6
’Kwaniŋ Gwasi Pesu/ kun Laḵkunu mo
1 Dhali ka cim gwansan ki mondeŋu gi imanciḵ gwo ’kokunu mo mmomar is mo tani ’Kwani Yahuuda/ ’peni Paŋ Griḵi miikina gumgum ap̱o/ ’Kwani Ibraniyiin mo haali/ up̱ buni kun wuna ikaṯẖim buni mo tani miikunu ka p̱iny is mo e mo jin miinu to ka yempa/ mo.
2 Dhali uniŋ ’kume’d i’ce’dka su/ yuḵkina waambuhany imanciḵ gwo i uni mo dhali o gwo mo ki: A’di diki ’bor jin mina aman dhal gwo ma Arumgimis ’pen mo dhali miiya ṯu’c ma tharabeesa mo.
3 A’di mina um, iwaḵ pem, ilaḵ ’peni bwam um ’kwaniŋ gwas pesu/ kun maŋu mo dhali kun ’tu’du/ mo ki Shi/in mo dhali ki yuḵ si’da/ mo uni kun mina ana mish dhu uni ap̱owa ṯu’c yan mo.
4 Hili am mina roc̱ sho’k mo mmo’tho ki sule/ mo dhali mmomii gwo mo.
5 Dhali gwo yan jin onu mo tani a’di ’borki’da waambuhany ’kwani ’baar mo bwa mo dhali uni kwanykina Isṯip̱anuus mo, a’di jin ta wathi/ jin ’tu’du/ ki moŋgam gwo is mo dhali ki Shi/in mo, dhala P̱ilibbus mo dhala Puruḵuurus mo dhala Nikanuur mo dhala Ṯimuun mo dhala Parminaas mo dhala Nikula/uus jin ta Wathi/ gi Pan Anthaakiya jin bu’th gwoŋ ’Kwani Yahuuda/ mo.
6 Uni gwahan idhuna uni ibwambori imandhunu ki she/ dhali ki uni ’thokin mo tani uni dhuki me’d buni ap̱o/ uni mo be.
7 Dhali gwo ma Arumgimis caki’d mo dhali mondeŋ gi imanciḵ gwo markunu is mo e Pa Urushaliim kagahara mo dhala waambuhany igasiis caaca haki gwo yansan e jin gamu is mo.
Mo gi Bu’thkunuwa Isṯip̱anuus mo
8 Dhala Isṯip̱anuus ’tu’du/ ka ’the mo dhali ki mom’bi’th mo tani a’di miiki dhan mii kun caaca mo dhali momer si’da/ ibwaŋ ’kwani mo.
9 Hili ’kwanin tiya doshkin ’peni uni kun ta uni gi gu’b gi montul is jin yuḵu ki gu’b gi montul is gi ’Kwani Libarṯiin mo, dhali ’Kwani gi Paŋ Kerawaan mo dhali ’Kwani gi Pa Iskandariyya mo dhali ’peni uni gi Paŋ Kilikiyya mo dhali Pa Asiyya mo uni sugkin ki gwo mo uni ka Isṯip̱anuus mo.
10 Dhali uni moli roc̱ yuḵ yan mo dhali Shi/in jin ona a’di gwo mo be.
11 Dhali uni wanki ’kwani is ka ’di/ mo dhali uni gun wanu is mo tani o gwo mo ki: Am ciḵkina a’di mmowal gwo sor ap̱owa Musa dhali ap̱owa Arumgimis si’da/ mo.
12 Dhali uni ḵa/ ’kwani is mo dhali ’kwaniŋ gwanyjaḵa/ si’da/ mo dhali iman’kwar to si’da/ mo dhali uni iiyina p̱o/ a’di mo dhali bu’th a’di mo dhali sus a’di e montul is yan mo.
13 Dhali uni dhuki iman/aḵ a’di gwo i is mo uni kun o gwo mo ki: Wathi/ yan diki daḵ gwo mo mmo/o ap̱o/ mo yan jin ḵogu mo dhali gwoŋḵan jin c̱inu si’da/ mo.
14 Haali/ am ciḵkina a’di mo mmo/o gwo ka Yesus yan gi Pa Naasira midi ’ce’d mo yan sho’k mo dhali aḵ mii ma Musa e mo kun ṯora a’di ana mo.
15 Dhali uni ’baar mo kun ’kon e montul is yan mmohila uni a’di ka ’thime/ mo tani mishki bwam/em piti mo mmowakina e a’di ki bwam/e ma man’doyu gwo mo be.