7
7-ci Ǐvel mə̌ğ
Davidi Binyamini tayfinaxun bakala K'uşa görə Q'ončuğoynak' şiqqayonen mə̌ğěğala Ǐvel mə̌ğ.
1 Ay bez Buxačux bakala Q'ončux, Vaz bač'an tarast'a!
Bez qoşt'an baft'it'oğoy kiyel za ma tada, za şot'oğoxun çark'est'a!
2 Tene düşmənen sa aslan k'inək' za śarek'on,
İz kiyexun haq'al nu bakayin tikə-tikəne bon!
3 Ay bez Buxačux bakala Q'ončux! Əgər günax sa əş biq'ezusa,
Əgər bez kiyexun pis əş c'erenesa,
4 Zaynak' dost' bakalt'u pisluğbi
Düşmən bakalt'u isə köməybezusa,
5 Barta bez düşmənen za şəp'eśi biq'eq'an,
Barta za oç̌alen saq'an bi!
Barta bez papaq'a oq'a saki oç̌al qı̌bakayin bağalaq'an bi!
6 Ay Q'ončux, hayza! Vi əcuğoy bəc'ük'esun k'ə baksuna ak'est'a,
Bez düşmənxoy pisluğa bok'osp'i śipa!
Şip' ma çurpa, ay Buxačux,
Bezi əşlə Hun běğa, bitot'aynak' düzgün q'ərar c'evk'a!
7 Mone, azuk'xo Vi hərrəmine gireğalt'un,
Hunal alaxun, Vi taxt'e loxol arśi şot'oğoy loxol kalaluğbalnu!
8 Q'ončuğon azuk'xo divanbale!
Ay Q'ončux, Vi piin bez əşləl běğa,
Bezi təmiz, taxsırsuz baksuna ç̌oyel c'evk'a.
9 Ay düzgünt'oğoy tərəf bakala düzgün Buxačux,
Ay amdarxoy ük'ə q'a fikirə k'alk'ala Buxačux,
Pist'oğoy axıra duğa, şot'oğoy ük'e bakala fikirxo içoğoy boş efa!
10 Za q'orişalo Buxačuxe!
Şo iz ük' təmiz bakalt'oğo çark'est'alone!
11 Buxačux düzgün divanbalone,
Haq'suzt'oğoy hər ğina görə q'ərar tadalone!
12 İçoğoy tağala yaq'axun nu qaybakala pist'oğoynak'
İzi q'ılınca ğayinbalone Buxačux!
Şot'oğoynak' ox-kamana həzir biq'alone Buxačux!
13 Mone, şot'oğoy elmoğo haq'ala silaxxo İz kiyel ext'ene,
Şot'oğoy loxol tağala bok'ala oxurxo həzirbene!
14 Əfçinen iz boş tum sakalo
Pisluğa iz boş əyel taradala k'inək' taradalone.
Şot'ay me dünyəne eçaloval serinaxun ə̌xil sa şeye bakon.
15 T'iyə̌mint'aynak' kur kašk'alo
İçe t'e kurnu baft'on!
16 İz pisluğenal içune zərəl tadon,
İz biq'ala əşurxo iz bele baron.
17 Düzgün bakala Q'ončuğoy s'iyaz alabsa,
Ala Arśit'u, Q'ončuğoz tərifbsa!