19
1 Yan’ko’d aha/ ciḵkina ’twa/ jin waki dhan ’twa/ ma waambuhany ’kwani kun eḵa/ eḵ e momis mo mmoḵum cuuwa/ mo ki:
Halleluya. Mowoṯẖ dhali monyca dhali mom’bi’th cil ma Arumgimis bana mo be,
2 haali/ gwom piti jin toru gwon dwall ’twa/a ’cesh mo tani uni ta kuŋ gana/ mo dhali kuŋ ḵar/e mo.
Haali/ a’di dwallki’da dhana yim jin ta c̱al gwo mo, a’di jin p̱u/ki ’kwaniny’cesh ki miinyc̱al ma yim mo.
Dhali a’di ri’cki’da yim mo goma bas gi unim piti kun ta c̱iŋkinam piti mo.
3 Dhali doḵ/e uni ḵumki cuuwa/ mo ki:
Halleluya. Dhala ku’d ’pena yim yaki mis mo ki sule/ dhali ki sule/ mo.
4 Dhali ’kwaniŋ gwanyjaḵa/ kun ’koni iss ’de/ i’ce’dka doŋon mo dhali to/e kun ’koni doŋon kun ’kon ki e mo tani uni ṯa’kkina ’cesh mo dhali luŋa Arumgimis mo, a’di jin c̱a’bki’da p̱owa ḵursi ma maliḵ piti mo mmo/o gwo mo ki: Amen, dhali Halleluya.
5 Dhali ’pena ḵursi ma maliḵ mo tani ’twa/ p̱u’dki’d jin gwoyi’d mo ki:
Maŋi Arumgimis bana mo, aris umi ’baar mo kun ta c̱iŋkinam piti mo,
um kun ḵo/ki a’di mo, ’peni uni gun gwa’dan mo dhali uni kun cakin mo.
Tonṯe/ ma Yuḵ gi Momiimash gi Ari Ḵa’bal mo
6 Dhali yan’ko’d aha/ ciḵkina ’twa/ jin waki dhan ’twa/ ma waambuhany ’kwani mo, dhali jin wana e ki dhan yi’de/ jin gwona is ka ris mo dhali jin wana e ka dhan montor ma sho’k jin eḵa/ eḵ mo jin mii’da gur gur mo, mmoḵum cuuwa/ mo ki:
Halleluya. Haali/ Tap̱a Arumgimis gana mo, a’di jin ta a’di jin Eḵa/ Eḵ mo tani a’di ta Tap̱a mo.
7 Dhalki ana ’kunya bwa mo dhali kar a’di ki ca mo dhali c̱i a’di monyca mo,
haali/ momiimash gi Ari Ḵa’bal a’di p̱u’dki’d mo,
dhali Nyaranyaŋa’b piti mo, ayim ki is piti a’di thosonki is mo.
8 Ayim taḵkunu ki burrinye/ jin dhinya/ e ki dhiny mo dhali jin c̱a’bki c̱aw c̱aw mo dhali jin dheleladhelel mo –
haali/ burrinyen dhiny e yansan mo tani a’di ta mii ma ḵar/e gi uni kun dhunu ki she/ ki dhelel dhelel mo be.
9 Dhala man’doyu gwo ki o aha/ gwo mo ki: ’Kwari gwo yansan mo ma: Mom’bor mii gom uni gwansan kun c̱inu ayuḵ mo mmo/iiyu/ mo mmoshwa tonṯe/ gi momiimash gi Ari Ḵa’bal mo. Dhali a’di ki o aha/ gwo mo ki: Gwo gwansan uni ta gwoŋ gana/ ma Arumgimis mo.
10 Dhali yan’ko’d aha/ biṯkina ’cesh e sho’k piti mo dhali luŋ a’di mo, hili a’di ki o aha/ gwo mo ki: /E yisa mini mii mii kana. Aha/ tana garr jin nyaḵki’da ṯu’c mii ki /e mo dhali awaḵ pini mo, uni gun ṯelki gwonṯor goma Yesus mo. Luŋi /e Arumgimis mo. Haali/ gwonṯor ma Yesus mo tani a’di ta shi/in gi gwo jin c̱inu is mo be.
