39
39-ci Ǐvel mə̌ğ
Fark'alxoy kalo bakala Yedutuneynak' śameśi Davidi Ǐvel mə̌ğ.
1 Za metərez pi: «Bez əyitmoğo fikir tadoz,
Bez ǰomoxun c'eğalt'oğon za günaxa bast'una imkan tez tadal,
Pis amdarxoxun ç̌o-ç̌oya eğat'an bez muza girboz».
2 Ama bez muza efi vədine,
Lap şaat' şeye barada nu əyitk'ala vədineyal,
Dərde loxol dərde hari bezi.
3 T'e vədə bez ük'en za uksane burqi,
Fikirbi t'e ğinaz baft'i ki, ene za efes tez baki,
Bez ǰomo ə̌mbi əyitk'alaz baki, metərez pi zu:
4 «Ay Q'ončux, bezi me dünyəne sa q'onağ baksuna,
Bisunaxun nu t'it'es baksuna ak'est'a za!
Barta me dünyəni t'ǒğə nu biq'i çurpes baksuna q'amişakaz!»
5 Pula q'ic'p'i qayk'amin zap'k'ala ömüren usk'i zaynak',
Vi həmişəluğ baksuni běš hik'k'ale mo!
Sa muş k'inək'e hari c'ovaksa insani ömür, şo həgigiyal hik'k'ale.
6 Tarak'ala xoji k'inək'e insan, q'erəz hik'k'al,
Ams'i galane çabalayinşbsa,
İz girbi var-dövlət şu mandale, şot'oval avabakala şey tene sal.
7 Ay Q'ončux, ene şuxun k'əz yaq'běğes bakon zu?
Bez umudi ga saycə Hunnu!
8 Os'k'a taşa bez taxsırxo bit'ova.
Axmağxoynak' axšumi ga baksa ma barta.
9 Şip'ez çurpi zu, bez səsə tez c'evksa,
Axıri Vi tadi cazinaz zap'e zu.
10 Ə̌xilba Vi kiin tadeğala cazina zaxun,
Porttezbsa zu, şot'ay bı̌hı̌luği oq'axun c'eyes tez baksa.
11 İz biq'i əşurxoy cazinan tast'a Hun amdara,
İz taxsırxo görə bakala əzyətə zapest'at'an
İz girbit'oğoy puçbaki taysunan ak'est'a Hun şot'o.
İnsan həgigiyal hik'k'ale!
12 Ay Q'ončux, bezi xoyinša ibaka,
Bezi Va k'alpsuna coğabsuz ma efa,
Nu aksuna ma laxa bez neğ śipsuna.
Bez bavoğoxun-kalboğoxun avuzin tezu zu,
Me dünyəne sa q'onağ k'inək'ez hare zuval.
13 Bez loxol bəc'ük'eśi əcuğo bask'est'a, bez loxol běğa samal,
Barta t'e dünyəne tağamin bez ç̌oyenal axšumpeq'an.