62
62-ci Ǐvel mə̌ğ
Fark'alxoy kalo bakala Yedutuneynak' śameśi Davidi Ǐvel mə̌ğ.
1 Tək Buxačuğoz arxayin zu,
Zaynak' çark'esun Şot'oxun eğale!
2 Tək Şone zaynak' q'aya bakalo, bez Çark'est'al,
Şo bez bač'ane - hik'k'alen satenekon za!
3 Hevaxt' kul haq'alnan və̌n me pisluğbsunaxun?
Amdari loxol taśi
Şot'o k'os'baki barina lik't'i sakala k'inək' saksunaxun,
Barala çəpərə galdi oç̌alen sabala k'inək',
Şot'oval saki oç̌alen sabsunaxun hevaxt' kul haq'alnan?
4 İçoğoy fikir amdara piyexun saki şot'o əfçibsune,
Əfçinent'un nəfəs haq'sa şot'oğon!
Ç̌oye muč'at'un əyite,
Ük'e boş isə q'arğişt'un śiye şot'oğon!
5 Ay bez ük', Buxačuğo arxayinbaka,
Tək Şot'one bez umud.
6 Tək Şone zaynak' q'aya bakalo, bez Çark'est'al,
Şo bez bač'ane - bitezton zu!
7 Bezi çark'esunal, təmiz s'iyal Buxačuğone tast'a za,
Şone zaynak' bač'an baki za İz q'ənədi oq'a ext'alo!
8 Vi t'ar ğineyal, mǔq ğineyal Şot'o umudbaka, ay azuk'!
Şot'o ams'iba vi ük'ə,
Axıri Buxačuxe beş umudi ga.
9 İnsan hik'k'al tene,
Əfçi əyite şot'o umudbaksun!
Tərəzik'ə laxi ayzap'k'ala hik'k'al butene şot'ost'a,
C'ovaki tağala sa muşaxun avuzin tene şo.
10 Nə və̌st'a bakala zora umudmabakanan,
Nəəl başq'i girbi malaxun fərəxləyinşmabakanan!
Var-dövlət heq'ədər avuzal bakayin, ef pula k'ač'ibsa ma bartanan.
11-12 Buxačuğoy "zor Zast'ane" upsuna,
Şot'ay "Q'ončuğost'ane nu badalbakala çuresun" əyitə ibakezu.
Hərt'u iz biq'i əşlin əvəzən tast'a Hun, ay Buxačux!