Amanmer Shumarum jin Ta jiŋ Kusha P̱o/ mo
11 Dhali yan’ko’d aha/ p̱arkina momis e mo mmoḵa’dkunu a’di ’twa/ mo, dhali hili mo mo ma, aha/ mishkina shumarum kush mo. Dhali a’di yansan jin c̱a’bki’da p̱o/ a’di mo tani gway piti yuḵu ki: A’di jin ta Isiŋ Gana/ mo dhali a’diŋ Gana/ mo, dhali e momii mii ma ḵar/e mo tani a’di dwallki gwo mo dhali kar mo/as mo be.
12 Em piti wana e ka le’dan o’d mo dhali e ’kup̱ piti mo tani aris toŋ’kup̱ ma maliḵ ’tamkunu e ’kup̱ piti mo. Dhali a’di yuḵkunu gway ka nyi’da/ nyi’da/ mo, a’di jin mola wathin ṯal ’deŋ kamu/ mo, hili a’di ki is piti imishki’d mo be.
13 A’di hi’thkunu is ki burrinyen turga/ mo jin ’thup̱kunu is ka bas mo dhali gway gi a’di jin yuḵkunu a’di mo tani a’di ita Gwo ma Arumgimis mo be.
14 Dhali aris ’kwani ma mee gi momis mo tani uni thosonkunu is ki burrinyen dhiny e mo dhali kun ta kuŋ kush mo dhali kun dheleladhelel mo, mmobaṯẖ a’di isho’k mo ki shumarum buni kun ta gi kush mo.
15 Dhali ’peni ’twam piti mo tani a’di gac̱ki gandala turga/ jin kaaka mo, a’di jin mina a’di ’kosh aris kal gi ’kwaniny’cesh mo dhali a’di midi ta tap̱a ap̱o/ uni ki cwa jin ta toŋḵuthu’d mo. Dhali a’di midi yap̱ mo jin nyu/u yimana mura’th ki sho’k mo, a’di jin ta’da nyor ma Arumgimis jin Eḵa/ Eḵ mo, anyor jin ’batha’ba’th mo.
16 E burrinyen turgam piti mo dhali e wum piti mo tani a’di c̱inu gway ka nyi’da/ nyi’da/ mo jin o ki: Amaliḵ jin ta tap̱a ap̱o/ imaliḵ mo dhali Tap̱a jin ta tap̱a ap̱o/ itap̱a mo.
17 Dhali yan’ko’d aha/ p̱arkina man’doyu gwoŋ kamu/ e mo mmodosh atente/ jin shwa’d mo dhali ki dhan ’twa/ jin caaca mo tani a’di yuḵki’da yuḵ mo goma ris ’dii ’baar mo kun p̱en isi bwaman momis mo ki: P̱eyu/ mo, dhali tulu/ is mo goma dhan tonṯe/ ma Arumgimis mo,
18 mmo’ka buŋgwar is gi imaliḵ mo, dhali buŋgwar is gi uni gun ta gummp̱a/ ki gummp̱a/ mo gom ’kwani ma mee mo, dhali buŋgwar is gi ’kwani kun eḵa/ eḵ mo, dhali buŋgwar is ma ris shumarum mo dhali imanmer uni ap̱o/ mo, dhali buŋgwar is ma ris ’kwani ’baar mo, uni gun ’kon ki ’kus mo dhali uni gun yolu ki yol c̱iŋkina/ mo, ’peni uni gun gwa’da is mo dhali uni kun cakin mo.
19 Dhali aha/ p̱arkina to/e e mo dhali imaliḵ gi mony’cesh mo nyaḵki ’kwani ma meem buni mo mmotul is mmonṯal ’de/ mo mmomii mo/as ap̱o/ a’di jin c̱a’bki’da p̱o/ shumarum mo dhali ap̱o/ ’kwani ma meem piti mo.
20 Dhali to/e a’di bu’thkunu mo dhali nyaḵka manc̱i gwonthus piti mo, a’di jin diki’d e buŋ’kus a’di mo dhali mmomii dhan jamas mii mo ki mii jin he’kkina a’di uni gwansan e mo, uni gun bu’thki jamas gi to/e mo dhali uni gwansan kun luŋki jamas piti jin uḵu mo. Dhali uni su/ gwansan mo tani uni iṯa’kkunu eya al o’d ki e mo, e mo jin mina isi pur uni ki to jin si’du ilu/ mo.
21 Dhali kun tiya ’kokunu mo mmo’kosh ki gandala turga/ mo ki a’di jin c̱a’bki’da p̱o/ shumarum mo, gandala turga/ jin gac̱ki’d ’peni ’twam piti mo, dhali aris ’dii ’baar mo komki ’pen mo gom buŋgwar is buni mo be.