22
22-ci Ǐvel mə̌ğ
Fark'alxoy dəst'in kalat'aynak'. Davidi "Běğ c'eğat'an c'eğala ceyran" faren mə̌ğěğala Ǐvel mə̌ğ.
1 Ay bez Buxačux, bez Buxačux, za het'aynak'en tək barti?
Het'aynak' bez t'ar ğine Va k'alk'at'an za kul ten boxost'a?
2 Ay Buxačux, Va dirist' ği k'alezne - za itenbaksa,
Üşez k'ale - p'urum sa irəətluğ tez bə̌ğə̌bsa.
3 Hun ı̌velnu,
İsrailluğoy tərifen ə̌leśi taxt'e loxol arśiyonu.
4 Beş bavoox Vat'un güvəyinşaki,
Vat'un bač'an taradi, Hunal şot'oğo kulen boxodi.
5 Vat'un köməyə k'alpi - Hunal Va p'ap'esp'i şot'oğo çark'esendi,
Vat'un umudbaki - Hunal şot'oğo ç̌omə̌yin ten efi.
6 Za isə amdari gala laxal butene, sa meq k'inək'zu zu.
Nə hörmətzax bu, nə s'i, saycə nifrəti q'ončuxzu.
7 Ak'alt'in axšumene bez loxol,
Bula ǰı̌k'p'i lağat'un haq'sa:
8 «P'oy Q'ončuğone umudbaksay?
Şot'ay piyes şaat'e ak'esasa,
Barta isə hari çark'est'eq'an ak'en».
9 Ama Hun za nanay tapanexun me dünyəne eçeriyonu,
Hələ körpə hamaq'un Vaz umud zu.
10 Nanaxun bakat'an Vi kiyel tadeśiyozu,
Hələ me işiğlu dünyəne eğamin Va Buxačuxez çalxe zu!
11 Vi kula zap'mapa zaxun,
Bələ hari bez best'a çurpene.
Za kul boxodal bakala tene!
12 Mone, düşmənxon bez hərrəminə sa sürü arak' k'inək' biq'est'ene,
Bez loxol Başani vərkər arak'xo k'inək't'un eysa.
13 İz kiyexun nu çark'es bakala,
İz ǰomo baft'alt'u śarpi śik'ala aslan k'inək't'un eysa.
14 Bez xe es'eśene,
Ǔq'enxon etenefsa za.
Bez ük'əl xebakene ene.
15 Zor tene mande zast'a, galdayin bitoz zu,
Bez muzal t'amağene ləçəq'eśe.
Mone, za tək oç̌alaxp'alane mande!
16 Pis amdarxon bez hərrəminə biq'est'ene,
Kašk'ala xə̌yox k'inək't'un eysa bez loxol,
Bez kul-turat'un hə̌fst'a şot'oğon.
17 Sa t'ol sa ǔq'ene mande bez,
Mot'o ak'iyal mǔqt'unbaksa.
18 İçoğoy arane bez paltarat'un cöybsa,
Bez paltareynak' çöpt'un bost'a şot'oğon.
19 Ama, ay Q'ončux, Hun zaxun ç̌o ma tarada!
Zaynak' bač'an bakala Buxačux, bez t'arnu p'ap'a!
20 Za q'ılıncaxun çark'est'a,
Me xə̌yoğoy ǰomo bafst'a ma barta,
21 Aslani ǰomoxun ext'a za.
Öküzxoy mǔq'oğoxunen çark'est'i za Hun!
22 Vi s'iya bez viçimoğoy běš bayanboz,
Şot'oğoy arane Vi s'iya alabi metər uk'oz:
23 «Ay Q'ončuğo çalxalorox, Şot'o tərifləyinşanan!
İak'ovi nəsil, Şot'ay s'iya alabanan,
Ay İsraili nəsil, Şot'o hörmətbanan!
24 Şot'in koruği boş bakalt'u nu aksuna tene laxi,
Şot'oxun İz ç̌oya tene taradi,
Ama şot'ay xoyinša inebaki!»
25 Bezi me gireśi viçimoğoy běš c'eysuni s'i Va tərifbsune,
Va çalxalt'oğoy běš bez niyətp'it'oğo bex p'ap'esp'oz zu.
26 Kəsibxoy boşşamin ukun bakale, şorox busa tet'un bakal,
Q'ončuğoy əyiten tağalt'oğoy ǰomoxun Şot'ay s'i tene bital!
Barta Buxačuğon ef elmoğo maq'an laft'i!
27 Oç̌ali ç̌oyel Buxačuğo eyex nu badalo, Şot'o nu çalxalo tene mandal,
Bito azuk'xon q'a tayfoğon Şot'o bul k'os'balt'un!
28 Şot'o görə ki, padçağluğ Buxačuğoy kiyele,
Şot'ine amdarxoy loxol kalaluğbsa.
29 Dövlətlut'oğon q'a şaat' ği ak'alt'oğonal Şot'o bul k'os'balt'un,
Me dünyənexun p'uri-tağalt'oğon q'a bisuni kiyexun nu çark'es bakalt'oğonal.
30 İçoğoy əyloğon Şot'o q'ulluğbale,
İçoğoxun oşa eğala nəsilen Q'ončuğoy barada exlətp'ale.
31 Nanaxun bakalt'in Şot'ay düzgünluğa q'a
Şot'ay biq'i əşurxo avabakale!