9
9-ci Ǐvel mə̌ğ
Fark'alxoy dəst'in kalat'aynak'. Mut-labenen mə̌ğěğala Davidi Ǐvel mə̌ğ.
1 Va ük'en şükürezbsa, ay Q'ončux,
Vi ak'est'i möcüzoğoz bez muzel eşt'a.
2 Vi biq'i əşurxon za mǔqest'a, za q'ənəd tadi purest'a,
Vi s'iya alabala mə̌ğurxoz mə̌ğě, ay Ala Arśi Buxačux!
3 Bez düşmənxo qoşt'un t'it'eri,
Şorox Vi běš tet'un portp'i - k'as'eśi bart'undi!
4 Metəren bez əşlə Vi düzgünluğen běği,
Metəren bezi xeyirinə q'ərar c'evk'i.
Taxt'a arśi düzgün Divanbalnu Hun!
5 Azuk'xoy pulan haq'i Hun, pist'oğoy tuman əfçibi,
Şot'oğoy s'iyurxon amdarxoy eyexun həmişəluğ c'evk'est'i!
6 Düşmən uk'ala şey tene mandi,
Şot'oğoy şəhərmoğon śarpi Hun!
Şot'oğoy s'iyal duğal tene bakal ene!
7 Q'ončuğoy kalaluğ həmişəluğe,
Divanbseynak'e laxe Şot'in İz taxt'a.
8 İz düzgünluğen dünyəneynak' q'ərar c'evk'ale,
Bitot'ay loxol sa piin běğale.
9 Fağırxoynak' bač'ane Q'ončux,
İçoğoy t'ar ğine kiyexun biq'alone Şo!
10 Va çalxalt'oğoynak' umudi ganu Hun,
Va qə̌věğalt'oğo nu bosalonu Hun!
11 İz taxt'a Siona Laxit'u mə̌ğpi tərifbanan,
Azuk'xo Şot'ay biq'i əşurxo bayanbanan!
12 Axıri bari p'iya oq'a nu Efalt'in fağırxo eyexun tene c'evk'on,
Şot'oğoy xoyinša coğabsuz tene efon!
13 Ay Q'ončux, běğa düşmənxon za he ğinat'un bade!
Za gorox eki, bisuni kiyexun zapa ext'a za!
14 Barta Yerusalimi camaati běš bez mǔqluğa ak'est'az,
Barta za çark'est'una görə bitot'ay běš Vi s'iya alabaz!
15 Azuk'xo içan kašp'i kurnut'un baft'i,
İçan laxi torurxot'un ləc'üreśi!
16 Mone, Q'ončuğon İzi düzgün divanbal baksuna ak'esedi:
Pisorox t'iyə̌mint'aynak' düzbi təlinə içant'un baft'i.
17 Pist'oğoy ga oç̌alin oq'ane,
Q'ončuğo nu çalxala bito azuk'xoy axır bisune.
18 Fağıri mə̌yin ği isə həmişəluğ tene,
Əzyəti boş bakalt'aynak' umudi ga həmişə bune.
19 Hayza, Vi şu baksuna ak'est'a, ay Q'ončux!
Barta insanen hər şeyi iz kiyel nu baksuna,
Azuk'xon Vi divanbsun k'ə baksuna ak'eq'at'un!
20 Şot'oğoy pula haq'a, ay Q'ončux!
Barta içoğoy adi insan baksuna q'amişakeq'at'un.