1 Wakana Israyiil bu’thki moyam piti mo nyaḵka ris tom piti kun tana a’di mo dhali a’di p̱u’dki’d mo e Pam Birsaba mo dhali a’di ki c̱i to jin ’ciṯẖu/ ’kus mmomiiya basa ’cesh goma Arumgimis ma babam piti ka Is/hak mo. 2 Dhali Arumgimis ṯorki’da ṯor ka Israyiil mon’thiny ki jan mo dhali o a’di gwo mo ki: Yakuub, Yakuub. Dhali a’di oki gwo mo ki: Aha/ dina imahan mo. 3 Dhali yan’ko’d a’di oki gwo mo ki: Aha/ tana Arumgimis mo a’di jin ta’da Arumgimis ma babam pini mo. Dhalku/ is ki ḵo/ mo mmoya ka luŋgu’b bway Pa Masir mo haali/ aha/ mina di imun mo dhali kar /e mmota adhan kal caaca mo. 4 Aha/ mina ya ka luŋgu’b nyaḵki /e mo e Pa Masir mo dhali aha/ si’da/ mina doḵu/ /e pa ka nyaŋ’ko’d doḵ/e mo dhali me’d ma Yuusup̱ a’di imidi mu’th em pini mo. 5 Dhala Yakuub cuki mis mo ’peni Pam Birsaba mo dhali aris iya/ ma Israyiil uni ḵalkina Yakuub jin ta’da babam buni mo nyaḵki ushi uc̱im buni mo dhali aris up̱ buni mo eya risa arabiya kun dira shumarum mo uni kun hashkin ma P̱irawn mo mmoḵalu/ uni mo be. 6 Uni si’da/ urki to/em buni mo dhali tom ’borgam buni mo uni kun gamkina uniya du is mo e Paŋ Kanaan mo dhali uni p̱u’dkin mo e Pam Masir mo aYakuub dhali aris kum piti kun c̱isa a’di nyaḵki a’di mo be. 7 Iya/m piti dhali iya/ gi iya/m piti nyaḵki a’di mo dhali i’bwa/m piti mo dhali i’bwa/ gi iya/m piti mo, aris kum piti ’baar mo kun c̱isa a’di mo tani uni ’doyina a’di bway Pa Masir mo be.

8 Dhali aris gway gi emen ma Israyiil uni annihe/ mo uni gun p̱u’dkin e Pa Masir mo aYakuub dhali iya/m piti mo. Ra/ubiin jin ta’da bwanyara/ ma Yakuub mo. 9 Dhali gway gi iya/ ma Ra/ubiin uni annihe/ mo: Hanuuk dhala P̱allu dhala Hasruun dhala Karmi mo. 10 Dhali gway gi iya/ ma Shim/uun uni annihe/ mo: Yamu/iil dhala Yaamiin dhala Uuhad dhala Yaaḵiin dhala Suuhar dhala Sha/uul a’di jin ta ya/ ma ’bom ’Kwani Kanaan mo be. 11 Dhali gway gi iya/ ma Lawi uni annihe/ mo: Jirshuun dhala Gahaat dhala Maraari mo. 12 Dhali gway gi iya/ ma Yahuuda uni annihe/ mo: Iir dhala Unan dhala Shiilah dhala P̱aaris dhala Saarah mo (hila Iir dhala Unan uni a’di iwuyin mo e Paŋ Kanaan mo) dhali gway gi iya/ ma P̱aaris mo uni annihe/ mo: Hasruun dhala Hamul mo. 13 Dhali gway gi iya/ ma Yassaakar uni annihe/ mo: Tuulaa/ dhala P̱awwah dhala Yuub dhala Shimruun mo. 14 Dhali gway gi iya/ ma Sabuluun uni annihe/ mo: Saarad dhala Iiluun dhala Yahal/iil mo. 15 (Uni gwansan ita iya/ ma Le/ah mo uni kun dho’thkina a’diya Yakuub mo e Pam P̱addaan/araam imonṯal ’de/ nyaḵki ku gi ’bwa/ ka Diinah mo imonṯal ’de/ nyaḵki iya/m piti dhali i’bwa/m piti mo dhali mondeŋ buni ’koni iss ’de/ i’ce’dka ’kume’d i’ce’dka kwara ap̱o/ mo.) 16 Dhali gway gi iya/ ma Jaad uni annihe/ mo: Sip̱yuun dhala Hajji dhala Shuuni dhala Asbuun dhala Iiri dhala Aruudi dhala Ar/iili mo. 17 Dhali gway gi iya/ ma Ashiir uni annihe/ mo: Yimnah dhala Yishwah dhala Yishwi dhala Barii/ah nyaḵka Saarah jin ta ’bwah buni mo. Dhali gway gi iya/ ma Barii/ah uni annihe/ mo: Haabar dhala Malḵi/iil mo. 18 (Uni gwansan ita iya/ ma Silp̱ah mo a’di jin c̱ikin ma Laabaana