,

Чүнки улар Пәрвәрдигарниң Тәврат-қанунини кәмситти,

Униңдики бәлгүлимиләргә әмәл қилмиди;

Уларниң сахтилиқлири өзлирини адаштуруп қойди; уларниң ата-бовилириму буларға әгишип маңған еди.□

5 Һәм Мән Йәһуда үстигә от әвәтимән,

От Йерусалимниң ордилирини жутувалиду.

Исраил һәққидә

6 Пәрвәрдигар мундақ дәйду: —

Исраилниң үч гунайи, бәрһәқ төрт гунайи үчүн, уни җазасидин қайтурмаймән,

Чүнки улар һәққанийларни күмүчкә сетивәтти,

Йоқсул адәмни бир җүп чоруққа сетивәтти;

7 Улар намратларниң бешидики чаң-топилирини бош қоювәтмәйду,

Аҗиз мөминләрниң несивисини қайривалиду;

Ата-бала иккиси Мениң муқәддәс намимни булғап, охшаш бир қизниң йениға тәң бариду.□

8 Улар қизларни һәммә қурбангаһниң йениға елип берип,

Қәризгә рәнигә қойған кийим-кечәкләр үстидә улар билән ятиду;

Улар өз илаһиниң өйидә җәриманә билән алған шарапни ичмәктә.□

9 Бирақ Мән Аморийларни уларниң алдидин һалак қилғанмән,

Аморийлар кедир дәриғидәк егиз, дуб дәриғидәк күчлүк болған болсиму,

Мән үстидин униң мевисини, астидин йилтизлирини һалак қилдим.■

10 Һәм Аморийларниң зиминини егилишиңлар үчүн,

Силәрни Мисир зиминидин елип чиқип,

Қириқ жил чөл-баяванда йетәклидим.□ ■

11 Силәрниң оғуллириңлардин бәзилирини пәйғәмбәр болушқа,

Жигитлириңлардин бәзилирини «Назарий» болушқа турғуздум.

Шундақ әмәсму, и Исраил балилири? — дәйду Пәрвәрдигар.□

12 Бирақ силәр Назарийларға шарап ичкүздуңлар,

Һәм пәйғәмбәрләргә: «пәйғәмбәрлик қилмаңлар» — дәп буйрудуңлар.■

13 Мана, Мән силәрни басимән,

Худди лиқ өнчә бесилған һарву йәрни басқандәк, силәрни бесип туримән;

14 Һәм чапқурларниңму қачар йоли йоқайду,

Палван өз күчини ишлитәлмәйду,

Зәбәрдәс батур өз җенини қутқузалмайду.

15 Оқяни тутқучи тик туралмайду;

Йәлтапан қачалмайду,

Атқа мингүчи өз җенини қутқузалмайду.

16 Палванлар арисидики әң җигәрлик батурму шу күнидә ялаңач қечип кетиду, — дәйду Пәрвәрдигар.

□ 2:4 «Уларниң сахтилиқлири өзлирини адаштуруп қойди» — «сахтилиқлири» кейинки гәпләргә қариғанда, уларниң ясиған бутлирини көрситиду. □ 2:7 «Ата-бала иккиси Мениң муқәддәс намимни булғап, охшаш бир қизниң йениға тәң бариду» — бу иш паһишивазлиқ болупла қалмай, йәнә уларниң бутиға, йәни «Баал»ға бир хил чоқунуш паалийити һесаплинатти. □ 2:8 «Улар қизларни һәммә қурбангаһниң йениға елип берип, қәризгә рәнигә қойған кийим-кечәкләр үстидә улар билән ятиду; улар өз илаһиниң өйидә җәриманә билән алған шарапни ичмәктә» — бу җүмлидә Амос уларниң, болупму байларниң төрт гунайини көрситиду: — (1) уларниң (бутларға атап беғишлиған) көп қурбанлиқлири бар еди; (2) улар Муса пәйғәмбәргә чүшүрүлгән муқәддәс қанунға хилаплиқ қилип, өзлиригә қәриздар болған намратлардин кийим-кечәклирини тартивалиду («Мис.» 22:26, «Қан.» 24:12-17ни көрүң); (3) улар бутханиларни селип, бутларни өзлириниң Худаси дәп етирап қилған; (4) улар һарам йолда хәқтин җәриманә алиду — у гуналар бәлким 6-айәттә ейтилған «үч гунайи, төрт гунайи»ни ениқ толуқлап көрситип бериши мүмкин. ■ 2:9 Чөл. 21:24; Қан. 2:31; Йә. 24:8 □ 2:10 «Силәрни ... қириқ жил ... йетәклидим» — «Мисирдин чиқиш» вә «Чөл-баявандики сәпәр» бойичә улар чөл-баяванда көп қетим Худаға итаәтсизлик, асийлиқму қилған. Худаниң шу күнләрдә уларни ташливәтмигәнлиги униң меһри-шәпқитигә интайин зор испат бәрди вә бериду. ■ 2:10 Мис. 12:51 □ 2:11 «Назарий» — бу адәмләр алаһидә йол билән (җүмлидин шарап ичмәй, чачлирини чүшүрмәй) вақитлиқ яки өмүрвайәт өзини Худаға атап беғишлиған. Шуңа уларниң жүрүш-турушлири хәқләргә бақий дунияни әслитип туратти («Чөл.» 6-бапни көрүң). ■ 2:12 Ам. 7:12, 13