143
143-ci Ǐvel mə̌ğ
Davidi Ǐvel mə̌ğ.
1 Ay Q'ončux, bez afırına ibaka!
Ak'est'a Vi düzgünluği k'ə baksuna, za nu ibaksuna ma laxa,
Axıri tadi əyiti loxol çurk'alonu Hun, za coğab tada.
2 Me Vi k'ula divanmaba,
Şot'aynak' ki, Vi běš şuk'k'al taxsırsuz tene me dünyəne.
3 Mone düşmən hari p'anep'i,
Turin oq'a laxi ç̌axç̌uxepi za şot'in.
Zülmət bayinq'unane ext'i boseri,
Gele vaxt'in p'uri k'inək'zu həysə zu.
4 Bot'ezu bez umuda hər şeyaxun,
Çurene bez ük' ene.
5 Damna döörəst'ə baki əşurxoz eyex bast'a zu:
Vi biq'i bito əşurxoy baradaz fikirbsa,
Vi bit'oğoz bez piin běš eşt'a.
6 Bez bula alabi Vaz k'ale,
Bez cicirxone t'ǒp't'ǒpe Vaynak',
Xesuz mandi oç̌al t'ǒp't'ǒp'k'ala k'inək'.
7 Ay Q'ončux, eki p'ap'a za kul boxoda,
Ene halnuxun bizast'a!
Vi ç̌oya zaxun ma tarada,
Ma barta oç̌alin oq'a bask'i sa p'uri k'inək' bakaz!
8 Barta hər savaxt'an Vi nu badalbakala çuresuni k'ə baksuna ak'es bakaz,
Axıri Vaz umudbaksa zu.
Za bez tağala yaq'a ak'est'a,
Axıri Vi kiyele bez elmux.
9 Ay Q'ončux, za bez düşmənxoy kiyexun çark'est'a,
Köməyeynak' Vi t'ǒğǒlez eysa zu.
10 Zomba za Vi çureğalt'oğo bex p'ap'espsuna,
Axıri bez Buxačux Hunnu!
Barta Vi şaat' Urufq'an baki zaynak' yaq' qaypi za taşalo.
11 Ay Q'ončux, ak'est'a Vi şu baksuna, yəşəyinşest'a za,
Düzgün bakalonu Hun, çark'est'a za me bəlinəxun!
12 Ak'est'a Vi nu badalbakala çuresuni k'ə baksuna,
Bez düşmənxo əfçiba!
K'as'p'a śipa bez elmoğo haq'sun çureğalt'oğo,
Axıri zu Vi k'ulzu.