Le/ah jin ta ’bwa/m piti mo dhali uni gwansan idho’thkin ma yima Yakuub mo, ’kwani kun ’koni ’kume’d i’ce’dka pe’de/ mo.) 19 Dhali gway gi iya/ ma Rahiil a’di jin ta asha Yakuub uni annihe/ mo: Yuusup̱ dhala Benyamiin mo. 20 Dhali goma Yuusup̱ e bampa/ Masir mo iya/ kun dho’thkunu a’di mo tani gway buni annihe/ mo: Manassa dhala Ep̱rayim uni kun dho’thkin ma Asnaat a’di mo a’di ta ’bwa/ ma P̱uthip̱aara/ jin ta’da gasiis ma Uun mo be. 21 Dhali gway gi iya/ ma Benyamiin uni annihe/ mo: Baala/ dhala Baakar dhala Ashbiil dhala Jiira dhala Namaan dhala Iihi dhala Ruush dhala Mup̱p̱iim dhala Hup̱p̱iim dhala Ard mo. 22 (Uni gwansan ita iya/ ma Rahiil mo kun dho’thkina a’diya Yakuub mo kun ta ’kwani kun ’koni ’kume’d i’ce’dka doŋon ’baar mo.) 23 Dhali gway gi iya/ ma Daan uni annihe/ mo: Hushim mo. 24 Dhali gway gi iya/ ma Nap̱taali uni annihe/ mo: Yahas/iil dhala Juuni dhala Yisr dhala Shilliim mo. 25 (Uni gwansan ita iya/ ma Bilhah a’di jin c̱ikin ma Laabaana Rahiil jin ta ’bwa/ mo dhali uni gwansan kun dho’thkin ma yim ma Yakuub mo tani ta ’kwani kun ’kon jasi pesuŋ gana/ ’baar mo.) 26 Aris ’kwani kun ta kuma Yakuub kun p̱u’dkin mo e bampa/ Masir mo tani uni ta jasi ku ki c̱isa a’di mo, yisa nyce/e ki ku ki aris up̱ gi iya/ ma Yakuub mo. Hili aris uni ’baar mo imonṯal ’de/ mo tani uni tana issi kwara i’ce’dka pe’de/ mo be. 27 Dhali iya/ ma Yuusup̱ kun dho’thkunu a’di e bampa/ Masir mo tani uni ’koni jasi su/ mo dhali aris uni ’baar mo kun ’kon e gu’b ma Yakuub mo me’d jin p̱u’dkina uni e bampa/ Masir mo tani uni ’koni issi kwara i’ce’dka ’kume’d mo be.

28 A’di hashki’da Yahuuda nṯwa/a/ ki a’di mo eya Yuusup̱ mo mmopi a’di i isi bwambor e Pan Jaasaan mo dhali uni p̱u’dkin mo e mony’cesh ma Jaasaan mo. 29 Dhali yan’ko’da Yuusup̱ thosonki’da arabiyam piti jin dira shumarum is mo dhali cu mis mo dhali ya gama Israyiil ’kup̱ mo a’di jin ta’da babam piti e Pan Jaasaan mo dhali a’di c̱iki is piti ki a’di mo dhali biṯi ’bam piti mo dhali ko e ’bam piti ki rash rash gana/ mo. 30 Israyiil oki’da Yuusup̱ gwo mo ki: Shwane/ dhalkaa/ wuna mo me’d jin mishkika/ jis/em pini mo dhali mish mo mo ki /e din ki e naskina/ mo. 31 Yuusup̱ oki ikam piti gwo mo dhali aris ’kwani ’baar mo kun ta kuŋ gu’b gi com mo ki: Aha/ mina ya mo dhali ṯora P̱irawn gwo mo dhali aha/ mina o a’di gwo mo ki: Ikam pem dhali aris ’kwani kun ta kuŋ gu’b ma babam pemi ’baar mo uni kun ’kokin e mony’cesh gi Paŋ Kanaan mo tani uni p̱u’dkini aha/ mo be. 32 Dhali ’kwani uni ita imanhil ḵa’bal mo haali/ uni ta imanhil to/e mo dhali uni ḵalkina ma’diny ḵa’bal buni ilu/ mo dhala dhana ŋul’kup̱ bip̱ buni mo dhali aris to ’baar mo kun tana uni mo be. 33 Ka P̱irawn midi yuḵ um mo dhali o gwo mo ki: Miin tom bum ta’da tinta mo? tani, 34 um mini o gwo mo ki: C̱iŋkinam pini uni ita imanhil to/e mo ’peni dhuru’c bam kun tana aman mo ntagi shwanesan mo, aman dhali ibabam bam mo, ki um mini mish ’ko mo e mony’cesh gi Pan Jaasaan mo haala ris ’kwani kun ta imanhil ḵa’bal mo tani uni ita thus ki thus e jis/e gi ’Kwani Masir mo be.